Matta 7
7
Yi ryok yya ba̱yaan shirya
(Luka 6:37-38, 41-42)
1“Yi ryok yya ba̱yanyet shirya ba, ho Ka̱za a̱ ma̱ bu ya yya shirya, 2rot ka̱sak ka an yya ba̱yanyet shirya ji ni, a̱mi Ka̱za ka ma̱ ni na̱ yya mi; mudu na a maai ba̱yanyet i ni, nkpa a̱mi Ka̱za ka ma̱ ni na̱ maai i. 3Ba̱ a̱nzan a̱n byyi an cyang bu ka̱bacincong kyang ka a̱ shyi i dissi a̱wumba nwan ni, da̱ nwan ba cyang dikum ti shyi i dissi nwan ti ni ba. 4A ni yya ni n hywa da̱ a̱wumba nwan nu, ‘Ryok n na̱ tun ka̱bankyang ka a̱ na̱ kpa dissi nwan ti ni,’ nwan nu wu hwrang bu dikum i dissi nwan ti? 5Ha̱ba̱! A̱ntyok raai ba̱nyet, yen tun dikum ti shyi i dissi nwan ti ni, i si wa bvwa n shya cyang a ba̱zizrak kyang a shyi i dissi a̱wumba nwan ti ni sin ku tun ni.
6“Ryok krok na̱bvwu nkyang Ka̱za ba, ba ni brak a̱za̱ nwan. Ryok krok ba̱la̱de na̱sham nkyang ba, ba ni brak a̱ na̱ shai-shai a̱ seyak.”
Yi naai, i cat, i tsot ka̱bvwa ka
(Luka 11:9-13)
7“Yi naai, ba ni ya ryi; yi cat, yi ni shya; yi tsot ka̱bvwa ka, ba ni ya yrang i. 8A̱yin nu a̱ naai ni ba ni ku ryi; a̱yin nu a̱ ma̱n cat i a̱ ni shya, da̱ a̱yin nu a̱ tsot ka̱bvwa ka ni ba ni ku yrang i. 9A̱nyan a̱mi ka̱yat nyin ki ka̱won nu a̱ ku zzim kyangya na̱ sook kpang a̱ ka̱ ryi? 10Ki a̱nyan ka̱won nu ka ni ku zzim hwon na̱ pyyem ryik a̱ ka̱ ryi? 11Ki nyin ba̱ka̱tuk ba̱nyet bvwo wwat na̱won nyin a̱tsatsak nkyang, ba̱lle A̱tyyi nyin nu a̱ shyi Tazwa ni, a̱ ni cong ni a̱ wi wrak ba̱nyet ba a̱ ku naai ni a̱tsatsak za̱nang?
12“Kyang a a cat ba̱nyet a̱ na̱ yya mi ni, nkpa a ma̱ ni ba̱ yya mi. Nkpa a̱mi yet Truwang Musa ji bu zzek ba̱nyet tyyei ba̱ryat Ka̱za na.”
Ka̱bahuhweyak ryen ka
(Luka 13:24)
13“Yi hyok ka̱bacincong ka̱nu gyeng ka, rot ka̱nu gyeng ka cong ka̱ryi dikwu ka ni a̱ shii ka̱ngat, ryen na ncong ni bvwa dikwu ba. Ba̱nyet ba a̱ kok ryen iya ni a̱ shii ka̱tswa. 14Ryen na cong di ba̱nyet ba ka̱ryi sucet ka ni yet ka̱bahuhweyak nkpa, di ka̱nu gyeng ka a̱ nwai i ka yet a̱gba̱dang ba. Ba̱nyet ba a̱ kpo kok ni a̱ shii ka̱tswa ba.”
Ka̱kon bu disum nka
(Luka 6:43-44)
15“Yi ta̱rwam bu ba̱nyet bvei diraa i diyrek Ka̱za. Ba ni nyyai a̱ ba da̱ nyin di bvon-tsaap ni, ma ka̱yat ndya mba ka a̱ yet na̱nying na̱bvwu a̱yit. 16Yi ni ba̱ bvwo i ka̱cyet mba ka. Ba a̱yin nu a̱ ka̱n kpyei a̱lemu i ka̱jyim ni, da̱ a̱yin na̱ ka̱n kpyei disum a̱bvap i ka̱kwo ba. 17Ka̱kon ka a̱ shyi bu lafiya nka ni a̱ na sak a̱zizrak disum, ma ka̱kon ka a̱ sang lafiya ni a̱ na sak a̱ka̱tuk disum. 18Ka̱kon ka a̱ shyi bu lafiya nka ni a̱ maai a̱n sak a̱ka̱tuk disum ba, di ka̱kon ka a̱ sang lafiya ni a̱n maai a̱ sak a̱zizrak disum ba. 19Ka̱kon ka a̱ byyi a̱zizrak disum ni ba, ba na ka̱ tyyak a̱ kprup a̱ tyyi a̱n dong. 20Rot a̱mi yi ni bvwo ba̱nyet bvei diraa di ba yet ba̱nyet tyyei ba̱ryat Ka̱za i ryen ka̱cyet mba na.”
N ya bvwo ba
(Luka 13:25-27)
21“Ba koyan nu a̱n yei ‘A̱gwam, A̱gwam’ ni a̱mi a̱ ni nwa Dityok Tazwa ti ba, se bu ba̱nyet ba a̱ yya kyang a A̱tyyi nzuk u a̱ shyi Tazwa ka ni na̱ cat da̱ mba ni. 22Ka̱tuk iya a̱ bai, ba̱nyet ba̱gingang a̱ bu hywa da̱ nzuk, ‘A̱gwam, A̱gwam, i diyrek nwan zi yin tyyei ba̱ryat Ka̱za ba, i nyying a̱ka̱tuk tswa, i yya nkyang ka̱hat sa̱rei i diyrek nwan.’ 23Nzuk n ma̱n hywa da̱ mba, ‘N ya bvwo ba, yi drok kyi n wwon, ba̱nyet a̱ka̱tukyya.’ ”
Ba̱nyet dinok ba̱hwa
(Luka 6:47-49)
24Yesu a̱ bo ya ka̱son a̱ hywa da̱ mba, “A̱yin nu a̱ ssang ba̱ryat nzuk ba a̱ tyei ni a̱ ryi di a̱ntyok a̱za̱ncyi nu a̱ nok ka̱ryi nu tazwa nhwang ni. 25Ka̱ram ka za zin bvwa ni, ba̱shekwot a̱ tyyi a̱ hywaai ncen, wun i hywap di cet, ma ka̱ryi ka a̱ tyyi tintying ba, rot ba ka̱ tuk tazwa nhwang.
26“Ma a̱yin nu a̱ ssang ba̱ryat nzuk ba a̱ zzwam ni a̱ ryi da̱ a̱bvwon a̱yin nu a̱ tuk ka̱ryi nu ka tazwa jijak ni. 27Ka̱ram ka za zin bvwa ni, ba̱shekwot a̱ tyyi a̱ hywaai ncen, wun i nwa hywap di cet, ka̱ryi ka a̱ trip a̱ kpa a̱ka̱tuk dikpak!”
Cet Yesu na
28Ka̱ram ka Yesu na̱n tyak ba̱ryat nu ba ni, ka̱tswa ba̱nyet ka a̱ nwa yya ka̱hat taka̱i zzek a na̱ zzek i. 29Zzek nu na yin bvwon bu nying ba̱malam Truwang mba na, rot Yesu a̱ yin zzek bu cet.
Trenutno odabrano:
Matta 7: kaj
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2011, Wycliffe Bible Translators, Inc. All rights reserved.
