മത്തായി 13
13
ബിത്ത് ബെദേക്കവാന്‌ദ് കദെ
1അയ്യി ണാള് ഏസു കൂരേലിര്‌ന്ത് പോയി കഡാലോരാത്തിലി കുക്കാന്തിര്‌ന്താ്. 2അക്കുളെ തന്ന് പട്ട്‌ക്കെ എത്തിന്യൊ ആള്‌ഗ ബന്ത്‌കൊണ്ടിര്‌ന്താര്. അദ്‌ണാലെ ഏസു അദിലി ഒരു തോണിക്കെ ഏ്റി കുക്കാന്താ്. ആള്‌ഗൊട്ടുക്ക് ഏ്ട്ടിലിമ് ഇര്‌ന്താര്. 3ഏസു അവാര്‌ക്കെ പല കാര്യഗണാമ് കദെ ദിന്‌സിലി സൊല്ലികൊഡുത്താ്. അദിലി ഒരു കദെ ഈ ദിന്‌സായിര്‌ന്ത്‌ദ്: <<ഒരു കാഡ്‌ക്കാറാ് ബെദേക്ക്യ പോനാ്. 4അവാ് ബെദേക്കാട്ടി ലേസ ബെദെ ബയ്യിക്കെ ബ്‌ന്ത്‌ദ്. അദ്‌ണ പക്കിഗ ബന്ത് കൊത്തി തിന്തെക്കിറ്റ്. 5അദിലി ലേസ ബെദെ അറെക്കുദ്ദാക്കിര്‌ക്ക മണ്ണ്‌ക്കെ ബ്‌ന്ത്‌ദ്. അറേലി അത്തറ മണ്ണില്ലാത്താദ്‌ണാലെ ബെദെ പൊത്തന കൊഡിത്ത്‌ദ്. 6ആന പയിര്‌ക്ക് ബേരോഡ്യ മുഡ്യാത്താദ്‌ണാലെ ബെക്കെ തട്ട്‌ഗാട്ടി അദ്‌ഗ ബാഡി കരിന്തെക്കിറ്റ്. 7ലേസ ബെദെ മുള്ളു സെ്ഡി പട്ട്‌ക്കെ ബ്‌ന്ത്‌ദ്. ആന മുള്ളു സെ്ഡി ബളാന്ത് അദ്‌ണ സപാളിസ്യെക്കിറ്റ്. 8ലേസ ബെദെ ണല്ല മണ്ണ്‌ക്കെ ബ്‌ന്ത്‌ദ്. അയ്യി പയിര്‌ഗ ബളാന്ത് അദിലി ഒരൊരു പയിര്‌ഗാളിലിര്‌ന്ത് ണൂറൊ അറുവാദൊ മുപ്പദൊ ബെത്ത് മണി പ്‌ഡിത്ത്‌ദ്. 9ണാന് സൊല്ലുറാദ്‌ണ കേ്ക്ക്യ മനേസ്സിര്‌ക്കവാ് കേ്ക്കുഡൊ.>>
കദെഗ സൊല്ലുറാദ്‌ക്കുള്ള കാര്യ
10അദ്‌ക്ക് പ്‌റ ഏസുദ് സൊല്ലുപഡി ണഡാക്കവാര് ഏസുണ: <<ണീ എന്ത്‌ക്ക് അവാര്‌ക്ക് എല്ലാമെ കദെ ദിന്‌സിലി സൊല്ലികൊഡുക്കാദ്?>> എന്ത് കേ്ട്ടാര്.
11അക്കുളെ ഏസു അവാര്‌ക്കെ ഇച്ചെ സൊന്നാ്: <<സാമി ആള്‌റാദ്‌ണ പറ്റി മറേന്തിര്‌ക്ക പൊറുള് ണിമാക്ക്‌ത്തെ ബെ്ളിപട്ട് കെ്ഡേത്തിര്‌ക്ക്‌ദ്. ആന അവാര്‌ക്ക് കെ്ഡേക്കാലെ. 12ഇര്‌ക്കവാന്‌ക്ക് എക്കസക്ക കൊഡുക്കുവാ്. ലേസ ഇര്‌ക്കവാന്‌ക്ക് ഇര്‌ക്ക ലേസണ ഗൂഡി എ്ഡ്‌ത്തെക്കുവാ്. 13ണാന് അവാര്‌ക്ക് എല്ലാമെ കദെ ദിന്‌സിലിത്തെ സൊല്ലുറാദ് എന്ത്‌ക്കെന്റ,
അവാര് കാണ്‌റാദാനാല്‌മ് സെരിക്ക്‌മ് കാണാലെ,
കേ്ക്കദാനാല്‌മ് സെരിക്ക്‌മ് കേ്ക്കാദ്‌മില്ലെ, ണെപ്പ്‌കെ്ഡേസ്‌റാദ്‌മില്ലെ.
14-15<ണിമ്മ കാദാലെ കേ്ട്ടാല്‌മ് കേ്ട്ടാല്‌മ് ണെപ്പ്‌കെ്ഡേസമാട്ടേര്,
ണിമ്മ കണ്ണാലെ ണോഡിനാല്‌മ് ണോഡിനാല്‌മ് കാണമാട്ടേര്.
ഈ ആള്‌ഗാദ് ണെഞ്ച് കല്ല് ണെഞ്ചായിര്‌ക്ക്‌ദ്,
കേ്ക്ക്യ അവാര്‌ദ് കാദ് മന്ത് ബ്‌ന്തെക്കിര്‌ക്ക്‌ദ്,
അവാര് കാണ്യ മുഡ്യാദെ കണ്ണ് അഡേന്തെക്കിര്‌ക്ക്‌ദ്,
അദ്‌ണാലെ അവാര് കണ്ണിലി കാണാദേമ്,
കാദിലി കേ്ക്കാദേമ്,
മനേസ്സിലി ണെപ്പ്‌കെ്ഡേസാദേമ്,
സാമി സാരി തില്‌മ്പാദേമ്, ണാന് അവാര്‌ണ തെ്ള്‌സാദേമ് ഇര്‌ക്കുവെ>#എസയ്യാ് 6:9,10
എന്ത് എസയ്യാ് സാമിദാസ് സൊന്നാദ് അദേപാസെ ണഡാന്ത്‌ദ്. 16ആന ണിമ്മ് കണ്ണ് കാട്ട്‌റാദ്‌ണാലേമ് ണിമ്മ് കാദ് കേ്ക്കാദ്‌ണാലേമ് ണിമ്മ ബാഗ്യക്കാറാര്‌ത്തെ. 17ണേര്‌മായിമ് ണാന് ണിമാക്കെ സൊല്ലുറെ, എത്തിന്യൊ സാമിദാസ്‌ഗാമ് ണേര്‌മെക്കാറാര്‌മ് ണിമ്മ കാണ്‌റാദ്‌ണ കാണ്യ ആസെപട്ടാര്. ആന അവാര് കാണാലെ. ണിമ്മ കേ്ക്കാദ്‌ണ കേ്ക്ക്യ അവാര് ആസെപട്ടാര്. ആന അവാര് കേ്ക്കാലെ.>>
ബിത്ത് ബെദേക്കവാന്‌ദ് കദേദ് അര്‌ത്ത
18<<അദ്‌ണാലെ ബെദേക്കവാന്‌ദ് കദേദ് പൊറുള്‌ണ കേ്ളിരി. 19ഒരുത്താ് സാമി ആള്‌റാദ്‌ണ പറ്റി സൊല്ലുറ സേദിന കേ്ട്ട് ണെപ്പ്‌കെ്ഡേസാദെ ഇര്‌ക്കാദ് ബയ്യിക്ക് ബ്‌ന്ത ബെദേക്ക് സമ. സെയിത്ത്യാ് ബന്ത് അയാള്‌ദ് മനേസ്സ്‌ക്ക് ബെദേത്ത ബെദേന എ്ഡ്‌ത്ത് തള്ള്‌റാ്. 20അറെ പട്ട്‌ക്കെ ബ്‌ന്ത ബെദെ എങ്കാദ് ഒരുത്താ് സാമി ആള്‌റാദ്‌ണ പറ്റ്യുള്ള സാമി സൊല്ലുസുലാക്കണ കേ്ട്ട് സട്ടന പിര്യപിര്യാത്ത് തങ്കാരിക്കാദ്‌ത്തെ. 21ആന ബേരില്ലാത്താദ്‌ണാലെ ഇച്ച്‌ളവാര് കേ്ട്ട സാമി സൊല്ലുസുലാക്കാത്തിലി അദിഗ കാല ണെലേത്തിര്‌ക്കമാട്ടാര്. അയ്യി സൊല്ലുസുലാക്കണ ണമ്പിനാദ്‌ണാലെ എന്താറ്റ് കജട്ടഗൊ കൊഡിമെഗൊ ബന്താക്കി അപ്പ്‌താനെ അദ്‌ണ തള്ള്യെക്കുവാര്. 22മുള്ളു സെ്ഡി പട്ട്‌ക്കെ ബ്‌ന്ത ബെദെ എങ്കാദൊ, ഒരുത്താ് സാമി ആള്‌റാദ്‌ണ പറ്റി സൊല്ലുറാദ്‌ണ കേ്ട്ട് തങ്കാരിത്ത്‌മ്, ഈ ഉലഗാത്തിലി ബര കജട്ടഗാമ്, പണ ആസെഗാമ് കേ്ട്ട സേദിന ണെരിക്കിതള്ളി ഉവഗാര ഇല്ലാദെ ആക്ക്‌റാദ്‌മ്‌ത്തെ. 23ണല്ല മണ്ണ്‌ക്കെ ബ്‌ന്ത ബെദെ എങ്കാദൊ, ഒരുത്താ് സാമി ആള്‌റാദ്‌ണ പറ്റി സൊല്ലുറാദ്‌ണ കേ്ട്ട് ണെപ്പ്‌കെ്ഡേസ്‌റവാ്ത്തെ. അദ്‌ണാലെ അവാര് തമാക്ക്‌മ് ബേ്റെ ആള്‌ഗാക്ക്‌മ് ഉവഗാരപഡുവാര്. പഗ്‌ദി ആള്‌ഗ ലേസത്താനെ ഉവഗാരപഡുവാര്, പഗ്‌ദി ആള്‌ഗ ഇദ്‌ണ ബ്‌ഡ ഉവഗാരപഡുവാര്, ബേ്റെ പഗ്‌ദി ആള്‌ഗ എത്തറാഗൊ ഉവഗാരപഡുവാര്.>>
കളേദ് കദെ
24ഏസു അവാര്‌ക്കെ ബേ്റെ ഒരു കദെ ഗൂഡി സൊന്നാ്: <<സാമി ആള്‌റാദ് എങ്കാദ് ഒരുത്താ് തന്ന് കാഡ്‌ക്കെ ണല്ല ബിത്ത് ബെദേത്താദ്‌ക്ക് സമാത്തെ. 25ആള്‌ഗ ഒട്ടുക്ക് ഉറാങ്ക്‌ഗാട്ടി അയാള്‌ദ് പോട്ടിക്കാറാ് ബന്ത് ഗോദിമ്പെ ബെദേത്തിര്‌ക്ക കാഡ്‌ക്കെ കളേനാമ് ബെദേത്ത് തള്ളി പോനാ്. 26പയിര് ബളാന്ത് കദ്‌റ് കഡാക്കാട്ടി അദ്‌ദൊപ്പ കളേമ് ബളാന്ത് ബന്താദ്‌ണ കണ്ടാര്.
27അക്കുളെ അയ്യി കാഡ്‌ക്കാറാന്‌ദ് ബേലെക്കാറാര് ബന്ത് പണ്ണാഡിക്കെ: <ണീ ണിന്ന് കാഡ്‌ക്ക് ണല്ല ബെദെ താനെ ബെദേത്താദ്. പിന്നെ ഏദിലിര്‌ന്ത് കളെ ബന്ത്‌ദ്?> എന്ത് കേ്ട്ടാര്.
28അദ്‌ക്ക് അയാള്: <ഇദ് പോട്ടിക്കാറാ് സെയ്‌ദാദ്> എന്ത് സൊന്നാ്.
അക്കുളെ അവാര്: <എമ്മ പോയി അദ്‌ണ പ്‌ഡിങ്കി എക്ക്‌റാദ്‌ക്ക് ണിനാക്ക് സമ്മദമുണ്ട> എന്ത് കേ്ട്ടാര്.
29അദ്‌ക്ക് അവാ്: <ബേ്ഡ, എന്ത്‌ക്കെന്റ കളേന പ്‌ഡ്‌ങ്ക്‌ഗാട്ടി ഗോദിമ്പെ കുത്ത്‌മ് അദ്‌ദൊപ്പ പ്‌ഡാങ്കി ബരു. 30അദ്‌ണാലെ ഗോദിമ്പേമ് കളേമ് അറെ ഗള്യെമാട്ട്‌ക്ക് ബളാരുഡൊ. അറെ ഗള്യേക്ക് ണാന് അറ്‌വെക്കാറാര്‌ക്ക് കളേന പ്‌ഡിങ്കി കൂട്ടി സുട്ടു എക്ക്യ ഒരൊരു കെ്ട്ട്‌ഗ ആക്കി കെ്ട്ട്യാമ്, ഗോദിമ്പേന അന്ന ബെക്ക കൂരേക്കെ തുമ്പിസി ബെക്ക്യാമ് സൊല്ലുവെ> എന്ത് സൊന്നാ്.>>
കഡ്‌ഗ് ബെദെ കദെ
31ഏസു പിന്നേമ് ബേ്റെ ഒരു കദെ ഗൂഡി അവാര്‌ക്ക് സൊന്നാ്: <<സാമി ആള്‌റാദ് എങ്കാദ് ഒരു കഡ്‌ഗ് ബെദേക്ക് സമ. അയ്യി ബെദേന ഒരുത്താ് തന്ന് കാഡ്‌ക്കെ ബെദേത്താ്. 32അയ്യി ബെദെ എല്ല ബെദേന ബ്‌ഡ സിന്നാദാനാല്‌മ് അദ് ബളാര്‌ഗാട്ടി എല്ല സെ്ഡിഗണ ബ്‌ഡ ബെല്ല്യാദായി പക്കിഗ ബന്ത് ഗൂഡ് എ്ഡ്‌ക്കാക്ക് തഗ്‌ന്ത താറ്‌തലേപ്പ്‌ഗ ബ്‌ഡ്‌റ ബെല്ല്യൊരു മ്‌ണ്ടെ ആദ്.>>
പുളി മാവു കദെ
33ബേ്റെ ഒരു കദെ ഗൂഡി ഏസു സൊന്നാ്: <<സാമി ആള്‌റാദ്‌ണ ണാന് ഏദ്‌ക്ക് എ്ണേത്ത് സൊല്ലുവെ? സാമി ആള്‌റാദ് എങ്കാദ് ഒരുത്തി മൊത്തന മാവുണ എ്ഡ്‌ത്ത് കലേസി അദ്‌ക്ക് ലേസ പുളിത്ത മാവുണ സേത്തി അദ് മുച്ചുഡ പുളിത്ത് ബരമാട്ട്‌ക്ക് ബെക്ക പാസെത്തെ.>>
34ഏസു ഇദ്‌ഗണ ഒട്ടുക്ക് കദെ ദിന്‌സിലിത്തെ ആള്‌ഗാക്കെ സൊല്ലികൊഡുത്താദ്. അവാര്‌ക്ക് കദെ ദിന്‌സിലി അല്ലാദെ ബേ്റെ ഒരു ദിന്‌സിലിമ് സൊല്ലികൊഡുക്കാലെ.
35<<ണാന് കദെ സൊല്ല്യ ബായി തുറാക്കുവെ,
ഉലഗ ദ്‌ട്ടിസിനാദിലിര്‌ന്ത് മറേസി ബെത്തിര്‌ക്ക കാര്യഗണ ണാന് സൊല്ലുവെ>>#സാമി പാട്ട് ബുക്ക് 78:2
എന്ത് സാമിദാസ് സൊന്ന കാര്യഗ ണഡാക്ക്യ ബേ്ണ്ടി ഏസു ഇച്ചെ സെയ്‌ദാ്.
കളെ കദേദ് പൊറുള്‌ണ സൊല്ലികൊഡുക്കാ്
36അദ്‌ക്ക് പ്‌റ ഏസു ആള്‌കൂട്ടണ സൊല്ലിബ്‌ട്ട് കൂരേക്കെ ബന്താ്. അക്കുളെ തന്ന് സൊല്ലുപഡി ണഡാക്കവാര്‌മ് ഏസു പട്ട്‌ക്കെ പോയി: <<എമാക്ക് കാഡില്യ കളേദ് കദെ പൊറുള്‌ണ സെറ്റെ സൊല്ലി തരുഡോമെ>> എന്ത് അവാര് ഏസുണ ബേ്ണ്ടികൊണ്ടാര്.
37അദ്‌ക്ക് ഏസു ബദ്‌ള് സൊന്നാദ് ഇച്ചെത്തെ: <<ണല്ല ബെദേന ബെദേത്തവാ് എങ്കാദ് മന്‌സാനായി പ്‌റാന്തവാ്. 38കാഡ് എങ്കാദ് ഈ ഉലഗ, ണല്ല ബെദെ എങ്കാദ് സാമി ആള്‌റാദ്‌ക്ക് പട്ടവാര്, കളെ എങ്കാദ് സെയിത്ത്യാന്‌ക്ക് പട്ടവാര്. 39അദ് ബെദേത്താദ് പോട്ടിക്കാറനാന സെയിത്ത്യാ്, അറ്‌ക്കാദ് എങ്കാദ് ഉലഗ കഡേസി ണാള്, അറ്‌വെക്കാറാര് എങ്കാദ് സാമിദൂദല.
40കളേന പ്‌ഡിങ്കി കൂട്ടി തീക്കിക്കി സുഡുറ പാസെ ഉലഗ കഡേസി ണാള് ണഡാക്കു. 41മന്‌സാനായി പ്‌റാന്തവാ് തന്ന് ദൂദലണ അന്‌പ്പി, താന് ആള്‌റ ണാഡില്യ ആള്‌ഗ കൂട്ടാത്തിലിര്‌ന്ത് പാവ സെയ്‌രവാര്‌ണാമ് കെ്ട്ട കാര്യ സെയ്‌രവാര്‌ണാമ് ഒന്റുക്ക് സേത്തുവാ്. 42പ്‌റ അയ്യി ദൂദല അവാര്‌ണ ഗെ്ണ്ടഗ കുയ്യിക്ക് ഇക്കുവാര്. അദിലി അവാര് അഗ്‌ദ്‌കൊണ്ട് പല്ല്‌ണ കെ്റ്‌സ്‌കെ്റ്‌സ കഡിക്കുവാര്. 43അയ്യി ഗള്യേക്ക് ണേര്‌മെക്കാറാര് തമ്മ്‌ദ് അപ്പാന്‌ദ് ണാഡിലി സൂര്യന പാസെ ബെ്ള്‌സ അഡിക്കുവാര്. കേ്ക്ക്യ മനേസ്സിര്‌ക്കവാ് കേ്ക്കുഡൊ.>>
ഒളിസി ബെത്തിര്‌ക്ക മുദാല്‌ദ് കദെ
44<<സാമി ആള്‌റാദ് എങ്കാദ് കാഡിലി ഒളിസി ബെത്തിര്‌ക്ക മുദാല്‌ക്ക് സമ. അദ്‌ണ ഒരുത്താ് കണ്ട് ബേ്റെ ഒളിസി ബെത്താ്. അയാള് അദ്‌ണ കണ്ട പിര്യാക്ക് പോയി തനാക്ക് ഇര്‌ക്കാദ്‌ണ ഒട്ടുക്ക് ബിറ്റ് അയ്യി കാഡ്‌ണ ബാങ്കിനാ്.>>
ണല്ല ബെലെപെറ്റ മുത്തുദ് കദെ
45<<പിന്നേമ്, സാമി ആള്‌റാദ് എങ്കാദ് ണല്ല മുത്തുണ പരാന്ത് ണഡാക്ക ഏവാരിക്ക് സമ. 46അവാ് ണല്ല ബെലെപെറ്റ ഒരു മുത്തുണ കാണ്‌ഗാട്ടി അവാ് പോയി തനാക്ക് ഇര്‌ക്കാദ്‌ണ ഒട്ടുക്ക് ബിറ്റ് അയ്യി മുത്തുണ ബാങ്കിനാ്.>>
ബലേദ് കദെ
47<<പിന്നേമ്, സാമി ആള്‌റാദ് കഡാല്‌ക്കെ ബലെ ബീസി പല ദിന്‌സ് മീന്‌ഗണ പ്‌ഡിക്ക ബലേക്ക് സമ. 48ബലേക്കെ മീന് തുമ്പുഗാട്ടി ബലെ ഇക്കിനവാര് അദ്‌ണ ഏ്ട്ടിക്കെ ബലിത്തേ്റ്‌സി, അവാര് അദിലിതാനെ ണല്ലാദ്‌ഗണ തെരിന്ത് പാത്ത്‌റാക്കെ ഇക്ക്‌റാര്. മോസഗണെല്ല എക്കാമ് സെയ്‌രാര്. 49ഇദേപാസെത്തെ കഡേസി ണാള് ണഡാക്കു. സാമിദൂദല ബന്ത് ണേര്‌മെക്കാറാര് കൂട്ടാത്തിലിര്‌ന്ത് കെ്ട്ടവാര്‌ഗണ പ്‌റ്‌ത്തെ്ഡ്‌ത്ത് 50ഗെ്ണ്ടഗ കുയ്യിക്കെ ഇക്കുവാര്. അവാര് അദിലി അഗ്‌ദ്‌കൊണ്ട് പല്ല്‌ണ കെ്റ്‌സ്‌കെ്റ്‌സ കഡിക്കുവാര്.>>
51<<ഇദ്‌ഗെല്ല ണിമാക്ക് തെരിന്ത്‌ദ?>> എന്ത് അവാര്‌ണ ഏസു കേ്ട്ടാദ്‌ക്ക്: <<ഈ്, തെരിന്ത്‌ദ്>> എന്ത് സൊന്നാര്.
52ഏസു അവാര്‌ക്കെ: <<അദ്‌ണാലെ സാമി ആള്‌റാദ്‌ണ പറ്റി പഡിക്ക ഒരൊരു ബേദ ബാത്ത്യലാമ്, തന്ന് കൂരേലി ബെത്തിര്‌ക്ക ബല്ലാത്തിലിര്‌ന്ത് പള്യ സാമാനഗണാമ് പുദ്യ സാമാനഗണാമ് എ്ഡ്‌ത്ത് കൊഡുക്ക ഒരു കൂരെക്കാറാന്‌ക്ക് സമാത്തെ>> എന്ത് സൊന്നാ്.
ഏസുണ തന്ന് ഊര്‌ക്കാറാര് തള്ള്‌റാര്
53ഏസു ഈ കദേന സൊല്ല്യെല്ല തീന്ത പ്‌റ അദിലിര്‌ന്ത് പോനാ്. 54അദ്‌ക്ക് പ്‌റ തന്ന് സൊന്ത ഊര്‌ക്കെ ബന്ത് എഗുദാര് പരേസ്‌റ കൂരെക്ക്‌റാഗ പോയി ബുദ്ദിണായണ സൊല്ലികൊഡുത്താ്. ഇദ്‌ണ കേ്ട്ട് ആള്‌ഗ ഒട്ടുക്ക് അദിസ്യപട്ട്: <<അവ്വൊ ഇവാന്‌ക്ക് ഈ ബുദ്ദിമ് ഇച്ചെ സെയ്യുള്ള സക്‌ദിമ് ഏദിലിര്‌ന്ത് കെ്ഡേത്ത്‌ദ്? 55ഇവാ് അയ്യി ആസാരിദ് മഗാനല്ലഗ? ഇവാന്‌ദ് അവ്വാസി മറിയ താനെ? ഇവാന്‌ദ് തമ്പില ആക്കോവു, ജോസെ, സീമോന്, ജൂദാ് എങ്കവാര് താനെ? 56ഇവാന്‌ദ് തങ്കെലാമ് ണമ്മ്‌ദൊപ്പ താനെ ഇര്‌ക്കാര്? ഇവാന്‌ക്ക് ഇദ്‌ഗെല്ല ഏദിലിര്‌ന്ത് കെ്ഡേത്ത്‌ദ്?>> 57എന്ത് സൊല്ലി അവാര് അവാന ബെലേമ് ബെക്കാലെ.
ആന ഏസു അവാര്‌ക്കെ: <<ഒരു സാമിദാസ്‌ണ ഒച്ചാരില്യ ഊര്‌ക്കാറാര് മദ്‌സുവാര്. ആന തന്ന് സൊന്ത ഊരിലിമ് കൂരേലിമ് മദ്‌സാഗെ മാട്ടാര്>> എന്ത് സൊന്നാ്.
58അദില്യവാര്‌ക്ക് ണമ്പിക്കില്ലാത്താദ്‌ണാലെ ഏസു അദിലി അദിഗ അദിസ്യ ഒന്റുമ് സെയ്യാലെ.
Trenutno odabrano:
മത്തായി 13: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
