Matta 8
8
Yesu a̱ creng a̱ntyok gbap
(Markut 1:40-45; Luka 5:12-16)
1Yesu na̱ bu kyrek nyyai a̱za̱ a̱gut u, ka̱tswa ba̱nyet ka a̱ brak a̱ ku tssup. 2A̱ntyok a̱yaan a̱ nyyai a̱ ba bu gbap a̱ bu ta̱gbok a̱ hywa di Yesu, “Malam, ki a shim n creng, a ryi n creng.”
3Yesu a̱ neyak bvak a̱n ku byram a̱ hywa, “N shim a creng.” Bu i ka̱baram gbap a i creng sa̱rei i ku wwon. 4Yesu a̱ hywa da̱ nu, “To, kula, n cat a tyyei a̱yin ba; nat si tyyei gado Ka̱za na̱ na̱ cyang, wwon a wrak ka-kyang da̱ni Musa na̱ hywa ni, koyan a̱ ga bvwo ba na̱ creng.”
Yesu a̱ creng a̱kwwa Kaptin nsoja Rom
(Luka 7:1-10)
5Yesu na̱ bu nwa Ka̱fa̱rna̱hum, kaptin nsoja Rom a̱yaan a̱ ku naai a̱ cat na̱ ku brang. 6A̱ hywa di Yesu, “A̱ntyok Ka̱ryi, a̱kwwa nzuk a̱ shyi i myyi bu hywu ba̱bubvuk ka̱ryi, a̱ shyi sswa ka̱bvung ba̱gingang.”
7Yesu a̱ hywa, “N bai n bu ku creng.”
8A̱tuba a̱ywu a̱ hywa, “Kaai, A̱ntyok Ka̱ryi, n maai a sak tak ka̱ryi nzuk ba. Ki a hywa-hywa a̱kwwa nzuk u a̱ ni creng. 9Nzuk ma n byyi ba̱nyet ba a̱ shyi a̱zanson nzuk ni, n byyi nsoja na ma̱ n tssup ni. Ki n kam a̱ntyen a̱ni n hywa, ‘Ba kyi,’ na̱ ba, ki n hywa da̱ a̱yanyet ‘Nat,’ na̱ nat. Ki n ma̱n hywa da̱ a̱kwwa nzuk, ‘Yya ni,’ na̱ yya.”
10Yesu na̱ bu hok ba̱ryat nu ba, a̱ yya ka̱hat a̱ hywa di ba̱nyet ba a̱ ku tssup ni, “N ya tyyei ka̱ryong, n ka̱n dyi a̱yin i ka̱byen Isreila na̱ byyi ntyyi rya da̱ a̱tuba a̱ni ni ba. 11Nkpa n ya tyyei: ba̱nyet ba̱gingang a̱ ni hyok nyyai dityin, ba̱yanyet nyyai a̱jenshring a̱ bu swrang a̱ ya a̱ sswa i Dityok Tazwa ti bu Ibrahim bu Ishaku bu Yakubu. 12Ma ba̱nyet ba a̱ wa myim nwa i Dityok ti ni, mba ba wa ni nyying a̱ tyyi a̱ta̱sa an dyin, ka̱ yemi ba nin dywei mbvak a̱ ta̱sang.” 13Yesu a̱ hywa di Kaptin nu, “Nat ka̱ryi! Kyang a an wrak ka̱ryong ni ba ni na̱ yya mi.”
Bu ka̱ram iya a̱kwwa Kaptin nu a̱ creng.
Yesu a̱ creng ba̱nyet ba̱gingang
(Markut 1:29-34; Luka 4:38-41)
14Yesu a̱ nwa a gbang Bitut a̱ si shya a̱kwo a̱ra̱mbyring Bitut u na̱ myyi bu ba̱soza. 15Yesu a̱ byram bvak nu na, ba̱soza ba a̱ tyak, na̱ ta̱za a̱ cat Yesu kyangya.
16Ka̱jenshring ka ka bu yya, ba cong bu ba̱nyet ba a̱ yin byyi a̱ka̱tuk tswa ni ba̱gingang, na̱ bu ba̱ nyying tswa ji di ba̱ryat, a̱ bo creng ba̱nyet nhywu ba sa̱rei. 17Ku cong ba ba̱cicrak bu kyang a a̱ntyok tyyei ba̱ryat Ka̱za nu ba yin yei Ishaya nu na̱ yin dyat ni, a̱ hywa, “Nu diccu nu a̱ tun digugwak njit ti, a̱ cot nhywu njit a.”
Ba̱nyet cat tssup Yesu
(Luka 9:57-62)
18Yesu na̱ bu ryi ba̱nyet ba ba tung ba̱gingang, na̱ tun na̱won pfong nu na ba byyek a̱ nat a̱ma̱nyyi kei ba̱shekwot ka. 19Malam Truwang a̱yaan a̱ nyyai a̱ bu hywa da̱ nu, “Malam, koke a naat n ni na̱ tssup.”
20Yesu a̱ hywa da nu, “Na̱bvwu a̱yit a̱ byyi a̱bvong, na̱non a̱ byyi na̱sa kwai mba, ma Ka̱won A̱neywu a̱ byyi ka̱bvwa tyyi diccu ba.”
21A̱yanyet meyang ka̱yat na̱won pfong ka a̱ ma̱ nyyai a̱ bu hywa di Yesu, “A̱ntyok ka̱ryi, yen dyok n nat n si nyat a̱tyyi nzuk u n ba.”
22Yesu a̱ hywa da̱ nu, “N tssup! Ryok ba̱nyet ba a̱ byyi nkom a ni a̱ nyyak nkom mba na.”
Yesu a̱ sseng da̱ a̱ka̱tuk wun
(Markut 4:35-41; Luka 8:22-25)
23Yesu a̱ nwa a̱ swrang a kpongo nu, na̱won pfong nu na a̱ nwa ba̱ nu. 24Ka̱ram ba̱cincong a̱ka̱tuk nwun a̱ hywwak tazwa kei ka, kpongo nu a̱ nwa jim, ba̱shekwot ba ba tang a̱ nwai, na̱ cat bu ta̱yut, ma Yesu na̱ shyi nda. 25Na̱won pfong nu na a̱ nat a̱ si ku shyek, a̱ hywa da̱ nu, “A̱gwam Yesu, za san; zi ni kwi!”
26Yesu a̱ hywa da̱ mba, “A̱nzan a̱ ya ba taka̱i ka̱wun ani? Yi sang ntyyi ndya a̱mi e?” A̱ si ta̱za a̱ kam wun na bu ba̱shekwot ba, ba brek a̱ sseng nyong.
27Koyan a̱ yya ka̱hat a̱ yya, “A̱nzan taka̱i a̱yin a̱nunini, hat wun bu ba̱shekwot a̱ ku pfong?”
Yesu a̱ creng ba̱nyet a̱ka̱tuk tswa i ka̱nkrang Gadarawa
(Markut 5:1-20; Luka 8:26-39)
28Yesu na̱ bu byyek kei ba̱shekwot ti a̱ nwa i ka̱byen Gadarawa ka a̱ mon bu ba̱nyet ba̱hwa, ba yin byyi a̱ka̱tuk tswa ba wruk nyyai ka̱bvwa nyyak ba̱nyet. Ba yin shyit hat ba̱nyet a̱ tyong hywei ryen iya. 29Bu hyok Yesu na ba krok nkun a̱ hywa, “A̱nzan a cat da̱ njit, nwan Ka̱won Ka̱za? A ba kyi i gi za nyyek nyyai ka̱ram ka ka ka̱n yya baa?”
30Ka̱srong ba̱la̱de ka shyi i ba̱ya ba̱shishrek ka̱ yemi, 31a̱ka̱tuk tswa nu a̱ naai Yesu i hywa, “Ki a ni za nyying, a za ryok zi nat si nwa ba̱la̱de yaan ni.”
32Yesu a̱ hywa, “Yi nat!” Ba nat a̱ si nwa ba̱la̱de ba. Sa̱rei ba̱la̱de ba a̱ krok ncyi a̱ si kyrek a̱gut u a̱ si nwa i kei ti a̱ kwi sa̱rei.
33Ba̱nyet ba a̱ shyi i tsaai ba̱la̱de ba ni a̱ tyong a̱ nat ka̱yat ka̱nkrang a̱ si tyyei kyang a ba̱ nyying ni. A̱ bo tyyei kyang a tyyi ba̱nyet byyi a̱ka̱tuk tswa ba ni. 34Rot a̱mi sa̱rei ba̱nyet ka̱nkrang ba a̱ gbit a̱ nat di Yesu. Ba si ku shya a̱ ku naai na̱ wruk a̱ ba̱ wwon ka̱nkrang mba ka.
Trenutno odabrano:
Matta 8: kaj
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2011, Wycliffe Bible Translators, Inc. All rights reserved.
