Genesis 19
19
Ochimwa wa Sodomu
1Angelo eellaalle yavollowiiwa mu Sodomu enthawi ya misikuwa, Loti aari akeraatthille vakhuviru ni mullako va muzindooyo. Loti awoonille athwaayo, ahiimella nave aya aallochella. Sika aakokhora vatthi, 2nave aallota wi, “Pepaani apwiyaaka, hankoni mwaphiye o enyumba ya kaporwaanyu, mwahuwe manyallo nave mwakone wenko. Ohinase wasa, muneerokhwaranya ni olendwaanyu.” Koma alliwa yahaakhulla wi, “Iyaayi, hiyaano ninaakone vaatte m'muzindani mwemmu.” 3Loti ahaawatihera waaveka nave vatulli viwa alliwa yahaakhullella oya o enyumba ya Loti. Sika vano Loti ahaakhozella machellello nave aawaapeyella buledi oohikhalla ni yisiti navettho ahaakhozella yoocha yooddiva wunchichi, sika athwaayo yaacha. 4Alletwaayo ehinakone, allopwana attheene a m'muzindanimmo, asombwe ni awuulluvalleene, yahaapheella enyumbeeyo. 5#Owe 19.22-24Yaamwiithana Loti emukoha wi, “Ethiyo athu ewiille owaninyu wuno mahiiywaalle eri wuuwi? Akhumihe, ewe wuno wi nikonena.”
6Loti aakhumella vaatte awalla mullako, 7nave ahaaveka wi, “Nyuwaano akhwaaka, muheere ello yoonanareella. 8Ngoonani, miyaano kookhalla ni anamwani aatthiyana eelli, anamwalli. Apaalle kiwinnyeni anamwani yaalla wi mweerena nnddo munapaalleenyu. Koma alletwaalla, muhiweerelle erive ello kaambiiwa tti alletwaaka nave kinaphwanella waateteza.”
9Koma alliwaayo yaallota wi, “Onivenyerevo mullupa oovirawe! Weyaano ttaani wi onilleelle yaweera? Vano ttuuwora wuuhoosa wunchichi okhwaranya alliwaayo.” Sika yaamukakha Lotooyo nave yahanlle vang'ono wi yinttake nchiwi. 10Koma athu eelli alle yaari muwaraalle yaamukokella Loti mpa, ewalla mullako. 11#2 Mam 6.18Vatulli viwa yahaallaka ni ohoona allopwana attheene ayo yiimellille vaattemvo, asombwe ni awuulluvalleene vawi kheyaaworillettho woona mullako.
Okhuma wa Loti mu Sodomu
12Allopwana eellaayo yaamukoha Loti wi, “Ethiyo ookhallavottho mmodda ari ni weyaano wuno? Akuse anaawo aallopwana, anaawo aatthiyana, akamwenaawo ni arive mbalaawo oyo ari m'muzindanimmu nave mukhume 13kaambiiwa hiyaano ninapaalla noononge nipuronna. Apwiya ahoona mullatu oyo athu ookhalla m'muzindanimmu eneeriiwa nave noorumiwa wi noononge muzindoolla.”
14Enthawi yeeyo Loti aaya wa asombwe ayo yapaalla waatthella anaaye aalleella wi, “Akuvani, hankoni nikhumewo wuno, ekaamba yawi vihanlle enthawi vang'ono wi Apwiya yoononge nipuronna.” Koma alliwaayo yaganiza wi aamasellulla.
15Ohinase, angelwaalle yaheeseesa omwaakuvihiha Loti nuumulleella wi, “Akuva! Omukuse mwaariyo ni anaawo aatthiyana eelli, mukhume oya otte wa muzinda wi muhoonongeye voollakiwani muzindoolla.” 16#2 Pet 2.7Koma Loti aanakayikellave, sika Apwiya yaamweerella echifundo. Mwawi ddiiddo athwaayo yaamukusa Loti, mwaariye ni anaaye eellaalle mwawaaphareella muwono, yaakhumihella otte wa muzindooyo. 17Yaakhumihelle otte wa muzindooyo, mmodda mwa angelwaayo aallota wi, “Thamakani, muvulluse okumaanyu. Muhiwehe mutulli nave muhiimelle muntaponimmo. Thawellani omiyaangoni wi muhiiphiwe.”
18Koma Loti ahaakhulla wi, “Iyaayi apwiya muheere ddiiddo. 19Ngoonani, mookimoriwella ethakaraka mi oorumeyellaanyu nave mookeerella echifundo wunchichi voovullusani okumaaka. Komathi miyaangonnddo ddiri voorekama wunchichi. Woonongeya wa nipuronna mullotillaanyunngu ttuuweereya miyaano kihinaphiye omiyaangoninnddo nave kineerokhwa. 20Ngoonani mwanamuzinda ori vakhuviru vakhopellamvooyo nave kaakhullelleni wi kithawelle wenko. Vawi naari nipuronno niri nooyeva wunchichi komave kineerovulluwellamo.”
21Mungelooyo ahaakhulla wi, “Kohaakhullella ddennddo vawi ngoononga mwanamuzinda yooyo. 22Thamaka mwawaakuva! Ngeera erive ello ophiyera weyaano ophiyalle wenko.” Sika Loti aathamaka aphiya o mwanamuzindoolle. Ekaamba ya yeella mwanamuzindooyo onaromolliwa Zowari.#19.22 Zowari: Nnddina nenna niniiweya wonanko na Eheberi nno ninattaphullella oyeva.
Woonongiwa wa Sodomu ni Gomora
23Nndduwa nakhumiiwa, Loti aari aphiyalle khalle o Zowari. 24#Mat 10.15; 11.23,24; Luk 10.12; 17.29; 2 Pet 2.6; Yuda 1.7Vano Apwiya yaamoriha munllo wa sulufure va Sodomu ni Gomora ovenyera oddullu. 25Sika yahoononga mizinda ddenndda ni ntapo nittheene ni athu attheene a m'mizindanimmo, opwesereravo ddoomella ddittheddene dda ellapo yeeyo. 26#Luk 17.32Koma mwaara Loti aaweha mutulli nave enthawi yeeyo aatthattuwa nlluku na mwiinyu.
27Osaka wene, ohinase, Abrahamu aathamakella onipuroni, nko iimellilleeye vamiitthoni va Apwiya. 28Aaweha o mizinda dda Sodomu ni Gomora ni o ntaponne. Nave ahoona mwiisi ori tungulii okhuma muntaponimmo wonanko mwiisi wookhuma mu eng'anjo. 29Mwawi Mulluku oonongeeye mizinda dda muntaponinnddo, yahuupuwella ovekella wa Abrahamu, sika aamuvullusa Loti va enthawi oonongeeye mizinda nndde mwakhalla Lotooyo.
Waambeya a Amowabu ni a Aamori
30Ekaamba yawi Loti aanoova okhalla o Zowari, olliyooyo ni anaaye aatthiyana eellaalle, yaaya omiyaangoni, attheenaayo yakhalla munikhunguni. 31Mwaana muullupalli aamulleella mung'onong'onwaaye wi, “Attiitthiihwaalla enimuulluvalla vano nave khaavo muthu naari mmodda va ellapo yavatthi#19.31 ellapo yavatthi: apaalle ellapweella. awi ttuunitthella wi naayare anamwani wonanko ddinakhallelliiwa va ellapo yavatthi. 32Hanko naalezelihe attiitthiihwaalla nave ekone ni hiyaano wi nikhalle ni edduullu.” 33Mahiiyu yaayo anamwanaayo yaawinnya vinyo attiitthiiwaayo. Vano mwaana muullupallooyo aakona ni attiitthinnya. Vawi attiitthiiwaayo yaari elezelille wunchichi, kheyaadduwella nnddo ddeereya.
34Ohinase wene mwaana muullupallooyo aamulleella mung'onong'onwaayoolle wi, “Miyaano mahiiyu evirallaalla kaakona ni attiitthiihu. Hanko naalezelihettho nave weyaanottho mahiiywaalla okonena wi mutundwaahu ohimalle.” 35Mahiiyu yaayo yaamulezelihattho nave mwaana mung'onong'onooyo aakona ni attiitthinnya. Vawi attiitthiiwaayo yaari elezelille wunchichi, kheyaadduwella nnddo ddeereya. 36Sika anamwani attheene eellaayo yaakusa erukullu ya attiitthiiwa. 37Mwaana muullupallooyo aamuyara mwaana aamullopwana, aamuvaha nnddina nawi Mowabu.#19.37 Mowabu: Nnddina nenna niniiweya wonanko na Eheberi nno ninattaphullella ovenyera wa attiitthaaka. Olliyooyo sika nikhollo na Amowabu. 38Mwaana mung'onong'onooyo olliyettho aamuyara mwaana aamullopwana, aamuvaha nnddina nawi Benami.#19.38 Benami: Nnddina nenna mu Eheberi ninattaphullella mwaana a mbalaaka nave niniiweya wonanko na Eheberi nno ninattaphullella Muamoni. Olliyooyo sika nikhollo na Aamoni.
Trenutno odabrano:
Genesis 19: MW2019
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The Bible in Elhomwe © The Bible Society of Malawi, 2019.