Matyiu 19
19
1E diyaki nonaně o Jisus a makidě ndaga těkadi, ka Mâ‐a věngěmě oviya Galili, na vala o betěbě bea Judia o mwidi ’pâkwě mua Jordan. 2Bebimba beněně be vitakidi Ma, ka Mâ‐a yongě beâ omě.
3Ka Farisi ja viya o Mâ‐a jadi, o boyějěkiyě Mâ, na, E te hohonganěngo na moto a valakidě mwad‘ ’aju na tina yěhěpi? 4A yavwanakindi, ka Mâ‐a vâ na bâ na, O ’běni langango, na, A velaki bâ o jali A velaki bâ momo na mwajo, 5ka Mâ‐a vâ, na, Yâ tina těkaně ndi ya moto e ka dikě hangwě na nyangwě, na mâ‐a ka kangalanakě na mwad‘ ’aju; na bâ babale ba ka diyaka uhoni umbâkâ? 6Ovaně vâkâna ba ’bě pě babale, kabo uhoni umbâkâ. Moto aa palwakidě pě ya Anyambě e di latěngo ta. 7Ka bâ‐ba vâ na Ju, na, Nd‘ e lě nde ya Mosěs e langwakidi na a věkwě ejanganangobo y‘ ivěngidě, na mâ‐a valudwě. 8Ka Mâ‐a vâ na bâ, na, Mosěs a bâbâkindi o valakidi bajo banyu ikabojana bebumulema beanyu be jadi bekolo; ndi yu diyaka nonaně oviya jali. 9Ndi Mbi vâki n‘ inyěni, na, Uěhěpi a ka validě mwad‘ ’aju, oningě e diya kabo n‘ inanganudwě, na mâ‐a ’la ka ba upâkwě, a hakand‘ ihonde; na uěhěpi tepě a ka bayě a di valudwěngo ně a hakand‘ ihonde. 10Beyokwedi beaju be vâki na Ju, na, E bě bwamu na o ba, oningě moto na mwad‘ ’aju ba jadi nonaně. 11Ndi A vâki na bâ, na, Bato behěpi baa nânge ndaga těkaně, kabo ba di yâ věwěngo. 12Ikabojana o na metonga meâkâ me jakudwě oviya memi ma ba nyangwě; na meâkâ me tongakwě na bato; na meâkâ me tongakě nyolo jabu mětě o nyanga ya ipangiya ja Hěvěn. A didi a yâlâkě o nângâ, a nângâke.
13Jâ ndi ja ba nděmbě ja vanwě omě o Mâ‐a jadi, nana a kahakidě makadu maju o bâ‐ba jadi na Mâ‐a kaliya; na beyokwedi beaju na kandakidě bâ. 14Ndi Jisus a vâki, na, Dikakani ba nděmbě ba vake o Umb‘ i jadi, o kandakidi bâni; ’kabojana jâ jângâ tědině ndi ja ipangiya ja Hěvěn. 15Ka Mâ‐a kahidě bâ makadu maju na věngěměkě omě.
16Umbwakiyate, umbâkâ a vakindi o Mâ‐a jadi ka vâ na Ju, na, Uyokwidi uyamu, mbi ka ha lě nja ’lombo‐ě eyamu nana mbi diye na eměnâ ya egombe yěhěpi? 17Ka Mâ‐a vâ na ju, na, E lě nd‘ eâvě e tubakě ’Mba na uyamu? o ’be na uyamu kabo ’mbâkâ, mâ ndi Anyambě. Ndi tataka belekanako, oningě o vahaka o ngiya o eměnâ. 18Ka mâ‐a vâ na Ju, na, Beve lě? Ka Jisus a vâ na ju, na, O weyake moto, O hake ihonde, O ibake, O langwanakiye evela, 19hekakidě nyângwě na hângwě, na Nâvě o ka tândâkâ moto a bakakě na nâvě pani ka nyol‘ ’âvě mětě. 20Iwanja tě i vâki na Ju, na, Mbi tatite ekabe beěhěpi oviya nděmbě ’amě; e lě pě ndi eamě e nyamakě? 21Jisus a vâki na ju, na, Kěkě ka hambidě belombo beâvě be di duwango, oningě o vahaka o diya hânjâbiyěngo, na nâvě wa vě mekuge, o ka diyi na hika o Hěvěn: na nâvě wa viya ka vitě ’Mba. 22Nd‘ iwanja tědině i kěkindi na ngěbě eitě, o mâ‐a yokaki ndaga těně: ’kabojana a diyaki na jumba iněně.
23Jâ ndi ja Jisus ja vâ na beyokwedi beaju, na, Mbi vâki n‘ inyěni pâkwěpâkwě, na, E ka diyi bokolo na moto a di kenango a ngakiya o ipangiya ja Hěvěn. 24Mbi vâki pě n‘ inyěni, na, E bobâbu na kaměl e pudunganaka ibeku ja tombo wa na moto a di kenango a ngakiya o ipangiya j‘ Anyambě. 25Beyokwedi beaju be mamakindi imama iněně, o bâ‐ba yokakidi, na, Nandi nja ka yâlě o yonga? 26Ndi Jisus a ’mbwakiyi bâ, ka Mâ‐a vâ na bâ, na, Ekae yaa haniye na bato; ndi belombo beěhěpi be ka haniyate n‘ Anyambě. 27Jâ ndi ja Pitě ja yavwana ka mâ‐a vâ na Ju, na, Umbwakiyate, ho senji beěhěpi na vitě Âvě; e lě nja ’lombo ě eahu e ka pahiyě? 28Ka Jisus a vâ na bâ, na, Mbi vâki n‘ inyěni pâkwěpâkwě, na, Inyěni ba di ’Mba vitěngo o ijawě iyânâ, o Mwana moto a ka viya ka diya o eka ya ivenda jaju, ’nyěni o ka diyate pěni o jomu na beka bebale, o yěkěkiděni jom‘ na miyâ mabale ma Israěl. 29Tepě moto uěhěpi a di senjango ndabo, tombe bana ba nyangwě, tombe maluku, tombe hangwě, tombe nyangwě, tombe mwajo, tombe bana, tombe behiki, o nyanga ya dina jamě, a ka pahiyi pě kama, na mâ‐a ka jiga tepě eměnâ ya ’gombe yěhěpi. 30Ndi baitě ba jadi ba bohoboho ba ka diyi pě o mbuhwa; na ba mbuhwa ba ka diyi pě o bohoboho.
Trenutno odabrano:
Matyiu 19: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
