Genesis 18
18
Lonjezo na oyariwa wa Isake
1Apwiya yaamooneyella Abrahamu o miteekho dda muthundu dda o Mamure mvo Abrahamooyo akeraatthilleeye va mullako wa musasaaye enthawi yootthaana ovihalle. 2#Ahe 13.2Moohitiyerella ello aawoona athu araru yiimellille vakhuviru ni olliye. Awoonille, aatimulla mwawaakuva wi aallochelle. Aakokhora vatthi, 3allota wi, “Apwiyaaka, mwaarimi mukeerenlle echifundo wunchichi, pepaani muhikhwaranye vaatte va oorumeyellaanyu. 4Asimaaddi vang'ono ewe wi muhuwe manyallo. Mweereke mwiithuuwaka vamuteekhonimva. 5Miyaano vano kinaya kakuse yoocha wi mwacha muphwanye masiva ookhwaranyella olendwaanyu. Moophiya vaatte vakamva sika kinaphwanella miyaano kuurumeyelleni.” Athwaayo yaamwaakhulla wi, “Ddaphaama, era moollikana ni mmo ollotelleewe.”
6Abrahamu aathamakella omusasani waye nave aamulleella Sara wi, “Okuse mwawaakuva etthello ddiraru dda othu waphaama, owoottowe nave omwaapeye buledi.” 7Vatulli viwa, Abrahamu aathamaka amuphara mwaana a eng'ombe aphaama ooneneva, awinnya akaporwaaye wi empotokose mwawaakuva. 8Aakusattho mukaka woonyuunya ni mmodda woohinyuunya ni enama yoopotokosiweelle aavaha ddittheddenennddo. Olliye ahiimella vakhwipi nngu athwaayo echaka vatthi va muteekho.
9Vano athwaayo yaamukoha Abrahamu wi, “Ethiyo mwaariyo Sara ari wuuwi?” Abrahamu ahaakhulla wi, “Ari m'musasanimmu.” 10#Aro 9.9Mmodda a athwaayo aari Apwiya nave aallota wi, “Kinimalonjeza wi vamalla miyeri mitthanu ni misese#18.10 vamalla miyeri mitthanu ni misese: apaalle enthawi wonanko yeella muyakha woosiisello. kineerohokollowattho nave mwaariyo aneeromuyara mwaana aamullopwana.” Nave Sara ahiiwa vawi akeraatthille otulli wa Abrahamu, va mullako wa musasa. 11Abrahamu ni Sara attheene yaari yuulluvanlle nave enthawi yeeyo sika Sara aari ahiyalle oya omweerini wonanko enakhallella atthiyana. 12#1 Pet 3.6Sika Sara aattheya muwariwari wi, “Ha, ethiyo kuulluvallelleemimmu, ttuuhakallallattho ni mamunaka? Navettho mamunakooyo tti awuulluvalla.”
13Vano Apwiya yaamukoha Abrahamu wi, “Kaambiiwa tini Sara attheyeeye voollotani wi, ‘Ethiyo mi kuulluvallelleemimmu ttuumuyara mwaana?’ 14#Luk 1.37Ethiyo yookhallavo ello yoolepheleya weeriwa ni Apwiya? Sika va enthawiine, kineereweera nndda kilonjezilleemi nave Sara aneeromuyara mwaana aamullopwana.”
15Ekaamba ya woova, Sara aaruna wi, “Ngaattheyille.”
Koma Apwiya yaallota wi, “Ee, waattheya.”
Abrahamu anaavekellella athu a o Sodomu
16Sika vano athwaayo yaatimulla, ephiya vanipuroni mvo yawehiiwa o Sodomu. Abrahamu aathaanana nimodda wi aavelleelle va olendwiiwa. 17Nave Apwiya yaallota weekhiiwa wi, “Abrahamoolla ngimukhuwella eyo kinapaalleemi weera. 18Edduullu ddaye ddinaakhalle mutundu muullupalli wa masiva. Nave mitundu ddittheddene dda va ellapo yavatthi ddineerodalisiwa oyeella mwa olliye.#18.18 mitundu…olliye: apaalle mitundu ddittheddene ddineerokiveka miyaano wi kiddidalise moollikana ni mmo kuudaliselleemi weyaano. 19Koomutthoolla olliyoolla wi aalamule anaaye ni mabanjaaye amuhoollo wi yiiwellelleke mawaaka vaweerani ddaphaama ni ddoolungama. Yeera ddenndda, kineereweera ddittheddene kamulonjezilleemi.”
20Sika Apwiya yaamulleella Abrahamu wi, “Vookhalla mullatu wawoopiha woohumullulla Sodomu ni Gomora nave nichimo niwa tti nuullupalli wunchichi. 21Mwawi ddiiddo kinapaalla kikitthellewo wi koone dda mullatu oyo kiiwalleemi waarimi ori wawoona.”
22Sika athu eellaalle yaatimulla enaya o Sodomu koma Abrahamu aahalla ni Apwiya. 23Enthawi yeeyo Abrahamu aawaatamella Apwiya nave aakoha wi, “Ethiyo wiiddiiddonko muneerewoononga athu oolungama ni oohilungama? 24Ethiyo mwaphwanyeya athu 50 oohilungama m'muzindanimmo, ethiyo muneerewoononga muzinda muttheene? Ethiyo khamuwuhiya wi mwaasunge athu 50 oolungamaayo? 25Ddawoona, khamuwiipha athu oolungama ni oohilungama. Yeella tti yooheereya! Ethiyo aweeruza a ellapo yavatthi ettheene khanaphwanella weera echilungamo?”
26Apwiya yaamwaakhulla wi, “Kaaphwanya athu 50 oohichimwa mu Sodomu, kineerewuuhiya muzinda muttheenooyo oohiwoononga, ekaamba ya athu 50 oolungamaayo.”
27Abrahamu aallotattho wi, “Pepaani, koollipa murima voollotani mwawi ddiidda ni nyuwaano, Apwiya. Miyaanothi tti muthu shisha vamiitthoni vanyu. 28Apaalle va echiwerengero ya 50, vayelleella athu atthanuve? Ethiyo muneerewoononga muzindooyo ekaamba yawi vooyelleella athu atthanuve?”
Apwiya yahaakhulla wi, “Kaaphwanyamo athu 45 oolungama, ngiwoononga muzindooyo.”
29Abrahamu aakohattho wi, “Ethiyo nanga vaphwanyeya athu oolungama 40.”
Apwiya yaamwaakhulla wi, “Kaaphwanyamo athu 40, ngiwoononga.”
30Abrahamu aallotattho wi, “Pepaani, kinimuuvekani, muhinakishella murima Apwiya nave kineerollotattho. Ethiyo nanga mwaaphwanyawo athu oolungama 30?”
Apwiya yaamwaakhulla wi, “Kaaphwanyamo athu 30, ngoononga.”
31Abrahamu aallota wi, “Kinimuuvekani, kikhululukelleni voollipani murima mwawi ddiidda nyu Apwiya. Ethiyo nanga mwaphwanyeya oolungama 20?”
Apwiya yahaakhulla wi, “Kaaphwanyamo oolungama 20, ngoononga.”
32Voomallihella, Abrahamu aallota wi, “Pepaani, muhinakishella murima Apwiya koma killote omoddave. Ethiyo nanga mwaaphwanya oohichimwa khumive?”
Nave Apwiya yaallota wi, “Kaaphwanyamo oolungama khumi, ngoononga.” 33Nave Apwiya emallihalle ollota, yaamuhiya vaavo Abrahamooyo.
Trenutno odabrano:
Genesis 18: MW2019
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The Bible in Elhomwe © The Bible Society of Malawi, 2019.