kurinṯuuz al awal 1
1
aza 1
buuluz muŋw zi agani leḏi kaniiza na muŋw eca Allah zukran
1nyi, kweni buuluz, kwornuṯi Allah ṯugwor ṯi ṯuŋwun eḏorɔ kafur keḏi Yecu Kwruztu, na zuzṯaniiz, kwir eŋgeri, 2lagnaŋazi leḏi kaniiza kinani kurinṯuuz, kla lirlinelu ter eḏi Kwruztu-na kweni Yecu, lornuṯuŋw zi eḏeni luŋwun lizi li tatap leṯari yiriny yi yeḏi Kweleny kweri kweni Yecu Kwruztu ṯəmna ṯi, kezir tatap.
3eḏi ṯimeca ṯeḏi ŋimɽi nani daŋgal-na ŋiɽena ŋi ŋinḏi nani gwu Allah wir Papa kweri, na Kweleny kweni Yecu Kwruztu,
4nyi kweca Allah zukran kweni ŋaŋa ki ŋwomur tatap ŋiɽaŋal ŋi ŋeḏi ṯimeca ṯeḏi ŋimɽi ŋeḏi Allah ṯimɔŋw inḏeḏa ŋaŋwuzi eḏi Kwruztu-na kweni Yecu, 5kaka ma gwu orɔ lurṯu duŋgwun-na ki ŋiɽaŋal-na tatap, ŋir ṯilŋiiḏina na ŋuma tɔk eḏi zi ŋi andazi. 6kaka eṯi gwu ṯunḏiza tinyi ki ṯeḏi Kwruztu ruḏaḏa rerem daŋgal-na. 7ṯaŋwu, na ŋazi haḏiya weḏi Ṯigɽim tirlinelu ter ere amɽiṯaḏa kworɔ mac, əkicaŋa gwu laminu kizen, linḏi li Kweleny kweri kweni Yecu Kwruztu eḏi ruwene lu breṯ; 8kwunderṯa kwɔŋazi firlazi la mindaŋ ma ṯurmun ernine, liira kaṯiya kere ki lamin leḏi Kweleny kweri kweni Yecu Kwruztu. 9Allah wir wirlalu, wunderṯa wornuṯaḏi ŋazi ki ŋumaṯ-na ŋeḏi Tor tuŋwun teni Yecu Kwruztu, kwir Kweleny kweri.
ṯundenina ṯiti ṯizaw mac kaniiza-na
10lakin, lieŋgeri linyi, nyi kwutureca ŋazi lu tur, yiriny yi yeḏi Kweleny kweri kweni Yecu Kwruztu, mindaŋ ma eḏi ṯunyu ṯutuput. eṯere undundeni-na mac, lakin eḏorɔ-na lutuput, leḏi fikra kwutuput, na ṯugwor ṯutuput. 11kaka ilŋiiḏinenyji gwu lizi leḏi kwaw kweni kuluwi ŋeni ŋalu, liengeri linyi, laruŋw, ŋupaḏa lu ŋinani daŋgal-na. 12ŋinyi ŋenuŋw, a leṯandindazi-na daŋgal-na, eṯaruŋw: nyi kwiri kweḏi buuluz, ya nyi kwiri kweḏi abuluuz, ya nyi kwiri kweḏi zafa,#buṯruz kwecer zafa. ya nyi kwiri kweḏi Kwruztu. 13Kwruztu kwumuɽene-na? buuluz kweyze ŋazi ki ŋwuɽi la ŋwuɽmɔḏalu a? ya ŋaŋa, a libaptizina yiriny yi yeḏi buuluz a? 14nyi kweca Allah zukran kaka iti baptiza nyi kwizi kwere mac, illi nenyi keni baptazi kworu kweni kriizbuz, na gayuz tɔk. 15mindaŋ eŋgi kwizi kwere ere aruŋw mac: nyi kwubaptizina yiriny yi yeḏi buuluz. 16(emba, nenyji keni baptazi leḏi duənuŋw kwedi izṯifaanuz, nenyere elŋe kwizi kwere kwokwony mac kwumenyi baptazi.) 17kaka iti uzanyi gwu Kwruztu eḏi baptazi mac, lakin edi keni andindazi ŋiɽaŋali ŋizaw ŋeḏi injiil; ner ere orɔ ŋeḏi ŋizaṯir ŋeḏi kandiza mac, mindaŋ eḏi ŋi kwizi kwere ere mac eḏi ruzi ŋwuɽi ŋweḏi Kwruztu ŋwiira ŋuma-na.
ŋuma ŋeḏi ŋwuɽi ŋwuɽmɔḏalu ŋweḏi Yecu Kwruztu
18kaka eni gwu ta ŋiɽaŋal ŋeḏi ŋwuɽi ŋwuɽmɔḏalu ŋiḏyaki ki yey-na yeḏi kla linḏi eḏi kiraḏa lu, lakin deŋgeri-na leni linḏi eḏi kilaw, ner eni ŋuma ŋeḏi Allah. 19kaka luḏinar gwu, ŋaruŋw:
nyi kwukirazi ṯeḏinayeyna ṯeḏi kla leni leḏi yeyna ta,
enyi duruneḏa ŋizaṯira lu ŋeḏi kla leni lizaṯir.
20kwor kwende kweḏi yeyna? kwor kwende kweṯizilŋiiḏini kuruu-na? kwor kwende kwurenezina dedep ŋeḏi ṯurmun kḏu? Allah witi wimɔruzi ṯeḏinayeyna ṯeḏi ṯurmun ŋiḏyaki manya? 21kaka ki ṯeḏinayeyna-na ṯeḏi Allah, na lizi leḏi ṯurmun ere elŋece Allah ṯeḏina ṯi yeyna ṯeŋen mac, lakin eṯi Allah amina eḏi zi kileḏi kla leḏi ṯəmna ŋiɽaŋal ŋi ŋeṯir zi ruzi ŋiḏyaki ŋeṯinyjandazi. 22kaka eṯi gwu lizi lir yahuuḏ uṯalu eḏeze kwɔmne kweṯerrini kwir ŋilim, na yunaani ta, eṯir naŋnini ṯeḏinayeyna. 23lakin nyiŋa ta, eṯinyjandazi ŋeḏi Kwruztu kwuṯigreḏir ki ŋwuɽi la, ner orɔ ki yey-na yeḏi yahuuḏ ŋeṯi zi ṯugwudazi eḏorle, na ki yey-na yeḏi yunaani ner orɔ ŋiḏyaki. 24lakin ki lizi-na kla lornuṯir zi, urir gwu keni yahuuḏ tɔk, ya yunaani, Kwruztu kwiri ŋuma ŋeḏi Allah na ṯeḏinayeyna ṯeḏi Allah tɔk. 25kaka eṯi gwu ŋiḏyaki ŋeḏi Allah ṯamḏu ṯeḏinayeyna ṯeḏi lizigwunaŋ; na ṯajila nana ṯeḏi Allah, eṯuŋw ferle beṯen eḏi ŋuma la ŋeḏi lizigwunaŋ.
26lieŋgeri linyi, izarṯi keni rɔgwɽɔ ralu eḏaruŋw, nyiŋa lurti ḏa ḏa kinaŋ mer nyji gwu ornuṯa; liti luru mac leḏi yeyna ŋiɽaŋal ŋi ŋeḏi ṯurmun, liti luru mac leḏi ŋuma, liti luru mac lir leleny. 27nezi Allah eca-na leḏi ṯurmun liti leḏi yeyna mac eḏi zi ejilini ki rɔgwɽɔ kla leḏi yeyna; nezi Allah eca-na liti lifirli mac eḏi zi ejilini ki rɔgwɽɔ kla lifirli. 28Allah wumɔ zi ece-na kla leni luŋw, na luɽer zi li yey la ki ṯurmun-na tɔk, na keni kla limer zi durneḏe lu, eḏi morḏazi ŋiɽaŋali ŋeni ŋupa ŋeḏi ṯurmun, mindaŋ ner ere eḏi fayḏa kwere ḏuṯ, 29mindaŋ ma kwizigwunaŋ ere kwere mac kweḏi ŋuma eḏellini ki rɔgwɽɔ ki yey-na yeḏi Allah. 30a leṯinani eḏi Kwruztu-na, ṯugwor ṯi ṯeḏi Allah, kwumɔ Allah ruzi ṯeḏinayeyna ṯeri, nuŋw irli nyuŋwuzi lu ter ṯofḏana ṯi ṯuŋwun, elluŋw gwu nyuŋwuzi ki ŋikya-na ŋeri; 31ma kwere naŋni eḏellini, eḏuŋw ellini ŋiɽaŋal ŋi ŋeḏi Kweleny.
Trenutno odabrano:
kurinṯuuz al awal 1: KIB1967
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Nuba, Koalib Ngirere New Testament © First published by the British and Foreign Bible Society in Khartoum in 1967.