Jovane 4
4
O Isus thaj i Samarijanka
1Kana o Isus dodžanglja kaj e fariseja šunde so vov pridobil thaj krstil pobut sikaden nego o Jovane 2– iako o Isus korkoro ni krstila, nego lese sikade gova ćerena – 3đelo andari phuv i Judeja thaj irisajlo ani phuv i Galileja.
4Ko drom trubuja te načhol tari Samarija. 5Gija avilo ano samarijansko gav savo akhardola Sihar, paši phuv savi dija o Jakov pe čhavese e Josifese. 6Gothe sasa o bunari e Jakoveso. O Isus čhindilo taro baro drom thaj bešlo pašo bunari. Sasa paše dešuduj (12) o sato.
7Kana gothe avili jekh Samarijanka te dolol paj, o Isus vaćarda laće: “De ma te pijav!” 8(Tegani sasa o Isus korkoro, golese kaj lese sikade đele ano gav te ćinen xamase.)
9Vaćarda e Isusese i Samarijanka: “Sar tu, savo san Jevrejo, šaj te manđe mandar tari Samarijanka te dav tut te pije paj?” Golese kaj e Jevreja naj ano amalipe e Samarijancurencar.
10O Isus vaćarda laće: “Kana bi samo džanesa e Devleso daro! Tu ni džane ko si kova so vaćarol tuće: ‘De ma te pijav paj!’ Te džane, tu bi mandar manđesa thaj me bi dava tut paj savo dol džuvdipe.”
11I džuvli phenda lese: “Gospodarona! Naj tut ni čaro te dole o paj, a o bunari si xor. Kotar ka le paj savo dol džuvdipe? 12Tu li de gođi kaj san po baro tare amaro paradad o Jakov savo dija amen kava bunari savestar pilja vov, lese čhave thaj lesi stoka?”
13O Isus vaćarda laće: “Dži jekh savo pijol tare kava paj, palem ka trošavol. 14Al ko pijol paj savo me ka dav le, ni ka avol trošalo dži kaj si džuvdo. Paj savo me ka dav le ka avol ane leste izvor e pajeso savo ka dol le džuvdipe bizo meripe.”
15I džuvli vaćarda lese: “Gospodarona! De ma gova paj te ma trošavav vadži ni te avav kate ko bunari te dolav paj!”
16O Isus vaćarda laće: “Dža akhar ćire rome thaj iri tut akari!”
17Tegani vaćarda lese i romni: “Naj man rom.”
Tegani phenda o Isus: “Šukar phendan kaj naj tut rom! 18Golese kaj sasa tut pandž roma thaj kova so isi tut akana naj ćiro rom. Gova so vaćardan si čače.”
19I romni vaćarda lese: “Gospodarona! Dikhav kaj san proroko. 20Amare paradada slavina e Devle ke kava brego. Al tumen e Jevreja vaćaren kaj ano Jerusalim si than kaj trubul te slavil pe o Dol.”
21O Isus vaćarda laće: “Džuvlije! Pača man, kaj ka avol o vreme kaj ni ka slavin e Dade na samo kate ko brego thaj na samo ano Jerusalim. 22Tumen e Samarijancura ni džanen kas slavin. Amen e Jevreja džana kas slavi golese kaj o spasenje avol tare Jevreja. 23Al avol o vreme kana e čačukane slavljenikura ka slavin e Dade ano Duxo thaj ano čačipe. O Dad manđol gasave pačavnen. A gova vreme već avilo. 24O Dol si Duxo thaj kola save slavin le, mora te slavin le ano Duxo thaj ano čačipe.”
25I džuvli phenda lese: “Džanav kaj ka avol o Mesija, savo akhardol Hrist#4,25 “Mesija” avol taro Jevrejsko lafi, a “Hrist” taro grčko lafi, so značil “Pomazanik”. Odnosilpe pe Devleso birimo Caro savestar vaćarena e prorokura ano purano vreme.. Kana ka avol vov, sa ka objasnil amenđe.”
26O Isus vaćarda laće: “Vov akana vaćarol tusa. Me sem o Mesija.”
27Ane gova časo lese sikade irisade pe andaro foro thaj čudisajle so o Isus vaćarol e džuvljasa. Al ni jekh ni pučlja le: “So manđe latar?” il “Sose vaćare lasa?”
28Tegani i džuvli ačhada gothe po khoro, irisajli ano gav thaj vaćarda e manušenđe: 29“Aven te dičhen e manuše savo manđe vaćarda sa so ćerdem. Šaj si vov o Hrist?” 30Gija e manuša avile andaro gav thaj đele te dičhen e Isuse.
31Ane gova vreme e sikade molisade e Isuse: “Rabbi! Xa khanči!”
32Al vov phenda lenđe: “Man isi xape savestar tumen ni džanen.”
33Tegani e sikade vaćarde maškare peste: “Te ni anda lese khoni khanči xamase?”
34A o Isus vaćarda lenđe: “Mingro xape si te ćerav so si volja kolesi savo bičhalda man thaj te dovršiv lesi bući. 35Na li vaćaren kana sejin: ‘Vadži štar čhon thaj ka avol o ćidipe?’ Al me phenav tumenđe, putren tumare jakha thaj dičhen e poljura resle ćidimase.#4,35 e poljura resle ćidimase Kava si metafora savi phenol kaj e “poljura” si e manuša, a “resle ćidimase” značil kaj e manuša si spremna te prihvatin o haberi e Isuseso. 36Kova savo ćidol već prihvatil plata thaj ćidol o bijandipe pašo džuvdipe bizo meripe, te šaj radujin pe katane kova so sejil thaj kova so ćidol. 37Gija čače avol i poslovica: ‘Jekh sejil, dujto ćidol.’ 38Me bičhalav tumen te ćiden kaj ni ćerden bući. Avera trudisajle, a tumen ćidijen o bijandipe tare lenđi bući.”
E Samarijancura pačaje ano Isus
39But Samarijancura tare gova foro pačaje ane leste zbog o lafi e džuvljako savi phenda o svedočanstvo: “Vaćarda manđe sa so ćerdem.” 40Kana avile e Samarijancura paše leste, molisade le te ačhol lencar. Thaj vov ačhilo gothe duj đive. 41Tegani vadži pobut manuša pačaje zbog lese lafura.
42Vaćarde e džuvljaće: “Akana više ni pača samo zbog gova so tu vaćardan, golese kaj amen korkore šundam thaj džana kaj si čače kava manuš o Spasitelji e svetoso!”
O Isus sastarol e carose službenikose čhave
43Pale duj đive, o Isus đelo tari Samarija ani Galileja. 44Korkoro o Isus svedočisada kaj e proroko ni poštuin ano than kaj barilo. 45Kana reslo ani Galileja, e Galilejcura lačhe prihvatisade le samo golese so dikhlje sa e čudesura save ćerda ano Jerusalim, golese kaj i von sesa odori ko baro đive ki Pasha.
46Gija o Isus đelo palem ani Kana i Galilejsko, kaj sasa ćerdo o paj ani mol. Sasa jekh službeniko e caroso andaro Kafarnaum, kas sasa nasvalo čhavo. 47Kana šunda kaj o Isus andari Judeja avilo ani Galileja, đelo ke leste ani Kana thaj molisada le te avol ano Kafarnaum thaj te sastarol lese čhave golese kaj si ko meripe.
48A o Isus phenda lese: “Gasave sen tumen manuša! Dži kaj ni dičhen znakura thaj čudesura, ni pačan.”
49E caroso službeniko vaćarda lese: “Gospode! Moliv tut, av sar ni mulo mingro čhavo.”
50O Isus vaćarda lese: “Dža čhere, ćiro čhavo sastilo!”
O manuš pačaja ane Isusese lafura thaj đelo čhere.
51Kana sasa vadži ko drom, arakhlja pe kandinen save ande lese haberi kaj leso čhavo sastilo. 52Vov pučlja len kana sastilo thaj von phende lese: “Eraći ko jekh o sato ko đive ačhada le i groznica.”
53Tegani haljarda o dad kaj gova sasa ane kova sato kana vaćarda lese o Isus: “Ćiro čhavo sastilo.” Thaj pačaje vov thaj sa ane leso čher. 54Gova sasa dujto čudesno znako savo ćerda o Isus ani Galileja kana irisajlo tari Judeja.
Trenutno odabrano:
Jovane 4: GSP
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
