മത്തായി 14
14
മുളുഗ്‌സ്‌റ ഓഗന്നാന കൊല്ലുറാര്
1അയ്യി കാലാത്തിലി ഗെലീലെ ണാഡ് തലെവാ് ആയിര്‌ന്ത എരോദാ് ഏസുണ പറ്റി സൊല്ലുറ സേദിന കേ്ട്ട്: 2<<ണേര്‌മായി അയാള് തണ്ണിക്ക് മുളുഗ്‌സ്‌റ ഓഗന്നാ്ത്തെ. അയാള് സത്തവാര് പട്ടിലിര്‌ന്ത് ഉജുറെ്ന്ത് ബന്തിര്‌ക്കാ്. അദ്‌ണാലെത്തെ ഇച്ചെല്ല സെയ്യുള്ള സക്‌ദി അയാളോഡെ ഇര്‌ക്കാദ്>> എന്ത് തന്ന് ബേലെക്കാറാര്‌ക്കെ സൊന്നാ്.
3-4ഈ എരോദാ് റാജാവു തന്ന് അണ്ണാ് പീലിപ്പോസ്‌ദ് പെ്ണ്ട് എരോദിന തനാക്ക് പെ്ണ്ടാക്കി എ്ഡ്‌ത്തിര്‌ന്താദ്‌ണാലെ: <<ഇവാണ ണീ പെ്ണ്ടാക്കി ബെത്തിര്‌ക്കാദ് സട്ടപഡി തപ്പ്>> എന്ത് ഓഗന്നാ് എരോദാ് റാജാവുക്ക് സൊന്നാ്. അദ്‌ണാലെ ഓഗന്നാന പ്‌ഡിത്ത് കെ്ട്ടി ജെയില്‌ക്കെ ഇക്കിര്‌ന്താ്. 5ഓഗന്നാന പ്‌ഡിത്ത് കൊല്ലുറാദ്‌ക്കുള്ള മൊനെല്ല ഇര്‌ന്ത്‌ദ്. ആന ആള്‌ഗ ഒട്ടുക്ക് അവാന സാമിദാസ് എന്ത് കണക്കാക്കിര്‌ന്താദ്‌ണാലെ എരോദാ് ആള്‌ഗണ അഞ്ചിനാ്.
6ആന എരോദാന്‌ദ് പ്‌റാന്ത ണാള് ബര്‌ഗാട്ടി, എരോദിദ് മഗളച്ചി ആള്‌ഗ മദ്ദേസാദ് മുന്തുക്ക് പോയി ആട്ടാഡിന. അയ്യി ആട്ട് എരോദാന്‌ക്ക് പ്‌ഡിത്ത് പോറ്റു. 7അദ്‌ണാലെ ണീ എന്ത കേ്ട്ടാല്‌മ് തരുവെ എന്ത് സത്ത്യ അഡിത്ത് അവാക്ക് ബാക്ക് കൊഡുത്താ്. 8അയ്യി പ്‌ള്ളെ തന്ന്‌ദ് അവ്വാസി സൊന്ന പഡി, <<എനാക്ക് തണ്ണിക്ക് മുളുഗ്‌സ്‌റ ഓഗന്നാന്‌ദ് തലേന ഒരു ബട്ടാക്കെ തരുഡൊ>> എന്ത് കേ്ട്ട. 9ഇദ്‌ണ കേ്ട്ട് എരോദാ് ദുക്കപട്ടാ്. ആന ബിര്‌ന്ത്‌ക്ക് ബന്തവാര്‌ദ് മുന്തുക്ക് ബെത്ത് സത്ത്യ അഡിത്ത് ബാക്ക് കൊഡുത്താദ്‌ണാലെ ഓഗന്നാന്‌ദ് തലേന കൊഡുക്ക്യ സൊന്നാ്. 10അച്ചെ ജെയില്‌ക്കെ ആള് ബ്‌ട്ട് ഓഗന്നാന്‌ദ് തലേന ബെ്ട്ടി, 11അയ്യി തലേന ഒരു ബട്ടാക്കെ എ്ഡ്‌ത്ത് ബന്ത് പ്‌ള്ളെ കയ്യിക്ക് കൊഡുത്താര്. അദ്‌ണ അവ എ്ഡ്‌ത്ത് പോയി തന്ന് അവ്വാസിക്ക് കൊഡുത്ത. 12അദ്‌ക്ക് പ്‌റ ഓഗന്നാന്‌ദ് സൊല്ലുപഡി ണഡാക്കവാര് അയാള്‌ദ് സാവുണ എ്ഡ്‌ത്ത് പോയി പൊദേത്താര്. പ്‌റ ഏസു പട്ട്‌ക്കെ ബന്ത് അയ്യി സേദിന സൊന്നാര്.
അഞ്ചായിര ആണ്‌മക്കണ പജ്യാറ്‌സ്‌റാ്
13അയ്യി സേദിന കേ്ട്ട് ഏസു അദിലിര്‌ന്ത് പോയി ഒരു തോണിക്കെ ഏ്റി ഒട്ടിപ്പാസുള്ള എ്ഡേക്ക് പോനാ്. ആള്‌ഗാക്ക് ഈ സേദി തെരിന്ത് പട്ടണാക്ക്‌റാഗ ഇര്‌ന്ത് അവാര് ണഡാന്തെ ഏസു പിന്ന്‌മേലെ പോനാര്. 14ഏസു ബന്ത് ബെല്ല്യൊരു ആള്‌കൂട്ടണ കണ്ട് ബേ്റ്‌വെന്ത്, അവാര് കൂട്ടാത്തില്യ ണോയിക്കാറാര്‌ണ തെ്ള്‌സിനാ്.
15അന്ത്യോഡാഗാട്ടി ഏസുദ് സൊല്ലുപഡി ണഡാക്കവാര് ഏസുക്കെ ബന്ത്: <<ഇദ് ഒരു ആള് ഇല്ലാത്ത എ്ഡെ. പണ്ടെ ണേരാമ് ബ്‌ന്ത്‌ദ്. അദ്‌ണാലെ ഈ ആള്‌ഗണ ഊര്‌ക്ക്‌റാഗ പോയി സാപാഡ്‌ക്കുള്ള സാമാനഗ ബാങ്കി ബര്യ സൊല്ലിബ്‌ഡുഡോമെ>> എന്ത് സൊന്നാര്.
16അക്കുളെ ഏസു അവാര്‌ക്കെ: <<അവാര് പോഡൊ എന്തില്ലെ. ണിമ്മ താനെ അവാര്‌ക്ക് തിന്ന്യ കൊഡിരി>> എന്ത് സൊന്നാ്.
17അക്കുളെ അവാര് ഏസുക്കെ: <<എമ്മോഡെ അഞ്ച് അഡേമ് റണ്ട് മീന്‌മ് അല്ലാദെ എമാക്ക് ഇദിലി ഒന്റുമ് ഇല്ലെ>> എന്ത് സൊന്നാര്.
18ഏസു അവാര്‌ക്കെ: <<എന്ത അദ്‌ണ ഈങ്ക് എ്ഡ്‌ത്ത് ബായി>> എന്ത് സൊന്നാ്. 19പ്‌റ ആള്‌ഗണ പുല്ലുക്കുദ്ദാക്ക് കുക്കാക്ക്യ സൊന്നാ്. ഏസു അയ്യി അഞ്ച് അഡേനാമ് റണ്ട് മീന്‌ണാമ് എ്ഡ്‌ത്ത്, മേല് ണോഡി സാമിക്ക് ണണ്ണി സൊല്ലി അഡേന മുറുത്താ്. പ്‌റ തന്ന് സൊല്ലുപഡി ണഡാക്കവാര്‌ക്കെ കൊഡുത്താ്. അവാര് ആള്‌ഗാക്ക് കൊഡുത്താര്. 20എല്ല ആള്‌ഗാമ് ബേ്റ് തുമ്പ തിന്താര്. ഏസുദ് സൊല്ലുപഡി ണഡാക്കവാര് മിച്ച ബന്ത അഡെ ണുറ്‌ക്ക്‌ണ പന്നന്റ് ബട്ടി തുമ്പിസി എ്ഡ്‌ത്താര്. 21തിന്തവാരിലി പെ്ണ്ണ്‌മക്കഗണാമ് പ്‌ള്ളെഗണാമ് കൂട്ടാദെ ഒപ്പത്തപ്പ ആണ്‌മക്കഗതാനെ അഞ്ചായിര ഇര്‌ന്താര്.
ഏസു കഡാല്‌ക്കുദ്ദാക്ക് ണഡാക്കാ്
22അപ്പ്‌താനെ ഏസു ആള്‌ഗണ സൊല്ലിബ്‌ട്ടാ്. അയ്യി കൂട്ടാത്തിലി താനെ തന്ന് സൊല്ലുപഡി ണഡാക്കവാര്‌ണാമ്: <<ണിമ്മ തോണിക്കെ ഏ്റി അയ്യേ്ട്ടി പോയിരിരി>> എന്ത് ണത്തിനാ്. 23അവാര്‌ഗണ സൊല്ലിബ്‌ട്ട പ്‌റ ഏസു പരേസ്യ എന്ത് മലേക്കെ ഒരുത്താ് പോനാ്. മജാക്കെ ആഗാട്ടി താന് ഒരുത്താ് താനെ അദിലിര്‌ന്താ്. 24അക്കുളെല്ല തോണി ഏ്ട്ടി അര്‌ഗെ ഇര്‌ന്ത് ദൂര പോയിര്‌ന്ത്‌ദ്. ആന കാറ്റ് തോണിക്കെ അഡിത്ത് കൊണ്ടിര്‌ക്കാദ്‌ണാലെ കഡാല് സെലെ അഡിത്ത് തോണി ആങ്കീങ്ക് ആഡി കൊണ്ടിര്‌ന്ത്‌ദ്.
25കോയിജാമാത്തിലി ഏസു കഡാല്‌ക്കുദ്ദാക്ക് ണഡാന്ത് തന്ന് സൊല്ലുപഡി ണഡാക്കവാര്‌ദ് പട്ട്‌ക്ക് പോനാ്. 26ഏസു കഡാല്‌ക്കുദ്ദാക്ക് ണഡാന്ത് ബരാദ്‌ണ കണ്ട് തന്ന് സൊല്ലുപഡി ണഡാക്കവാര് അഞ്ചിനാര്. അദ്‌ക്ക് <<അദ് പിജാദ്‌ത്തെ>> എന്ത് സൊല്ലി അവാര് അഗാറിനാര്.
27അപ്പ്‌താനെ ഏസു അവാര്‌ക്കെ: <<അഞ്ചാദി ദയ്യിരമായി ഇരിരി, ഇദ് ണാന്‌ത്തെ>> എന്ത് സൊന്നാ്.
28അക്കുളെ പത്ത്‌റോസ്: <<ആണ്ടവാനെ ഇദ് ണീത്തേഗ. അച്ചാനാക്കി ണാന്‌മ് തണ്ണിക്കുദ്ദാക്ക് ണഡാന്ത് ണിന്ന് പട്ട്‌ക്ക് ബര്യ സൊല്ലുഡോമെ>> എന്ത് സൊന്നാ്.
29അക്കുളെ ഏസു: <<ബാ>> എന്ത് സൊന്നാ്.
അപ്പ്‌താനെ പത്ത്‌റോസ് തോണിലിര്‌ന്ത് ഇ്റാങ്കി ഏസു പട്ട്‌ക്ക് പോയ തണ്ണിക്കുദ്ദാക്ക് ണഡാന്താ്. 30ആന കാറ്റ് അഡിക്കാദ്‌ണ കണ്ട് അവാന്‌ക്ക് കോവെ പ്‌ഡിത്ത്, തണ്ണിക്കെ മുങ്കിപോയപട്ടാ്. അദ്‌ണാലെ: <<ആണ്ടവാനെ എനാണ കാപാറ്റുഡോമെ>> എന്ത് അഗാറിനാ്.
31ഏസു അപ്പ്‌താനെ കയ്യിന ണീ്ട്ടി പത്ത്‌റോസ്‌ണ പ്‌ഡിത്ത്: <<അരെഗൊര്യ ണമ്പിക്കുള്ളവാനെ, ണീ എന്ത്‌ക്ക് സന്തേഗപട്ടാദ്>> എന്ത് സൊന്നാ്.
32അദ്‌ക്ക് പ്‌റ അവാര് തോണിക്കെ ഏ്റിനാദ്‌മ് കാറ്റ്‌മ് അഡാങ്കിറ്റ്. 33അക്കുളെ തോണിലിര്‌ന്തവാര്: <<ണീ സെരിക്ക്‌മ് സാമിദ് മഗാ്ത്തെ>> എന്ത് സൊല്ലി ഏസുക്കെ സഡാങ്ക ബ്‌ന്ത് കുമ്മുഡിനാര്.
ഏസു ഗന്നേസരേക്കെ പോരാ്
34അവാര് കഡാല് കഡാന്ത് ഗന്നേസരെ എങ്ക ണാഡ്‌ക്കെ എജ്ജിനാര്. 35അദിലിര്‌ക്ക ആള്‌ഗാക്ക് ഏസുത്തെ ബന്ത് ഇര്‌ക്കാദ് എന്ത് തെരിന്ത് അര്‌ഗെ സുറ്റിര്‌ക്ക ഊര്‌ക്ക്‌റാഗെല്ല സേദി ബ്‌ട്ടാര്. അച്ചെ അദില്യവാര് ണോയിക്കാറാര്‌ണ ഒട്ടുക്ക് ഏസു പട്ട്‌ക്ക് എ്ഡ്‌ത്ത് ബന്താര്. 36അവാര്: <<ണിന്ന് സീലെ താനെന എന്താല് ണോയിക്കാറാര്‌ണ അണ്ണ്യ ബ്‌ഡുഡോമെ>> എന്ത് ഏസുണ ബേ്ണ്ടിനാര്. അച്ചെ അണ്ണിനവാര് ഒട്ടുക്ക് ണോയി തെ്ളിന്താര്.
Trenutno odabrano:
മത്തായി 14: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
