മത്തായി 21
21
ഏസു എര്‌സലേമ്‌ക്കെ കഡാക്കാ്
1അദ്‌ക്ക് പ്‌റ ഏസുമ് തന്ന് സൊല്ലുപഡി ണഡാക്കവാര്‌മ് എര്‌സലേമ്‌ക്ക് എജ്ജ്യ പക്കാനാര്. അച്ചെ ഒലിവ് മലെ അര്‌ഗെ ഇര്‌ക്ക ബേദ്‌പാഗെ ഊര്‌ക്കെ എജ്ജ്‌ഗാട്ടി, തന്ന് സൊല്ലുപഡി ണഡാക്കവാരിലി റണ്ട് ആള്‌ക്കെ ഏസു ഇച്ചെ സൊല്ലിബ്‌ട്ടാ്: 2<<ണിമ്മ അയ്യി മുന്തുക്ക് കാട്ട്‌റ ഊര്‌ക്കെ പോയി; അദിലി കെ്ട്ടി ബെത്തിര്‌ക്ക ഒരു പെ്ട്ടെ കള്‌ദെനാമ് അദ്‌ദ് കുട്ടിനാമ് കാണുവേര്. അദ്‌ണ ഉക്കി എന്ന് പട്ട്‌ക്ക് എ്ഡ്‌ത്ത് ബായിരി. 3എന്ത്‌ക്ക് ഇദ്‌ണ ഉക്കുറേര് എന്ത് ആരാറ്റ് ണിമാണ കേ്ട്ടാക്കി, ആണ്ടവാന്‌ക്ക് ഈ കള്‌ദെനാമ് കുട്ടിനാമ് ബേ്ഡു എന്ത് സൊല്ലിരി. അപ്പ്‌താനെ അവാ് അദ്‌ഗണ ബ്‌ഡുവാ്.>>
4-5<<സീയോന്‌ക്കാറാരെ:
<ഇദാ ണോഡിരി, ണിന്ന് റാജാവു തണിമെക്കാറാനായി കള്‌ദെക്കുദ്ദാക്ക്,
സൊമെ സുമാക്ക കള്‌ദെ കുട്ടിക്കുദ്ദാക്ക്‌ത്തെ ഏ്റി
ണിന്ന് പട്ട്‌ക്ക് ബരാ്>#സെക്കര്യാവു 9:9
എന്ത് സൊല്ലിരി>>
എന്ത് സാമിദാസ് മേലെ സാമി സൊല്ലിര്‌ന്താദ് അദേപാസെ ണഡാക്ക്യ ബേ്ണ്ടിത്തെ ഇച്ചെ ണഡാന്ത്‌ദ്.
6ഏസുദ് സൊല്ലുപഡി ണഡാക്കവാരിലി റണ്ട് ആള് പോയി ഏസു സൊന്ന പാസെ സെയ്‌ദാര്. 7അവാര് കള്‌ദെനാമ് കുട്ടിനാമ് ഓട്ടി എ്ഡ്‌ത്ത് ബന്ത് തമ്മ ഉഡുപ്പുക്കുദ്ദാക്ക് പൊദേക്കാദ്‌ണ അയ്യി കള്‌ദെ കുട്ടിക്കുദ്ദാക്ക് സൂഡ്‌സിനാര്. പ്‌റ ഏസു അദ്‌ക്കുദ്ദാക്ക് ഏ്റി കുക്കാന്താ്. 8എത്തിന്യൊ ആള്‌ഗ തമ്മ പൊദേത്തിര്‌ന്ത സീലെഗണ ബയ്യിക്കെ ബിരിസിനാര്. പഗ്‌ദി ആള്‌ഗ മരാത്തിലിര്‌ന്ത് സപ്പഗ ബെ്ട്ടി ബന്ത് ബയ്യിക്കെ പാസിനാര്. 9അവാന്‌ദ് മുന്നുക്ക്‌മ് പിന്ന്‌ക്ക്‌മ് ണഡാന്ത് കൊണ്ടിര്‌ന്ത ആള്‌ഗ:
<<ദാവീദ് കാല്‌കെ്ളേക്ക് പട്ടവാന്‌ക്ക് ഓസാന!>>
<<ആണ്ടവാന്‌ദ് പേരിലി ബരവാ് ബാഗ്യക്കാറാ്!>>#സാമി പാട്ട് ബുക്ക് 118:26
<<എല്ലാദ്‌ണ ബ്‌ഡ ഉജാന്തവാന്‌ക്ക് ഓസാന#21:9ഓസാന ഓസാന എന്ത് എവുറാര് ണായാത്തിലി സൊല്ലുറ ബാക്ക്‌ക്ക് അര്‌ത്ത എമാണ ഇപ്പ് കാപാറ്റുഡൊ എന്ത്‌ത്തെ. ഇദ് ഇസ്‌റേല്‌ക്കാറാര് സാമിന ഒഗെ ഇക്ക്യ ബേ്ണ്ടിമ് സൊല്ലുറാര്. >>
എന്ത് സൊല്ലി ബെല്ല്യാദ്‌ക്ക് ആലാത്ത് ക്‌ളാമ്പിനാര്.
10ഏസു എര്‌സലേമ്‌ക്കെ എജ്ജ്‌ഗാട്ടി അയ്യി പട്ടണ മുച്ചുഡ ഗ്‌ഡിനൊ എന്തായി: <<ഇവാ് ആര്?>> എന്ത് ആള്‌ഗ കേ്ട്ടാര്.
11അക്കുളെ ആള്‌ഗ: <<ഇവാത്തെ ഗെലീലെ ണാഡില്യ ണസറത്തിലിര്‌ക്ക സാമിദാസാന ഏസു>> എന്ത് സൊന്നാര്.
ഏസു സാമികൂരേലി
12ഏസു സാമികൂരേക്കെ പോയി അദിലി ഏവാര സെയ്‌രവാര്‌ണാമ് ബാങ്ക്‌റവാര്‌ണാമ് എല്ല ബെ്ള്യെ മുഡിക്കി ബ്‌ട്ടാ്. പണ കയ്യിമാറ്‌റവാര്‌ദ്#21:12പണ കയ്യിമാറ്‌റവാര്‌ദ് ഉലഗാത്തില്യ പല ണാഡ്‌ഗാളിലിര്‌ന്ത് എത്തിന്യൊ ആള്‌ഗ എര്‌സലേമില്യ സാമികൂരേക്കെ കുമ്മുഡ്യ ബര്‌ഗാട്ടി സാമിക്ക് കാണിക്കെ കൊഡുക്ക്യ ബേ്ണ്ടി അദാദ് ണാഡില്യ പണഗണാത്തെ എ്ഡ്‌ത്ത് ബന്തിര്‌ന്താദ്. അയ്യി പണാണ സാമികൂരേല്യ പണ ആക്കി മാറ്റ്‌റവാര്‌ണാത്തെ പണ കയ്യിമാറ്‌റവാര് എന്ത് സൊല്ലുറാദ്. മേസെഗണാമ്, സോറെ പക്കിഗണ ബിക്കവാര്‌ദ് ബെഞ്ചിഗണാമ് ഉന്തി മറ്‌ത്താ്. 13പ്‌റ അവാര്‌ക്ക്: << <എന്ന് കൂരേന പരേസ്‌റ കൂരെ എന്ത് സൊല്ലുവാര്>#എസയ്യാ് 56:7 എന്ത് എ്ള്‌ദിര്‌ക്ക്‌ദ്. ആന ണിമ്മ അദ്‌ണ <ത്‌റ്‌ട്ടാര് തങ്ക്‌റ അളെ>#ഇരെമ്യാ് 7:11 ആക്കി ബെത്തിര്‌ക്കേര്>> എന്ത് സൊന്നാ്.
14സാമികൂരേലി ഏസു ഇര്‌ക്കാട്ടി കുറുഡാര്‌മ് മൊണ്ടിഗാമ് അയാള് പട്ട്‌ക്കെ ബന്താര്. അവാര്‌ഗണെല്ല അവാ് തെ്ള്‌സിനാ്. 15ആന എഗുദ പൂസാരി തലെവലാമ് ബേദ ബാത്ത്യലാമ് അവാ് സെയ്‌ദ അദിസ്യണാമ് <<ദാവീദ് കാല്‌ക്ക് പട്ടവാന്‌ക്ക് ഓസാന>> എന്ത് സാമികൂരേലി ബെത്ത് മക്കഗ ആലാക്കാദ്‌ണാമ് കാണ്‌ഗാട്ടി അവാര്‌ക്ക് മൊനെ ബന്ത്‌ദ്.
16അക്കുളെ അവാര് ഏസുക്കെ: <<ഈ മക്കഗ സൊല്ലുറാദ്‌ണ ണീ കേ്ക്കേന?>> എന്ത് കേ്ട്ടാര്.
അക്കുളെ ഏസു അവാര്‌ക്ക്: <<ഈ്,
<പ്‌ള്ളെഗാമ്, പച്ചെ പ്‌ള്ളെഗാമ് അവാര് ബായാലെ,
ണിനാണ പെര്‌മെപഡ്‌സ്യ ണീ താനെ അവാര്‌ണ ഒരിക്കി ബെത്തിര്‌ക്കെ>#സാമി പാട്ട് ബുക്ക് 8:2
എന്ത കാര്യണ ഇന്നാരമാട്ട്‌ക്ക്‌മ് ണിമ്മ പഡിത്ത് ണോഡാലേഗ?>> എന്ത് കേ്ട്ടാ്.
17പ്‌റ ഏസു അവാര് പട്ടിലിര്‌ക്കാദെ അയ്യി പട്ടണാത്തിലിര്‌ന്ത് ബെദനിക്കെ പോയി അയ്യി അന്തിലി അദിലി തങ്കിനാ്.
ഏസു അത്തി മരാണ സാപ ഇക്ക്‌റാ്
18ഏസു ബെ്ഡ്യണേര പട്ടണാക്കെ തിലിമ്പി പോഗാട്ടി അവാന്‌ക്ക് പജി പ്‌ഡിത്ത്‌ദ്. 19അയ്യി ബയ്യ്യോരാത്തിലി ഒരു അത്തി മരാണ കണ്ട് അയ്യി മ്‌ണ്ടെ പട്ട്‌ക്കെ ഏസു പോനാ്. ആന അദിലി എലെ അല്ലാദെ ബേ്റെ ഒന്റുമ് ഇര്‌ക്കാലെ. അദ്‌ണാലെ അത്തി മരാണ ണോഡി: <<ണീ ഇനി എപ്പേക്ക്‌മ് കായി പ്‌ഡിക്കാദെ ഇര്‌ക്കുഡൊ>> എന്ത് സൊന്നാ്. അപ്പ്‌താനെ അയ്യി അത്തി മര ഉണാന്തെക്കിറ്റ്.
20ഏസുദ് സൊല്ലുപഡി ണഡാക്കവാര് ഇദ്‌ണ കണ്ട്: <<ഇത്തറ സട്ടന എച്ചെ ഈ അത്തി മര ഉണാന്തെക്കിറ്റ്?>> എന്ത് സൊല്ലി അദിസ്യപട്ടാര്.
21അദ്‌ക്ക് ഏസു: <<ണിമ്മ സന്തേഗപഡാദെ ണമ്പിക്കുള്ളവാരായി ഇര്‌ന്ത, ണിമാക്ക്‌മ് ഈ അത്തി മരാണ ണാന് സെയ്‌ദാദ്‌ണ പാസെ സെയ്യ മുഡ്യു. അദ്‌താനെമല്ല ഈ മലേന <ഇദിലിര്‌ന്ത് അഡ്യോഡെ പ്‌ഡാങ്കി പോയി കഡാല്‌ക്കെ ബീ്> എന്ത് സൊന്നാല് ഗൂഡി അദ് അദേപാസെ ണഡാക്കു എന്ത് ണേര്‌മായിമ് ണാന് ണിമാക്കെ സൊല്ലുറെ. 22ണിമ്മ എന്താറ്റ്‌ക്ക് ബേ്ണ്ടി ണമ്പിക്കോഡെ പരേസ്‌ഗാട്ടി അദ് ണിമാക്ക് കെ്ഡേക്കു>> എന്ത് സൊന്നാ്.
ഏസുക്കിര്‌ക്ക അദിഗാരണ പറ്റി കേ്ക്കാര്
23ഏസു സാമികൂരേക്കെ പോയി ആള്‌ഗാക്കെ പഡിസി കൊണ്ടിര്‌ക്കാട്ടി, എഗുദ പൂസാരി തലെവലാമ് എഗുദ മൂപ്പലാമ് ഏസു പട്ട്‌ക്കെ ബന്ത്: <<ണീ എന്ത അദിഗാരത്തിലി ഈ കാര്യഗെല്ല സെയ്‌രെ? ണിനാക്ക് ഈ അദിഗാര ആര് തന്താദ്?>> എന്ത് കേ്ട്ടാര്.
24അദ്‌ക്ക് ഏസു: <<ണാന്‌മ് ണിമാണ ഒരു കേ്ള്‌വി കേ്ക്കെ. അദ്‌ക്ക് ണിമ്മ എനാക്ക് ബദ്‌ള് സൊന്ന ണാന്‌മ് എന്ത അദിഗാരത്തിലി ഇദ്‌ഗെല്ല സെയ്‌രെ എന്ത് ണാന് ണിമാക്കെ സൊല്ലുവെ. 25ഓഗന്നാന്‌ക്ക് തണ്ണിക്ക് മുളുഗ്‌സ്‌റാദ്‌ക്കുള്ള അദിഗാര ഏദിലിര്‌ന്ത് കെ്ഡേത്താദ് സാമ്യോഡിര്‌ന്തൊ, ഇല്ലെ മന്‌സാരോഡെ ഇര്‌ന്തൊ?>> എന്ത് കേ്ട്ടാ്.
അവാര് തമ്മ തമ്മ പേസി ഓസണെ എ്ഡ്‌ത്തിര്‌ന്ത് ഇച്ചെ സൊന്നാര്: << <സാമിലിര്‌ന്ത്> എന്ത് സൊന്ന <പിന്നെ എന്ത്‌ക്ക് ണിമ്മ ഓഗന്നാന ണമ്പാലെ> എന്ത് ഏസു കേ്ക്കുവാ്. 26ആന ണമ്മ <മന്‌സാരോഡിര്‌ന്ത്> എന്ത് സൊന്ന ആള്‌ഗണാമ് ണമാക്ക് കോവെ. എന്ത്‌ക്കെന്റ ആള്‌ഗ ഒട്ടുക്ക് ഓഗന്നാന ഒരു സാമിദാസ് എന്ത് അല്ല ണെനേക്കാദ്.>>
27അദ്‌ണാലെ അവാര് ഏസുക്കെ: <<എമാക്ക് തെര്യ>> എന്ത് സൊന്നാര്.
അക്കുളെ ഏസു: <<അപ്പ് ണാന് എന്ത അദിഗാരത്തിലി ഇദെല്ല സെയ്‌രെ എന്ത് ണാന്‌മ് ണിമാക്കെ സൊല്ലുറാദില്ലെ>> എന്ത് സൊന്നാ്.
റണ്ട് മഗനാര്‌ദ് കദെ
28<<എന്താല്‌മ് ണിമ്മ ഇദ്‌ണ പറ്റി എന്ത ണെനേക്കേര്? ഒരുത്താന്‌ക്ക് റണ്ട് മഗനാര് ഇര്‌ന്താര്. അദിലി അവാ് ബെല്ല്യ മഗാന്‌ക്കെ: <അയ്യ, ണീ ഇന്റ് മുന്തിരി ദോട്ടാക്കെ പോയി ബേലെ സെയ്> എന്ത് സൊന്നാ്.
29അക്കുളെ അവാ്: <ണാന് ഒല്ലെ> എന്ത് സൊന്നാ്. ആന പ്‌റ മനേസ്സ് മാറി പോഗാമ് സെയ്‌ദാ്.
30പ്‌റ അപ്പാ് സിന്ന മഗാന്‌ക്കേമ് അദേപാസെ താനെ സൊന്നാ്. അക്കുളെ അവാ്: <ണാന് പോരെലപ്പ> എന്ത് സൊന്നാ്. ആന അവാ് പോഗാമില്ലെ.
31ഇവാര് റണ്ട് ആളിലി ആര് അപ്പാന്‌ദ് ആസെപഡി സെയ്‌ദാദ്?>> എന്ത് ഏസു അവാര്‌ണ കേ്ട്ടാ്.
അക്കുളെ അവാര്: <<ബെല്ല്യ മഗാ്>> എന്ത് സൊന്നാര്.
ഏസു അവാര്‌ക്കെ: <<ണ്‌ഗ്‌ദി പിരിക്കവാര്‌മ് ബേസ്യാഡ്‌റവാര്‌മ് ണിമാക്ക് മുദ സാമി ആള്‌റാദ്‌ക്ക് പട്ടവാര് ആരാര് എന്ത് ണേര്‌മായിമ് ണാന് ണിമാക്കെ സൊല്ലുറെ. 32എന്ത്‌ക്കെന്റ ഓഗന്നാ് ണേര്‌മോഡെ പെ്ളേക്കാദ്‌ക്കുള്ള കാര്യ പഡിസി കൊണ്ട് ണിമ്മ് പട്ട്‌ക്ക് ബന്താ്. ണിമ്മ അവാ് സൊന്നാദ്‌ണ ണമ്പാലെ. ആന ണ്‌ഗ്‌ദി പിരിക്കവാര്‌മ് ബേസ്യാഡ്‌റവാര്‌മ് അവാ് സൊന്നാദ്‌ണ ണമ്പിനാര്. അദ്‌ണ കണ്ട് ഗൂഡി ണിമ്മ മനേസ്സ് മാറി അവാന ണമ്പാമില്ലെ>> എന്ത് സൊന്നാ്.
ഗുത്തഗെക്കാറാര്‌ണ പറ്റ്യുള്ള കദെ
33അദ്‌ക്ക് പ്‌റ ഏസു: <<ഇദാ, ബേ്റൊരു കദെ ഗൂഡി കേ്ളിരി. ഒരു മുന്തിരി ദോട്ട ഉണ്ടാക്കിന ഒരു കാഡ്‌ക്കാറാ് ഇര്‌ന്താ്. അയാള് അയ്യി ദോട്ടാക്ക് സുറ്റുമ് ബേലി കെ്ട്ടി മുന്തിരിന മെ്ട്ടി സാര എ്ഡ്‌ക്ക്യ അറേക്കെ കുയ്യി ഉണ്ടാക്കിനാ്. പ്‌റ കാവപന്താമ് ബെത്താ്. അദ്‌ക്ക് പ്‌റ അയാള് മുന്തിരി ദോട്ടണ ഗുത്തഗെക്കാറാര്‌ക്ക് ഗുത്തഗേക്ക് കൊഡുത്ത് ബേ്റെ ണാഡ്‌ക്ക് പോനാ്. 34മുന്തിരി പഗ പറ്‌ക്ക ഗള്യെ ആഗാട്ട്യെല്ല മുന്തിരി ദോട്ടക്കാറാ് തനാക്കുള്ള പങ്ക്‌ണ ഏറ്റ് ബര്യ തന്ന് പണ്ണ്യക്കാറാര്‌ണ ഗുത്തഗെക്കാറാര് പട്ട്‌ക്കെ സൊല്ലിബ്‌ട്ടാ്.
35ആന അയ്യി ഗുത്തഗെക്കാറാര് അയാള്‌ദ് പണ്ണ്യക്കാറാര്‌ണ പ്‌ഡിത്ത് ഒരുത്താന അഡിത്താര്, പിന്നെ ഒരുത്താന കൊന്റാര്, ബേ്റൊരുത്താന കല്ല് എ്റിന്താര്. 36അക്കുളെ അയ്യി ദോട്ടക്കാറാ് മുദ ബ്‌ട്ടാദ്‌ണ ബ്‌ഡ മൊത്തന പണ്ണ്യക്കാറാര്‌ണ പിന്നേമ് സൊല്ലിബ്‌ട്ടാ്. അവാര്‌ണാമ് അയ്യി ഗുത്തഗെക്കാറാര് അച്ചെത്തെ സെയ്‌ദ് ബ്‌ട്ടാര്. 37കഡേസിലി അയാള്: <എന്ന് മഗാന അവാര് മദിക്കുവാര്> എന്ത് സൊല്ലി, തന്ന് മഗാന അവാര്‌ദ് പട്ട്‌ക്കെ അന്‌പ്പിനാ്.
38ആന ഗുത്തഗെക്കാറാര് അയാള്‌ദ് മഗാന കണ്ട്: <ഇവാ്ത്തെ ഈ ദോട്ടാക്ക് ഉരിമെക്കാറാ്. അദ്‌ണാലെ ബായി, ഇവാന ണമ്മ കൊന്റ് അവാന്‌ദ് സൊത്തുഗണൊട്ടുക്ക് ണമ്മ എ്ഡ്‌ക്കില> എന്ത് തമ്മ തമ്മ പേസിനാര്. 39അച്ചെ അവാര് അവാനാമ് പ്‌ഡിത്ത് മുന്തിരി ദോട്ടാക്ക് ബെ്ള്യെ എ്ഡ്‌ത്ത് പോയി കൊന്റെക്കിനാര്.
40അച്ചാനാക്കി മുന്തിരി ദോട്ടക്കാറാ് ബര്‌ഗാട്ടി അവാ് അയ്യി ഗുത്തഗെക്കാറാര്‌ണ എന്ത സെയ്‌വാ്?>> എന്ത് കേ്ട്ടാ്.
41അദ്‌ക്ക് അവാര്: <<അയ്യി കേ്ഡ്‌ഗെ്ട്ടവാര്‌ണ റമ്പ കൊഡിമെപഡ്‌സി കൊന്റ്, മുന്തിരി പഗ പറ്‌ക്ക ഗള്യേക്ക് താനെ തനാക്ക് കെ്ഡേക്ക മുന്തിരി പഗ പങ്ക് തര ബേ്റെ ഗുത്തഗെക്കാറാര്‌ക്കെ മുന്തിരി ദോട്ടണ കൊഡുക്കുവാ്>> എന്ത് സൊന്നാര്.
42ഏസു അവാര്‌ക്കെ:
<< <കൂരെ ബേലെക്കാറാര് മോസ എന്ത് എ്റിന്തെക്കിന അദേ കല്ല് താനെ,
കൂരെ എ്ഡ്‌ക്കാട്ടി എല്ല കല്ല്‌ഗണ ബ്‌ഡ മുക്ക്യമാന കല്ല്#21:42 മുക്ക്യമാന കല്ല് ബേസ്‌മട്ടാദ് മൂലേല്യ കല്ല് എന്തൊ കാവഡിന പാസെ ഇര്‌ക്ക ബാസാക്ക് മേലെ ണഡ്‌ക്കെ ആയി ബെക്ക കല്ല് എന്തൊ ഇദ്‌ണ അര്‌ത്ത ആക്കില. ണമ്മ് ആള്‌ഗ കൂരെ എ്ഡ്‌ക്കാട്ടി പെ്ര്‌ങ്കാ് കമ്പ് കൂരേന ഒറേപ്പാക്കി ബെക്ക പാസെ എഗുദാര് കൂരെ എ്ഡ്‌ക്കാട്ടി ഈ കല്ല്‌ത്തെ അവാര്‌ദ് കൂരേന ഒറേപ്പാക്കി ബെക്കാദ്. ആറ്റ്.
ഇദ് ആണ്ടവനാലെ ണഡാന്ത്‌ദ്.
അദ് ണമ്മ് കണ്ണ്‌ക്ക് അദിസ്യുള്ള കാര്യ ആയിര്‌ക്ക്‌ദ്>#സാമി പാട്ട് ബുക്ക് 118:22,23
എന്ത് സാമി ബുക്കിലി എ്ള്‌ദിര്‌ക്കാദ്‌ണ ണിമ്മ ഇന്നിമ് പഡിക്കാലേഗ?
43അദ്‌ണാലെ ണാന് ണിമാക്കെ സൊല്ലുറെ, സാമി ആള്‌റാദ്‌ക്ക് പട്ടവാര് ആര ണിമാണ തള്ളി എക്കി സാമി സൊല്ലുപഡി ണഡാക്ക ബേ്റെ ജാദിഗണ സാമി ആള്‌റാദ്‌ക്ക് പട്ടവാര് ആക്കുവെ. 44ഈ കല്ല്‌ക്കെ ബീ്റവാനെല്ല തുണ്ടുതുണ്ട ആവാര്. ആന ഈ കല്ല് ആരാറ്റ്‌ക്കെ ബ്‌ന്താല്‌മ് അദ് അവാന തവുഡുപൊഡി ആക്കി തള്ളു>> എന്ത് സൊന്നാ്.#21:44 മുദ എ്ള്‌ദിന കായിദണ ണോഡി എ്ള്‌ദിന ലേസ കായിദാത്തിലി ണാപ്പത്തി ണാലാവദ് സുലാക്ക ഇല്ലെ.
45ഏസു സൊന്ന കദെഗണ എഗുദ പൂസാരി തലെവലാമ് പരിസലാമ് കേ്ക്കാട്ടി, അദ് തമാണ പറ്റിത്തെ സൊന്നാദ് എന്ത് അവാര്‌ക്ക് തെരിന്ത്‌ദ്. 46അദ്‌ണാലെ അവാര് ഏസുണ പ്‌ഡിക്ക്യ ണോഡിനാര്. ആന ആള്‌ഗ ഒട്ടുക്ക് ഏസുണ സാമിദാസ് എന്ത് ണമ്പ്‌റാദ്‌ണാലെ അവാര് ആള്‌ഗണ അഞ്ചിനാര്.
Trenutno odabrano:
മത്തായി 21: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
