Matius 11
11
1It ap Yesus ane waganhe lagoukha meke inebe 12 emenogo inasuk itithogon warogo 'bisalok nen, akhuni inai ukul dopok horogat meke wene hano wene etnogo yakulisigik, inasuk wakhik, hagasigiluk, o ukul etoma nenat nekhe lageikhe.
Yesus nen Yohanes ima usa'isekhe lageikhe meke hasik yogeisasikhe wene
(Lukas 7:18-35)
2At Yohanes ima usa'isekhe lageikhe meke etnogo iki herle warek werekma, akhuni nen,
“Kristus itithogon hagariogo,” iluk ugunem asuk holhikhesik nen, at agarumi ane waganhe lagoukha meke Yesus oba hinok waganuagaluk la'isa ageikhe. 3La'isa ageikhemo wagoukhasik nen,
“Ap ageikhe wisigin iluk ekhe lagoukha etnogo, harat a? E a, at he, ninat meke ageikhe therogo dogogun a?” iluk yogokhukhama, 4at Yesus nen men yogeisasikhe,
“Hit he, an yigithogon igithogon hagakhunem hinileken neegik, wene isinem hinasuk holhik, hagakhep meke iti, at Yohanes hutukhogon yogosi lano o. 5Inileken puk meke 'bekelogo hano ageik, inae la'belek meke holak lageik, inoba u henako hakene inayuk meke werekma hagarinakhunem hano ageik, inasuk dogou meke inasuk huakhogon holhik, akuni warek meke inilugurinakhik, it aperek inameke dek meke hano wene yakulisigik, hagakhunem hinileken neegep etnogo hutukhogon yogosi lano. 6Yogotluk tha nen etaiken pere atluk here'anhidek dogogin halok he, akla arleken akhekhe dogogin o, iluk yogosi lano,” iluk la'isasikhe.
7Itithogon isikhemo, it Yohanes agarumi emenogo lagoukhama, at Yesus nen akhuni doalegat emenogo Yohanes abok men yogeisasikhe,
“Hit he, o limo akhuni dekma etoma nena meke hinileken huogoluk laga lagasip nogo? Hiteka yagareka hisakne nen huphogon lageik-wageik hagakho werekma 'bikha luogoluk laga lagasip a? 8E a, at he, nena meke ha luogoluk laga lagasip. Ap ageikhe asu hano motok meke ugu werekma ha luogoluk laga lagasip a? Lakhani! Inasu hano meke ikhegarek iti, koktek inetagapogot meke inaila dogolik halogat ikharek. 9Halok he, nena meke 'bikha luogoluk laga lagasip? E a, at he, ap Allah ane yogeisekherek meke ageikhe werekma hinileken 'bikha luogoluk laga lagasip a? Eberogonat, itiat o. An nen yokhisak. It ap Allah ane yogeisekhe lagoukha meke aperek welagoukha mekeat he, it iti erlok dek negen. Mekeat he, at Yohanes iti anek he, etagapogot isiken negenat o. 10#Maleakhi 3:1 At Allah nen men isikhe,
Hat yabokane lanogoluk ap ageikhe hat hagolak
ya'agekhe dogoagaluk, ayoko 'biluk alebageik
la'igima o,
iluk isikhemo holal waganogo 'bisukha iti ebe at Yohanes hasigat isikhe. 11Halok he, an nane eberogonat yokhisak. Akhuni tha'bokhogonat inagosa lak nen itaginabik wagoukha mekeat he, inetaga dek anek o. Mekeat he, at Yohanes ima usa'isekherek meke iti anek, etaga werek o. Itithogon mekeat he, nopase pogot oba meke apma 'bisekherekma etoma, at Yohanes etnogo etaga dek negen mekeat he, it akhuni aperek inetaga dek meke iti, inetaga werek negenat o. 12At Yohanes ima usa'isekhe laga iti hurli nen yogotak ya hurli, it inobabut weak inakla aga weak meke nen, nopase pogot oba meke apma 'bisekherek etnogo ina'it nen erlok degetduogoluk inobatnerogo walhiliogei. 13At Yohanes ebe aban wageidek werek korlek, wene Allah nen inasuk wakhikhe wene etnogo baga inom, Allah ane yogeisekhe lagoukha meke etnogo baga inom, yabokane hagatlasigin iti meke pakhogon yogeisekhe lagoukha etnogo 14hinetaikenma hutukhogon waganhep halok, at Elia ebe wisigin, iluk abok isukha etnogo, ebe Yohanes waga itiat o. 15Hit hinasuk holusak halok he, hanorogon holini o.
16Akhuni o yogotak werek ya baga re, nena meke oba lisogo yokhisak. Yi meke oba lisogo ik. It iti yekerugi pasar oba oko waganharekma etoma hurek dogolik, inagarlak lak inom wene la'igik-wa'igik ekhe dogolik,
17Nit etai watdinaguogoluk isa ula'ogo mekeat he, hit nen ekaka igidegat. Nen, de asuogoluk, de wene erlo ula'ogo mekeat he, hit nen de ageidegat, iluk egarek etnogo hagat, hagariogei o. 18At Yohanes iti hipiri inom, anggur eken apusu inom, nikidek here'isalok welaga iti hasik, it akhuni nen he,
At iti mokat obabut weak meke akla ukekhesik werek o, iluk iliogei. 19Meke re, an abat itaklasi agagi etnogo, hipiri inom, anggur eken apusu inom, nilik wagagisikmo, akhuni nen nabok ekhe dogolik,
Hipiri inom, anggur eken apusu inom, oba la'buk niliogo yi! It ap pemerintah hasik uang kino iluk waganharek meke inom, weak hagarik nekharek meke inom, inom hunetdakhalok werek yi 'bikhani! iluk iliogei iti, Allah akla motok kagalek dogolik hagakherek iti nen, hanorakhunem inileken halok,
Morat, iluk hutdugunat o,” iluk yogeisasikhe.
It akhuni inai ukul dopok wene eberogonat iluk hutdigidek nen yogeisasikhe wene
(Lukas 10:13-15)
20Itithogon yogeisasikhesik nen, akhuni inai ukul dopok at nen hagasusak dek meke elalinat hagakhunem inileken hekhe lagoukha mekeat he, inakla hutdigidek dogolik, yi weak ti weak hagakhe lagoukha meke here'isigidek welagoukha meke wenageisekhe dogolik, men yogeisasikhe,
21“Hit akhuni o Korasim meke men, o Betsaida meke men, eiye! Nakmu lak o. Akhuni nen hagasusak dek meke an nen elalinat hit ninom dogolik hagakhe lagei etnogo, o Tirus Sidon etoma hagakhe dogolema, it akhuni o etoma meke hean 'biluk hagakharek hak, inasu pelabi ikhigik, 'bisi yugulharek hakene wul dabulhik, hagakhe dogolik, weak hagakhe lagoukha meke iti thogotdisalok inobabut haganeat hebelatlep mekeat, hit he, itithogon hagasusak hina'it iti nen weagathinabigin o! 22Mekeat he, an nane eberogonat yokhisak. Yabokane o ilugun hurli baga Allah nen ukum hinoba 'bigik, kokhik, hagasigin itinem he, it akhuni o Tirus Sidon etoma inom, ukum inoba 'biluk alhe negen inasigin mekeat he, hit anek he, motok akinhogo negen hinasigin o, iluk yokhisigi. 23Nen, hit akhuni o Kapernaum meke yi hinakla nen,
Allah nen pogot oba lia'inaniluk kogotdinanigin, iluk hogorakeke lagap a? Motok dek o. Akhuni watlatluk lageikharekma etoma motok usa'inagagin o. Akhuni nen hagasusak dek meke an nen elalinat hit ninom dogolik hagakhe lagei etnogo, o Sodom etoma hagakhe dogolema, it etoma inebe dek ageidek yogotak ya motok hunigat dogolep o. 24Yabokane Allah nen ukum inoba 'bigik, kokhik, hagasigin itinem he, it akhuni o Sodom welagoukha meke ukum inoba 'bisalok alhe negen inasigin mekeat he, hit anek he, ukum motok akinhogo negen hinasigin o, iluk yokhisigi,” iluk yogeisasikhe.
“Hit thet walubageik nen an noba witni o,” iluk yogeisasikhe wene
(Lukas 10:21-22)
25-26Itithogon yogeisasikhesik, o itinem, at Yesus nen Allah ebe yogokhe dogolik,
“Allah nopase! Pogot agat iteerek harat o! Wene tha'bokhogonat iti, it akhuni inakla kagalek meke men, yi wene ti wene inilu meke men, inilu asunogo iluk lima'iluk nen, it inobabut yekerugi ket itago meke hakene anek, pakhogon yogeisegen iti hakla warlok apegetik nenat yogeisegen iti nen heagei wathakhe lagei, nopase,” iluk yogokhikhe. 27Itithogon yogokhikhesik, it akhuni emenogo men yogeisasikhe,
“An nopase nen yi meke ti meke tha'bokhogonat iteerek dogoagaluk woknikhikhe. Nen, an Allah a'but yi, akhuni tha'bokhogonat motok inokodek mekeat he, nopase Allah arligat anek ilu welagarek. Iti hagat, an nopase Allah iti akhuni tha'bokhogonat motok inokodek mekeat he, a'but an narligat anek nilu welagarek o. Nen, Allah a'but an nenat nakla apalok nen nopase ebe akhuni aperek inilu asuagaluk pakhogon yogeisegerek meke itiat inilu ageikharek.
28Hit hinoba akin-pakinhogo thet weak hagakhe lagap meke iti, an nen hinoba thet korogo 'binagumo thet walubageik nen, noba witni o. 29-30An nasuke ukharlek su ade al warek hano ukharlogo wokhisaumo alheat hugun iti nen, hinomorlo baga waganiluk, an nobabut enago dogolik inapma negen welagarek etnogo hutukhogon yakulilik nekhe dogono o. Itithogon nekhe dogogun halok, hinetaiken hapuk igin o,” iluk yogeisasikhe.
Trenutno odabrano:
Matius 11: LAIDNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
