Genesis 15
15
Echipangano ya Mulluku ni Abramu
1Ddimanlle nndda, Apwiya yaamooneyella Abramu mu masomphenya. Yaamulleella wi, “Ohoove Abramu, mi tti echishangwaawo. Yoothuviwaawo enaakhalle yuullupalli.” 2Koma Abramu aallota wi, “Apwiya Mulluku, miyaano nginna anamwani. Vano munaawore mwawiidde okivaha yoothuviwa? Oovollowa munipuroni mwaka tti Eliyezere a o Damasiko.#15.2 Oovollowa…Damasiko: Mawu yaalla mu Eheberi kheniiweya phaama. 3Khamukivahille anamwani vawi ddiiddo mmodda mwa allupa muttekwaaka sika anaahallena eyuumaaka.”
4Vano Apwiya yaamulleella wi, “Eliyezere khahallana eyuumaawo koma mwaana aawaawo sika anaahallena eyuumaawo.” 5#Aro 4.18; Ahe 11.12Enthawi yeeyo Apwiya yaamukhumiha Abramu vaatte, emulleella wi, “Ngoona oddullunngu nave waaworaka weerenge etheneerinnddo, erenga. Weyaano oneerokhalla ni edduullu ddinchichi wonanko etheneerinnddo.”
6 #
Aro 4.3; Aga 3.6; Yak 2.23 Abramu ahaakhulupilila Apwiya nave ekaamba ya yeeyo Apwiya yaamwaakhullella wi tti oolungama.
7Sika Apwiya yaamulleella Abramu wi, “Mi tti Apwiya oyo kuukhumihalle o Uri a o Babiloni wi kuuvahe ellapweella wi ekhalle yaawoyaawo.”
8Koma Abramu aakoha wi, “Apwiya Mulluku, ethiyo kinaadduwelle mwawiidde wi ellapweella enaakhalle yaaka?”
9Apwiya yaamwaakhulla wi, “Waana eng'ombe, epuri ni nankhoro a enkhosa, ddittheddenenndda dda miyakha miraru, vamoddattho ni nnddiya ni ekhunda.” 10Abramu aawaana enama ddittheddenennddo wa Apwiya, addiphaddaphadda variyari. Aahiya ddoophaddannddo piillipiilli moowehana, mu mizere miilli koma epallamenndde khaaddiphaddille. 11Aneekhwaambe yaamorellavo wi eche enama nnddo iiphalleeyennddo koma Abramu aawiikariha.
12 #
Yob 4.13,14 Voovollowani nndduwa, Abramu aakhwavo ni ekhove navettho epiphi yuullupalli ni yawoopiha yammorella olliye. 13#Eks 1.1-14; Mit 7.6Sika Apwiya yaamulleella wi, “Odduwelle moosimikiza wi edduullu ddawo ddineerokhalla alleto o ellapo yaaneena, ddineerokhalla wonanko akaporo nave ddineerohoosiwa wa miyakha 400. 14#Eks 12.40,41; Mit 7.7Koma kineerewaallaka athu enaarumeyellekeewaayo, vano edduullu ddawonnddo ddineerokhumawo o ellapweeyo ddikusalle eyuuma yinchichi. 15Vano weyaano oneerokhalla ni okumi enthawi yoorekama nave oneerokhwa mwamurendelle. Oneerovitthiwa mu mahame wuulluvanllesese. 16Viviralle mibado sese edduullu ddawonnddo ddineerohokollowattho ekaamba yawi ngiwiikariha a Aamori ophiyera onanara wiwa ophiyalle variyari wi ellakiwe.”
17Nndduwa nivollowille wene, epiphi yaambaka, moorurumusa vahooneya embawula yoothuwa mwiisi ni mutthiko wookhara nave ddeko piillinndda ddaavira variyari va enama ddoophaddiwanndde. 18#Mit 7.5Nllapo nenno Apwiya yaapangana ni Abramu. Yaallota wi, “Kinimalonjeza wi kineeroddivaha edduullu ddawo ellapo ettheeneella ovenyera o muhinje wa o Iguputo ophiyera o muhinje muullupalli wa Yufurate. 19Kineerewuuvaha ellapo ya Akeni, ya Akenizi, ya Akadimoni, 20ya Ahiti, ya Aperezi, ya Arefaimu, 21ya Aamori, ya Akanani, ya Agirigashi ni ya Ayebusi.”
Trenutno odabrano:
Genesis 15: MW2019
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The Bible in Elhomwe © The Bible Society of Malawi, 2019.