Luka 23
23
Yesu kagalwa habehi ya Pilato na Herode
1Baho dale gima da Nhaguso Nghulu wenuka, wamgala kwa Pilato. 2Wasonga kumtagusa walonga, “Tumona yuno kobananga lukolo lwetu, kowagomesa wanhu sukuwamwinghe Mtawala Kaisari kodi, ilawa baho kailongaga kamba heyo iyo Mndewa Kristo.” 3Pilato kamuuza kalonga, “Hambwe gweye gwegwe mndewa wa Wayuda?” Kedika kamulongela, “Gweye vivo ulonga.” 4Pilato kawalongela Watambika Wakulu na madale ga wanhu, “Siyona mbuli ihile kwa munhu yuno.” 5Hewo wananahila nghani walonga, “Kawalongelaga undunyu iwanhu, yahawalanguliza lulawile Uyuda kose na Galilea yose mpaka kuno.”
6Pilato viyagahulike higo, kauza kamba munhu yuno kalawa Galilea? 7Na viyagapatile goya kamba heyo kalawa isi ya Mtawala Herode, kamgala kwa Herode, kwa mzoko siku zija heyo kakala Yerusalemu.
8Herode viyamuwene Yesu, kadenghelela nghani, kilumbo kasulukila kumona mazuwa bwando, kilumbo kazihulika mbuli zake, kabili kakala yolonda kulola vilolomboto vonda visanghanwe na heyo. 9Kamuuza mbuli bwando, Yesu hedike mbuli. 10Bali Watambika Wakulu na Wananzuma wema wima, wamtagusa hakulu nghani. 11Baho Herode hamonga na Wakulu wa asikali wamdawalila, wamtendela mchalango; wamvaza miguwo inogile imelemetaga, imala baho kambweza kwa Pilato. 12Disiku didija Herode na Pilato waitema ubwiga, kwa mzoko aho haichanduso wakala waihile.
Kitala cha Pilato, kamfungulila Barabba
13Pilato kawakema watambika wakulu, na iwavyele, na madale ga wanhu walundike. 14Kawalongela, “Mumgala munhu ino kumwangu, mumlonga kowalulusa iwanhu; basi nimuuzagiza, na mweye kuno mulola, bali siwene tozo kumwake munhu yuno, ajo dumumkengemeka. 15Viyemela Herode na heyo vivo hamuwene na tozo, vilihi viyambwezile kumwetu, amba ino hatozile mbuli ilumbile mkudanganika. 16Avo nomsuna, imala baho nomulekesa.” 17Kwa mzoko viiduganya vinyandama kuwafungulila mfungwa yumwe mkikomo cha isikunghulu.
18Waguta mizangi wose hamonga walonga, “Msegeze yuno, utufungulile Baraba!” 19Na ayo Baraba kageligwa mkifungo kilumbo cha ufyalala uzusigwe muja mdiwambo, na kilumbo kiyagwe cha kukoma wanhu. 20Pilato yomana kulonga nawo kabili, giladi yake kalonda kumfungulila Yesu. 21Bali wabamila walonga, “Muwambe mbiki! Muwambe mbiki!” 22Aho yawauzile mwanza waikadatu, “Wona kabananga choni yuno? Siiwene mbuli kumwake ya kumkoma, avo nomtowa, ilawabaho nomfungulila.” 23Komu wawo wamdonheza kwa kuguta nghani mizangi, wolonda yawambigwe mdibiki; na kiyahiyahi chawo kihuma. 24Pilato kaikanha imbuli, kavumila vija vuwalondile. 25Kamfungulila yuja yageligwe mkifungo kwa kilumbo cha ufyalala na kukoma wanhu, yuja wamulondile; komu Yesu kamulava wamtendele vuwomgesa.
Watwanzi wa Yerusalemu wamlilila Yesu
26Vuwamgalile, wamgoga Simoni wa Kirene yobita yolawa kumgunda, wamdikwa msalaba, yamsolele Yesu na kumuwinza.
27Wanhu bwando nghani wamkoleleza, hamonga na watwanzi wakalile wokitowatowa muna zimhambaga kuno wolila. 28Yesu kawahindukila kalonga, “Amweye watwanzi wa Yerusalemu, sukumndilile niye, komu ililileni wenyego na iwanenu! 29Kwa mzoko mazuwa gokwiza, vonda walonge, Wene kudengha iwo waja iwagumba, na inda zija zilekile kulela, na matombo galekile kongheza! 30Aho baho vonda wailongele migongo, Tugwileni! na kuilongela misugulu, Tugubikeni! 31Kilumbo biki bisi wahaditendela gano, ajo dinyalile jokuwaze?”
Yesu kapulila waja wamwihila; kamuhonya bokonyo; Yesu viyadanganike
32Wagaligwa wayagwe wabili watendile gehile, giladi wakomigwe hamonga na Yesu. 33Vuwavikile hanhu hakemagwa Zege da Pala, baho wamuwambile heyo na ija mibokonyo, yumwe ukulume na yumwe ukumoso. 34Yesu kalonga, “Tata, walekese, kilumbo hawavimanyile vuwotenda!” Wazigola nguwo zake, watenda kibafuti. 35Madale ga wanhu wakala wemile wolola; waja iwakulu na hewo wamtendela uponela wolonga, “Wayagwe kawahonya; na yaihonye mwenyecho, kamba yuyo Kristo yasaguligwe na Mulungu!” 36Na waja asikali wamana kumtendela mchalango, wamkwenhukila, wamgalila siki ya divai. 37Walonga, “Kamba gweye gwegwe Mndewa wa Wayuda, ihonye mwenyecho!” 38Na hachana ya idibiki weka utango, “Yuno yuyo Mndewa wa Wayuda.” 39Imonga wa ija mibokonyo iwambigwe kamuliga Yesu, kalonga, “Che, gweye siyo Kristo? Ihonye mwenyecho, imala baho tuhonye na tweye!” Komu yuja waikabili kamwidika, kamkomhokela kalonga, “Gwe! habali humdumba Mulungu, igambile na gweye kwa mumu muna ungaduko uuno? 41Amba tweye ilumba, kwa mzoko tobokela kitumetume cha gaja igetu gatusanghane; komu ino habanange kinhu chochose.” 42Bahaja kalonga, “Go Yesu unghumbuke, vonda wingile kuna undewa wako!”
43Yesu kamulongela, “Ihoko nokulongela, lelo didi kokuwa hamonga na niye hambeho.”
44Avija viivikile saa sita, kukala na ziza muiisi ngima, kwa mzoko zuwa hadilawile mpaka saa kenda. 45Baho guwo da mdihekalu dimana kudegeka hagatigati. 46Yesu kalila kwa dizwi kulu kalonga, “Go Tata, mmikono mmwako noika loho yangu.” Viyamalile kulonga higo, mhunde kadanganika.
47Aija iakida viyagawene gaja galawilile haja, kamtogola Mulungu, kalonga, “Aka baye munhu ino kakala yali bule matozo.” 48Na madale gose ga wanhu waja waitinghanile wolola unzonza uja, avija vuwagawene galawilile haja, waitowatowa muna zimhambaga, wabwela. 49Na waja wose wamtangile, na waja watwanzi wamkoleleze kulawa Galilea, wema kutali wolola unzonza uja.
Yesu kazikigwa
50Mhunde kalawilila munhu mkulu twaga jake Yosefu, miyawo wana Nhaguso Nghulu, munhu yanogile umoyo, mwene ihoko. 51Heyo haigelile muna msagu na kitendo chao; kalawile Arimatia, kiwambo kimonga cha Wayuda, na heyo kakala youbeta Undewa wa Mulungu. 52Yuja kachola kwa Pilato, kalonda yagolelwe mtufi wa Yesu. 53Kauhulumusa kulawa muna umsalaba, kaugubika sanda, kawika mdikabuli dichongigwe mdibwe, hadinazikigwa hata munhu mgati.
54Na siku dija wakala okisasala, kilumbo sikunghulu isonga kwingila.
55Komu iwatwanzi waja wezile hamonga na heyo kulawa Galilea, wakala womkoleleza giladi wadilole dikabuli, na mtufi hawikigwe. 56Imala baho wabwela, wamana kudolonghanya vihatilo vya mavuta ganunghaga goya.
Wakala wohumula siku ja Sabato, kamba vuwalagizwe na Imbila.
Trenutno odabrano:
Luka 23: ZAM75
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Testament in Zaramo © United Bible Societies, 1975.
