Aba Vatowo 39
39
Iyosepa be Potipari monena tetelidi
1E kina go Iyosepayana Isimaeli tubunao nimadi goi ikaaiyaka. Tuwo tauyana sinave Itipita goi go, ina tovakumgo tayamo yoina Potipari#Abv 37:36; 40:2-4. guma Itipita igimone. Potipariyana moe Pero ina deri ana toyausayao adi tokalikumatana. 2Go kina ivaakitau,#Gui 7:9. tauna ina vaita goi Iyosepa ina paisewayana madabokina kikiboda. Tuwo ina tomoya Potipari ina vada goi ikaaiyaka. 3Ikaaiyaka go, ina tomoyayana bogina igite bego Yauwe ivaakitau, tauna ina vaita goi kaga liliuna Iyosepa nimana goi kina Potipari iyatoyato, madabokina ikibode. 4Tuwo Potipari ina kanuwóiya ibabane. Tauyana idigo kana,
‘Iyosepa, tuta ame goi avayokoim kom tomatakavata. Guna vada be nakae konagu liliudi kumatakavatēdi unana anumisem.’
5E tutayana ivayoko kina Iyosepa moe ina vada be konana liliudi adi tomatakavata, e tauyana pasina Yauwe Potipari guma Itipita . Tauna ana dedevina ibabane. 6Tuwo Potipari konana liliudi be ina vada ana rugwáuta Iyosepa nimana goi iyatoidi. Tauna dogoiyadi manudi geya inuuwonúwana geya. Go kina tauna, áika tayamo toito.
E Iyosepa koroto gumaboina nakae ana bíbina dedevina. 7Tauyana ipaaisewa ina tomoya Potipari ina vada goi go, Potipariyana monena ikandobala Iyosepayana igite koroto gumaboina, tauna ivakone. E tuta tayamo ina ilatuwoko idigo kana,
‘Iyosepa, kūma kumasisiyēgu.’
8Go kina Iyosepayana ikatae, idigo kana,
‘Geya. Kunōve. Yau pasigu guna tomoya geya inuuwonúwana geya kaga liliuna ina vada sinaena manudi. Konana liliudi nimagu goi iyatoidi. 9Yau aguta vada ame goi toolagaigu. Geya vatau tayaamo ikalisavegu. Guna tomoyayana geya kada tayaamo konana ivagagalakoigu geya, go sem kom monena amta ivagagalem yau yaigu. Tauna geya itoboineguta moe dogoiyana goyogoyoina aguinuwe guna tomoya yaina. Moe nakae goyo aguinuwe Yaubada matana goi.’
10Ego maliyalina tamo tamo Iyosepayana ilumaakikine kana,
‘Iyosepa, kūma kumasisiyēgu.’
Go kina Iyosepayana ikatae, tuwo geya itagoneta bei imasisi tauyana taiyao.
11E tuta tayamo Iyosepa isiu Potipari ina vada goi bego ipaisewa go, vadayana sinaena geya tayaamo vada ana topaisewa ikaaiyaka geya. 12Tuwo vavinayana ima ibisibala Iyosepayana ana kwama iyoisi, idigo kana,
‘Kūma kumasisiyēgu!’
Go Iyosepayana ana kwama ikalave, vadayana goi ilokoinaodo, isiya. 13Go kina vavinayana ikandosobu nimana goi kwamayana igite, 14tuwo ina iduduwedi sima, ipola kana,
‘Kogīte! Ame monegu ime bego ida vada imatakavate go, ikaiwotetegu. Maine isiu ima iyoisigu latuwona bego imasisiyegu go, apodeda. 15Go tutayana guna podedayana inove imatoita, e ana kwama kikigu goi ikalave go, ilokoinaodo isiya.’
16Tuwo kwamayana kikina goi iyato irugwausi ana kadókana Iyosepa ana tomoya ikaluvila. 17Tutayana tauyana ikaluvila ima, e kina vavinayana ilatuwoko idigo kana,
‘Amo im pákwana guma Iberiu boi kumememe yaima goi maine isiu ima iyoisigu bego imasisiyegu. 18Go tutayana apodeda, e ana kwama kikigu goi ikalave go, ilokoinaodo isiya. 19E ame nakae im pákwana iguinuwe yaigu.’
E tutayana Potipari monena idigo kana, ‘Ame nakae im pákwana iguinuwe yaigu’, Iyosepa ina tomoya inove, gamona igoyo toina. 20Tauna deri ana torugwautayao ilatuwokoidi kana,
‘Kōna Iyosepa koyōisi, deri goi kovaisīu.’
Tuwo nakae siguinuwe. Ego deriyana moe Pero, da Itipita adi tolovina, ina deri moe toogoyoidi manudi neta Peroyana yaina siguinuwa goyogoyo.
Tuwo Iyosepayana deri goi ikaaiyaka go, 21Yauwe ivaakitau be nakae ikuubunuwe.#Gui 7:9. Nakae Yauwe ina guinuwa pasina deri ana tolovina nakae Iyosepa ikanuuwoiye. 22E tuwo tolovinayana idigo kana,
‘Iyosepa, avayokoim kom deri ana tokaiyakoyao adi tovakumgo. E nakae guinuwa liliudi deri goi kom kumatakavatedi.’
23Tuwo kaga liliuna Iyosepa nimana goi sikaaiyaka nakae imatakaavatedi, e manudi tolovinayana geya inuwonuwoneta. Bogina kuyagoi. Yauwe Iyosepa ivaakitau, tauna Yauwe pasina Iyosepayana ina paisewa madabokina kikiboda.
Trenutno odabrano:
Aba Vatowo 39: GVS
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2019, Wycliffe Bible Translators, Inc. All rights reserved.