Matius 7
7
“Hit nen wene it aperek inoba 'busak dek,” iluk yogeisasukha wene
(Lukas 6:37-38, 41-42)
1Itithogon yogeisasikhesik, ageikhe men yogeisasikhe, “At Allah nen wene hinoba 'biluk weagathinabinogo iluk, hit nen akhuni ageikhe wene inoba 'biluk weagarinakhup o. 2Hit nen wene it aperek inoba 'begethep iti hak, at Allah nen itithogonat wene hinoba 'bigin o. Nen, hit nen walegeke walhalok it aperek wogeisegethep iti hak, at Allah nen walegeke iti bagaat walhalok wokhisageinat o. 3Hit hinekaerek hinilekenma o kok obakha palek meke werek iti 'bikhakhigidegat, it hinagarlak lak hinerugi aperek inilekenma amumuleke 'bugurlagat meke ukiluk werekma wokhauwogoluk kolageisekhe lagap iti nenaluk. 4Hinekaerek hinilekenma o kok meke palek harokthek dogoligat, hinagarlak lak hinerugi iti yogeisekhe dogolik,
Hilekenma amumuleke ukekhe meke iti wokheak, iluk usak nogo? 5Hinoado baga anek hano thalek dogolik hinetaiken pere yi re! Hinekaerek hinilekenma o palek kok meke iti tak wokhakhalok nen, hinileken arat lia aga halok he, yabokane hinagarlak lak hinerugi inilekenma amumuleke werek meke iti erlok wokhausak o,” iluk yogeisasikhe.
6Itithogon yogeisasikhesik ageikhe men yogeisasikhe,
“Allah hasik 'bisegarek meke etnogo yeke wogokhunem, yabokane dagakhogon aik nen li'bilhinabinogo iluk, wogokhup o. Nen, hinobake ile hano meke mutiara iti, wam wogokhunem isok nen wulel warogo la'inogo iluk, yogokhubat o,” iluk yogeisasikhe.
Allah kino yogokhunem asuk holherek wene
(Lukas 11:9-13)
7-8Itithogon yogeisasikhesik ageikhe men yogeisasikhe,
“It akhuni inebe tomok nen Allah kino yogokhunem, at nen inebe tomok wogeisekherek anek iti. Nen, it aperek inebe tomok nen yi meke ti meke at oba herakhunem inebe tomok herakhegarek anek iti. Nen, it aperek inebe tomok nen thu puputhasinem, at nen inebe tomok thu hualisekherek anek iti. Iti nen he, hit Allah kino yogokhe dogono. Yogokhe dogoumo, wokhisageinat o. Hano meke at oba herakhe dogono. Herakhe dogoumo herasugunat o. Nen, thu puputhekhe dogono. Puputhekhe dogoumo, at nen thu hualhisageinat o. 9Hit ageikhe hina'buri nen,
Hipiri roti meke abu o, isinem, inopase lak nen, helekit meke wogeisegethep nogo a? 10E a, at he,
Ikan abu, isinem, warlo pelal meke wogeisegethep nogo a? Dek o. 11Hit hinobabut weak hegakhethep mekeat he, hina'buri hano meke wogeisegethep iti hinilumo, hano meke wogeisegethep o. Iti hak, hinopase Allah pogot oba meke iti, kino yogosugun meke motok hano meke wogosigin dek nogo a? Wogosiginat o. 12Hit hinakla nen,
It aperek nen itithogon hano hagatninabilep e, iluk apegethep iti hagat, hit nen it iti itithogonat hagarinakhe dogono o. Wene Allah nen Musa ayoko 'biluk ninasuk wakhikhe wene iti men, it Allah nen inayoko 'bisinem ane yogeisekhe lagoukha wene iti men, dapukhogon kok he, itiat o,” iluk yogeisasikhe.
“Holagape palek 'bugurlagat kirli-kerlorekma ukini,” iluk yogeisasikhe wene
(Lukas 13:24)
13Itithogon yogeisasikhesik, ageikhe men yogeisasikhe,
“Weakma nuk aga lageikharek iti, holagape palek iti kogatma. Nen, holak ebe yago baga lageikharek iti kogat akhuni inebe doalegat ukiliogei. Iti nen he, hit holagape palek 'bugurlagat kirli-kerlorekma iti baga uki lani. 14Mekeat he, holak hanoma lageikharek holak iti, ape palek iti herlekha'bugurlagat. Nen, holak ebe lageikharek iti motok kirli-kerlorekma nogo iluk, akhuni doalegat uki lausak dek nen, inebe pererlagat anek ukiliogei,” iluk yogeisasikhe.
Inekalat nukhetdisegarek wene
(Lukas 6:43-44)
15Itithogon yogeisasikhesik ageikhe men yogeisasikhe,
“It aperek inekalat Allah ane yogeisegarek meke thalek hinoba witluk nen, hinakla kagalinogo iluk, hinobabut hebelogo dogono o. It iti inelokhoken domba ena meke hakene hagarogo nen wisugun mekeat he, inetaiken akla re, yeke helo yeke anini weak meke hakene wisugun o. 16Yi o ti o eken ikherek iti baga, erlo ekagat hagatlagarek iti hakene, it nen hagathinabugun iti baga, inobabut ekagat hagatlasigin iti. O pati hakene arlok weak mekeat, eken anggur hano meke eken hakene itlukmo palharek nogo? E a, at he, herle mul arlok weak mekeat he, eken o ara hano meke eken hakene itlukmo palharek nogo? Dek o. 17O hano meke halok he, eken hano mekeat ikherek o. Nen, o weak meke halok he, eken itithogonat weak meke ikherek o. 18O hano mekeat he, eken o weak meke eken isu hak aperek isusak dek. Iti hak he, o weak mekeat he, eken, o hano meke eken isu hak aperek isusak degat. 19Yi o ti o eken hano ikherek dek meke iti re, erlo mukhogo, hetumo motok la'isegarek o. 20Itithogon hakene, it akhuni itithogon hagathinabugun iti baga, inobabut ekagat hinilu asugun o,” iluk yogeisasikhe.
“Mothogon hagakhidek inape baga anek umo, hanoma ukusak dek,” iluk yogeisasikhe wene
(Lukas 13:25-27)
21Itithogon yogeisasikhesik men yogeisasikhe,
“Hit akhuni nen, an yoknekhe dogolik,
Ninoe, ninoe, iluk ekhe lagap iti baga hinebe tha'bokhogonat, an nopase pogot oba meke apma 'bisekherekma etoma ukilugun dek. Pogot oba ukilugun iti re, it an nopase pogot oba meke akla apekherek meke mothogon hagariogei meke anegat ukilugun o. 22O ilugun hurli baga hagatlasigin itinem, akhuni doalegat noba witluk nen, yigithogon yoknesugun,
Ninoe. Nit nen, hat hetaga bagaat wene hano wene yakulisigik, mokat obabut weak meke akhuni inakla ukisukhasik werekma mukhogo ula'isigik, hagasusak dek meke elalinat doalegat hagakhik, hagarik nekhe lago emenogo dek a? iluk ugun mekeat he, 23an nen pakhogonat yigithogon yogeisagein o,
Hit hinebe an nokodek o. Weak motok hagarik nekhe lagap meke iti nalilu ya dogogup o. Kikil warani, iluk yogeisagein o,” iluk yogeisasikhe.
“Ap inebe pere nen o halhukha,” iluk oba lisogon yogeisasikhe wene
(Lukas 6:47-49)
24Itithogon yogeisasikhesik nen, ageikhe men yogeisasikhe,
“Halok he, tha nen, an nane iti asuk holiluk mothogon hagakhe halok, at nen yi hakene hagasigin o. Ap ageikhe etaiken werek meke nen o helekit oba dukhogon halhikhemo, 25miso kogat usa'ageik, i itluk kogat wageik, hisakne kogat hubetha ageik, hagakhikhe mekeat he, o etnogo helekit oba dukhugon halhikhesikmo nogo nen, thagoukhogon lageidek huk ageikhe iti hakeneat hagasigin o. 26Meke re, tha nen an nane yi asuk holhe dogolik mothogon hagariogo dek halok, yi hakeneat hagasigin. Ap ageikhe etaiken dek meke nen o lelagama dukhogon haldilukmo, 27miso kogat usa'ageik, i itluk kogat wageik, hisakne kogat hubetha ageik, hagakhe dogolik, o etnogo wakhikhemo, thatnakhogon wolok laga dogolik motok misak-dapukhogon weagatdisikhe iti hagat o,” iluk yogeisasikhe.
Inasuk holhukhasik nen, hogorakhukha wene
(Markus 1:22; Lukas 4:32)
28-29Yesus nen wene itithogon ilik waga lageikhesik wene arat ilokon warogo isikhemo, it akhuni doalegat emenogo nen,
“Eiya! Wene ekhe iti, it ap Allah ane holal waganek iteerek meke nen yoknisegarek hakene iliogo dek o. At nen wene ebe iteerek meke nen u hak ekhe iti, nayuk e!” iluk hogorakhukha.
Trenutno odabrano:
Matius 7: LAIDNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
