Luke 8
8
Ko Iratou na Yalewa Dau Sala Vata kei Jisu
1Sa oti, sa qai lako voli e muri ko koya e na veikoro kecega kei na veikoro lalai kecega, ka vunau, ka tukuna nai tukutuku-vinaka ni matanitu ni Kalou; kei ira vata kaya na lewe tinikarua, 2#Maciu 27.55,56; Mari 15.40,41; Luke 23.49kei na yalewa eso, sa vakabulai oti mai na yalo ca eso ka curumi ira kei na malumalumu, ko Meri sa vakatokai na yalewa ni Makitala, sa lako tani oti vua e vitu na tevoro, 3kei Joana na wati Kusa na vakailesilesi nei Eroti, kei Susana, ka lewe vuqa tale, era sa qaravi koya e na nodra i yau.
Na Vosa Vakatautauvata ni Daukabukaburaki
(Maciu 13.1-9; Marika 4.1-9)
4Ia ni sa lewe vuqa sara era sa soqoni vata, ka sa lako mai vei koya mai na veikoro, ka sa tukuna na vosa vakatautauvata oqo ko koya: 5“Sa dua na dauteitei sa laki kaburaka na nona sore ni sila; ia ni sa kaburaka lako, sa lutu eso e na tutu ni sala; a sa butubutuki sobu, a ra sa mai kania na manumanu vuka. 6A sa lutu eso ki na vatu; a sa tubu cake, ka qai raqosa sara, ni sa sega ni suasua. 7A sa lutu eso ki na loma ni veiwa-vakavotona; a sa tubu cake kaya na veiwa-vakavotona, ka vakaruguta. 8A sa lutu eso ki na vanua vinaka, a sa tubu cake ka vuataka e drau na vuana.” Ni sa vosataka oti ko koya na veika oqo, sa kacivaka, “O koya sa vakadaligana me rogoca, me mani rogoca sara.”
Na Kedra i Naki na Vosa Vakatautauvata
(Maciu 13.10-17; Marika 4.10-12)
9A sa tarogi koya ko ira na nona tisaipeli, ka kaya, A cava beka nai balebale ni vosa vakatautauvata oqo? 10#Aisea 6.9A sa kaya ko koya, “Sa soli vei kemudou mo dou kila na veika vuni ni matanitu ni Kalou; ia sa nodra ga na tani na vosa vakatautauvata;
‘me ra raica ka sega ni raica,
ka rogoca ka sega ni kila.’
Sa Vakamacalataka ko Jisu na Vosa Vakatautauvata ni Daukabukaburaki
(Maciu 13.18-23; Marika 4.13-20)
11 “Ia na vosa vakatautauvata sa vakaoqo: A sila, na vosa ni Kalou. 12Ia ko ira era vaka na tutu ni sala, ko ira era sa rogoca; sa qai lako mai na tevoro, a sa kauta tani na vosa mai na yalodra, de ra vakadinata ka bula kina. 13Ia ko ira era vaka na vatu, sai ira sa rogoca, ka vakabauta na vosa e na reki; ia sa sega na wakadra, a ra sa vakadinata vakadede vakalailai ga, ia ni sa yaco na gauna ni dauveretaki era sa bale tale. 14Ia ko koya sa lutu ki na veiwa-vakavotona, sai ira era sa rogoca, a ra sa lako yani, a ra sa vakaruguti e na lomaocaoca kei nai yau kei na marau ni bula, oqo a sa sega kina ni vua dina. 15Ia ko koya e na vanua vinaka, sa vakai ira era sa yalodina ka vinaka, a ra sa rogoca na vosa, ka taura deivaki, ka vakavuana tikoga.
Na Cina ena Ruku ni Bilo
(Marika 4.21-25)
16 #
Maciu 5.15; Luke 11.33 “Sa sega na tamata sa tutuvaka na cina, ka qai laki ubia e na rubu, se viritura e ruku ni mocemoce; sa viritura ga e na kenai tutu, me ra raica na kena rarama ko ira sa curu mai. 17#Maciu 10.26; Luke 12.2Ni sa sega e dua na ka sa vuni, me sega ni vakarairaitaki; se tabogo, me sega ni kilai se vakavotui mai. 18#Maciu 25.29; Luke 19.26O koya mo dou qai qarauni kemudou e na ka dou rogoca; ni kevaka sa tu na ka vua e dua na tamata, ena qai soli vakalevu tale vua; ia na tamata sa sega ni tu vua e dua na ka, ena qai kau tani mai vua na ka sa nanuma sa tu vua.”
Na Tina i Jisu kei Iratou na Tacina
(Maciu 12.46-50; Marika 3.31-35)
19Sa qai lako mai vua na tinana kei iratou na tacina, a ratou sa sega ni toro rawa vua e na vukudra na lewe vuqa. 20A sa tukuna vua ko iratou eso, ka kaya, “Sa tu e tautuba na tinamu kei iratou na tacimu, eratou sa via raici iko.” 21A sa vosa ko koya, ka kaya vei ira, “A tinaqu kei na taciqu ko ira oqo era sa rogoca na vosa ni Kalou, ka cakava.”
Sa Vakamaravutaka na Cava ko Jisu
(Maciu 8.23-27; Marika 4.35-41)
22Ia sa dua na siga oqori, sa vodoka ko koya e dua na waqa, kei ira talega na nona tisaipeli; a sa kaya vei ira ko koya, “Tou lako ki tai kadua ni drano.” A ra sa lako yani. 23Ia ni ra sa soko, sa moce ko koya; a sa lako sobu mai na cava e na drano; a ra sa luvu tiko, ka voleka ni mate. 24A ra sa lako mai ka vakayadrati koya, ka kaya, “Kemuni na Turaga, Kemuni na Turaga, eda sa mate.” Sa qai tucake ko koya, ka vunauca na cagi kei na wai cudrucudru; ka rau sa cegu kina, a sa qai maravu sara. 25A sa kaya vei ira ko koya, “Evei na nomudou vakabauta?” A ra sa rere ka kurabui, ka veikayaka vakai ira, “Ko cei beka oqo; sa vakarota na cagi kei na wai, a rau sa talairawarawa vua?”
Sa Vakabula ko Jisu na Tamata Curumi Tevoro
(Maciu 8.28-34; Marika 5.1-20)
26A ra sa udu ki na nodra vanua na kai Katara, sa donui Kalili. 27Ia ni sa sobu ki vanua ko koya, sa sota kaya e dua na tamata mai na koro, sa tiko vakadede vua eso na tevoro, a sa dau sega ni vakaisulu, se tiko e vale, ia e nai bulubulu ga. 28Ia ni sa raici Jisu, sa qoqolou cake, ka cuva sobu vua, ka kaya e na domo levu, “A cava vei kedaru, i Jisu na Luve ni Kalou Cecere Sara? Au sa vakamasuti kemuni, mo kakua ni vakararawataki au.” 29Ni sa kaya oti ko koya vua na yalo velavela me lako tani vua na tamata. (Ni sa dau curumi koya wasoma, a sa vesu tiko ko koya e na sinucodo kei nai vesu me tauri kina; ia sa musulaka nai vesu, ka sa dau vakauti koya na tevoro ki na vanua lala.) 30A sa tarogi koya ko Jisu, ka kaya, “Ko cei na yacamu?” A sa kaya ko koya, “Ko Vavakoso;” ni ra sa lewe vuqa na tevoro ka curuma. 31A ra sa masuti koya me kakua ni kaya vei ira me ra lako yani ki bulu.
32A sa dua na qele-ni-vuaka levu sa kana voli e na ulunivanua; a ra sa masuti koya me laivi ira me ra curumi ira. A sa laivi ira ko koya. 33Era sa qai lako tani mai vua na tamata ko ira na tevoro, a ra sa curumi ira na vuaka ka ra sa cici sara na qele-ni-vuaka e na baba ki na drano, ka ra sa luvu.
34Ia ko ira sa vakania, ni ra sa raica na ka sa caka, era sa dro ka laki tukuna e na koro kei na veiyasana ki vanua. 35A ra sa qai lako yani me ra raica na ka sa caka, ka ra sa yaco vei Jisu ka kunea na tamata sa lako tani vua ko ira na tevoro, ni sa tiko ki na yava i Jisu, ka sa vakaisulutaki, ka yalomatua. A ra sa rere. 36Ko ira talega era raica, era sa tukuna vei ira na ka sa bula kina ko koya ka curuma eliu ko ira na tevoro. 37Sa ra qai masuti koya ko ira kecega na lewe ni yasana ko Katara me lako tani vei ira, ni sa kani ira na rere levu. A sa vodoka na waqa ko koya, ka lesu tale yani. 38Na tamata ka lako tani vua na tevoro sa qai masuti koya me laivi koya me rau tiko vata kaya, ia sa vakatalai koya yani ko Jisu, ka kaya, 39“Mo lesu ki na nomu vale, ka tukuna na levu ni veika sa cakava vei iko na Kalou.” A sa lako ko koya, ka tukuna ki na koro taucoko ko ya na levu ni veika sa cakava vua ko Jisu.
Na Luve i Jairo Yalewa kei na Yalewa Turudrabalavu
(Maciu 9.18-26; Marika 5.21-43)
40Ia ni sa lesu tale ko Jisu, era sa veitavaki vei koya ko ira na tamata, ni ra sa waraki koya ko ira kecega. 41Ka raica, sa dua na tamata ko Jairo na yacana, e dua na turaga ni valenilotu, sa lako mai ka cuva sobu ki na yava i Jisu, ka vakamasuta me lako ki nona vale, 42ni sa dua bauga na luvena-yalewa, e tinikarua na nona yabaki, a sa voleka ni mate.
Ia ni sa lako ko koya, era sa drigiti koya na lewe vuqa. 43Ka dua na yalewa, sa turudrabalavu ka yabaki tinikarua, a sa vakaotia vei ira na vuniwai na nona ka kecega sa tu vua me bula kina, a sa sega ni bula vua e dua, 44sa lako mai ki dakuna, ka tara na tutu ni nona i sulu; a sa mudu vakasauri kina nai davedave ni nona dra. 45A sa kaya ko Jisu, “O cei sa tarai au?” Ia ni ra sa vakasegasega kecega, sa kaya ko Pita kei ira sa tiko vata kaya, “Kemuni na Turaga, sa vakaosoosoi kemuni na lewe vuqa era sa veidrigidrigiti kei kemuni.” 46Ia sa kaya ko Jisu, “E dua sa tarai au, ni’u sa kila sa lako tani vei au na kaukauwa.” 47Ni sa kila na yalewa ni sa sega ni rawa ni vuni, sa lako mai ka sautaninini, ka cuva sobu vua, ka tukuna e matadra kecega na lewe vuqa na ka sa tarai koya kina, kei na nona bula vakasauri kina. 48A sa kaya vua ko koya, “Na luvequ-yalewa, sa vakabulai iko na nomu vakabauta; mo lako e na vakacegu.”
49Ni se vosa tikoga ko koya, sa lako mai e dua mai na vale ni turaga ni valenilotu, ka kaya vua, “Sa mate na luvemu-yalewa; kakua ni vakaocataka nai Vakavuvuli.” 50Ia ni sa rogoca ko Jisu, sa vosa vua, ka kaya, “Kakua ni yalolailai; vakadinata ga, ena qai vakabulai ga ko koya.” 51Ia ni sa curu ki vale ko koya, sa sega ni laiva e dua me curu kina, ko iratou ga ko Pita, kei Jemesa, kei Joni, kei na tama ni goneyalewa kei na tinana. 52A ra sa tagi kecega, ka tagicaka: a sa kaya ko koya, “Kakua ni tagi; sa sega ni ciba ko koya, sa moce ga.” 53A ra sa dredrevaki koya, ni ra sa kila sa ciba ko koya. 54A sa vakatalai ira kece ki tautuba, ka taura na ligana, ka kaci, ka kaya, “Goneyalewa, mo duri cake!” 55A sa lesu tale mai na yalona, a sa duri cake sara; a sa kaya ko koya me soli vua e dua na kena. 56A rau sa kurabui sara na nona qase; a sa vakarota vei rau ko koya me rau kakua ni tukuna vua e dua na ka sa caka.
Trenutno odabrano:
Luke 8: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
