Luka 22
22
1Ikala behi sikunghulu ya migate haigelagwa usasu, ikemigwa Pasaka ya Ukombozi. 2Baho Watambika Wakulu hamonga na Wana-Nzuma wazahila nzila ya kumkoma, komu wakala wodumba wanhu.
Yuda Iskariota yomuhimbila Yesu
3Mwenembago yomana kumwingha Yuda yokemigwa Iskariote, ayo yuyo imonga wa waja Mulongo umwe na Wabili. 4Yuja kasegela, kagenda kalonga na Watambika Wakulu na wakulu wa asikali vilihi vonda yadahe kumgela mmikono mmwawo. 5Wadenghelela nghani, womana kwika nayo kilaga cha kumwingha mhiya. 6Katogola, kazahila ulegeho unogile wa kumulava, wanhu sukuwavimanye.
Pasaka vitunduwililwe; mandiya ga ikilo
7Ivika siku ja imigate haigelagwa usasu, igambile kusika nghondolo wa Pasaka. 8Kawatuma Petro na Yohana kalonga, “Gendeni mkatunduwile pasaka tuije!” 9Wamulongela, “Kolonda tukakusanghanile kulihi?” 10Kawalongela, “Loleni vija vonda mwingile hakiwambo, mokitinghana na mbigalo yaidikwile nongo ya mazi; mkolelezeni mkengile muna ingʼanda yonda yengile heyo! 11Kwiza mulongeleni mwene ngʼanda, Mkulufunzi kokulongela, dakwahi digati da iwahenza, kwiza nije pasaka mumo hamonga na wanahina zangu? 12Na heyo komulagusilani gati kulu uchana, kimalile kwikwa goya, tandikeni mumo!” 13Wachola, wavyona kamba viyawalongele, womana kwitunduwila pasaka.
14Avija kipigiti vikivikile, kakala hana gamandiya heyo na waja wanahina hamonga. 15Kawalongela, “Nisulukila nghani kuija pasaka ino (ya nghumbulilo) hamonga na mweye, nihali tanhu sinagaduswa. 16Kwa mzoko nomulongelani, avo honda niije kabili, komu vonda divikizwe muna Undewa wa Mulungu.” 17Kabokela kikombe, kakituniza kalonga, “Soleni kino, mwigolele mwemwe kwa mwemwe! 18Kilumbo nomulongelani, lulawile vino singʼwa mmilelo ya mitongoni, komu Undewa wa Mulungu vondawize.”
19Yomana kuusola mgate, katenda nhogo, kaumega ka-wengha, kalonga, “Luno lulo lukuli lwangu, lolavigwa kwa kilumbo chenu; tendegeni vivi kuno mgesa niye!”
20Ikikombe na hecho vivo vuwazigile ukuja, kalonga, “Kino dijo lagano da sambi muna umulopa wangu okwitika kwa kilumbo chenu.
21Avo lola mkono wake ayo yonihonza wabaha hameza hamonga na niye. 22Kwa mzoko Mwana wa Munhu yaigendelele na zake kamba viyagesile Mulungu, komu kojona ayuja munhu yamuhimbile!”
23Wasonga kuiuzagiza wenyego kwa wenyego, yalihi mmwao yonda yasanghane mbuli hiyo.
Mkulu yuyo yatumagwa; Petro kaidundula
24Dilawilila bamila vivija vuwali, kamba yalihi yopetigwa mkulu. 25Kawalongela, “Watawala wa makabila watawalaga, na yuja mwene mhiko kumwao kakemigwaga Kanoga Umoyo. 26Komu kumwenu mweye sivivo bule; aija yali mkulu kumwenu na yagalamke mdodo; mwene kulongoza wayagwe na yawe kamba ija yatumikaga. 27Hebu imkulu yuyo yalihi – yuja yakalile hana gamandiya hebu yuja yatumikaga? Nyeza yuja yakalaga hana gamandiya. Bali niye hamwenu ngalamka kamba yuja yatumagwa.
28Na mweye iyo mwemwe mkalile hamonga na niye vinikalile nigezigwa. 29Niye nowekilani mweye undewa, kamba vija Tata wangu viyanikile niye. 30Kwiza mwize kuja na kungʼwa haimeza yangu muna undewa wangu, na kukala muna ivigoda vya iyenzi, kuno muwataguse ngholo za Israeli uja mulongo umwe na wabili.
31Kalonga, Simoni, Simoni, lola Mwenembago kawalonda mweye, yawasugulule kamba vija muhunga vuusugululagwa. 32Komu nikupulila gweye, giladi ngogelo yako sukuihunguke; na gweye vondaugaluke, aho uwagangamaze ndugu zako! 33Kamulongela, “Mndewa, niye nihawa nagwe, kahi sidumba kuchola kukifungo, hebu kamba kudanganika.” 34Kalonga, “Nokulongela Petro, nzogolo hanakwika lelo, gweye kwiza kombela miyanza midatu kamba hunhangile niye.”
Mikoba yonda igule mizele
35Kawauza, “He, haja haniwatumile mwabule mkwizi wala mkoba wala vilatu, muhungukilwa na kinhu?” Walonga, “Aka.” 36Kawalongela, “Komu vino mwene mkwizi nayasole, na mkoba ivo vivo; na heyo yali bule zele, yakagulize nghanzu yake, yakagule zele! 37Kwa mzoko nomulongelani, ago gandikigwe kumwangu, Kapetigwa hamonga na wabananzi, govikizwa giladi, kilumbo gano ganyandame gana uzigilo wake.” 38Walonga, “Mndewa, lola hano hana mizele mibili!” Kawalongela, “Yenela.”
Nghondo ya kumpula Tata haja Getsemane
39Kalawa kagenda kukigongo cha Mizeituni, kamba vigali mazowela gake; wanahina zake na hewo wailongoza nayo. 40Viyavikile haja kawalongela, “Puleni, kilumbo sukumwingile mkugezwa!” 41Mwenyecho kakwenhuka hamwande kamba vija nyasilo ya dibwe, kafugama mavindi kapula. 42Kalonga, “Go Tata, ihawa gago gamanogelwa gako, segezela ikikombe kino; komu sukugawe manogelwa gangu, bali igako gavikizwe!” 43Mhunde malaika kulawa kuulanga kamulawila, kamgela mhiko. 44Na heyo avija viyakalile yogaya, kuno yogomba na kifo, baho yabanzile nghani kupula; vuke jake dikala kamba madondo ga mulopa ulagala hasi.
45Viyasegele haja hana ukupula, kawabwelela waja wanahina wake, kawavika wawasile utulo, kilumbo wengilwa na nyululuko. 46Kawalongela, “Vilihi vumuwasa utulo? Segeleni, mkapule, sukumwingile mkugezwa!”
Yesu kagogwa kamba yali mbokonyo
47Avija viyakalile yolonga ago, lola dale da wanhu, na yuja yokemigwa Yuda, amba yuyo imiyawo waja mulongo umwe na wabili, kalongolela kamkwenhukila Yesu, giladi yamnonele. 48Yesu kamulongela, “Yuda, komuhonza Mwana wa Munhu kwa kumnonela?” 49Waja wakalile behi na Yesu vuwawene gonda galawilile, walonga, “Mndewa, tuwakanhe na mizele?” 50Miyawo imonga yomana kumtowa mtumwa wa Mtambika Mkulu, kamkanha digutwi da ukulume. 51Yesu kedika kalonga, “Walekeni viwolonda!” kamkwasa dija digutwi, kamuhonya.
52Baho yawalongele Watambika Wakulu, Wakulu wa asikali wa Dihekalu na waja Iwavyele, “He, mwiza na mizele na mikota kamba vija wanhu vuwamgendelaga mbokonyo? 53Mazuwa gose nghala namwe muna dihekalu, hamngolosele mikono; komu ino iyo saa yenu, vilema ziza dihuma.”
Petro kambela Yesu, kagwa uyalazi
54Wamgoga wamsola, wagenda nayo kuna ingʼanda ya mtambika mkulu; na Petro kakala yomkoleleza kutali-tali. 55Vuwamalile kubwinha moto hagatigati ya ulubuga na kukala hamwe, na heyo Petro kakala hamonga nawo. 56Baho mtumwa imonga wa kitwanzi kamona viyakalile kuja kubumuke, kambunhulila meso kalonga, “Yuno na heyo yuyo imonga wawo.” 57Petro kabela kalonga, “Go mtwanzi, simmanyile!” 58Mhunde munhu iyagwe kamona kalonga, “Na gweye kwa miyawo”. Petro kalonga, “Miyangu gwe, aka si nene!” 59Kibita kipigiti, munhu iyagwe kananahila kuno yolonga, “Bule, ayuno kakala hamonga nayo, kwa mzoko ayuno na heyo Mgalilea.” 60Komu Petro kalonga, “Miyangu, sivimanya yuulonga.” Na viyakalile yobela, nzogolo yomana kwika. 61Mndewa kahinduka kamulola Petro; Petro yomana kukumbukila uja ulonzi wa Mndewa viyamulongele, “Lelo didi nzogolo hanakwika, gweye kwiza kombela miyanza midatu.” 62Kalawa kunze, kagwa giyogiyo, kalila nghani.
Yesu haluhengo, kataguswa kifo
63Na waja wanhu wakalile wamgogile Yesu, wamtendela uponela, wamtowa. 64Wamgubika gameso, wamuuzauza wolonga, “Huguza yalihi yakutowile?” 65Walava ulonzi bwando wihile, wamuliga.
66Vuuchele, Wavyele bwando wailundiza hamonga na Watambika Wakulu na Wananzuma, wamgela muna Nhaguso Nghulu. Walonga, 67“Kamba gweye gwegwe Kristo, tulongele!” Kawalongela, “Hata nihamulongelani, honda mtogole ngʼo. 68Na kamba nihawauza, honda mnidike. 69Komu kulawa vino Mwana wa Munhu kogamba yakalile mwambu wa ukulume kwa Mhiko za Mulungu.” 70Walonga wose, “Avo gweye gwegwe mwanage Mulungu?” Kawalongela, “Ona, molonga kamba niye nene.” 71Walonga, “Chei, avo tuzahile usindi wa choni kabili? Kilumbo tweye wenyego tuhulike ulonzi ulawile mmulomo wake!”
Trenutno odabrano:
Luka 22: ZAM75
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Testament in Zaramo © United Bible Societies, 1975.
