മത്തായി 23
23
ഏസു പരിസലണാമ് ബേദ ബാത്ത്യലണാമ് പറ്റി സൊല്ലുറാ്
1അദ്‌ക്ക് പ്‌റ ഏസു തന്ന് സൊല്ലുപഡി ണഡാക്കവാര്‌ക്കേമ് ആള്‌ഗാക്കേമ് സൊന്നാദ് എച്ചെന്ത: 2<<പരിസലാമ് ബേദ ബാത്ത്യലാമ് മോസെ ബെത്ത സാമി സട്ടണ പറ്റി പഡ്‌സ്‌റാദ്‌ക്കുള്ള അദിഗാരിഗളായി ഇര്‌ക്കാര്. 3അദ്‌ണാലെ അവാര് സൊല്ലുറാദ്‌ണ ണിമ്മ കേ്ട്ട് ണഡാന്ത്‌മ് കൊള്ളിരി, സെയ്യ സൊല്ലുറാദ്‌ണ സെയ്‌ദ്‌മ് കൊള്ളിരി. ആന അവാര് സെയ്‌രാദ്‌ണ പാസെ ണിമ്മ സെയ്യ ബേ്ഡ. എന്ത്‌ക്കെന്റ അവാര് സൊല്ലുറാദല്ലാദെ സെയ്‌രാദില്ലല്ല? 4അവാര് ബുദ്ദിമുട്ടുസ്‌റ കഡ്‌പ്പമാന സട്ടഗണ ബെത്ത് അദേ സട്ടപഡി ണഡാക്ക്യ ആള്‌ഗണ ണത്ത്‌റാര്. ആന അവാര് ബെക്ക സട്ടപഡി ണഡാക്ക്യ ആള്‌ഗാക്ക് ഒരു ഉദാവിമ് സെയ്യ അവാര്‌ക്ക് മനേസ്സില്ലെ.
5തമ്മ സെയ്‌ര എല്ല കാര്യഗണാമ് ആള്‌ഗ കാണ്യ ബേ്ണ്ടി അവാര് സെയ്‌രാര്. അവാര് സാമി സൊല്ലുസുലാക്കണ എ്ള്‌ദി ഇക്കി ബെത്തിര്‌ക്ക പെ്ട്ടിന ബെല്ല്യ പെ്ട്ട്യാക്കി തലേക്കെ കെ്ട്ടി ബെക്കാര്. തമ്മ ഇക്ക്‌റ ജൊഗേക്ക് കുത്തി മൂട്ടുറ താനേക്ക്#23:5 ഇച്ചെ സെയ്‌രാദ് തമ്മ ബക്‌ദിക്കാറാരെന്ത് കാട്ട്യ ബേ്ണ്ടിത്തെ. ണീ്ട്ട കൂട്ട്‌റാര്. 6ബിര്‌ന്ത് പട്ടിലി എല്ലാര്‌ദ് മുന്തുക്ക് ഇര്‌ക്ക്യാമ്, എഗുദാര് പരേസ്‌റ കൂരെക്ക്‌റാഗ മുക്ക്യമാന എ്ഡേലി കുക്കാക്ക്യാമ് അവാര് ആസെപഡ്‌റാര്. 7സന്തേക്ക്‌റാഗ ആള്‌ഗ തമാണ ബിനാത്ത്‌റാദ്‌മ്, അവാര് തമാണ <ഗുരുവെ> എന്ത് ഒളേക്കാദ്‌മ്‌ത്തെ അവാര്‌ക്ക് പ്‌ഡിത്ത കാര്യ.
8ആന അഡ്‌ത്തവാര് ണിമാണ <ഗുരുവെ> എന്ത് ഒളേക്ക്യ പാങ്കില്ലെ. ഗുരു ണിമാക്ക് ഒരുത്താ് മാട്ട്‌ത്തെ. ണിമ്മ ഒട്ടുക്ക് ഒന്റിലി പ്‌റാന്ത അണ്ണതമ്പിലഗണ പാസെത്തെ. 9ബൂമിലി ആര്‌ണാമ് ണിമ്മ <അപ്പാ്> എന്ത് ഒളേക്ക ബേ്ഡ. ഒരുത്താ് മാട്ട്‌ത്തെ ണിമ്മ്‌ദ് അപ്പാ്. അദ് മേലോഗാത്തിലിര്‌ക്ക സാമിത്തെ. 10ണിമ്മ <തലെവല> എങ്ക പേര് ബാങ്ക്യ ആസെപഡ ബേ്ഡ. ഒരുത്താ് മാട്ട്‌റാത്തെ ണിമ്മ്‌ദ് തലെവാ്. അദ് ക്‌റ്‌സ്‌ത്ത്‌ത്തെ. 11ണിമ്മ്‌ദ് കൂട്ടാത്തിലി എല്ലാര്‌ണാമ് ബ്‌ഡ ബെല്ല്യവാ് ആയിര്‌ക്കവാ് ണിമാക്കെല്ലാര്‌ക്ക്‌മ് ബേ്ണ്ടി ഓരാഡ്‌റവാനാഡൊ. 12തനാണതാനെ ഉജാത്തി കെ്ട്ട്‌റവാന താത്തി കെ്ട്ടുവാ്. തനാണതാനെ താത്തി കെ്ട്ട്‌റവാന ഉജാത്തി കെ്ട്ടുവാ്.>>
ഏസു ബേദ ബാത്ത്യലണാമ് പരിസലണാമ് കുറ്റ സൊല്ലുറാ്
13<<ബക്‌ദിക്കാറാരായി ണഡിക്ക ബേദ ബാത്ത്യലാമ് പരിസലാമ് ആനവാരെ, ണിമാക്ക് സെറ്റെ കജട്ട കജട്ടത്തെ. എന്ത്‌ക്കെന്റ ണിമ്മ ആള്‌ഗണ സാമി ആള്‌റാദ്‌ക്ക് കഡാക്ക്യ ബ്‌ഡ്‌റാദില്ലെ. ണിമ്മ സാമി ആള്‌റാദ്‌ക്ക് പട്ടവാരായ മനേസ്സ് ബെക്കാദ്‌മില്ലെ. സാമി ആള്‌റാദ്‌ക്ക് പട്ടവാരായ ബേ്ണ്ടി ഓരാഡ്‌റവാര്‌ണ ണിമ്മ അദ്‌ക്ക് ബ്‌ഡ്‌റാദ്‌മില്ലെ.#23:13 മുദ എ്ള്‌ദിനാദ്‌ണ ണോഡി എ്ള്‌ദിന പല കായിദാത്തിലിമ് പദിണാലാവദ് സുലാക്ക ഇല്ലെ. <<ബക്‌ദിക്കാറാരായി ണഡിക്ക ബേദ ബാത്ത്യലാമ് പരിസലാമ് ആയിര്‌ക്കവാരെ, ണിമാക്ക് സെറ്റെ കജട്ട കജട്ടത്തെ. ണിമ്മ മ്‌ണ്ടേസിഗാദ് സൊത്തുമുദാല്‌ണ ഏമാത്താമ് സെയ്‌രേര്, ണിമ്മ ആള്‌ഗ കാണ്യ ബേ്ണ്ടി ണല്ല ഗള്യെ പരേസാമ് സെയ്‌രേര്. ഇച്ച്‌ള ആള്‌ഗളാന ണിമാക്ക് കെ്ഡേക്ക ദണ്ടണെ റമ്പ കഡ്‌പ്പ ആയിര്‌ക്കു.>>
15ബക്‌ദിക്കാറാരായി ണഡിക്ക ബേദ ബാത്ത്യലാമ് പരിസലാമ് ആയിര്‌ക്കവാരെ, ണിമാക്ക് സെറ്റെ കജട്ട കജട്ടത്തെ. ണിമ്മ ഒരുത്താന മദാക്ക് സേത്ത്യ ബേ്ണ്ടി കഡാല് കഡാന്ത് പോരേര്, എല്ല ണാഡ്‌ക്ക്‌റാഗാമ് പോരേര്. അച്ചെ ഒരുത്താന ണിമ്മ്‌ദ് മദാക്ക് സേത്തിന പ്‌റ ണിമാക്ക് കെ്ഡേക്ക ണരഗ ദണ്ടണേന ബ്‌ഡ ബെല്ല്യ ദണ്ടണേക്ക് അവാന തഗ്‌ദ്യുള്ളവനാക്കി തീക്കേര്.
16കുറുഡാരാന ബയ്യി കാട്ടിഗളെ, ണിമാക്ക് സെറ്റെ കജട്ട കജട്ടത്തെ. <ഒരുത്താ് സാമികൂരേക്കെ സൊല്ലി സത്ത്യ അഡിത്ത, അദ് ബെല്ല്യ കാര്യ അല്ല എന്ത്‌മ്, സാമികൂരേല്യ പൊന്നുക്കെ സൊല്ലി സത്ത്യ അഡിത്ത, സത്ത്യ അഡിത്ത കാര്യ സെയ്‌ദ് കൊഡുക്ക്യ ണിനാക്ക് പൊറുപ്പുണ്ടു> എന്ത്‌മ് ണിമ്മ സൊല്ലുറേര്. 17ബുദ്ദില്ലാത്തവാര്‌ണ പാസേമ് കുറുഡാര്‌ണ പാസേമ് ഇര്‌ക്കവാരെ, ഇദിലി ഏദ് ബെല്ല്യാദ്? പൊന്നൊ ഇല്ലെ അദ്‌ണ സുത്താപ്പാക്ക്‌റ സാമികൂരെഗൊ? 18<ഒരുത്താ് പലി കൊഡുക്ക മദ്‌ള്‌ണ സൊല്ലി സത്ത്യ അഡിത്ത അദ് ബെല്ല്യ കാര്യ അല്ല എന്ത്‌മ്, ആന അദ്‌ക്കുദ്ദാക്ക് ബെത്തിര്‌ക്ക പലി കൊഡുക്ക ജാദിന സൊല്ലി സത്ത്യ അഡിത്ത അയ്യി സത്ത്യ അഡിത്ത കാര്യണ സെയ്‌ദ് കൊഡുക്ക്യ ണിനാക്ക് പൊറുപ്പുണ്ടു> എന്ത് ണിമ്മ സൊല്ലുറേര്. 19കുറുഡാര്‌ണ പാസെ ഇര്‌ക്കവാരെ, ഇദിലി ഏദ് ബെല്ല്യാദ്? പലി കൊഡുക്ക ജാദ്യൊ ഇല്ലെ പലി കൊഡുക്ക ജാദിന സുത്താപ്പാക്ക്‌റ മദ്‌ളൊ? 20അദ്‌ണാലെ പലി കൊഡുക്ക മദ്‌ള്‌ണ സൊല്ലി സത്ത്യ അഡിക്കവാ് പലി കൊഡുക്ക മദ്‌ള്‌ണാമ് അദ്‌ക്കുദ്ദാക്ക് ബെത്തിര്‌ക്ക പലി കൊഡുക്ക ജാദിനാമ് സൊല്ലി സത്ത്യ അഡിക്കാ്. 21ഒരുത്താ് സാമികൂരേന സൊല്ലി സത്ത്യ അഡിത്ത, അവാ് സാമികൂരെനാമ് അദിലിര്‌ക്കവാനാമ് സൊല്ലി സത്ത്യ അഡിക്കാ്. 22മേലോഗണ സൊല്ലി സത്ത്യ അഡിക്കവാ്, സാമി കുക്കാക്ക കുറിഞ്ചിനാമ് അദിലി കുക്കാന്തിര്‌ക്ക സാമിനാമ് സൊല്ലി സത്ത്യ അഡിക്കാ്.
23ബക്‌ദിക്കാറാരായി ണഡിക്ക ബേദ ബാത്ത്യലാമ് പരിസലാമ് ആയിര്‌ക്കവാരെ, ണിമാക്ക് സെറ്റെ കജട്ട കജട്ടത്തെ. കല്‌പൂരതൊളസി, അയിമോദഗ, ജീരാഗെ ഇദിലിര്‌ന്തെല്ല സാമിക്ക് ണിമ്മ പത്തിലി ഒരു പങ്ക് കൊഡുക്കേര്. ആന ണേര്‌മെക്കാറാനായി ഇര്‌ക്കാദ്‌ണാമ്, സാമ്യോഡെ ണമ്പിക്കെ ബെത്ത് ണഡാക്കവാനായി ഇര്‌ക്കാദ്‌ണാമ് കറ്‌മ്മ പ്‌ഡിക്കവാനായി ഇര്‌ക്കാദ്‌ണാമ് ഇച്ചെ ബെലെ ഉള്ള കാര്യഗണ ണിമ്മ തള്ള്‌റേര്. മുദ സെയ്‌ദ കാര്യണ തള്ളാദേമ് റണ്ടാവദ് സൊന്ന കാര്യ സെയ്‌ദ്‌മിര്‌ക്കുഡൊ. 24കുറുഡാരാന ബയ്യി കാട്ടിഗളെ, ണിമ്മ കുഡിക്കാദിലിര്‌ന്ത് സിന്ന സിന്ന കുന്നികൊജോട്ടഗണ അരിത്ത് എ്ഡ്‌ക്കേര്. ആന ഒട്ടഗാണ ഗുഡുക്കന ണുങ്കാമ് സെയ്‌രേര്.
25ബക്‌ദിക്കാറാരായി ണഡിക്ക ബേദ ബാത്ത്യലാമ് പരിസലാമ് ആനവാരെ, ണിമാക്ക് സെറ്റെ കജട്ട കജട്ടത്തെ. ണിമ്മ ക്‌ണ്ടിഗണാമ്, ഗളാസ്‌ണാമ് ബെ്ള്യെ ണലമായി കച്ച്‌റേര്. അദേപാസെ ണിമ്മ ബെ്ള്യെ ണല്ലവാരാനാല്‌മ് ണിമ്മ് മനേസ്സ്‌ക്കുള്ളുക്ക് എത്തിനി കെ്ഡേത്താല്‌മ് മദിവരാത്ത ആസെപാഡ്‌മ്, മിദിമീ്റി സെയ്യ ഉള്ള എല്ല കെ്ട്ട ണെനേവുഗാമ് തുമ്പിര്‌ക്ക്‌ദ്. 26കുറുഡാന പാസെ ഇര്‌ക്ക പരിസാനെ, മുദ ണീ ക്‌ണ്ടിഗാദ്‌മ് ഗളാസ്‌ഗാദ്‌മ് ഉള്ളെ ബ്‌ളാക്കി ബെ്ഡിപ്പാക്ക് അപ്പ് ബെ്ള്യെ സുത്താപ്പായിര്‌ക്കു.
27ബക്‌ദിക്കാറാരായി ണഡിക്ക ബേദ ബാത്ത്യലാമ് പരിസലാമ് ആനവാരെ, ണിമാക്ക് സെറ്റെ കജട്ട കജട്ടത്തെ. സിന്നാമ്പ് പൂസിര്‌ക്ക പൊദേവണ പാസെത്തെ ണിമ്മ. അദ് ബെ്ള്യെ ണല്ല ദഗദഗാത്ത് കത്ത്‌ദ്. ആന അദ്‌ക്കുള്ളുക്കൊ, സത്തവാര്‌ദ് എല്‌മ്പ്‌ഗാമ് തുമ്പിര്‌ക്ക്‌ദ്. സത്ത് ണാറ്‌റ ണാറ്റഗാമ് അഡിക്ക്‌ദ്. 28അദേപാസെ ആള്‌ഗ ണിമാണ ബെ്ള്യെ ണോഡുഗാട്ടി ണിമ്മ ണേര്‌മെക്കാറാര് എന്ത് അവാര് ണെനേക്കാര്. ആന ണിമ്മ് മനേസ്സ്‌ക്കുള്ളുക്ക് ബക്‌ദിക്കാറാരായി ണഡിക്ക ണഡിപ്പ്‌മ് കെ്ട്ട എ്ണ്ണഗാമ് തുമ്പിര്‌ക്ക്‌ദ്.
29ബക്‌ദിക്കാറാരായി ണഡിക്ക ബേദ ബാത്ത്യലാമ് പരിസലാമ് ആനവാരെ, ണിമാക്ക് സെറ്റെ കജട്ട കജട്ടത്തെ. സാമിദാസ്‌ഗാദ് പൊദേവഗണ ണിമ്മ ണല്ലാദാക്ക്‌റേര്. ണേര്‌മെക്കാറാര്‌ദ് പൊദേവഗണ സവ്വിസവ്വ്യ അലങ്കാരിത്ത് ബെത്ത്: 30<എമ്മ് പാട്ടല കാലാത്തിലി എമ്മ പെ്ളേത്തിര്‌ന്ത സാമിദാസ്‌ഗണ കൊല്ല്യ എജേഗ മാട്ടേരായിര്‌ന്ത്‌ദ്> എന്ത് ണിമ്മ സൊല്ലുറേര്. 31അച്ചെ സാമിദാസ്‌ഗണ കൊന്റവാര്‌ദ് പ്‌ള്ളെഗാത്തെ ണിമ്മ എന്ത് ണിമാക്ക് താനെ ണിമ്മ കാട്ടി കൊഡുക്കേര്. 32ണിമ്മ് പാട്ടല സെയ്യ പ്‌ഡിത്ത പാവണ ണിമ്മ സെയ്‌ദ് മുഡിക്കേര്.
33പാമ്പ്‌ണ പാസെ, ണാഗ പാമ്പ്‌ണ പാസെ ഇര്‌ക്കവാരെ, ണിമാക്ക് കെ്ഡേക്ക ണരഗ ദണ്ടണേലിര്‌ന്ത് ണിമ്മ എച്ചെ തപ്പിസി കഡാക്കുവേര്? 34അദ്‌ണാലെ ണാന് സാമിദാസ്‌ഗണാമ്, അറുവാളിഗണാമ്, ബേദ ബാത്ത്യലണാമ് ണിമ്മ് പട്ട്‌ക്കെ സൊല്ലിബ്‌ഡ്‌റെ. അവാര്‌ദിലി ലേസ ആള്‌ഗണ ണിമ്മ കുരുസ്‌ക്കെ സേത്തി ആണി അഡിത്ത് കൊല്ലുവേര്. ലേസ ആള്‌ഗണ കൊല്ലുവേര്. ലേസ ആള്‌ഗണ ണിമ്മ എഗുദാര് പരേസ്‌റ കൂരെക്ക്‌റാഗ എ്ഡ്‌ത്ത് പോയി സാട്ടെബാറ്‌ക്കെ അഡിത്ത് ഒരു പട്ടണാത്തിലിര്‌ന്ത് ബേ്റൊരു പട്ടണാക്കെ മുഡിക്കി ബ്‌ഡുവേര്. 35അദ്‌ണാലെ ണേര്‌മെക്കാറനാന ആവേല്‌ണ കൊന്റ കാലാത്തിലിര്‌ന്ത് സാമികൂരേക്ക്‌മ് പലി കൊഡുക്ക മദ്‌ള്‌ക്ക്‌മ് ണഡ്‌ക്കെ ബെത്ത് ണിമ്മ കൊന്റ ബെരക്ക്യാവുദ് മഗാ് സെക്കര്യാവുദ് കാലമാട്ട്‌ക്ക് ബൂമിലി കൊന്റ ണേര്‌മെക്കാറാര്‌ദ് കുറ്റ മുച്ചുഡ ഇപ്പ് പെ്ളേക്ക ണിമ്മ് തലേക്കെ ബരു. 36ഈ കുറ്റ മുച്ചുഡ ഇപ്പേത്ത കാലാത്തില്യവാര്‌ക്ക് ബരു എന്ത് ണേര്‌മായിമ് ണാന് ണിമാക്കെ സൊല്ലുറെ.>>
ഏസു എര്‌സലേമ്‌ണ ണോഡി ദുക്കപഡ്‌റാ്
37<<എര്‌സലേമെ, എര്‌സലേമെ, ണീ സാമിദാസ്‌ഗണ കൊന്റവാമ് ണിന്ന് പട്ട്‌ക്ക് സൊല്ലിബ്‌ട്ടവാര്‌ണ കല്ല് എ്റിന്ത് കൊന്റവാമ്‌ത്തെ. കോയി തന്ന് കുഞ്ചിഗണ ഇ്റാക്കെക്കുള്ളുക്ക് ബെക്ക പാസെ ണിനാണ എന്ന് പട്ട്‌ക്കെ സേത്തി ബെക്ക്യ എത്തിന്യൊ ജമ്പ് എനാക്ക് മനേസ്സിര്‌ന്ത്‌ദ്. ആന ണിനാക്കൊ അദ് പ്‌ഡിക്കാലെ. 38അദ്‌ണാലെ ഇദാ, ണിന്ന് കൂരെ ബ്‌ട്ടകൂരെ ആയി ഒന്റുമ് ഇല്ലാദായെക്കു. 39<ആണ്ടവാന്‌ദ് പേരിലി ബരവാ് ബാഗ്യക്കാറാ്>#സാമി പാട്ട് ബുക്ക് 118:26 എന്ത് ണീ സൊല്ലുറമാട്ട് എനാണ ണീ കാണമാട്ടേര് എന്ത് ണാന് ണിനാക്കെ സൊല്ലുറെ.>>
Trenutno odabrano:
മത്തായി 23: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
