Jovane 5
5
O Isus sastarol ko savato ani banja Vitezda
1Pale gova sesa Bare đivesa e Jevrejenđe thaj o Isus đelo ano Jerusalim. 2Ano Jerusalim paše Bakresi kapija isi banja, savi akhardol jevrejsko Vitezda thaj gothe sesa pandž učharde terase. 3Odori pašljona but nasvale manuša, kore, banđe thaj šuće. [Von ađućarena o paj te tresil, 4golese kaj o meleko e Gospodeso uljola ano određeno vreme ani banja thaj tresila o paj. Ko angleder bi džala andre kana o paj tresila, vov bi sastola taro po nasvalipe savo sasa le.]
5Gothe pašo paj sasa jekh manuš savo tranda thaj ohto (38) berš sasa nasvalo. 6Kana o Isus dikhlja le sar pašljol, a sar džanglja kaj si but berša nasvalo, pučlja le: “Manđe li te ave sasto?”
7O nasvalo phenda lese: “Gospode, naj man khoni te mučhol man ani banja kana o paj tresil. Kana me džav premalo paj, khoni aver uljol angleder mande.”
8O Isus vaćarda lese: “Ušti, le ćiro than kaj pašljiljan thaj phir!”
9A tari jekh drom kova manuš sastilo, lija po than kaj pašlilo thaj phirda.
Al gova đive sasa savato 10golese e Jevrejska šorutne vaćarde kalese save o Isus sastarda: “Ađive si savato! Phađe o zakon, golese kaj inđare ćiro than kaj pašljiljan ko savato!”
11Al vov phenda lenđe: “Kova manuš savo sastarda man, phenda manđe: ‘Le ćiro than kaj pašljiljan thaj phir!’”
12Von pučlje le: “Ko si gova manuš savo vaćarda tuće: ‘Le ćiro than kaj pašljiljan thaj phir?’”
13Al o sastardo ni džanglja ko si, golese kaj o Isus crdija pe maškare but manuša save sesa gothe.
14Pale gova, o Isus arakhlja ane hramesi avlin kole manuše save sastarda thaj vaćarda lese: “Ak, sastiljan! Ma ćer greh vadži, te ma avol tuće pobilačhe!”
15Tegani o manuš đelo thaj vaćarda e Jevrejskone šorutnenđe kaj si gova o Isus savo sastarda le.
O Isus vaćarol kaj si vov e Devleso Čhavo
16Gija, e Jevrejska šorutne lije te progonin e Isuse golese kaj sastarda e manuše ko savato. 17Al o Isus vaćarda lenđe: “Mingro Dad uvek ćerol bući. Gija i me ćerav.” 18Gola lafura sesa povod e Jevrejskone šorutnenđe te dičhen pobut te mudaren le golese kaj na samo so phaglja o zakon taro savato, nego so e Devle čak akharol Dade thaj gija vov ćerda pe isto sar o Dol.
19Golese o Isus phenda lenđe: “Čače, čače vaćarav tumenđe: o Čhavo korkoro pestar našti khanči te ćerol, već samo so dičhol so ćerol o Dad. Sa so o Dad ćerol, gova ćerol i o Čhavo. 20Golese kaj o Dad manđol e Čhave thaj sikavol lese sa so korkoro ćerol. A ka sikavol lese i pobare buća tare kala so sastarda akale manuše, te aven zadivime i tumen. 21Golese kaj, sar so o Dad vazdol e mulen thaj dol len džuvdipe, gija i o Čhavo dol džuvdipe kase manđol. 22Golese so, o Dad khanikase ni sudil, nego dija o pravo pe Čhavese te anol o sudo, 23te bi savore poštuina e Čhave sar so poštuin e Dade. Ko ni poštujil e Čhave, ni poštujil ni e Dade savo bičhalda le.
24Čače, čače vaćarav tumenđe: ko mingre lafura šunol thaj pačal kole savo man bičhalda, isi le džuvdipe bizo meripe thaj ni ka avol osudimo nego nakhlo andaro meripe ano džuvdipe. 25Čače, čače vaćarav tumenđe: avol o sato – thaj već avilo – kana e mule ka šunen o glaso e Devlese Čhaveso thaj kola save šunen, ka aven džuvde. 26Sar so si o Dad izvor taro džuvdipe, gija pe Čhave ćerda izvor taro džuvdipe. 27Thaj dija le vlast te sudil golese kaj si Čhavo e Manušeso.
28Ma čudin tumen kalese! Golese kaj avol o vreme kana sa e mule ka šunen o glaso e Devlese Čhaveso 29thaj ka ikljen andare pumare limora – kola save ćerde šukar, ka ušten te prihvatin o džuvdipe bizo meripe, a kola save ćerde bilačhe, ka ušten te aven osudime. 30Me korkoro mandar khanči našti ćerav. Sudiv ko temelji so šundem tare mo Dad. A mingri presuda si pravedno golese so ni rodav te ćerav mingri volja, nego i volja kolesi savo bičhalda man.”
Svedočanstvura taro Isus
31“Te svedočisadem korkoro mandar, gova svedočanstvo naj dovoljno. 32Al isi jekh aver savo svedočil mandar thaj me džanav kaj si gova svedočanstvo mandar dovoljno. 33Tumen bičhalden e manušen ko Jovane o Krstitelj thaj vov svedočisada tumenđe taro čačipe. 34Manđe naj potrebno o manuš te svedočil mandar, al sa kava vaćarav tumenđe taro Jovane, te bi spasina tumen. 35O Jovane sasa sar svetiljka savi phabola thaj dola svetlost, a tumen mangljen zala vreme te uživin ane leso svetlost.
36Al man isi po baro svedočanstvo tare Jovaneso. Golese kaj e buća save dija man mo Dad te ćerav – gola čudesna znakura save akana ćerav, svedočin mandar thaj dokažin kaj bičhalda man o Dad. 37Thaj o Dad, savo bičhalda man, svedočisada mandar. Tumen nikad ni šunden leso glaso niti dikhljen leso muj. 38Leso Lafi naj džuvdo ane tumende golese kaj ni manđen te pačan ane Koleste savo bičhalda man. 39Tumen šukar sikljon e Sveta lila, golese kaj den gođi kaj šaj aračhen ane lende džuvdipe bizo meripe, a gola Sveta lila svedočin mandar. 40Al tumen ni manđen te aven mande te avol tumen džuvdipe bizo meripe.
41Me ni prihvativ slava tare manuša. 42Al me pindžarav tumen thaj džanav kaj ane tumende naj e Devleso manglipe. 43Me aviljem ano alav mingre Dadeso, a ni manđen te prihvatin man. Te avol khoni aver ane piro alav, le bi prihvatina. 44Sar šaj pačan, tumen, save prihvatin i slava jekh averestar, al i slava savi si taro jekh Dol ni roden?
45Ma te den gođi kaj me ka tuživ tumen angle mingro Dad. Tumen ka tužil o Mojsije, ane kaste čhuten tumari nada. 46Te bi čače pačana e Mojsijase, pačana bi i man. Golese kaj o Mojsije pisisada mandar. 47Al te ni pačajen kova so pisisada vov, sar ka pačan ane mingre lafura!”
Trenutno odabrano:
Jovane 5: GSP
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
