Luke 9
9
Sa Talai Iratou na Tisaipeli e Tinikarua ko Jisu
(Maciu 10.5-15; Marika 6.7-13)
1Sa qai kacivi ira mai na nona tisaipeli e lewe tinikarua me ra soqoni vata, a sa solia vei ira na lewe kei na kaukauwa vei ira kecega na tevoro, me ra vakabula talega na mate; 2a sa talai ira ko koya me ra vunautaka na matanitu ni Kalou, ka vakabulai ira sa tauvi-mate. 3A sa kaya vei ira ko koya, “Kakua ni kauta e dua na ka e gaunisala, me kua nai titoko, se na taga ni vaqa, se na madrai, se nai lavo—se me yarua na nomudou kote. 4Ia na vale kecega dou na curu kina, dou tiko ga kina, ka cavu tu yani mai kina. 5#Caka 13.51#Luke 10.4-11Ia ko ira vakaaduaga ena sega ni vakacegui kemudou, ni dou sa lako tani e na koro ko ya, kureitaka sara na kuvu-ni-soso mai na yavamudou, mei vakatakilakila vei ira.”
6A ra sa lako yani, ka lako ki na veikoro lalai, ka vunautaka nai tukutuku-vinaka, ka ia na veivakabulai e na veiyasana kecega.
Na Veilecayaki i Eroti
(Maciu 14.1-12; Marika 6.14-29)
7 #
Maciu 16.14; Mari 8.28; Luke 9.19 A sa rogoca ko Eroti na turaga na ka kecega sa caka: a sa kidroa kina, ni sa kaya eso, Sa tucake tale mai na mate ko Joni, 8ka so, Sa rairai mai ko Ilaijia, ka so tale, Sa tucake tale e dua vei ira na parofita eliu. 9A sa kaya ko Eroti, “Au a tamusuka na ulu i Joni, ia ko cei beka oqo ka'u sa rogoca kina na veika vakaoqo?” A sa via raici koya.
Sa Vakani Ira na Lewe Lima na Udolu ko Jisu
(Maciu 14.13-21; Marika 6.30-44; Joni 6.1-14)
10Ia ko ira nai apositolo, ni ra sa lesu tale mai, era sa tukuna vua na ka kecega era sa kitaka. A sa kauti ira ko koya, ka lako vakatikitiki ki na dua na vanua galala sa voleka ki na koro ka yacana ko Pecisaita. 11Ia ko ira na lewe vuqa, ni ra sa kila, era sa muri koya; a sa vakacegui ira ko koya, a sa vosataka vei ira na ka ni matanitu ni Kalou, a sa vakabulai ira era sa sega ni bula vinaka.
12Ia ni sa kala na siga, sa lako mai ko ira na lewe tinikarua, ka kaya vua, “Vakatalai ira tani na lewe vuqa, me ra lako ki na veikoro lalai kei na veiyasana sa vakavolivoliti keda, me ra moce, ka qara na kedra; ni da sa tiko eke e na vanua vagalala.” 13A sa kaya vei ira ko koya, “Dou solia vei ira me ra kana.” A ra sa kaya, “Sa sega na ka vei keitou, e lima walega nai buli madrai kei na rua na ika—ka vakavo kevaka me keitou laki voli kakana me kedra kecega na lewe vuqa oqo.” 14Ni ra sa lewe lima beka na udolu na tagane. Ka sa kaya vei ira na nona tisaipeli ko koya, “Dou raici ira me ra dabe sobu me rauta ni tau ya limasagavulu e na veiwasewase yadua.” 15A ra sa kitaka vakakina, ka ra vakatikori ira sobu kecega. 16Sa qai taura ko koya nai buli madrai e lima kei na ika e rua, a sa ta cake ki lomalagi, ka lotutaka, ka dovia, ka solia vei ira na tisaipeli me ra tauca vei ira na lewe vuqa. 17A ra sa kana, ka sa mamau kecega. A sa tomitomiki vata na vo ni kedra, a sa tinikarua nai su.
Na Ka e Tusanaka ko Pita me Baleti Jisu
(Maciu 16.13-19; Marika 8.27-29)
18A sa tiko duaduaga ko Jisu ka masu, ka tiko vata kaya ko ira na tisaipeli. A sa tarogi ira ko koya, ka kaya, “Era sa kaya ko ira na tamata se ko cei koi au?” 19#Maciu 14.1,2; Mari 6.14,15; Luke 9.7,8A ra sa vosa, ka kaya, “Ko Joni na dauveipapitaisotaki; ia ka so, era kaya, ko Ilaijia; ia ka so tale era kaya, ni sa tucake tale mai e dua vei ira na parofita e liu.” 20#Joni 6.68,69Sa qai kaya vei ira ko koya, “Ia na cava dou sa kaya koi kemudou se ko cei koi au?” Sa vosa ko Pita, ka kaya, “Na Mesaia#9.20 Se Na Karisito ni Kalou.”
Sa Tukuna ko Jisu na Nona Vakararawataki kei na Nona Mate
(Maciu 16.20-28; Marika 8.30—9.1)
21A sa vakadreta vei ira ko koya, ka vakarota me ra kakua ni tukuna na ka oqo vua e dua, 22ka sa kaya, “Sa kilikili kaya na Luve ni Tamata me vosota na ka e vuqa, me ra biuti koya talega ko ira na qase, kei ira na bete levu, kei ira na vunivola, ka me vakamatei ko koya, ka vakaturi cake tale mai e nai katolu ni siga.”
Colata na Nomu Kauveilatai ka Muri Jisu
23 #
Maciu 10.38; Luke 14.27 A sa kaya vei ira kecega, “Kevaka e dua sa via muri au, me kakua ni muria na lomana, ia me colata ga na nona kauveilatai e na veisiga, ka muri au. 24#Maciu 10.39; Luke 17.33; Joni 12.25Ia ko koya yadua sa via maroroya na nona bula, ena vakayalia; ia ko koya ena vakayalia na nona bula e na vukuqu, ena maroroya. 25Ia ka cava na kena yaga vua na tamata, kevaka e rawati vuravura kece, ka vakayali koya vakai koya ga, se sa biu tani? 26Ia ko koya yadua ena maduataki au kei na noqu vosa, ena maduataki koya na Luve ni Tamata, ni na lako mai e na nona i ukuuku, kei nai ukuuku nei Tamana, kei na nodra i ukuuku na agilosi yalosavasava. 27Ia ka’u sa kaya vakaidina vei kemudou, sa tu ga eke eso era na sega mada ni mate, era na raica eliu na matanitu ni Kalou.”
Sa Matalia nai Rairai kei Jisu
(Maciu 17.1-8; Marika 9.2-8)
28Sa oti na vosa oqo ka bogi walu beka, sa qai kauti Pita kei Joni kei Jemesa ko koya, ka lako cake ki na ulunivanua me masu. 29Ia ni sa masu tiko ko koya, sa matalia na matana, a sa vulavula ka lumilumisa na nona i sulu. 30Ka raica, e le rua na tamata sa veivosaki kaya, koi rau ko Mosese kei Ilaijia; 31erau sa rairai mai e nai ukuuku, ka rau vosataka na nona ciba ena vakayacora ko koya mai Jerusalemi. 32A sa biti Pita kei rau ka tiko kaya na via moce; ia ni ratou sa yadra sara, eratou sa raica na nona i ukuuku, kei rau na tamata eratou sa tu vata kaya. 33Ia ni rau sa lako tani tiko vua, sa kaya vei Jisu ko Pita, “Kemuni na Turaga, sa vinaka na nodatou tiko eke. Ia me keitou tara e tolu na vale vakacevaceva, e dua me nomuni, ka dua me nei Mosese, ka dua me nei Ilaijia”—sa sega ga ni kila na ka sa kaya. 34Ni sa vosa tiko vakaoqo, sa dua na o sa lako mai, ka vakarurugi iratou, ka ratou sa rere ni ratou sa curu ki na o. 35#Aisea 42.1; Maciu 3.17; 12.18; Mari 1.11; Luke 3.22A sa rogo e dua na vosa mai na o, ka kaya, “Oqo na Luvequ, na noqu Gone ni toko; dou rogoci koya!” 36Ia ni sa oti na vosa, sa kune duaduaga ko Jisu. A ratou sa vunia ga, ka sega ni tukuna vua e dua e na gauna ko ya e dua na ka eratou a raica.
Sa Vakabula ko Jisu na Gone Tagane Curumi Tevoro
(Maciu 17.14-18; Marika 9.14-27)
37Ia e na mataka, ni ratou sa lako sobu mai na ulunivanua, era lewe vuqa sara sa veitavaki kaya. 38Ka raica, sa dua vei ira na lewe vuqa sa kaci cake, ka kaya, “Vakavuvuli, au masuti kemuni, mo ni mai raica na luvequ-tagane; ni sa luvequ e dua bauga. 39Ka raica, sa dua na yalo sa tauri koya a sa qoqolou vakasauri kina. A sa bitabitalaki koya, ka sa qai tuburaki vuso, a sa vakamavoataka ka dredre ni lako tani vua. 40Ka’u a masuti ira na nomu tisaipeli me ra vakasevi koya tani, ia era sa sega ni rawata.” 41A sa vosa ko Jisu, ka kaya, “Ai tabatamata sa sega ni vakabauta ka yalo vakatani! A cava na kena dede me’u tiko kei kemudou, ka vosota voli kei kemudou? Kauta mai ki ke na luvemu.” 42Ia ni sa lako tiko mai ko koya, sa vakabalea na tevoro, ka bitabitalaka. A sa vunauca na yalo velavela ko Jisu, a sa vakabula na gone, a sa solia tale vei tamana. 43A ra sa kurabui kecega e na kaukauwa levu ni Kalou.
Tukuna Tale ko Jisu na Ka e Baleta na Nona Mate
(Maciu 17.22-23; Marika 9.30-32)
Ia ni ra sa kurabui kecega e na vuku ni ka kecega sa cakava ko Jisu, sa kaya vei ira na nona tisaipeli ko koya, 44“Me kasa sara ki na daligamudou na vosa oqo: ni na soli yani na Luve ni Tamata ki na ligadra na tamata.” 45Ia era sa sega ni kila na vosa ko ya; sa vuni vei ira, ka ra sa lecava. Ka ra sa rere ni tarogi koya e na vosa ko ya.
O Cei e Uasivi Cake?
(Maciu 18.1-5; Marika 9.33-37)
46 #
Luke 22.24
Sa qai tubu vei ira na veileti, se ko cei vei ira ena uasivi cake. 47Ia ni sa raica ko Jisu na nanuma ni yalodra, sa kauta e dua na gone lailai, ka vakatura e tikina, 48#Maciu 10.40; Luke 10.16; Joni 13.20a sa kaya vei ira, “O koya yadua sa vinakata na gone lailai oqo e na vuku ni yacaqu sa vinakati au, ia ko koya yadua sa vinakati au, sa vinakati koya sa talai au mai. Ni na uasivi cake ko koya sa lailai sara vei kemudou kecega.”
Sa Noda i To ko Koya sa Sega ni Noda Meca
(Marika 9.38-40)
49Sa qai vosa ko Joni, ka kaya, “Kemuni na Turaga, keitou sa raica e dua sa vakaseva tani na tevoro eso e na yacamuni; ka keitou sa tarova, ni sa sega ni muri keda.” 50A sa kaya vua ko Jisu, “Kakua ni tarova, ni sa noda i to ko koya sa sega ni noda meca.”
E Sega ni Vakacegui Jisu e Dua na Koro vaka-Samaria
51Ia ni sa yaco dina na gauna me kau cake kina ko koya, sa vaqara matua na matana me lako vaka ki Jerusalemi. 52A sa tala eso na tamata me ra liu e matana. A ra sa lako ka curu ki na dua na nodra koro lailai na kai Samaria, me ra vakarautaka na kena. 53A ra sa sega ni ciqomi koya, e na vuku ni sa vakanamata tiko vaka ki Jerusalemi. 54#2Tui 1.9-16Ia ni sa raica oqo koi rau na nona tisaipeli ko Jemesa kei Joni, erau sa kaya, “Na Turaga, ko ni sa vinakata me keirau kaya me lutu sobu mai lomalagi na bukawaqa, me vakamai ira?” 55A sa vuki ko koya, ka vunauci rau, ka kaya, Drau sa sega ni kila nai valavala ni yalomudrau. 56Ni sa sega ni lako mai na Luve ni Tamata me vakamatei ira na tamata, me vakabulai ira ga. A ra sa lako ki na dua tale na koro lailai.
Ko Ira Era Via Muri Jisu
(Maciu 8.19-22)
57Ia ni ra sa lako tu e na sala, sa dua e kaya vei koya, “Kemuni na Turaga, au na muri kemuni ki na veiyasana kecega ko ni na lako kina.” 58Sa qai kaya vua ko Jisu, “Sa vaqara na fokisi, ka sa vakairoro na manumanu vuka; ia na Luve ni Tamata sa sega na nona tikina me vakadavora kina na uluna.” 59A sa kaya ko koya vua e dua tale, “Muri au.” A sa kaya ko koya, “Kemuni na Turaga, laivi au me’u lako mada ka buluti tamaqu.” 60A sa kaya vua ko Jisu, “Biuta na mate me ra buluta na nodra mate; ia ko iko, mo laki vunautaka na matanitu ni Kalou.” 61#1Tui 19.20A sa kaya e dua tale, “Kemuni na Turaga, au na muri kemuni; ia mo ni biuti au ga me’u lako mada me’u veitatau vei ira mai neitou.” 62A sa kaya vua ko Jisu, “E sega e dua na tamata sa taura nai siviyara ka qai rai ki muri, me yaga e na matanitu ni Kalou.”
Trenutno odabrano:
Luke 9: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
