Joni 20
20
Nai Bulubulu Lala
(Maciu 28.1-8; Marika 16.1-8; Luke 24.1-12)
1Ia e nai matai ni siga ni macawa sa lako mai ko Meri na yalewa ni Makitala e na mataka caca, ni sa butobuto tu, ki nai bulubulu, ka raica ni sa kau tani na vatu mai nai bulubulu. 2Sa qai cici ko koya, ka lako yani vei rau, ko Saimoni Pita kei na tisaipeli kadua, ko koya sa lomana ko Jisu, ka kaya vei rau, “Era sa kauta tani na Turaga mai nai bulubulu, ia keitou sa sega ni kila na tikina era sa vakotori koya kina.”
3Erau sa qai lako yani ko Pita, kei na tisaipeli kadua, a rau sa lako ki nai bulubulu. 4A rau sa cici vata ruarua, a sa sivi Pita na tisaipeli kadua, ka sa liu ki nai bulubulu. 5A sa cuva sobu ko koya ka sa rai ki loma, ka raica nai sole lineni sa no; ia ka sega ni curu ko koya. 6Sa qai muri mai ko Saimoni Pita, ka curu ki nai bulubulu, ka raica nai sole lineni sa no, 7kei nai tavoi sa viviraki e na uluna, ia sa sega ni no vata kei nai sole lineni, sa lobi koto duaduaga e na tikina tani. 8A sa qai curu talega na tisaipeli kadua, ko koya sa liu ki nai bulubulu, a sa raica ko koya, ka vakadinata. 9A rau sa sega ga ni kila nai Vola Tabu, ni sa dodonu me tucake tale mai na mate ko koya. 10Oi rau na tisaipeli erau sa qai lako tani tale ki nodrau.
Na Rairai nei Jisu vei Meri na Yalewa ni Makitala
(Maciu 28.9-10; Marika 16.9-11)
11Ia sa tu ko Meri mai nai bulubulu e tautuba, ka tagi. Ia ni sa tagi tiko, sa cuva sobu ka rai ki loma ni bulubulu; 12a sa raica e le rua na agilosi e nai sulu vulavula, a rau sa tiko, e dua ki uluna, ka dua ki yavana, e na tikina ka koto kina na yago i Jisu. 13A rau sa kaya vua, “Yalewa, ko sa tagi e na vuku ni cava?” Sa kaya vei rau ko koya, “E na vuku ni ra sa kauta tani na noqu Turaga, ia ka'u sa sega ni kila na tikina era sa vakotori koya kina.” 14Ni sa qai vosa vakaoqo, sa vuki vakanadaku, ka raici Jisu ni sa tu, ia sa sega ni kila ni sai Jisu. 15Sa kaya vua ko Jisu, “Yalewa, ko sa tagi e na vuku ni cava? Ko cei ko sa vakasaqara?” Sa nanuma ko koya ni sai vakatau-ni-were, ka sa kaya vua, “Kevaka ko sa kauti koya tani, tukuna saka vei au na tikina ko sa vakotori koya kina, ka'u na qai laki kauti koya tani.” 16Sa kaya vua ko Jisu, “I Meri!” Sa vuki ko koya, ka kaya vua, “Raponai!” (a kenai balebale, Vakavuvuli). 17Sa kaya vua ko Jisu, “Kakua ni tarai au, ni'u se bera ni lako cake vei Tamaqu. Ia mo lako vei ira na wekaqu, ka kaya vei ira, ‘Au sa lako cake vei koya sa Tamaqu, ka Tamamudou, vei koya sa noqu Kalou, ka nomudou Kalou.’ ” 18Sa lako yani ko Meri na yalewa ni Makitala ka tukuna vei ira na tisaipeli, “Au sa raica na Turaga”; ka tukuna vei ira ni sa vosataka vua na veika oqo ko koya.
Na Rairai nei Jisu vei Iratou na Nona Tisaipeli
(Maciu 28.16-20; Marika 16.14-18; Luke 24.36-49)
19E na siga ko ya, e nai matai ni siga ni macawa, ni sa yakavi mai, ka ni sa sogo tu na katuba ni vale era sa soqoni vata kina na tisaipeli, ni ra sa rerevaki ira na Jiu, sa curu mai ko Jisu ka tu e na kedra maliwa, ka kaya vei ira, “Dou vakacegu.” 20Ia ni sa vosa vakaoqo, sa vakaraitaka vei ira na ligana kei na sarisarina. A ra sa qai reki na tisaipeli, ni ra sa raica na Turaga. 21Sa qai kaya tale vei ira ko Jisu, “Dou vakacegu, me vaka sa talai au mai ko Tamaqu, au sa talai kemudou vaka talega kina.” 22Ia ni sa vosa vakaoqo ko koya, sa ceguvi ira, ka kaya, “Me curumi kemudou na Yalo Tabu.” 23#Maciu 16.19; 18.18Nai valavala ca ni tamata yadua dou sa vosota, ena vosoti; nai valavala ca ni tamata yadua dou sa sega ni sereka, ena sega ni sereki.
Ko Jisu kei Tomasi
24A sa dua vei ira na le tinikarua, ko Tomasi, sa vakatokai ko Titimo, sa sega ni tiko vata kei ira ni sa lako mai ko Jisu. 25O koya sa kaya kina vua ko ira na tisaipeli tani, “Keitou a raica na Turaga.” A sa kaya vei ira ko koya, “Kevaka ka'u na sega ni raica na we ni vako e na ligana, ka daramaka na noqu i qaqalo ki na we ni vako, ka daramaka na ligaqu ki na sarisarina, au na sega ni vakadinata.”
26Sa qai bogi walu, sa tiko tale e loma ni vale ko ira na nona tisaipeli, ko ira vata kei Tomasi. A sa curu mai ko Jisu, ni sa sogo tu na katuba, ka tu e na kedra maliwa, ka kaya, “Dou vakacegu.” 27Sa qai kaya vei Tomasi ko koya, “Dodoka mai na nomu i qaqalo, ka raica na ligaqu, ia dodoka na ligamu, ka daramaka ki na sarisariqu. Ia mo kakua ni vakatitiqa, mo vakadinata ga.” 28A sa vosa ko Tomasi, ka kaya vua, “Noqu Turaga, ka noqu Kalou!” 29Sa kaya vua ko Jisu, “Ko sa vakadinata li, Tomasi, baleta ni ko sa raici au? Sa kalougata ko ira era sa sega ni raica, ka ra sa vakadinata ga.”
Nai Naki ni Vola Oqo
30A sa vuqa tale na cakacaka-mana sa cakava dina ko Jisu e na matadra na nona tisaipeli, a ra sa sega ni volai e nai vola oqo. 31Ia sa volai oqo, mo dou vakadinata ni sa Karisito ko Jisu, na Luve ni Kalou, ia mo dou rawata na bula e na yacana, ni dou sa vakabauta.
Trenutno odabrano:
Joni 20: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
