Matius 12
12
Akhuni Yahudi meke iniki 7 baga Allah hasik werlegat werek korlek, Yesus agarumi gandum eken palogo nilik lagoukha wene
(Markus 2:23-28; Lukas 6:1-5)
1O itinem, it akhuni Yahudi meke iniki 7 baga Allah hasik werlegat werek korlek, at Yesus agarumi ane waganhe lagoukha meke emenogo inom gandum yagomake laga dogolik, agarumi hipiri abu nen, gandum eken palogo nilik nilik lagoukha. 2Palogo nilik lagunem, it ap Farisi meke nen inileken hisalok nen, Yesus men yogokhukha,
“Lakhan! Niniki 7 baga Allah hasik werlegat dogolik,
Itithogon hagasusak dek, iluk wene palek werek mekeat he, hat hagarumi gandum eken palogo nilik wageikha yi re!” iluk yogokhukhama, 3at Yesus nen,
“At Daud agarumi oporlik lagoukha meke inom hipiri nonaik 'bisasikhemo, at nen hagakhikhe meke Allah ane baga holal waganek etnogo hit nen etaga thalhidek welagap a? Etaga thalhethebat o. 4At Daud nen Allah ai halekma ukisikhesik nen, hipiri roti meke Allah hasik 'bekhe lagoukha meke it ap Allah iteerek meke inarligat anek nausak. Mekeat he, at Daud ebe men, it ap at oporlik lagoukha meke men, inom, it nausak dek meke waganhukhasik nasukha iluk holal waganek etnogo hit etaga thalhidek welagap nogo? 5Nen, niniki 7 baga Allah hasik werlegat dogolik yi meke ti meke hagakhidek werlegat dogosak mekeat he, it ap Allah iteerek meke anek, Allah ai halekma ukiluk, it hagasusak meke hagakhunem wene inoba 'begarek dek, iluk Allah ane holal waganek werek etnogo etaga thalhidek nogo? 6Halok he, an nen wene yi yokhisak. Allah ai halek iti erlok dek negen. Meke re, an yoma welagei yi anek he, motok kogat o. 7#Hosea 6:6 Allah ane holal waganek etnogo baga, wene men iluk werek,
An Allah nakla nen, akhuni nen inako
watnekharek iti na'it o. It akhuni aperek
inebe inakmurinakhe dogosak itiat warlok o,
iluk isikhe meke iti, hit hutdilepma, it yoma weak hagakhidekma wene inoba 'bilep dek o. 8Niniki 7 baga Allah hasik werlegat welagorek iti, iteerek an abat itaklasi agagi nebe yiat o,” iluk yogeisasikhe.
Allah hasik werlegat werek korlek, Yesus nen ap ageikhe iki lapelek meke hano hagakhikhe wene
(Markus 3:1-6; Lukas 6:6-11)
9-10At Yesus o etoma nen lageikhesik, o it akhuni Yahudi meke sembayan egarekma ukisikhesik nen, ap ageikhe iki ebelak lapelek werekma ileken hasikhemo, it ap aperek nen wene Yesus oba 'buogoluk itema waganhe dogolik, men yogokhukha,
“Allah hasik werlegat dogolik u hagarinabu erlok a? Dek a,” iluk yogokhukhama 11at Yesus nen,
“Ap hit meke ageikhe akorlak domba opakiatma Allah hasik werlegat dogolik, ebe kilinla usaumo, hapokhogon lia'isusak nogo a? Lia'isusagat o. 12Meke re, domba iti meke erlok dek negen o. Akhuni inebe iti oko kogat o. Halok he, Allah hasik werlegat dogolik, hano hagarinabumo erlogat o,” iluk yogeisasikhe. 13Itithogon yogeisasikhesik ap etnogo men yogokhikhe,
“Hiki walokhan,” iluk yogokhikhemo, iki etnogo walothasinem iki ebelake hano hagat, hano motok ageikhe. 14Itithogon hagakhikhemo, it ap Farisi meke emenogo o silimo dukhisukhasik nen, Yesus wasuogoluk abok palhe lagoukha.
Allah nen, “Yesus an nen ayoko 'biluk la'i agagi,” iluk isikhe wene
15Abok itithogon palhunem, at Yesus nen inobabut ekagat hutdisikhesik nen, o etoma nen lagunem akhuni inebe doalegat, at oporlik lagoukha. Lagoukhama re, u warek meke tha'bokhogonat hano hagarinakhikhesik nen,
16“An nen hagathinakhi yi, nabok akhuni aperek motok yogeisugup o,” iluk inasuk warogo yogeisasikhe. 17Itithogon hagakhikhe iti, at Yesaya Allah ane yogeisekhe lageikhe meke etnogo nen isikhe tak-tagat hagatlasuagaluk hagakhikhe iti. 18At Allah nen,
“'Bikhani! At iti re, an natuaneke dogoagaluk
nekaerek nen witaberogo meldigi.
Netaiken hunik noba hotokthek meke, at itiat o.
An Nagoreke at oba 'bumo,
an nen akhuni wene inoba 'bigik, kokhik,
mothogon 'bigin iti hasik, at nen it akhuni
itikmanke meke wene pakhogon yogeisekhe
dogoginat o.
19At nen akhuni inom wene tauk ageik, ane puk
weak wenageisigik,
akhuni holagarlemke lagunem ane holuagaluk
kokhogon yogeisigik, hagakhe dogogin dek o.
20O ilugun hurli baga at nen wene akhuni inoba
'bigik, kokhik, mothogonat hagakhe dogolik,
at obatne asigin iti aban werek korlek,
hite oak sigilik meke, at nen hukaligin dek o.
Nen, isagal amulok dageigidek thode anek
dageikhe halok he, at nen naguldisagein
degat o.
21 #
Yesaya 42:1-4
Nen, it akhuni itikmanke meke nen at etaga
bagaat, At nen hanotninabigin o, iluk ugun,”
iluk isikhe meke werek iti tak-tagat hagatlasuagaluk hagakhikhe iti.
“At Yesus iti, Beelzebul akla ukekhesik hagarik liliogo,” iluk isukha wene
(Markus 3:20-30; Lukas 11:14-23)
22Itithogon hagakhikhesik oba nen, yabokane ap ageikhe mokat obabut weak meke akla ukisikhemo nen ileken puk ageik, ane ako dek ageik hagakhikhe meke Yesus oba wolok wagoukhama, at nen hanotdisikhemo ileken puk meke etnogo hano ageik, ane dek meke huak igik, hagakhikhe. 23Itithogon hagakhikhemo, it akhuni alilu natogorlek welagoukha meke nen,
“Eiye! Daud a'but wisigin iluk ekhe lagoukha etnogo ebe yi a?” isukha. 24Itithogon isinem, it ap Farisi meke emenogo inasuk holhukhasik, men isukha,
“A! Ap yi mokat obabut weak meke inoe kok etaga Beelzebul etnogo at oba dukthek werekma nogo nen, mokat at agarumi negen inobabut weak meke akhuni inakla ukiluk werekma mukhogo ula'isiliogo,” iluk isinem, 25at Yesus nen it inakla apasukha meke ekagat hutdisalok, men yogeisasikhe,
“Ap koktek inetagapogot inagarumi inapma hagasik welageikharek obake dopok, it-it inom hurlitdakhalok, inom weak dogogun halok he, erlok dek asugun o. Nen, akhuni inai ukul dopok opakiat meke men, ap inebe dopok ina'buri men, inom hurlitdakhalok inom weak dogogun halok, weak asugunat o. 26Iti hak, at Iblis ekaerek agarumi mokat inobabut weak meke inom hurlitdakhalok, ebetlake nen ebetlake mukhogo ula'iselepma, at agarumi hagasik welagarek meke nikithogon obatne dogolep? Erlok degat o. 27An nen Beelzebul iti obatne baga, at agarumi inobabut weak meke akhuni inakla ukiluk werekma mukhogo ula'isekhe lagei halok he, hit hinagarumi nen mokat inobabut weak meke it aperek inakla ukiluk werekma mukhogo ula'isiliogei iti, tha obatne baga mukhogo ula'isiliogei apegep. Hinagarumi nen itithogon hagariogei iti baga, it nen,
Wene at Yesus hasik egep iti, korlo egep o, iluk wene hinoba 'bu hak hagariogei o. 28Mekeat he, an nen mokat inobabut weak meke iti akhuni inakla ukiluk werekma an nopase Agoreke obatne baga ula'isekhe lagei halok he, Allah nen at apma 'bisagein etnogo arat hit hinoba horok asi aga o. 29Ap ageikhe obatneak meke iki herle warogo 'bigidegat, aila at ameke iniki abusak wagani ukusak, erlok apegep? Erlok dek. Iki herle warogo 'biluk anek he, ameke iti iniki abusak erlok wagani ukusak o.
30Nen, tha nen ebe an werekmake welageidek halok he, at iti an nipisak wim kagalek negenat o. Nen, tha nen an nipisak akhuni natogorinakhe lago dek meke halok he, at iti nenat thirlik-pirlikhogon ula'isiliogo o,” iluk yogeisasikhe. 31Itithogon yogeisasikhesik wene ageikhe men yogeisasikhe,
“Wene itithogon egep iti nen, an wene yi yokhisak. Akhuni nen yi weak ti weak hagariogei meke inom, inakla nen it aperek meanetdisalok inane baga nen inetaga weagatdiliogei meke inom, at Allah nen erlok thagalogo degetdisausak meke re, Allah Agoreke iti anek inakla nen meanetdiluk etaga weagatdisi halok he, erlok thagalogo degetdisausak motok dek o. 32Tha nen an abat itaklasi agagi etnogo akla meanetdaniluk netaga weagatdisi halok he, weak hagasigin meke iti Allah nen erlok thagalogo degetdisausak mekeat he, Allah Agoreke iti akla meanetdiluk etaga weagatdisi halok he, weak hagasigin meke iti, Allah nen yogotak men, o ilugun hurli baga arat hagatlatluk dogogun oba men, thagalogo degetdisausak motok dek o,” iluk yogeisasikhe.
“O eken ikherek oba nen erlo ekagat hutdegethep,” iluk yogeisasikhe wene
(Lukas 6:43-45)
33Itithogon yogeisasikhesik ageikhe men yogeisasikhe,
“O eken hano meke erlo hano meke nenat ikherek. Nen, o eken weak meke iti, erlo weak meke nenat ikherek. Itithogon ikherek iti baga, o eken yi hano meke eken igik, yi weak meke eken igik, ekagat hutdegethep o. 34Hit hinebe warlo nen itago meke yomarani! Akhuni nen yi wene ti wene inapema nen egarek iti, inakla kerlek dogolik kagalogo dagei agunem egarek iti nen, hit he, hinobabut weagat dogolik, wene hano meke ekhe dogosak a? Erlok dek o. 35Akhuni inobabut hano meke re, inakla hano meke kerlekhogon dogolik, kagalogo dagei agunem, wene hano mekeat dukhi agerek o. Meke re, akhuni inobabut weak meke inakla weak meke kerlekhogon dogolik, kagalogo dagei agunem, wene weak mekeat dukhi agarek o. 36Halok he, an wene yi yokhisak. Yabokane Allah nen initema waganogo wene inoba 'bigik, kokhik, hagasigin itinem, akhuni inane we yugunat egarek meke iti hasik wene inoba 'bisageinat o. 37Hit hinakaerek hinane egethep meke mothogonat Allah nen wene hinoba 'bigik, kokhik, hagasiginat o,” iluk yogeisasikhe.
“Nit nen hutdaguok nen iluk, hat nen elalin meke ageikhe hagasin o,” iluk yogokhukha wene
(Markus 8:11-12; Lukas 11:29-32)
38Itithogon isikhemo nen, it ap Allah ane holal waganek iteerek meke aperek inom, it ap Farisi meke aperek inom, Yesus men yogokhukha,
“Noe. Nit nen hutdaguok nen, hat nen elalin meke ageikhe hagakhunem ninileken hau warlok iluk yokhekho,” iluk yogokhukhama, 39at Yesus nen,
“Hit akhuni o yogotak welagap meke yoma re, hinobabut weak anek hagarik nekhe dogolik, Allah hinom dopokhogon dogou'buk yoma re! Itithogon dogolik, hit nen,
Nit nen hutdaguok nen, hat nen elalin meke ageikhe hagasin he, iluk yoknekhe lagap mekeat he, an nen elalin ninat meke ageikhe hagasigin motok dek o. At Yunus Allah ane yogeisekhe lageikhe meke nen akhuni aperek hutduagaluk elalinat hagakhikhe iti hak anek, an nen yabokane ageikhe hagakhunem hinileken neagun o. 40At Yunus iti ikan kok elabut akla werek korlek, o hi ageik, wi ageik, hagakhe korlek iki henagan welageikhe o. Iti hakeneat, an abat itaklasi agagi etnogo, agat akla o hi ageik, wi ageik, hagakhe korlek, niki henaganat dogogin o. 41At Yunus iti nen it akhuni o Niniwe meke etoma Allah ane yogeisekhe lageikhemo, inobabut hebelatluk, yi weak ti weak hagakhe lagoukha meke here'isasukha o. Meke re, at Yunus iti etaga dek negen. At ageikhe yoma werek yi anek, kogat etogo nen, o ilugun hurli baga Allah nen akhuni ukum inoba 'bigik, kokhik, hagasigin itinem, akhuni o Niniwe meke etoma inebe melatluk, hit akhuni o yogotak welagap meke yi men yokhisagun,
Hit weak, hinekarli, iluk yokhisagun o. 42Haganeat at he kok etagapogot ai o i aputmo wema eloma walegat etoma nen at ap Salomo iti akla kagalek motok dogolik hagakhe lageikhe meke asuk holigiluk wageikhe. Meke re, at Salomo iti erlok dek negen. Meke re, ageikhe yoma werek yi anek he, motok kogatma, yabokane o ilugun hurli baga Allah nen akhuni ukum inoba 'bigik, kokhik, hagasigin itinem at he kok iti ebe melatluk nen, hit o yogotak welagap meke yi nen yokhisagein,
Hit weak, hinekarli, iluk yokhisagein,” iluk yogeisasikhe.
At Yesus nen, “Mokat obabut weak meke isok oba apuke wagarek,” iluk yogeisasikhe wene
(Lukas 11:24-26)
43Itithogon yogeisasikhesik ageikhe men yogeisasikhe,
“Mokat obabut weak meke iti akhuni inakla nen dukhekherethek nen,
An nai komake dogeik nen lak he, iluk thet walogo dogosak oba obolukmo herarik, i motok dekma etoma nekherek nekherek, herakherek motok dek o. 44Motok dek nen he, at nen men ekherek,
An naila alebageik welagagimo meke etnogo napuke lalok uki ligin o, iluk wagarek. Wagarethek ukekherek, o etnogo inebe dek, o 'bon mekeat he, amumul ula'iluk motok karelek werekma 'bikha agarethek nen, 45yabokane apuke dukhi lagarethek nen, mokat aperek inobabut at obabut hakene dek. At he, inobabut motok weak meke inebe 7 nen, inayoko 'bi lagarethek nen, wogosik o etnogo uki agarethek nen, ap iti akla ukegarethek nen welageikharek o. Itithogon ukiluk werekma, ap iti alebageik, obabut hano negen welageikhe mekeat he, yabokane obabut motok weagat hagatlagarek. Iti hak, hit akhuni o yogotak ya hinobabut motok weak hagakhe lagap meke yi, itithogonat hagasugun o,” iluk yogeisasikhe.
Yesus agosa inom, agarumi inom, at ebe herarik wagoukha wene
(Markus 3:31-35; Lukas 8:19-21)
46At Yesus akhuni doalegat inom dogolik wene yogeisekho werekma, at agosa inom, agarumi inom, wene yogosuogoluk oba wagoukhasik nen, okutlu welagoukha. 47Werekma, ap ageikhe nen,
“Yesus, lakhan! Hat hagosa men, hagarumi men, wene yokhisuogoluk herakhabik wageikhasik okutlu werek o,” iluk yogokhikhemo, 48at Yesus nen he,
“An nagosa nagarumi iti thani nogo?” iluk yogokhikhesik, 49it ap agarumi ane waganhe lagoukha meke emenogo iki sisik inoba 'bisikhesik nen,
“An nagosa nagarumi, it yiat o. 50Tha nen an nopase pogot oba meke akla apekherek meke mothogon hagakherek halok, at iti an nagot, neru, nagosa werek o,” iluk yogokhikhe.
Trenutno odabrano:
Matius 12: LAIDNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
