മത്തായി 22
22
കല്ല്യാണ ബിര്‌ന്ത്‌ണ പറ്റ്യുള്ള കദെ
1ഏസു പിന്നേമ് അവാര്‌ക്കെ കദെ ദിന്‌സിലി സൊന്നാദ് എച്ചെന്ത: 2<<ഒരു റാജാവു തന്ന് മഗാന്‌ക്ക് ബേ്ണ്ടി കല്ല്യാണ ബിര്‌ന്തട്ട് ഒരിക്കിനാ്. സാമി ആള്‌റാദ് എങ്കാദ് ഇദ്‌ക്ക് സമാത്തെ. 3അവാ് കല്ല്യാണ ബിര്‌ന്ത്‌ക്ക് ഒളേത്തവാര്‌ണ, ഒളേത്ത് ബര്യ തന്ന് പണ്ണ്യക്കാറാര്‌ണ ബ്‌ട്ടാ്. ആന അവാര്‌ക്ക് ബര്യ മനേസ്സ് ഇര്‌ക്കാലെ.
4അവാ് പിന്നേമ് തന്ന്‌ദ് ബേ്റെ പണ്ണ്യക്കാറാര്‌ക്കെ ഇച്ചെ സൊല്ലി അന്‌പ്പി ബ്‌ട്ടാ്: <ണാന് ബിര്‌ന്തട്ട് ഒരിക്കി ബെത്തിര്‌ക്കെ. ഇദ്‌ക്ക് ബേ്ണ്ടി ണാന് ണല്ല മിജ്‌മിജിര്‌ക്ക ഓരിഗണാമ്, ആഡ്‌മാഡ്‌ഗണാമ് അറ്‌ത്ത് എല്ലാമെ ഒരിക്കി മുഡിന്ത്‌ദ്. കല്ല്യാണ ബിര്‌ന്ത്‌ക്ക് ബായിരി എന്ത് ഒളേത്തിര്‌ന്തവാര്‌ക്കെ ബര്യ സൊല്ലിരി.>
5ആന അവാര് അദ്‌ണ ബെലെ ബെക്കാദെ ഒരുത്താ് തന്ന് കാഡ്‌ക്കേമ്, പിന്നെ ഒരുത്താ് ഏവാര സെയ്യാമ് പോനാ്. 6ബാക്കി ആള്‌ഗ ഒളേക്ക്യ പോന പണ്ണ്യക്കാറാര്‌ണ പ്‌ഡിത്ത് ണാണഗെ്ഡ്‌സാമ് സെയ്‌ദാര്, കൊന്റെക്കാമ് സെയ്‌ദാര്. 7റാജാവു ഈ സേദിന കേ്ട്ട് മൊനെ ബന്ത്, തന്ന് പഡെഗണ ബ്‌ട്ട് അയ്യി കൊന്റവാര്‌ണ കൊല്ലിസി അവാര്‌ദ് പട്ടണണ സുട്ടു കരിത്തെക്കിനാ്.
8അദ്‌ക്ക് പ്‌റ റാജാവു തന്ന് പണ്ണ്യക്കാറാര്‌ക്കെ: <കല്ല്യാണ ബിര്‌ന്തട്ട് ഒരിക്കി മുഡിന്ത്‌ദ്. ആന ണാന് ഒളേത്തവാരെല്ല ബര്യ തഗ്‌ദില്ലാത്തവാര് ആനാര്. 9അദ്‌ണാലെ ണിമ്മ തെരുവുക്ക്‌റാഗ പോയി കാണ്‌റവാര്‌ണെല്ല കല്ല്യാണ ബിര്‌ന്ത്‌ക്ക് ഒളേത്ത് ബായി> എന്ത് സൊന്നാ്. 10അയ്യി പണ്ണ്യക്കാറാര് തെരുവുക്ക്‌റാഗ പോയി, കണ്ട കേ്ഡ്‌ഗെ്ട്ടവാര്‌ണാമ്, ണല്ലവാര്‌ണാമ് കൂട്ടി ബന്താര്. അച്ചെ കല്ല്യാണ കൂരെ ബിര്‌ന്ത്‌ക്കാറാര്‌ണകൊണ്ട് തുമ്പിറ്റ്.
11ആന കല്ല്യാണ ബിര്‌ന്ത്‌ക്ക് ബന്തവാര്‌ണ ണോഡ്യ എന്ത് റാജാവു ഉള്ളുക്ക് ബര്‌ഗാട്ടി, കല്ല്യാണാക്കുള്ള ഉഡുപ്പിക്കാദെ ഇര്‌ക്ക ഒരുത്താന കണ്ടാ്. 12അക്കുളെ റാജാവു അവാന: <ഇദാമെ, ണീ കല്ല്യാണാക്കുള്ള ഉഡുപ്പിക്കാദെ ഉള്ളുക്ക് എച്ചെമെ ബന്തെ> എന്ത് കേ്ട്ടാ്. ആന അവാന്‌ക്ക് ഒരു ബാക്ക് സൊല്ല്യ മുഡ്യാദെ മ്‌ണ്ടാദിര്‌ന്താ്.
13അക്കുളെ റാജാവു പണ്ണ്യക്കാറാര്‌ക്കെ: <ഇയാള്‌ദ് കയ്യികാല്‌ണ കെ്ട്ടി ബെ്ള്യെ ഒരേപെ്ട്ട് ഇ്റ്‌ട്ടൂറിര്‌ക്ക പട്ട്‌ക്ക് എ്ഡ്‌ത്ത് എ്റിന്തെക്കിരി. അദിലി അഗ്‌ദ്‌കൊണ്ട് പല്ല്‌ണ കെ്റ്‌സ്‌കെ്റ്‌സ കഡിക്കുവാ്> എന്ത് സൊന്നാ്.>>
14കദെ സൊല്ലി തീന്ത പ്‌റ ഏസു: <<സാമി മൊത്തന ആള്‌ഗണ ഒളേക്കാ്. ആന സാമി തെരിന്തെ്ഡ്‌ത്തവാര് ലേസാത്തെ>> എന്ത് സൊന്നാ്.
ണ്‌ഗ്‌ദി കൊഡുക്കവാര്‌ണ പറ്റി
15അദ്‌ക്ക് പ്‌റ പരിസല പോയി ഏസുണ ഏദാറ്റൊരു ണായാത്തിലി സിക്കിസ്യ ബേ്ണ്ടി സട്ടകെ്ട്ടിനാര്. 16അച്ചെ അവാര് തമ്മ്‌ദ് സൊല്ലുപഡി ണഡാക്കവാര്‌ണ എരോദലാദൊപ്പ ഏസു പട്ട്‌ക്ക് സൊല്ലിബ്‌ട്ടാര്. അവാര് പോയി: <<ഗുരുവെ, ണീ സത്ത്യണ തുറാന്ത് സൊല്ലുറവാ് എന്ത്‌മ് മന്‌സാര് എച്ചെ പെ്ളേത്ത് പോഡൊ എന്ത് സാമി സൊല്ലിര്‌ക്കാദ്‌ണ അദേപാസെ പഡ്‌സ്‌റവാ് എന്ത്‌മ് എമാക്ക് തെര്യു. ഏവാനാമ് മൂഞ്ചിമുഗ ണോഡാത്തവാ് ആനാദ്‌ണാലെ മന്‌സാര് എന്ത ണെനേക്കുവാര് എന്ത് ഗൂഡി ണീ അഞ്ചാലെ എന്ത്‌മ് എമാക്ക് തെര്യു. 17മോസെ ബെത്ത സാമി സട്ടപഡി റോമ ണാഡ് റാജാവുക്ക് ണ്‌ഗ്‌ദി കൊഡുക്കാദ് സെര്യൊ ഇല്ലെ തപ്പൊ? അദ്‌ണ പറ്റി എന്ത ണെനേക്കെ എന്ത് സൊല്ലി തരുഡൊ>> എന്ത് കേ്ട്ടാര്.
18ആന ഏസുക്ക് അവാര്‌ദ് മനേസ്സില്യ കെ്ട്ട ണെനേപ്പ്‌ണ തെരിന്ത്: <<ബക്‌ദിക്കാറാരായി ണഡിക്കവാരെ, ണിമ്മ എനാണ സോദണെ സെയ്യ ണോഡുറാദ് എന്ത്‌ക്ക്? 19ണിമ്മ ണ്‌ഗ്‌ദി അഡേക്ക പണാണ കാട്ടിരി>> എന്ത് സൊന്നാ്. അക്കുളെ അവാര് ഒരു ബെ്ള്ളി പണ എ്ഡ്‌ത്ത് കൊഡുത്താര്. 20അക്കുളെ ഏസു: <<ഈ പണാത്തിലിര്‌ക്ക മൂഞ്ചിമ് പേര്‌മ് ആര്‌ദ്>> എന്ത് കേ്ട്ടാ്.
21അക്കുളെ അവാര്: <<റോമ റാജാവുദ്>> എന്ത് സൊന്നാര്.
<<അച്ചാനാക്കി റോമ ണാഡ് റാജാവുക്ക് കൊഡുക്കാദ്‌ണ അയാള്‌ക്ക് കൊഡിരി. സാമിക്ക് കൊഡുക്കാദ്‌ണ സാമിക്ക് കൊഡിരി>> എന്ത് ഏസു അവാര്‌ക്കെ സൊന്നാ്.
22അവാര് ഇദ്‌ണ കേ്ട്ട് അദിസ്യപട്ടെക്കിനാര്. പ്‌റ ഏസു പട്ടിലിര്‌ക്കാദെ പോനാര്.
മറ്‌ദെ ഉജുറെ്ന്ത്‌റാദ്‌ണ പറ്റി
23സത്തവാര് മറ്‌ദെ ഉജുറെ്റാദില്ലെ എന്ത് സൊല്ലുറ സദൂക്യലാദിലി ലേസ ആള്‌ഗ അയ്യി ണാള് താനെ ഏസു പട്ട്‌ക്ക് ബന്ത് അവാന ഒരു കേ്ള്‌വി കേ്ട്ടാര്: 24<<ഗുരുവെ, ഒരുത്താ് പ്‌ള്ളെഗ ഇല്ലാദെ സത്താക്കി, അവാന്‌ദ് പെ്ണ്ട്‌ണ തമ്പി എ്ഡ്‌ത്ത്, അണ്ണാന്‌ദ് പേര്‌ക്ക് പ്‌ള്ളെഗ പ്‌റാത്തുഡൊ എന്ത് മോസെ എ്ള്‌ദി ബെത്തിര്‌ക്കാനല്ല? 25ആന എമ്മ്‌ദ് പട്ടിലി ഏ്ള് അണ്ണതമ്പില ഇര്‌ന്താര്. അദിലി തലെകോഡില്യവാ് പെ്ണ്ണ് എ്ഡ്‌ത്ത് സത്ത്‌കൊണ്ട് പോനാ്. പ്‌ള്ളെഗ പ്‌റാക്കാത്താദ്‌ണാലെ അയാള്‌ദ് പെ്ണ്ട്‌ണ തമ്പ്യച്ചാ് എ്ഡ്‌ത്താ്. 26തലെകോഡില്യവാന്‌ദ് അഡ്യസാരില്യവാന്‌മ് അദ്‌ക്ക് അഡ്യസാരില്യവാന്‌മ് അച്ചെ ഏ്ള് ആള്‌മ് അവാണ എ്ഡ്‌ത്ത് പ്‌ള്ളെഗ പ്‌റാക്കാദെ സത്ത്‌കൊണ്ട് പോനാര്. 27കഡേസിലി അവാമ് സത്ത്‌കൊണ്ട് പോന. 28ആന സത്തവാര് ഉജുറേ്ഗാട്ടി ഇവ ഈ ഏ്ള് ആളിലി ആര്‌ക്ക് പെ്ണ്ടാവ? ഏ്ള് ആള്‌ക്ക്‌മ് ഇവ പെ്ണ്ടായിര്‌ന്താളല്ല?>>
29അദ്‌ക്ക് ഏസു: <<സാമി ബുക്കിലി എ്ള്‌ദിര്‌ക്കാദ്‌ണാമ് സാമി എല്ലാദ്‌മ് സെയ്യ മുഡിരവാ് എന്ത് ണിമാക്ക് തെര്യാത്താദ്‌ണാലേമ്‌ത്തെ ഈ തപ്പ് ണിമാക്ക് ബന്തിര്‌ക്കാദ്. 30ആന സത്തവാര് ഉജുറെ്ന്ത്‌ഗാട്ടി ആള്‌ഗ പെ്ണ്ണ് എ്ഡ്‌ക്കാദ്‌മില്ലെ, പെ്ണ്ണ് കൊഡുക്കാദ്‌മില്ലെ. അവാര് മേലോഗാത്തില്യ ദൂദലണ പാസെത്തെ ആവാര്. 31സത്തവാര് ഉജുറെ്ന്ത്‌റാദ്‌ണ പറ്റി സാമി ണിമാക്കെ സൊല്ലിര്‌ക്കാദ്‌ണ ണിമ്മ സാമി ബുക്കിലി പഡിക്കാലേഗ? 32<ണാന് അവുറഗാമ്‌ദ്‌മ്, ഇസാക്ക്‌ദ്‌മ് ആക്കോവുദ്‌മ് സാമിത്തെ>#പയണ 3:6 എന്ത് സാമി സൊല്ലിര്‌ക്കാ്. ഈ മൂണ് പാട്ടല സത്തിര്‌ന്താല്‌മ് സാമിക്ക് അവാര് സാഗാലെ. ആന സാമി സത്തവാര്‌ദ് സാമി അല്ല ഉജുറിര്‌ക്കവാര്‌ദ് സാമിത്തെ>> എന്ത് സൊന്നാ്.
33ഏസു പഡിസിന ഈ കാര്യണ കേ്ട്ട ആള്‌ഗ അദിസ്യപട്ടെക്കിനാര്.
മുക്ക്യമാന സട്ട
34സദൂക്യലണ ഏസു ബദ്‌ള് സൊല്ല്യ ഇല്ലാത്തപഡി ആക്കിനാദ്‌ണ പരിസല കേ്ട്ട് അവാര് ഒന്റായി എജേന്താര്. 35അവാര്‌ദിലി ഒരു ബേദ ബാത്ത്യാ് ഏസുണ സോദണെ സെയ്യ ബേ്ണ്ടി:
36<<ഗുരുവെ, മോസെ ബെത്ത സാമി സട്ടാത്തില്യ മ്‌ഗ്‌ന്ത കല്‌പനെ ഏദ്?>> എന്ത് കേ്ട്ടാ്. 37അക്കുളെ ഏസു അവാന്‌ക്കെ: << <ണിന്ന് സാമ്യാന ആണ്ടവാന ണീ ഉജുറുക്കുജുറ സീവാ് ബ്‌ട്ട് ണഡാക്കുഡൊ, ണിന്ന് പെ്ളേപ്പിലി ഒപ്പ സാമിന സീവാ് ബ്‌ട്ട് ണഡാക്കുഡൊ, അദേപാസെ ണിമ്മ സാമിന മനേസ്സാറ ഒപ്പ സീവാ് ബ്‌ട്ട് ണഡാക്കുഡൊ.>#മറ്‌ദെ സൊല്ലുറ സട്ട 6:5 38ഇദ്‌ത്തെ ഒണ്ണാവദ്‌മ് മുക്ക്യമാനാദ്‌മാന സട്ട. 39റണ്ടാവദ് സട്ട അദ്‌ക്ക് സമ: <ണീ ണിനാണ സീവാ് ബ്‌ട്ട് ണഡാക്ക പാസെ അഡ്‌ത്തവാര്‌ണാമ് സീവാ് ബ്‌ട്ട് ണഡാക്കുഡൊ.>#ലേവ്യാര് 19:18 40മോസെ ബെത്ത സാമി സട്ടാത്തിലി സൊല്ലിര്‌ക്ക എല്ല കാര്യഗാമ് സാമിദാസ്‌ഗ സൊന്ന കാര്യഗാമ് ഈ റണ്ട് സട്ടാത്തിലി അഡാങ്കിര്‌ക്ക്‌ദ്>> എന്ത് സൊന്നാ്.
ക്‌റ്‌സ്‌ത്ത്‌ണ പറ്റി കേ്ള്‌വി കേ്ക്കാര്
41പരിസല ഒന്റായി കൂഡിര്‌ക്കാട്ടി ഏസു അവാര്‌ണ: 42<<ക്‌റ്‌സ്‌ത്ത്‌ണ പറ്റി ണിമ്മ എന്ത ണെനേക്കേര്? അവാ് ആര്‌ദ് മഗാ്?>> എന്ത് കേ്ട്ടാ്.
അക്കുളെ അവാര്: <<ദാവീദ് കാല്‌ക്ക് പട്ടവാ്>> എന്ത് സൊന്നാര്.
43അക്കുളെ ഏസു അവാര്‌ക്കെ: <<അച്ചാനാക്കി ദാവീദ് സാമിണിഗാലാലെ അവാന ആണ്ടവാ് എന്ത് എച്ചെ ഒളേക്കുവാ്? 44എന്ത്‌ക്കെന്റ ദാവീദ് ഇച്ചെ സൊല്ലിര്‌ക്കാ്:
< <<ണാന് ണിന്ന് പോട്ടിക്കാറാര്‌ണ ണിന്ന് കാല്‌ക്കഡി ആക്കമാട്ട്‌ക്ക്
എന്ന് ബല സാരി ഇര്>>
എന്ത് ആണ്ടവാ് എന്ന് ആണ്ടവാന്‌ക്കെ സൊന്നാ്>#സാമി പാട്ട് ബുക്ക് 110:1
എന്ത് അവാ് സൊല്ലുറാനല്ല. 45ദാവീദ് ക്‌റ്‌സ്‌ത്ത്‌ണ ആണ്ടവാ് എന്ത് ഒളേക്കദാനാക്കി പിന്നെ എച്ചെ ക്‌റ്‌സ്‌ത്ത് ദാവീദ് കാല്‌ക്ക് പട്ടവാനാവാ്?>> എന്ത് കേ്ട്ടാ്. 46അവാനോഡെ ബദ്‌ള് സൊല്ല്യ ആര്‌ക്ക്‌മ് മുഡ്യാലെ. അയ്യി ണാള് തൊട്ട് ആര്‌മ് ഏസോഡെ എന്താറ്റ് കേ്ക്ക്യ ദയ്യിര കാട്ടാലെ.
Trenutno odabrano:
മത്തായി 22: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
