Aba Vatowo 38
38
Yuda be Temari tetelidi
1E amo tutayana goi Yuda senao ikalavedi go, isou ina koroto tayamo guma Adulam yoina Ira, e taiyao sikaaiyaka. 2E amoko goi Kenani vavinaina tayamo ivalobode, vavinayana tamana yoina Suwa guma Kenani. Tuwo sinai, taiyao simasisi 3namlieta Yuda monena ikéuwama. Ikéuwama, ivenátuna, natuna koroto ivayou Era. 4Sivayuwoina Yuda monena ikeuwamamna, ivenátuna, natuna koroto. Natunayana ivayou Onani. 5Niga Yuda mana bodao sina asa Kesiba goi sikaiyaka. Amoko goi monena sivatonina ikeuwamako, ivenátuna, natuna koroto. Natunayana ivayou Seile.
6Tuwo sikaaiyaka, sikaaiyaka, e Yuda ina botomoya Era bogina ikaitubuwaumatuwo. Tuwo Yuda itaoya, ina tayamo vavina ikabi bego Erayana monena. Vavinayana yoina Temari. 7E Erayana ina sinapu igoyo matana goi, tuwo kina Yauwe ikaumate.
8E Yuda natuna bonauyayana yoina Onani iduduwe ima. Ima Yudayana idigo kana,
‘Onani, tuwowom bogina ikámasa go, geya natunamo. Tauna ida sinapu goi kūna kobuina taiyao konāi, taiyao komasīsi bei ikéuwama. Ikéuwama, ivenátuna, natuna tuwowom ana katumapu.’#38:8 Ame sinapuyana ame nakae: Neta koroto tayamo ikámasa go, geya natunamo, e tokámasa ana gómana itoboine tuwowona kobuina taiyao sinai. Amo nakae siguinuwe bego taiyao simasisi, e kóbuya ikéuwama namlieta ivenátuna, natuna moe tokámasa ana katumapu (Atu 25:5-10).
9E Onaniyana bogina iyagoi neta nakae iguinuwe, gomanayana moe geya tauyana natuna geya. Tuwo tuta tamo tamo tuwowona kobuina imasisiye, elueluna#38:9 Elueluna: Ame Onani molona poyapoya goi ikalidaubesobeso. poyapoya goi idau besobeso. Tauna vavinayana geya itoboineyeta ikéuwama ivenátuna tuwowona manuna. 10E ame iguuinuwe Yauwe matana goi igoyo, tauna tauyana nakae kina Yauwe ikaumate.
11E tuwo Yuda yaona Temari iduduwe ima ilatuwoko ipola idigo kana,
‘Temari, kwaluvīla kūna tamam ina vada goi kwaiyāka maa kobuim ana kadókana natugu Seile ikaitubuwaumatuwo, e bei itoboinemi konai.’
Tauyana ina nuwonúwana kana, ‘Geya latuwogu natugu Seile amo vavinayana inai, govila bei ikámasa tuwowonao nakae.’ Tuwo moitamo Temari ikaluvila ina tamana ina vada goi ikaaiyaka.
12E sikaaiyaka, sikaaiyaka aaa, Yuda monena, moe Suwa natuna, ikámasa. Tuwo nuwona imou. Ina nuwomou ikavava, e siyana Ira guma Adulam taiyao sina asa yoina Timna. Amoko goi ina topaisewayao sipaaisewa, ina sipiyao unuunudi siikupoidi.
13Ago tomota sina Temari silatuwoko kadi,
‘Temari, yaom inonoina Timna bego ina sipi unuunudi ikupoidi.’
14Tuwo livalayana inove, kóbuya adi kwama ivalilivi iyato go, ituli ta kwama ilosi. Tayamo kwama ikabi maisina ivamou go, imatakipola. Ivamou ikavava, ina tayamo asa yoina Enaim. Moe Timna kenaoina goi ikaaiyaka. E ina Enaim ana kaba siu goi itusobu Yuda ituuyaosi. Ina nuwonúwana kana, ‘Yaogu ikatubaugu. Natuna Seile bogina ikaitubuwaumatuwo go, geya itagoneta kanai.’
15E iitusobu go, Yuda ima ikandobala vavinayana igite inuwonúwana kana, ‘Nakona vavina tomatagogoli.’ Bogina kuyagoi. Vavinayana maisina ivamou. 16E Yuda ivatabale ina vavinayana kikina goi idigo kana,
‘Kūma kumasisiyēgu.’
Geya iyagoiyeta bego vavinayana moe yaona Temari.
‘Gobe kaga kuvinigu?’ Temariyana kaena.
17‘ bonatuna tayamo bei aetune iwo’, Yuda kaena.
‘Konam tayamo ame tuta kuvinīgu. Niga goti kuetūne ima konamyana kutatete’, tauyana kaena.
18‘Ava konagu bei avinim?’ Yuda kaena.
‘Im mana maka#38:18 Rini mana maka: Ame dogoiyana gumogumoina go, nimaseliselina goi ivalilivi. Riniyana ana maka moe aba kinana, Yuda ina kaba kinana. Neta makayana tomota sigite, siyagoi Yuda. be im kaituko kuvinīgu’, tauyana kaena.
E tuwo moitamo konanayadi ivini. Ikavava, taiyao sina, e imasisiye, ikéuwama. 19Simasisi ikavava, Temari ikaluvila ina tamana ina vada goi. Amoko goi ana kwama ivalilivi go, kóbuya adi kwama ilosimneidi.
20E niga Yuda ina goti bonatuna tayamo ikabi, siyana Ira ivini. Ivini, ilatuwoko idigo kana,
‘Ira, ame gotiyana kwābi kunāve vavinayana kuvīni go, konaguyadi kutatetēdi.’
Tuwo ikabi ina vavinayana ilusale, geya. 21Toni kasa koroto maniyedi sikaaiyaka iigitedi ilumadadedi, kana,
‘Vavina tomatagogoli boile koneiyuwe Enaim ina kenao goi ikaaiyaka, tauyana nako ina?’
‘Geya tayaamo tomatagogoli ameni’, korotoyadi kaedi.
22Tuwo Irayana ikaluvila ina Yuda ilatuwoko, idigo kana,
‘Vavinayana alusale, geya. Toni kasa koroto amodi sikaaiyaka alumadadedi, tauyadi kadi,
“Geya tayaamo tomatagogoli ameni.”’
23E Yudayana idigo kana,
‘Tuwo kwalāve. Konaguyadi sikaaiyaka tauyana yaina, govila bei tomota sivaponuponuyeda. Goti bonatunayana boi akaatotule yaina bogina aetune ina go, vavinayana geya itoboinemta kubabane.’
24E tuwo tukówana aito mlidi, tomota sima Yuda silatuwoko sidigo kadi,
‘Yuda, yaom Temari ana ketoiya tomatagogoli nakae, koroto taiyao simasisi. Go kunōve. Masisi goyogoyoinayana goi bogina ikéuwama.’
E Yudayana idigo kana,
‘Kōna tauyana koyōisi, kōme be kogābu ikámasa!’
25E sina siyoisi go, Yuda ina be ina kaituko tomota tayamo ivini ilatuwoko kana,
‘Ame kwabīdi go, kūna Yuda kuvīni kam,
“Korotoyana boi imasiisiyegu akéuwama konana goamedi. Kom kugīte nakona itoboinem kukinane rini ame be aituko ame avatau konana?”’
26E moitamo ina Yuda ivini go, tutayana konanayadi igitedi, ikinanedi. Tuwo idigo kana,
‘Tauyana nai ana lovina ana go, yau geya unana natugu Seile avagagale tauyana yaina. Tauna tauyana lovina ana tokibóbwata.’
Tuwo Temariyana geya sigabuyeta. Ego Yuda Temari taiyao geya tuwaina simasisimna.
27E niga Temari ina tuta venátuna isowóduwo go, natunao gamona goi lalavi sikaaiyaka. 28E iivenátuna go, mainao gómana tayamo nimana isowóduwo. E tovaita búyala kayakayaina ikabi, gomanayana nimakituna goi isiko. Isiko ikavava, idigo kana,
‘Ame tauyana igimisowóduwo.’
29Ego gomanayana nimana ivaisiumnei go, siyana isowóduwo. E tovaitayana idigo kana,
‘Siyam kuvatupuwe bego kom kugimisowóduwo?’
Tuwo gomanayana sivayou Peresi.#38:29 Peresi: Ame youyana ana yagoina moe vatupúwana (Rut 4:12,18; Mad 1:3). 30Peresi isowóduwo ikavava, ana gómana, tauyana nimana goi búyala kayakayaina ikaaiyaka isowóduwo go, tauyana sivayou Serako.#38:30 Serako: Ame youyana ana yagoina moe kayakayaina o mavada.
Trenutno odabrano:
Aba Vatowo 38: GVS
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2019, Wycliffe Bible Translators, Inc. All rights reserved.