Matius 5
5
YESUS TOM OBA DAGEISIKHESIK YAKULISASIKHE WENE
Inakla arleken akhausak wene
(Lukas 6:20-23)
1Akhuni doalegat wagunem, at Yesus ileken 'birisalok nen, tom oba dageisikhesik hurek lageikhemo, it at ane waganhe lagoukha meke emenogo oba wagoukha. 2Wagoukhama, wene yakulisekhe dogolik,
3“Akhuni inakla nen,
An he, Allah il oba, ebe meke hasik nerlageik
welagei, iluk apegarek meke iti, kok pogot
oba meke apma 'bisekherekma etoma iteerek
irat iti nen,
inakla arleken akhekhe dogosagat o.
4Nen, akhuni inakla wiik-weakhogon
welageikharek meke iti, Allah nen inetaiken
thebeligin iti nen,
inakla arleken akhekhe dogosagat o.
5Nen, akhuni inobabut enogo welageikharek meke
iti, o Allah nen o abok yoknisasikhe iti, irat
ite asugun iti nen,
inakla arleken akhekhe dogosagat o.
6Nen, akhuni hipiri inom, i inom, abu ageikharek
hak, Allah akla apekherek meke kogotdiluk
mot motok hagasu warlok apegarek meke iti,
hipiri ina'ithogon nekarek hak, yabokane
Allah nen inakla warlok apiliogei tak-tagat
wogeisagein iti nen he,
inakla arleken akhekhe dogosagat o.
7Nen, akhuni inebe inakmurogon welageikharek meke
iti, ninopase nen it akmurinabigin iti nen he,
inakla arleken akhekhe dogosagat o.
8Nen, akhuni inetaiken opakiat karelek motok
welageikharek meke iti, yabokane Allah ebe
ineleken hugun iti nen,
inakla arleken akhekhe dogosagat o.
9Nen, akhuni inom weak werekma, it aperek nen
dapulogo 'bisegarek meke iti, at Allah nen he,
Yi an na'buriat o, iluk yogeisagein iti nen,
inakla arleken akhekhe dogosagat o.
10Nen, akhuni nen Allah akla apekherek meke
kogotdisegarek meke hasik, it aperek nen
weagarinakhunem, kok pogot oba meke apma
'bisekherekma etoma iteerek irat asugun iti nen,
inakla arleken akhekhe dogosagat o.
11-12Hit aban werek korlek, haganeat it ap Allah ane yogeisekhe lagoukha meke weagarinakhe lagoukha hagat, hit an nebe hasik, it akhuni aperek nen wenakhisigik, weagathinakhik, inekalat nenat hinabok palhe dogolik, yi weak ti weak hinoba 'bigik, hagakho halok he, hinakla arleken akhekhe dogosagat o.
Yabokane ninopase pogot ona meke nen oko kok meke woknisagein iluk, hinakla hano ageik, hinakla arleken akhigik, kokhogon hagakhe dogono,” iluk yogeisasikhe.
Mayu hasik inom, o lia hasik inom, yakulisasikhe wene
(Markus 9:50; Lukas 14:34-35)
13Wene itithogon yogeisasikhesik nen,
“Akhuni yoma tha'bokhogonat inobasik, mayu hekene hirat welagap o. Meke re, mayu iti aik dek aga halok he, nena meke baga aik weregerasusak apegep? Dek o. Aik weregerasusak motok dek nen, pulelogo la'isegarekma akhuni inisok nen tamelogo la'isegarek o.
14Nen, akhuni agat oba yoma tha'bokhogonat liarinakhe lagap meke hirat welagap o. O kota ageikhe tom ukul ebe baga halek meke limaklasusak erlok dek o. 15Nen, akhuni nen isagal yibarlogo isoak abura thebelogo 'begarek degat. Isok tilik oba dukhogon 'bisinem akhuni uma welageikharek meke inebe tha'bokhogonat liarinakherek. 16Iti hak, hit hano hagakhunem, it aperek nen,
It hano hagariogei, iluk hinopase pogot oba meke etnogo hogorasuak nen, hit akhuni iniloba iti hakeneat liarogo dogono o,” iluk yogeisasikhe.
Allah nen ninasuk wakhikhe wene etnogo hasik yogeisasikhe wene
17Itithogon yogeisasikhesik wene ageikhe men yogeisasikhe,
“An wagagi iti, Allah ane nisasuk wakhikhe meke etnogo inom, it ap Allah ane yogeisekhe lagoukha meke inane iti inom, inane thagaligiluk wagagi dek o. Eberogonat hagatlasuagaluk kogotdigiluk wagagi o. 18An nane eberogonat yokhisak. Pogot inom, agat inom, aban dek ageidek werek korlek ya, wene Allah nen ninasuk wakhikhe meke iti, holal herlekha'bugat murluban al hakene inom, inisiken opakiat hakene inom, dek ageidek motok tha'bokhogon eberogonat hagatlasigin o. 19Halok he, tha nen Allah nen isikhe meke herlekha'bugat meke opakiat thebelogo 'biluk, it aperek nen itithogon hagakhe dogoagaluk yakulisekhe halok, kok pogot oba meke apma 'bisekherekma etoma, at iti etaga yekerugi negen inakla meanetdekhe dogogun o. Meke re, tha nen Allah ane iti mothogon hagakhe dogolik, it akhuni aperek nen itithogonat hagakhe dogoagaluk yakulisekhe dogogin halok, kok pogot oba meke apma 'bisekherekma etoma, at etaga pogorat werekma kogotdekhe dogogin o. 20Allah akla apekherek meke mothogon hagasuogoluk, it akhuni nen Allah ane holal waganek iteerek meke emenogo inom, ap Farisi meke inom, inobabut hagariogei iti hagat, hagakhe dogogun halok, kok pogot oba meke apma 'bisekherekma etoma ukugun dek o. At he, it 'bugurlagat negen hagakharek meke, hit ebenageik kokhogon hagakhe dogogun halok anek ukugun o,” iluk yogeisasikhe.
Inakla aga inoba 'bisegarek hasik inasuk wakhikhe wene
(Lukas 12:57-59)
21 #
Keluaran 20:13
Itithogon yogeisasikhesik wene ageikhe men yogeisasikhe,
“Wene Allah nen nit ninopa lak yogeisekhe dogolik,
Akhuni inakhup o,
iluk isikhemo,
Inakhep halok he, wene hinoba 'bigin werek o, iluk isukha etnogo hinasuk holhe lagabat o. 22Meke re, an nen wene ageikhe yi yokhisak. Hat tha nen hagarlak hasik hakla aga dageikhe halok he, wene ageikhe hoba 'bigin werek o. Nen, hat tha nen hagarlak ageikhe yogokhe dogolik,
Hat he, hebe kepu yi re! iluk isi halok he, it ap wene erlo pilinekharekma etoma wokharek lalok, ukum hoba 'bugunat o. Nen, hat tha nen,
Hat he, hebe uo motok yi re! iluk isi halok he, wene hoba 'biluk weakma hetu aikmo la'agagin o. 23Halok he, hat tha nen hinameke hano weke wolok Allah ake 'bi laga dogolik, hakla nen,
Nagarlak etnogo nen,
At weak hagakhemo, iluk wene noba 'biliogo, iluk hinekaerek nen hinetaiken ebetlasi aga halok he, 24wolok ligin meke etnogo Allah ake 'begarekma etoma werlegat 'biluk, yabokane suguluk hapuke hagarlak etnogo oba witluk, wene thagalogo degetdusak o. Nen, wene etnogo arat thagalhep halok he, yabokane lalok Allah ake etnogo 'busak o. 25Nen, ap ageikhe hipisak agorek meke nen hat wokharik ap wene erlo pilinekharekma lagunem, ap etoma nen yabokane wokharik polisi inoba laumo, it polisi lak nen yabokane wokharik, iniki herle warogo 'bisegarekma launogo iluk, hipisak agorek meke iti holagarlem aban laga dogolik etaat ibathogon wene iti thagalogo heanerasusak o. 26Itithogon heanerakhidek halok, hiki herle warogo 'bagoumo, ap iti ameke pelegeke hat hoba werek meke iti oko 'bogokhogon aban wogokhidek werek korlek, ula'agousak motok dek o, iluk eberogonat yokhisigi,” iluk yogeisasikhe.
“Param ha'isausak dek,” iluk yogeisasikhe wene
27 #
Keluaran 20:14; Ulangan 5:18 Itithogon yogeisasikhesik ageikhe men yogeisasikhe,
“At Allah nen ekhe dogolik,
Humi param ha'isausak dek o,
iluk isikhe iti, hinasuk holhe lagabat o. 28Mekeat he, an nen wene yi yokhisak. Ap tha nen, he ageikhe ileken lakhalok akla nen,
Eiye. An he iti param hagatle, iluk apekhe halok, akla nen param eberogonat arat ha'ekhe o. 29Halok he, hileken ebeke nen weagathabusak hagatlaga halok he, hemelogo la'isano. Hebe abisake hetu aikmo po la'ageinogo nen, hemelogo la'isalok ebelake anek werekma hano. 30Nen, hiki ebeke nen weagathabusak hagatlaga halok he, hiki ebeke iti tekhogon la'isano. Hebe abisake hetu aikmo la'ageinogo nen, thekhogon la'isalok ebelake anek werekma hano,” iluk yogeisasikhe.
“Humi lologo here'isausak dek,” iluk yogeisasikhe wene
(Matius 19:9; Markus 10:11-12; Lukas 16:18)
31 #
Ulangan 24:1-4
Itithogonat yogeisasikhesik, ageikhe men yogeisasikhe,
“Nen, wene ageikhe haganeat yogeisekhe dogolik,
Ap ageikhe age lologo here'isagaluk halok he,
An he yi here'isigi o, iluk holal waganogo, he iti
wogosusagat o,
iluk isukhaat. 32Itithogon meke re, an nen wene ageikhe yi yokhisak. Ap ageikhe age waganek meke, it ap ninat meke param ha'igidekmaat, lologo thogotdisekhe halok, he iti param hagasuagaluk thogotdisekhe o. Nen, at ap ageikhe nen, he lologo here'igin meke iti waganhe halok, at ap iti paramat hagasigin o,” iluk yogeisasikhe.
“Hupuk palusak dek,” iluk yogeisasikhe wene
33 #
Imamat 19:12
Itithogon yogeisasikhesik, ageikhe men yogeisasikhe,
“Nen, wene ageikhe yi, Allah nen ninopa lak emenogo yogeisekhe dogolik,
Hit hinekalat an Allah netaga hupuk palhup o.
An yigithogon hagasigin o, iluk an netaga
hupuk palhep halok he, hinopase
Netagapogot nil oba egen hagat, hagatno,
iluk isikhe wene hinasuk holhe lagabat o. 34Meke re, an nen ageikhe yi yokhisak. Hit nen, at ageikhe yogokhe dogolik,
Yi meke ti meke etaga hupuk palogo yokhikhi o, iluk yogosusak motok dek o. Allah ebe pogot iti baga hurek dogolik wene morerakherek. Halok he, pogot iti etaga hupuk palusak motok dek o. 35Nen, agat iti ninopase Allah isok yago welagarek. Halok he, agat yi etaga hupuk palogo yogeisausak motok erlok dek o. Nen, o Yerusalem ukul kok iti an hinopase Netagapogot meke etoma welagarek. Halok he, o iti etaga hupuk palusak degat o. 36Nen, yogotak he, nisi opakiat morla asugak igik, nen, yogotak nisi opakiat mirli asusak igik, isinem hinane hologo morla ageik, mirli ageik, hagakherek motok dek o. Halok he, hinukuloak iti etaga palogo hupuk palusak degat o. 37Hit nen,
I o, uogoluk halok he,
I oat usak. Nen,
Dek o, uogoluk halok he,
Degat usak o. Wene ninat meke ageikhe lapeli lagap halok he, Iblis obabut weak meke etnogo nen hinakla kagalhe korlek ugun o,” iluk yogeisasikhe.
“Hit weagathinakho halok oko 'busak dek o,” iluk yogeisasikhe wene
(Lukas 6:29-30)
38 #
Keluaran 21:24
Itithogon yogeisasikhesik, wene ageikhe men yogeisasikhe,
“Haganeat wene ageikhe men isukha,
Hinileken hemelho halok he, oko inelekenat
hemelusak. Nen, hinaik dakulho halok he,
oko inaigat dakulusak,
iluk isukha meke iti hinasuk holhe lagap o. 39Itithogon mekeat he, an nen wene ageikhe yi yokhisak. Weagathinakha halok oko 'bugup o. Hinelokhoken ebeke dapukhogon hinakho halok he, paike inomat hasuagaluk wogosusagat o. 40Nen, it akhuni aperek nen, it ap wene erlo pilinekharek meke emenogo inoba wokhisik lalok,
Hasuk akmanke ugu meke woknom, iluk isi halok he, iti inom, hasu thogei meke itikmanke ugu meke iti inomat thabakhogon wogeisausak o. 41Nen, at ap ageikhe nen ane obatnerogonat ekhe dogolik,
Suke yi horok eta 'bani lausak o, isi halok he, hit nen walekhogon negenat 'bisa lausak o. 42Nen, at ap ageikhe nen,
Hameke iti an woknom, iluk kino isi halok he, hina'it hisigidegat wogosusak o. Nen, at ageikhe nen,
Hat meke iti yabokane wokhesik nen, elanma hasik woknom, iluk isi halok he,
Na'it, igidek wogosusagat o,” iluk yogeisasikhe.
“Akhuni hinom agorek meke hinakmurogo dogosak,” iluk yogeisasikhe wene
(Lukas 6:27-28, 32-36)
43 #
Imamat 19:18
Itithogon yogeisasikhesik, ageikhe men yogeisasikhe,
“Haganeat it aperek nen wene men yogeisasukha,
Hit he, akhuni aperek hinom welagathep meke
hinakmurinakhe dogolik,
it aperek hinom agorek meke halok he, hina'it inabusak o, iluk isukha meke iti hinasuk holhe lagap o. 44-45Itithogon meke re, an nen wene ageikhe yi yokhisak. At ninopase Allah pogot oba meke mo iteerek dogolik agat oba liarogo akhuni inobabut weak meke dek, hano meke dek, tha'bokhogonat inobasik yarisigik, nen, miso usa'i agarek iti, it mothogon hagariogei meke dek, korlo hagariogei meke dek, tha'bokhogonat inobasik usa'i ageik, hagakherek iti hak, hit hinopase Allah pogot oba meke a'buriat asubageik iluk, akhuni hinom agorek meke iti hinakmurinakhe dogolik, it weagathinabiogei meke iti, Allah nen hanorinabuagaluk, it inobasik sembayan ekhe dogono. 46Nen, it akhuni aperek nen, hit inakmuthinakharek meke iti anek hit nen hinakmurinakhe lagap halok he, Allah nen oko wokhisagein nogo? Dek o. Iti hak he, it ap pemerintah meke hasik uang kino iluk natogokharek meke nen inobabut itithogonat hagakharek o. 47Nen, hinerugi hinagarlak lak halok anek heagei warinakhe lagap halok he, hinobabut itithogon hit anek hagakhe lagap 'buk. It ap itikmanke meke inobabut itithogonat hagakharek dek a? Itithogon hagakharek o. 48Halok he, ninopase Allah pogot oba meke obabut hano motok karelek dogolik akmurinakherek hak, hit itithogonat hinakmurinakhe dogono o,” iluk yogeisasikhe.
Trenutno odabrano:
Matius 5: LAIDNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
