മത്തായി 15
15
പാട്ടിപാട്ടല ബെത്ത സട്ട
1അദ്‌ക്ക് പ്‌റ ലേസ പരിസലാമ്, ബേദ ബാത്ത്യലാമ് എര്‌സലേമിലിര്‌ന്ത് ഏസു പട്ട്‌ക്കെ ബന്ത്: 2<<ണിന്ന് സൊല്ലുപഡി ണഡാക്കവാര് ണമ്മ്‌ദ് പാട്ടിപാട്ടല സട്ട്‌മെ്ട്ട്‌പഡി ണഡാക്കാത്താദ് എന്ത്‌ക്ക്? അവാര് സാപാഡ്‌ക്ക് മുദ കയ്യി കച്ചാദെ തിങ്കാരല്ല?>> എന്ത് കേ്ട്ടാര്.
3അക്കുളെ ഏസു ഇച്ചെ സൊന്നാ്: <<ണിമ്മ് പാട്ടിപാട്ടല സട്ട്‌മെ്ട്ട്‌പഡി സെയ്യ ബേ്ണ്ടി ണിമ്മ സാമിദ് സട്ടാക്ക് കെ്ട്ട്‌പട്ട് ണഡാക്കാത്താദ് എന്ത്‌ക്ക്? 4<ണീ ണിന്ന് അവ്വെ അപ്പലണ മദിക്കുഡൊ>#പയണ 20:12; മറ്‌ദെ സൊല്ലുറ സട്ട 5:16 എന്ത്‌മ് <അവ്വെ അപ്പലണ കുറ്റ സൊല്ലുറവാന കൊല്ലുഡൊ>#പയണ 21:17; ലേവ്യാര് 20:9 എന്ത്‌മ് സാമി സട്ട ബെത്തിര്‌ക്കാനല്ല? 5ആന ണിമ്മ ഒരുത്താന തന്ന് അവ്വെ അപ്പലാക്കെ കൊഡുക്കാദ്‌ണ, <ണാന് ണിമാക്ക് തര്യ ഇര്‌ക്കാദ്‌ണ സാമിക്ക് ണേര്‌സെ കൊഡുക്കെ> എന്ത് തന്ന് അപ്പാന്‌ക്കൊ അവ്വെക്കൊ സൊന്ന മദി, 6അവാ് അപ്പന മദ്‌സ ബേ്ഡ എന്ത് സൊല്ലുറേര്. ഇച്ചെ ണിമ്മ് സട്ട്‌മെ്ട്ട്‌ഗാക്ക് ബേ്ണ്ടി സാമിദ് സട്ടണ ബെലെ ഇല്ലാദാക്കി എക്ക്‌റേര്. 7ബെ്ള്യെ ണല്ലവാരായി ണഡിക്കവാരെ, ണിമാണ പറ്റി എസയ്യാ് സാമിദാസ് സൊല്ലിര്‌ക്കാദ് എത്തറ സെരി.
8<ഈ ആള്‌ഗ ബായിലി എനാണ മദിക്കാര്;
ആന അവാര്‌ദ് മനേസ്സിലി ണാന് ഇല്ലെ,
9അവാര് മന്‌സാര്‌ദ് സട്ടണ സാമിദ് സട്ട എന്ത് സൊല്ലി പഡ്‌സ്‌റാദ്‌ണാലെ,
അവാര് എനാണ കുമ്മുഡ്‌റാദ് ബെ്റ്‌ദെത്തെ>#എസയ്യാ് 29:13
എന്ത് അയാള് സൊല്ലിര്‌ക്കാ്.>>
മന്‌സാര്‌ണ സുത്താപ്പില്ലാത്തവാ് ആക്ക്‌റാദ്‌ണ പറ്റി
10പ്‌റ ഏസു ആള്‌ഗണ അര്‌ഗെ ഒളേത്ത് ബര്‌സി അവാര്‌ക്കെ: <<ണാന് സൊല്ലുറാദ്‌ണ സൊക്കാന കേ്ട്ട് ണെപ്പ്‌കെ്ഡേസിരി. 11മന്‌സാന കെ്ഡ്‌സ്‌റാദ് ബേ്റ്‌ക്കുള്ളെ പോരാദല്ല, ബായിമേലെ ബരാദ്‌ത്തെ അവാന കെ്ഡ്‌സ്‌റാദ്>> എന്ത് സൊന്നാ്.
12അക്കുളെ തന്ന് സൊല്ലുപഡി ണഡാക്കവാര് ഏസുദ് അര്‌ഗെ ബന്ത്: <<പരിസല ഈ ണായണ കേ്ട്ട് മൊനേക്ക്‌പട്ടാദ് ണിനാക്ക് തെര്യാലേഗ?>> എന്ത് കേ്ട്ടാര്.
13അക്കുളെ ഏസു: <<മേലോഗാത്തിലിര്‌ക്ക എന്ന് അപ്പാ് ണഡ്‌ക്കാത്ത സെ്ഡിഗെല്ല ബേരോഡെ പ്‌ഡാങ്കി എക്കു. 14അവാര്‌ണ പോയ ബ്‌ഡി, അവാര് കുറുഡാരായിര്‌ക്ക തലെവലാത്തെ. കുറുഡാ് കുറുഡാന ബയ്യി കാട്ടിന റണ്ട് ആള്‌മ് കുയ്യിക്കെ ബീ്വാര്>> എന്ത് സൊന്നാ്.
15അക്കുളെ പത്ത്‌റോസ് ഏസുക്കെ: <<ഈ കദേദ് അര്‌ത്തണ സെറ്റെ എമാക്ക് സൊക്കാന സൊല്ലി തരുഡൊ>> എന്ത് സൊന്നാ്.
16അദ്‌ക്ക് ഏസു അവാര്‌ക്കെ: <<ണിമാക്ക് ഇന്നിമ് അദ്‌ഗണ ണെപ്പ്‌കെ്ഡേസ്യ മുഡ്യാലേഗ? 17മന്‌സാന്‌ദ് ബായിക്കുള്ളെ പോരാദ് ബേ്റ്‌ക്കുള്ളെ പോദ്. അദ് ഗുബിക്കിര്‌ന്ത തീന്ത്‌ദ് എന്ത് ണിമാക്ക് തെര്യാഗ? 18ആന ബായിലിര്‌ന്ത് ബെ്ള്യെ ബരാദ് മനേസ്സ് കുള്ളുക്കിര്‌ന്ത് ബര്‌ദ്. അദ്‌ത്തെ അവാന കെ്ഡ്‌സ്‌റാദ്. 19അദ് എച്ചെന്ത കെ്ട്ടെ്ണ്ണ, കൊലെ സെയ്‌രാദ്, ബേസ്യാഡ്‌റാദ്, ബെപ്പാട്ടിബെത്ത് ണഡാക്കാദ്, ത്‌റ്‌ഡ്‌റാദ്, കുറ്റക്കാറാ് അല്ലാത്തവാന കുറ്റക്കാറാ് എന്ത് സൊല്ലുറാദ്, കുറ്റ സൊല്ലുറാദ്, ഇദ്‌ഗെല്ലാത്തെ മന്‌സാന്‌ദ് മനേസ്സിലിര്‌ന്ത് ബരാദ്. 20ഇദ്‌ഗെല്ലത്തമ്പ ഒരു മന്‌സാന കെ്ഡ്‌സ്‌റാദ്. കച്ചാത്ത കയ്യിലി തിങ്കണാലെ അല്ല, മന്‌സാ് കെ്ഡ്‌റാദ്>> എന്ത് സൊന്നാ്.
കാനാന്യക്കാറിസിദ് ണമ്പിക്കെ
21ഏസു അയ്യി എ്ഡേന തള്ളി സോര്‌ക്ക്‌മ് സീദോന്‌ക്ക്‌മ് പോനാ്. 22അയ്യി ണാഡിലി പെ്ളേത്തിര്‌ന്ത ഒരു കാനാന്യക്കാറിസി ഏസു പട്ട്‌ക്കെ ബന്ത്: <<ആണ്ടവാനെ, ദാവീദ് കാല്‌ക്ക് പട്ടവാനെ, എന്നോഡെ സെറ്റെ ബേ്റ്‌വായി ബേഡോമെ. എന്ന് മഗാക്ക് കെ്ട്ടജാദി തട്ടി അവ റമ്പ കൊഡിമെപഡ്‌റ>> എന്ത് ബെല്ല്യാദ്‌ക്ക് അഗാറികൊണ്ട് സൊന്ന.
23ആന ഏസു അവാളോഡെ ഒരു ണായ ബീസാക്ക് സൊല്ലാലെ. അദ്‌ക്ക് തന്ന് സൊല്ലുപഡി ണഡാക്കവാര് ഏസു പട്ട്‌ക്കെ ബന്ത്: <<അവ ണമ്മ് പിന്ന്‌മേലെ അഗ്‌ദ്‌കൊണ്ട് ബര. എന്താറ്റ് സൊല്ലിബ്‌ഡുഡോമെ>> എന്ത് ഏസുണ ബേ്ണ്ടിനാര്.
24അദ്‌ക്ക് ഏസു: <<എനാണ അന്‌പ്പിര്‌ക്കാദ് ഇസ്‌റേല്‌ക്കാറാരിലി കാണാദായെക്കിന കൊറ്യാഡ്‌ഗ പാസെ ഇര്‌ക്ക ആള്‌ഗ പട്ട്‌ക്ക്‌ത്തെ>> എന്ത് സൊന്നാ്.
25ആന അവ ഏസു പട്ട്‌ക്കെ ബന്ത് സന്ത് ഊന്റി: <<ആണ്ടവാനെ, എനാണ സെറ്റെ കയ്യിതാങ്കുഡോമെ>> എന്ത് സൊന്ന.
26ഏസു അവാക്കെ: <<പ്‌ള്ളേഗാദ് അഡേന എ്ഡ്‌ത്ത് ണായികുട്ടിഗാക്ക് ഇക്കി കൊഡുക്കാദ് സെര്യല്ല>> എന്ത് സൊന്നാ്.
27അക്കുളെ അവ: <<ആണ്ടവാനെ ണേര്‌ത്തെ, ആന ണായികുട്ടിഗ ഗൂഡി സാക്ക്‌റവാര് തിങ്ക ക്‌ണ്ണാത്തിലിര്‌ന്ത് അഡി അലേര മുറിഗണ തിങ്കാദില്ലെഗ?>> എന്ത് സൊന്ന.
28അക്കുളെ ഏസു: <<പൊമ്പുളേഗെ, ണിന്ന് ണമ്പിക്കെ മ്‌ഗ്‌ന്താദ്‌ത്തെ. അദ്‌ണാലെ ണീ ആസെപട്ട പാസെ ണഡാക്കുഡൊ>> എന്ത് ഏസു സൊന്നാ്. അപ്പ്‌താനെ അവാള്‌ദ് മഗ തെ്ളിന്ത.
ഏസു എത്തിന്യൊ ണോയിക്കാറാര്‌ണ തെ്ള്‌സ്‌റാ്
29ഏസു അദിലിര്‌ന്ത് പോയി ഗെലീലെ കഡാലര്‌ഗെ എജ്ജി ഒരു മലേക്കെ ഏ്റി അദ്‌ക്കെ കുക്കാന്താ്. 30എത്തിന്യൊ ആള്‌ഗ, മൊണ്ടിഗണാമ്, കുറുഡാര്‌ണാമ്, ഊമെഗണാമ്, ഗൂനാര്‌ഗണാമ് അച്ചെ പല ദിന്‌സ് ണോയിക്കാറാര്‌ണ ഏസുദ് കാല് പട്ട്‌ക്കെ എ്ഡ്‌ത്ത് ബന്ത് ബെത്താര്. ഏസു അവാര്‌ണ മുച്ചുഡ തെ്ള്‌സിനാ്. 31ഊമെഗ പേസ്‌റാദ്‌ണാമ്, മൊണ്ടിഗ ണഡാക്കാദ്‌ണാമ്, കുറുഡാര്‌ക്ക് പാര്‌വെ കെ്ഡേത്താദ്‌ണാമ്, ഗൂനാര് തെ്ളിരാദ്‌ണാമ് ആള്‌ഗ കണ്ട് അദിസ്യപട്ട്: <<ഇസ്‌റേല് സാമി ബെല്ല്യവാ്>> എന്ത് സൊല്ലി ഒഗെ ഇക്കിനാര്.
ണാലായിര ആണ്‌മക്കഗാക്ക് തീനി കൊഡുക്കാ്
32ആന ഏസു തന്ന് സൊല്ലുപഡി ണഡാക്കവാര്‌ണ അര്‌ഗെ ഒളേത്ത്: <<ഇവാര്‌ണ കണ്ട് എനാക്ക് കറ്‌മ്മ പ്‌ഡിക്ക്‌ദ്. മൂണ് ണാള് ഇവാര് എന്ന്‌ദൊപ്പ ഇര്‌ക്കാര്. ഇപ്പ് ഇവാര്‌ക്ക് തിന്ന്യ ഒന്റുമ് ഇല്ലെ. അവാര്‌ണ പജ്യോഡെ ബ്‌ഡ്യ എനാക്ക് മനേസ്സ്‌മില്ലെ. എന്ത്‌ക്കെന്റ അവാര് ബയ്യിക്ക്‌റാഗ തണാങ്കി ബീ്വാര്>> എന്ത് സൊന്നാ്.
33അക്കുളെ ഏസുദ് സൊല്ലുപഡി ണഡാക്കവാര്: <<ആള്‌ഗ ഒന്റുമില്ലാത്ത ഈ എ്ഡേലി ഇക്കണ്ട ആള്‌ഗണ പജി ആറിസ്യുള്ള അഡെ ണമാക്ക് ഏദിലിര്‌ന്ത് കെ്ഡേക്കു?>> എന്ത് സൊന്നാര്.
34അവാര്‌ണ: <<ണിമ്മ് കയ്യിലി എത്തിനി അഡെ ഇര്‌ക്ക്‌ദ്?>> എന്ത് ഏസു കേ്ട്ടാ്.
അക്കുളെ അവാര് <<ഏ്ള്, പിന്നെ ലേസ കുഞ്ചി മീന്‌ഗാമ് ഇര്‌ക്ക്‌ദ്>> എന്ത് സൊന്നാര്.
35ഏസു ആള്‌ഗണ മണ്ണ്‌ക്കെ കുക്കാക്ക്യ സൊന്നാ്. 36പ്‌റ ഏസു അയ്യി ഏ്ള് അഡേനാമ് കുഞ്ചി മീന്‌ണാമ് എ്ഡ്‌ത്ത് സാമിക്ക് ണണ്ണി സൊല്ലി അദ്‌ണ മുറുത്താ്. പ്‌റ തന്ന് സൊല്ലുപഡി ണഡാക്കവാര്‌ക്കെ കൊഡുത്താ്. അവാര് ആള്‌ഗാക്കേമ് കൊഡുത്താര്. 37എല്ല ആള്‌ഗാമ് ബേ്റ് തുമ്പ തിന്ത് പജ്യാറിനാര്. മിച്ച ബന്ത അഡെ മുറിഗണ ഏസുദ് സൊല്ലുപഡി ണഡാക്കവാര് ഏ്ള് കൂഡേക്ക് പൊറിക്കി എ്ഡ്‌ത്താര്. 38തിന്ത ആള്‌ഗാദിലി പെ്ണ്ണ്‌മക്കഗണാമ് മക്കമറിഗണാമ് സേത്താദെ താനെ ണാലായിര ആണ്‌മക്കഗ ഇര്‌ന്താര്. 39ആള്‌ഗണെല്ല സൊല്ലിബ്‌ട്ട പ്‌റ ഏസു തോണിക്കെ ഏ്റി മഗദ എങ്ക ണാഡ്‌ക്കെ പോനാ്.
Trenutno odabrano:
മത്തായി 15: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
