Joni 19
19
1A sa qai kauti Jisu ko Pailato, ka vakanakuitataka. 2A sa talia e dua nai sala wa-vakavotona ko ira na sotia, ka vakaisalataki koya kina, a ra sa vakasulumi koya e na dua nai sulu lokaloka, 3ka kaya, “Sa loloma, na nodra Tui na Jiu!” A ra sa sabici koya e na ligadra.
4Sa qai curu tale yani ko Pailato, ka kaya vei ira, “Raica, au sa kauti koya mai vei kemudou, mo dou kila ni'u sa sega ni kunea e dua nai valavala ca vei koya.” 5Sa qai curu yani ko Jisu, sa vakaisala tu e nai sala wa-vakavotona, ka vakaisulu e nai sulu lokaloka. A sa kaya vei ira ko Pailato, “Raica na tamata!” 6Ni ra sa qai raici koya ko ira na bete levu kei ira na ovisa, era sa qoqolou, ka kaya, “Vakota ki na kauveilatai, vakota ki na kauveilatai.” Sa kaya vei ira ko Pailato, “Dou kauti koya ka vakota ki na kauveilatai, ni'u sa sega ni kunea vua e dua nai valavala ca.” 7Ko ira na Jiu era sa kaya vua, “Sa dua na neimami vunau, ka sa dodonu e na neimami vunau me mate ko koya, ni sa tukuni koya me Luve ni Kalou.”
8Ni sa qai rogoca na vosa oqo ko Pailato, sa levu cake kina na nona rere. 9A sa curu tale ki na vale ni veilewai, ka kaya vei Jisu, “O sa lako mai vei?” Ia sa sega ni vosa vua ko Jisu. 10Sa qai kaya vua ko Pailato, “O sa sega li ni vosa mai vei au? Ko sa sega beka ni kila ni'u sa rawata me'u vakoti iko ki na kauveilatai, ka'u sa rawata talega me'u sereki iko?” 11Sa kaya ko Jisu, “Ko sa sega ni rawata e dua na ka vei au, kevaka sa sega ni soli vei iko mai cake. A ka oqo sa levu cake kina na nona i valavala ca sa soli au yani vei iko.”
12Sa qai vakatovolea tiko ko Pailato me sereki koya, ia ko ira na Jiu, era sa qoqolou, ka kaya, “Kevaka ko sa sereki koya oqo, ko sa sega ni totaki Sisa. Ko koya yadua sa tukuni koya me tui, sa vosa vakacacataki Sisa.” 13Ni sa qai rogoca na vosa oqo ko Pailato, sa kauti Jisu yani, ka tiko sobu e nai tikotiko ni veilewai e na tikina sa vakatokai Na Raravatu, ia e na vosa vaka-Iperiu, ko Kapaca. 14Na siga oqo sa siga ni Vakavakarau ki na solevu ni Lako-sivia, ia sa kenai kaono ni aua. A sa kaya vei ira na Jiu ko koya, “Raica na nomudou Tui!” 15A ra sa qoqolou, “Kauta tani! Kauta tani! Vakoti koya ki na kauveilatai!” Sa kaya vei ira ko Pailato, “Me'u vakota li ki na kauveilatai na nomudou Tui?” Ko ira na bete levu era sa kaya, “Sa sega na neimami tui, ko Sisa duaduaga.” 16Sa qai soli koya yani vei ira ko koya me vakoti ki na kauveilatai. A ra sa kauti Jisu, ka tuberi koya yani.
Sa Vakoti ki na Kauveilatai ko Jisu
(Maciu 27.32-44; Marika 15.21-32; Luke 23.26-43)
17A sa colata na nona kauveilatai ko koya, ka lako yani ki na tikina sa vakatokai Na vanua ni qavokavoka, a sa vakatokai e na vosa vaka-Iperiu, ko Kolikoca. 18A ra sa vakoti koya mai kina ki na kauveilatai, ka lewe rua vata kaya, e dua vaka, ka dua vaka, kei Jisu e na kedrau maliwa.
19A sa dua nai vakatakilakila sa vola ko Pailato, ka sa vakatikora e na ulu ni kauveilatai. Sai koya oqo na ka sa volai, “Ko Jisu na Kai Nasareci, na Nodra Tui na Jiu.” 20A ra sa lewe vuqa na Jiu era sa wilika nai vakatakilakila oqo, ni sa voleka ki na koro na tikina sa vakoti kina ki na kauveilatai ko Jisu; a sa volai tu e na vosa vaka-Iperiu, kei na vosa va-Kirisi, kei na vosa vaka-Roma. 21Era sa qai kaya vei Pailato ko ira na nodra bete levu na Jiu, “Kakua ni vola, ‘A nodra Tui na Jiu,’ ia me volai ga vakaoqo, ‘Sa kaya na Tamata oqo, Koi au na nodra Tui na Jiu.’ ” 22Sa kaya ko Pailato, “A ka ka'u sa vola, ka'u sa vola.”
23Ia ko ira na sotia, ni ra sa vakoti Jisu ki na kauveilatai, era sa kauta na nona i sulu, ka wasea vakava, me ra tauyadua na tikina ko ira na sotia. Nai tutuvi talega; ia ka sa sega ni bau cula na nona i tutuvi, sa tali taucoko mai na tikina e cake ka kauta ki ra. 24#Same 22.18O koya era sa veikayaka kina, “Me da kakua ni dresuka, ia me da vakawiri madigi, se na nei cei.” Oqo me vakayacori kina nai Vola Tabu, ni sa kaya,
“Era sa vota na noqu i sulu,
ia na noqu i tutuvi era vakawiri madigi kina.”
Ko ira na sotia, era sa kitaka na veika oqo. 25Ia sa tu voleka ki na kauveilatai i Jisu na tinana, kei na taci tinana, ko Meri na wati Kilopa, kei Meri na yalewa ni Makitala. 26Ni sa qai raici rau ko Jisu, na tinana, kei na tisaipeli ka tu voleka, ko koya sa lomana ko koya, sa kaya vei tinana, “Yalewa, raica na luvemu!” 27Sa qai kaya vua na tisaipeli, “Raici tinamu!” Ia mai na tiki-ni-siga ko ya sa kauti koya na tisaipeli ko ya ki nona vale.
Na Mate nei Jisu
(Maciu 27.45-56; Marika 15.33-41; Luke 23.44-49)
28 #
Same 69.21; 22.15 Ni sa oti oqo, ka sa kila ko Jisu sa oti na ka kecega, me vakayacori kina nai Vola Tabu, sa kaya, “Au sa viagunu.” 29Ia sa tu e kea e dua na bilo sa sinai e na wai wiwi. A ra sa vakasuasuataka e dua na vutovuto e na wai wiwi, ka ciqira ki na dua na taba ni isopi, ka vakauta ki na gusuna. 30Ni sa qai gunuva na wai wiwi ko Jisu, sa kaya, “Sa oti.” A sa vakacuva na uluna, ka solia yani na yalona.
Lausua na Sarisari i Jisu
31Ia ko ira na Jiu, era sa masuti Pailato me musuki na yavadratou ka me ratou kau tani, e na vuku ni sa siga vakarau, me kakua ni rube tu na yagodratou e na kauveilatai e na Siga ni Vakacecegu, (ni sa uasivi na siga ni vakacecegu ko ya.) 32Sa qai lako ko ira na sotia, ka musuka na yavana nai kadua, a yavana talega na kenai karua, eratou a vakoti vata kaya ki na kauveilatai. 33Ia ni ratou sa lako mai vei Jisu, ka raica sa mate sara tu, era sa sega ni musuka na yavana. 34Ia sa suaka na sarisarina e dua na sotia e na dua na moto, a sa dave sara mai kina na dra kei na wai.
35Ia ko koya ka raica sa tukuna, a sa dina na nona i tukutuku. A sa kila ko koya ni sa vosa dina, mo dou vakabauta. 36#Lako 12.46; Tiko 9.12; Same 34.20Ni sa caka na veika oqo, me vakayacori kina nai Vola Tabu, “Me kakua ni musuki e dua na suina.” 37#Saka 12.10; Vtaki 1.7Ia e dua tale na tiki ni Vola Tabu sa kaya, “Era na raici koya era sa suaka.”
Na Bulu i Jisu
(Maciu 27.57-61; Marika 15.42-47; Luke 23.50-56)
38Ia ni sa oti na veika oqo, sa masuti Pailato ko Josefa, na kai Arimacea, a tisaipeli i Jisu, ia ka vuni ga ni sa rerevaki ira na Jiu, me kauta tani ko koya na yago i Jisu, a sa vakatara ko Pailato. Sa qai lako ko koya, ka kauta tani na yago i Jisu. 39#Joni 3.1,2A sa lako talega mai ko Nikotimo, ko koya sa lako eliu vei Jisu e na bogi, a sa kauta mai na mura kei na yasiyasi sa veiwaki vata, e dua na drau na paudi. 40Erau sa qai kauta na yago i Jisu, ka solega vata e nai sole lineni eso kei na ka boi vinaka, me vaka nai valavala ni nodra veibulu na Jiu.
41Ia sa dua na were e na tikina sa vakoti kina ki na kauveilatai ko koya, ka sa dua nai bulubulu vou e na were, sa sega ni bulu kina e dua na tamata. 42Erau sa qai buluti Jisu kina, ni sa nodra siga vakarau na Jiu, (ka ni sa voleka nai bulubulu.)
Trenutno odabrano:
Joni 19: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
