Luke 4
4
Na Veretaki i Jisu
(Maciu 4.1-11; Marika 1.12-13)
1Ia ni sa sinai ko Jisu e na Yalo Tabu, sa lesu tale mai na Joritani, a sa kauti koya na Yalo Tabu ki na loma ni vanua lala, 2a sa dauveretaki koya na tevoro ka bogi vasagavulu. A sa sega na ka e kania ko koya e na veisiga ko ya. Ia ni sa oti, sa qai viakana. 3A sa kaya na tevoro kivei koya, “Kevaka ko sa Luve ni Kalou, mo kaya mada me vuki na vatu oqo mei buli madrai.” 4#Vrua 8.3A sa vosa vua ko Jisu, ka kaya, “Sa volai, ‘Ena sega ni bula na tamata e na madrai duaduaga, sa bula ga e na vosa kecega ni Kalou.’ ”
5A sa tuberi koya na tevoro ki na dua na ulunivanua cecere, a sa vakaraitaka vei koya vakasauri sara na veimatanitu kecega e vuravura. 6Sa qai kaya na tevoro kivei koya, “A lewa ni ka kecega oqori ka’u na solia vei iko, kei na kedrai ukuuku talega, ni sa soli vei au, ia ka’u sa solia vei koya yadua ka’u sa via solia kina. 7Ia kevaka ko na vakarokoroko vei au, ena nomu kecega.” 8#Vrua 6.13A sa vosa vua ko Jisu, ka kaya, “Ni sa volai,
‘Mo vakarokoroko vei Jiova na nomu Kalou,
ia mo qaravi koya duaduaga.’ ”
9A sa kauti koya ki Jerusalemi, ka vakatikora e na taba ni vale-ni-soro, a sa kaya vua, “Kevaka ko sa Luve ni Kalou, mo rika sobu eke, 10#Same 91.11,12ni sa volai,
‘Ena vakaroti ira na nona agilosi ko koya e na vukumu,
me ra maroroi iko,’
11ia
‘Era na keveti iko e na ligadra,
de dua na siga sa tavutu kina na yavamu e na vatu.’ ”
12 #
Vrua 6.16
A sa vosa ko Jisu, ka kaya vua, “Sa kainaki, ‘Mo kakua ni vakatovolea na nomu Kalou ko Jiova.’ ” 13Ia ni sa vakaotia kecega na dauvere na tevoro, sa lako tani vua me yacova e dua tale na gauna.
Sa Vakatekivutaka na Nona Cakacaka mai Kalili ko Jisu
(Maciu 4.12-17; Marika 1.14-15)
14A sa lesu tale ko Jisu e na kaukauwa ni Yalo Tabu ki Kalili; a sa kuruvaki na kenai rogorogo ki na vanua taucoko sa vakavolivolita. 15A sa vakatavuvuli tiko e na nodra veivalenilotu, a ra sa dokai koya ko ira kecega.
Sega ni Vinakati ko Jisu mai Nasareci
(Maciu 13.53-58; Marika 6.1-6)
16A sa yaco ki Nasareci, a koro ka susugi kina. Ia me vaka na nona i valavala, sa curu ki na valenilotu e na Siga ni Vakacecegu, a sa tucake me wili vola. 17A sa soli vua nai vola nei Aisea na parofita. Ia ni sa tevuka nai vola, sa kunea na tikina sa volai kina:
18 #
Aisea 61.1,2 “Sa tu vei au na Yalo i Jiova,
ni sa lumuti au ko koya
me’u vunautaka nai tukutuku-vinaka vei ira era sa dravudravua.
Me’u vunautaka na sereki vei ira na bobula,
kei na rai tale vei ira era sa mataboko,
me’u vakalalagataki ira era sa mavoa,
19 me’u vunautaka na yabaki vinaka i Jiova.”
20A sa viviga nai vola, a sa solia tale vua na dauveiqaravi, a sa tiko sobu. A sa vakaraici koya matua na matadra kecega era tiko e na valenilotu. 21Sa qai kaya vei ira ko koya, “E na siga oqo sa vakayacori e na daligamudou nai Vola Tabu oqo.” 22A ra sa vakadinadina vua ko ira kecega, a ra sa kurabui e na vuku ni vosa vinaka sa lako mai na gusuna. A ra sa kaya, “Sa sega li ni luve i Josefa ko koya oqo?” 23A sa kaya vei ira ko koya, “E dina ga dou na cavuta vei au nai vosavosa oqo, ‘Vuniwai, mo vakabulai iko mada.’ ‘A veika kecega keimami sa rogoca sa caka mai Kapenaumi, kitaka talega e na nomu vanua oqo.’ ” 24#Joni 4.44Sa kaya talega ko koya, “Au sa kaya vakaidina vei kemudou, sa sega e dua na parofita sa vinakati e na nona vanua. 25#1Tui 17.1Ia ka’u sa vosa dina vei kemudou, ni ra sa lewe vuqa na yada e Isireli e na gauna i Ilaijia, ni sa sogo tu ko lomalagi ka yabaki tolu ka vula ono, ni sa dausiga vakalevu na vanua taucoko; 26#1Tui 17.8-16ia sa sega ni talai ko Ilaijia vua e dua vei ira, vua ga e dua na yada mai Sarifaci, e na yasayasa vaka-Saitoni. 27#2Tui 5.1-14A sa lewe vuqa talega na vukavuka e Isireli e na gauna i Ilaisa na parofita; a sa sega e dua vei ira sa vakasavasavataki, ko Neamani ga na kai Siria.” 28Ia ko ira kecega e na valenilotu, ni ra sa rogoca na ka oqo, era sa cudru vakalevu sara. 29A ra sa tucake, ka biligi koya ki nai bili ni koro, ka ra sa kauta ki na bati ni ulunivanua sa tara tu kina na nodra koro, me ra biliga mai na bari-ni-savu. 30Ia sa curu rawa ko koya e na kedra maliwa, ka lako tani yani.
Na Tamata Curumi Yalo Velavela
(Marika 1.21-28)
31A sa lako sobu ki Kapenaumi, a koro mai Kalili, ka sa vakatavuvuli e na veisiga ni vakacecegu. 32#Maciu 7.28,29A ra sa kurabui sara e na nona i vakavuvuli, ni sa vosa ko koya e na kaukauwa vakai koya. 33A sa tiko e na valenilotu e dua na tamata, ka curumi koya na yalo ni dua na tevoro velavela, ka sa qoqolou e na domo levu, 34ka kaya, “Ulei! A cava vei keda, i Jisu na kai Nasareci? Ko sa lako beka mai me rawai keitou? Au sa kilai iko, na nona Le Dua Yalosavasava na Kalou.” 35A sa vunauci koya ko Jisu, ka kaya, “Mo galu ga, ka lako tani mai vua.” Ia ni sa bitabitalaki koya mada na tevoro e na kedra maliwa, sa qai lako tani mai vua, a sa sega ni vakamavoataka. 36A ra sa kurabui kecega, ka ra sa veivosaki vakai ira, ka kaya, “A cava beka na vosa oqo! Ni sa vosa vakaturaga ka vakamana ko koya vei ira na yalo velavela, ka ra sa lako tani sara.” 37A sa kuruvaki yani na kenai rogorogo ki na veiyasana kecega ni vanua sa vakavolivolita.
Sa Vakabulai Ira na Lewe Vuqa ko Jisu
(Maciu 8.14-17; Marika 1.29-34)
38A sa lako tani mai na valenilotu ko koya, ka curu ki na vale i Saimoni. A sa tauvi koya na tina ni wati Saimoni e dua na katakata levu; a ra sa masuti koya e na vukuna. 39A sa tu e tikina ko koya, ka vunauca na katakata, ka sa takali vua. A sa tucake sara ko koya, ka qaravi iratou. 40Ia ni sa dromu tiko na siga, ko ira kecega sa tauvi mate na nodra e na mate eso, era sa kauti ira kivei koya; a sa tabaki ira yadua ko koya e na ligana, ka vakabulai ira. 41Ia era sa lewe vuqa sa lako tani mai vei ira eso na tevoro, ni ra sa qoqolou tiko, ka kaya, “Oi kemuni na Karisito na Luve ni Kalou!” A sa vunauci ira ko koya, ka sega ni laiva me ra vosa, ni ra sa kila sa Karisito ko koya.
Sa Vunau ko Jisu ena Veivalenilotu
(Marika 1.35-39)
42Ia ni sa siga sa lako yani ko koya, ka lako ki na dua na vanua galala. A ra sa vakasaqarai koya ko ira na tamata; ia ni ra sa yaco yani vua, a ra sa via tarovi koya me kakua ni lako tani vei ira. 43Ia sa kaya vei ira ko koya, “Sa dodonu me’u lako me’u tukuna nai tukutuku-vinaka ni matanitu ni Kalou e na veikoro tani talega; ni sa ka oqo ka’u sa talai mai kina.” 44A sa dauvunau ko koya e na veivalenilotu mai Kalili.
Trenutno odabrano:
Luke 4: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
