Matyiu 18
18
1O yâ egombe těeně te ya beyokwedi be vakidi o Jisus a jadi, na, Nj‘ uněně wa o ipangiya ja Hěvěn? 2Ka Jisus a ndiya etumbě o Mâ‐a jadi, ka Mâ‐a tědě yâ o hanganě ’abu, 3ka Mâ‐a vâ, na, Mbi vâki n‘ inyěni pâkwěpâkwě, Wa ngiyeni o ipangiya ja Hěvěn kabo wa ’luwani, n‘ inyěni wa běni ka betumbě. 4A di boněně wa o ipangiya ja Hěvěn ndi a ka yěvidě nyol‘ ’aju uěhěpi ona etumbě těkae. 5A ka věhělidě etumbě ka ’kae yâkâ uěhěpi na dina jamě a věhělěkidi ’Mba. 6Na uehěpi a ka bevě etumbě yâkâ o betumbě tě be kamakidě ’Mba ekabe, e ndi tâmângo na mâ a tingakwě ilale i kâkânâkwě o ibâlu jaju, na mâ‐a ngilindândwě o ndiba ya manga.
7Maguga na he o nyanga ya ikâbânidě! ’kabojana e ndi na ikâbânidě i ka pândi: ndi maguga na moto u‘ ikâbânidě i vakiyě! 8Vâkâna, oningě ikadu jâvě na ba itambi jâvě ja kâbidě mâ, lenaka mâ, na nâvě wa ’hwa mâ; e ndi bwam‘ o pěl‘ ’âvě na nâvě o ngakiya o ’měnâ o děhimaka na ba yěmě, wa na o diya na makadu mabale na ba matambi mabale na nâvě wa uhwě o veya via ’gombe yěhěpi. 9Ndi tongwaka dihâ jâvě, na nâvě uhwa jâ, oningě i kâbâkě âvě: e bwam‘ na nâvě o ngakiya o ’měnâ na dihâ jâkâ wa na o diya na mihâ mabale na nâvě wa ’hwě o Hěl ya veya. 10Bandamakiděni o pějěkeni na yâkâ o betumbě tě behâlě ekabě; ’kabojana Mbi vâki n‘ inyěni, na, O Hěvěn enjěl jabu i ’mbwakiyi boho boa Paia a jad‘ oba, egombe yěhěpi. 11Ikabojana Mwana moto a vaki ka hungina e diyaki nyangango. 12O piviyaka lě na? Oningě moto a na kama ya medâmbě, n‘ umbâkâ o tango ’abu mu a lenga, aa dikaka mabo ibuwa n‘ ibuwa na mâ‐a ka kěkě o mekodi, ka vaha u di lengango? 13Mbi vâki n‘ inyěni pâkwěpâkwě, oningě ya diya nonaně na mâ‐a duwa muâ, a ka peyi na muâ wa na mabo ibuwa n‘ ibuwa ma ha lengakidi. 14Nonaně tepě u ibě upango mua Hângw‘ ’anyu a jad‘ o Hěvěn, na behâlě ekabe be pelake na yâkâ.
15Tepě, kěkě ka langwakiye mwana nyângwě bobe boaju inyi na ju babale, oningě a beviy‘ âvě; oningě a yokiyengě âvě, vâkâna o pahiyi mwana nyângwě. 16Ndi oningě aa yokiye, nângâkâ na nâvě metě umbâkâ na babale, na ovaně nd‘ o ndaga yěhěpi e ka kâmâmě o udumbu mua tali ibale na ba ilalo. 17Na, oningě aa yokiye bâ, langwakiya ba tyâtyi; nd‘ oningě aa yokiye ba tyâtyi, a ka diyaka panika moto a ha ’wě Anyambě na uyoli pago. 18Mbi vâki n‘ inyeni pâkwěpâkwě, Eanyu e ka kombiyě o he yěhěpi e ka kombwě tepě o Hěvěn; na eanyu e ka unjuwě o he yěhěpi, e ka unjwě tepě o Hěvěn. 19Mbi vâki pě n‘ inyěni, na, Oningě babale o tango ’anyu ba latingě o he opěla elombo yěhěpi eabu e ka uwě, e ka hawudwi bâ na Paia a jadi o Hěvěn. 20Ikabojana o babale na ba balalo ba di lataniyango ta o dina jamě, ovoně Mbi tepě o ngalakabo ’abu.
21Jâ ndi ja Pitě ja viya o Mâ‐a jadi, ka mâ‐a vâ, na, Upangiyi, mwanina a ka bevě lě ’mba nj‘ iningě, n‘ umba‐mba ’yidě mâ? nala njo hěmbwědi? 22Jisus a vâki na ju, na, Mba vâkâ na nâvě, na, Nala njo hěmbwědi; ndi, Kwanga nala mabo hěmbwědi njo hěmbwědi. 23Ovaně nd‘ o ipangiya ja Hěvěn e kwanakudwě upolo umbâkâ, u ’mbakidi o nângâ tango o bahayi baju ba jadi. 24O mâ‐a yalakidě o langa tango, k‘ umbâkâ a vanwě o mâ‐a jadi a diyaki mâ nuwanango jomu ja tâjen ja talěnt. 25Ndi, o mâ‐a ha diyakidi na elombo e timbakě, upangiyi muaju a sombiyakidi na a hambakwě, na mwad‘ ’aju, na bana baju, na ibeaju be diyanakidi beěhěpi, na beâ bea věwě. 26Ka uhayi tě a kwa o he, na hâhâlâkidě mâ, na, Upangiyi, ta yika ’mba, mbi ka timběte âve beěhěpi. 27Jâ ndi ja upangiyi mua uhayi tě mâ‐a ’muwa na ngěbě, ka mâ‐a unjuwa mâ, na ’yakidě mâ inwana tědině. 28Ndi uhayi těmuně a kěkindi, ka mâ‐a duwa uhayi na ju umbâkâ, a diyaki mâ nuwanango kama ya disu; ka mâ‐a bweya mâ o kingâ, na, O i ’mba nuwanango, věkě ’mba. 29Ka uhayi na ju a kwa o matambi maju, na mâ‐a ka hâhâlâkidě mâ, na, Ta yika ’mba, ’mbi ka timběte âvě beěhěpi. 30Ndi a bâbâkâ, nd‘ a kěkindi, ka mâ‐a vamidě mâ ndabo ya meboka kabo a ta vě. 31Bahayi na bâ bapâkwě ba yěněki ngěbě eitě, o bâ‐ba yěněkidi nyanga ya e hamakidi, na bâ na vaka ka languwa upangiyi muabu nyanga ya e hamakidi yěhěpi. 32Jâ ndi ja upangiyi muabu ja ndiya mâ, ka mâ‐a vâ na mâ, na, E! mot‘ ube, mbi ’yakiděnd‘ âvě inwana tě jěhěpi, ’kabojana o hâhâlâkidi ’mba; 33Wu lukaka o yěně uhayi na nâvě upâkwě ngěbě, panika umba‐mbi yěněkid‘ âvě? 34Ka upangiyi muaju a linguwa, n‘ a věkě mâ bavomwanidi kabo a ta vě e di mâ nuwanango yěhěpi. 35Nonaně tepě o Paia a jad‘ o Hěvěn e ka hayě inyěni oningě o yiděni moto uěhěpi mabe ma bana ba nyangwě banyu oviya melema meanyu.
Trenutno odabrano:
Matyiu 18: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
