Luke 2
2
Na Sucu i Jisu
(Maciu 1.18-25)
1Ena gauna ko ya, sa tukuni yani na lewa i Sisa Akusito, me volai na lewe-ni-vanua taucoko. 2Sa vakaoti mada nai vola oqo ni sa Kovana mai Siria ko Kirinio. 3A ra sa dui lako kecega na tamata me ra volai, ko ira yadua ki na nona koro. 4Sa lako cake talega ko Josefa mai Kalili, mai na koro ko Nasareci, ki Jutia, ki na koro i Tevita, a yacana ko Peceliema, ni sa vale vata kei Tevita, ka sa kawa mai vua. 5A sa lako me volai vata kei Meri, ko koya sa musuki vua me watina, ka sa bukete tiko. 6Ia ni rau sa tiko mai kea, sa yaco na nona siga me vakasucu kina. 7A sa vakasucuma na nona ulumatua na gonetagane, a sa viviraka vua nai sulu ni gone, ka vakadavora e na nodra tikina na manumanu; ni sa sega na tiki ni bure me nodratou.
Ko Ira nai Vakatawa ni Sipi kei Ira na Agilosi
8A sa so nai vakatawa ni sipi e na vanua ko ya, era sa tiko mai na vanua veico, a ra veivuke me vakatawa na sipi e na bogi.
9Ka raica, sa dua na agilosi ni Turaga, sa rairai vei ira, a sa cila vakavolivoliti ira nai ukuuku ni Turaga, a ra sa rere vakalevu. 10A sa kaya vei ira na agilosi, “Dou kakua ni rere; ka raica—au sa kauta mai vei kemudou e dua nai tukutuku vinaka mo dou reki vakalevu kina, kei ira kecega na tamata. 11Ni sa sucu vei kemudou e na siga oqo, e na koro i Tevita, nai Vakabula, ko koya na Karisito na Turaga. 12Ia oqo na kenai vakatakilakila vei kemudou: dou na kunea na gone sa viviraki vua nai sulu ni gone, ka sa davo e na nodra tikina na manumanu.” 13A ra sa lewe vuqa na kai lomalagi era sa tiko vakasauri vata kaya na agilosi, ka ra sa vakavinavinaka vua na Kalou ka kaya,
14“Sa nona na Kalou na vakarokoroko e na veiyasana e cake sara,
ka sa veivinakati rawa ko ira e vuravura—sa lomani ko ira na tamata!”
15Ia ni sa lako tani vei ira ko ira na agilosi ki lomalagi, era sa kaya vakai ira nai vakatawa ni sipi, “Me datou mai lako ki Peceliema, me raica na ka oqo sa qai yaco, o koya sa vakatakila mai vei kedatou na Turaga.” 16A ra sa lako vakatotolo yani, a ra sa kunei Meri, kei Josefa, kei na gone sa davo e na nodra tikina na manumanu. 17Ia ni ra sa raica, era sa tukuna yani na vosa sa tukuni vei ira e na vuku ni gone oqo.
18A ra sa kurabui kecega era sa rogoca na veika sa tukuna vei ira ko ira nai vakatawa ni sipi. 19A sa taura na vosa kecega oqo ko Meri, ka sa vakananuma kina e lomana. 20Ia ko ira nai vakatawa ni sipi era sa lesu tale, a ra sa vakavinavinakataka ka doka na Kalou e na vuku ni ka kecega era sa rogoca ka raica, me vaka sa tukuni oti vei ira.
Sa Vakayacani ko Jisu
21 #
Vsoro 12.3; Luke 1.31 Ni sa oti na bogi walu, sa kena gauna me cilivi kina na gone; ka sa vakatokai na yacana ko Jisu, me vaka ka vakatoka na agilosi ni se bera ni kunekunetaki.
Sa Vakacabori ko Jisu ena Valenisoro
22Ia ni sa oti na veisiga ni vakasavasavataki i tinana me vaka na vunau i Mosese, erau sa kauti koya ki Jerusalemi, me vakacabora ki na Turaga; 23#Lako 13.2,12(me vaka sa volai e na vunau ni Turaga, “A gonetagane kecega sa ulumatua ena vakatokai me tabu me nei Jiova;”) 24#Vsoro 12.6-8me rau vakacabora talega nai soro me vaka na ka sa kaya na vunau ni Turaga, “Me rua na soqe, se rua na luve ni ruve.”
25Ka raica, sa dua na tamata mai Jerusalemi, ko Simione na yacana; a sa yalododonu ka daulotu na tamata oqo, a sa waraka na nodra vakacegui na Isireli; a sa tiko vei koya na Yalo Tabu. 26A sa vakatakila oti vua na Yalo Tabu, ni na sega mada ni mate, ena kunea eliu na Karisito ni Turaga. 27A sa vakavuna na Yalo Tabu na nona lako ki na vale-ni-soro; ia ni rau sa kauta mai na gone ko Jisu koi rau na nona qase, me caka vua me vaka nai valavala ni vunau, 28sa qai keveta cake ko koya, ka vakavinavinakataka na Kalou, ka kaya,
29“Kemuni na Turaga, ko ni qai laiva na nomuni tamata me lako e na vakacegu,
me vaka na nomuni vosa;
30ni sa qai raica na mataqu na vu ni bula mai vei kemuni,
31io, ko koya ko ni sa vakarautaka e na matadra na tamata kecega,
32 #
Aisea 42.6; 49.6; 52.10 a rarama me vakararamataki ira na veimatanitu tani,
me nodra i ukuuku talega na nomuni tamata na Isireli.”
33A rau sa kurabui ko Josefa kei na tinana e na vuku ni veika sa tukuni e na vukuna. 34A sa vosavakalougatataki rau ko Simione ka sa kaya vei Meri na tinana, “Raica, na gone oqo sa digitaki me baleta na bale sobu kei na cadra cake ni lewe vuqa vei ira na Isireli, ka mei vakatakilakila ena saqati 35me na vakarairaitaki kina na nanuma ni yalodra e lewe vuqa—ka na laucoka talega na yalomu e nai seleiwau.”
36A sa dua na parofita yalewa, ko Ana, a luve i Fanueli, e na yavusa i Aseri. Sa vuqa sara na nona yabaki, sa goneyalewa ni sa vakawati, a rau sa bula vata kei na watina ka yabaki vitu, 37ka sa qai yada, ka walusagavulu ka va na kena yabaki. A sa sega ni lako tani mai na vale-ni-soro, a sa daulotu ka lolo ka masu e na siga kei na bogi. 38A sa lako mai ko koya e na tiki-ni-siga ko ya, a sa vakavinavinakataka talega na Turaga, ka sa tukuna na veika me baleta na gone vei ira kecega era tiko mai Jerusalemi era waraka nai Vakabula.
Nai Lakolako Lesu ki Nasareci
39 #
Maciu 2.23
Ia ni rau sa cakava oti na ka kecega me vaka na vunau ni Turaga, eratou sa lesu tale ki Kalili, ki na nodratou koro ko Nasareci.
40A sa tubu cake na gone, a sa yalomatua mai, sa sinai e na vuku; a sa tu vei koya na loloma ni Kalou.
Na Cauravou Lailai ko Jisu e na Valenisoro
41 #
Lako 12.1-27; Vrua 16.1-8 A rau sa lako na nona qase e na veiyabaki ki Jerusalemi ki na solevu ni Lako-sivia. 42Ia ni sa qai tinikarua na nona yabaki, eratou sa lako ki Jerusalemi, me vaka na kenai valavala ni kana vata; 43ia ni ratou sa vakaotia na veisiga, ka rau sa lesu tale, sa tiko ga na gone ko Jisu mai Jerusalemi; a rau sa sega ni kila ko Josefa kei tinana. 44A rau sa nanuma sa tiko ko koya kei ira sa lako tu, a rau sa lako ga e na dua na siga ka bogi; a rau sa qai vakasaqarai koya vei ira na kai nodra, kei ira era veikilai kei rau. 45Ia ni rau sa sega ni kunea, erau sa lesu tale ki Jerusalemi, ka vakasaqarai koya tiko. 46Sa oti e tolu na bogi, erau sa qai kunei koya e na vale-ni-soro, ni sa tiko e na kedra maliwa nai vakavuvuli, ka rogoci ira tiko, ka taro talega vei ira. 47A ra sa kurabui ko ira kece era sa rogoca, e na nona vuku kei na nona vosa. 48Ia ni rau sa raica, erau sa kurabui; a sa kaya vua ko tinana, “Na luvequ, ko sai valavala vakaoqo vei keirau ena vuku ni cava? Raica, keirau kei tamamu keirau sa vakasaqarai iko ka sa rarawa tiko.” 49A sa kaya vei rau ko koya, “A cava drau sa vakasaqarai au kina? Drau sa sega beka ni kila ni sa kilikili kei au me’u tiko e na vale nei Tamaqu?” 50A rau sa sega ni kila nai balebale ni vosa sa kaya vei rau ko koya. 51A sa lako sobu vata kei rau ko koya, a sa yaco ki Nasareci, ka sa talairawarawa vei rau. A sa maroroya ko tinana na vosa kecega oqo e lomana.
52 #
1Samu 2.26; Vbale 3.4 A sa tubu cake ko Jisu e na vuku kei na yagona talega, a sa vinakati koya vakalevu cake tikoga na Kalou kei ira talega na tamata.
Trenutno odabrano:
Luke 2: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
