Yohana 3
3
Nikodemo kapetelwa nyongʼonyo za iloho; Kitala cha Lumuli chabaha vino
1Kukala na munhu yumwe wa Mafariseo tagwa jake Nikodemo, mkulu wa Wayuda. 2Hiyo kamgendela Yesu ikilo na kumulongela, “Mwalimu, tuvitanga kamba kwa mulangulizi ulawile kwa Mulungu, kilumbo haduhu munhu yadahile kuzitenda nhuko zino ziutenda gweye, kamba Mulungu hawile hamonga naheyo.” 3Yesu kedika kamulongela, “Kingongongo nokulongela, munhu kamba haleligwe mwanza wekabili, hadaha kuwona undewa wa Mulungu.” 4Nikodemo kamulongela, “Kodahaze munhu kwelekwa yahawa mvyele? Kodaha kwingila muinda ya mamaake mwanza wekabili yaleligwe?” 5Yesu kamwidika, “Togola Togola nokulongela, munhu kamba helekwe mmazi na mLoho hadaha kwingila mundewa wa Mulungu. 6Chelekwe na lukuli, lulo lukuli, na chelekwe na Loho, iyo iloho. 7Sikuukanganye vinikulongela, Mweye vilumba kuleligwa lwekabili. 8Beho dobwinha kudilonda, na dizwi jake kodihulika, kahi huditanga kudilawa bule kudigenda. Avo vivo viigambile munhu yaleligwe mLoho.” 9Nikodemo katongola yomulongela, “Godahikaze gano?” 10Yesu kalonga, “Che, gweye kwa mulangulizi wa Israeli, na mbuli kamba zino kumbe huzitangile? 11Kingongongo nokulongela, tweye tupetaga gatutangile, tusindilaga gatuwene, amweye usindi wetu hamuubokela. 12Nihampetelani mbuli za imbago iino na mweye hamvumila, movumila vilihi nihampetelani za kuulanga? 13Kileka kuduhu munhu yakwelile kuulanga, komu Heyo yahumuluke kulawa kuulanga, iyo Mwanage Munhu. 14Na kamba vija Mose viyamwinule yuja inyoka kuluwala, vivo Mwanage Munhu vimwandakana yenuligwe mbiki, 15giladi kila munhu yonda yamtogole, yawone upile wa digunge na digunge. 16Kwa mzoko vivo Mulungu kainogela imbago, kamgala Mwanage Nyadimwe (Waidiwangala), giladi wose wonda wamtogole sikuwage, komu wawone upile wa digunge. 17Chanduso Mulungu kamgala Mwanage muiisi, si kamba yaudumilize ulumwengu, bali ulumwengu uhonele kumwake.
18Yonda yamtogole Heyo, havika kukitala (cha Mulungu); yalekile kumtogola kamala kutaguswa, kilumbo haditogole twaga ja Mwana Nyadimwe wa Mulungu. 19Kitala icho kino, Lwiza Lumuli luvikila muiisi, na iwanhu wadinogela ziza kubita Lumuli, kilumbo viwotenda viha. 20Kilumbo kila yotenda gehile, kehila Lumuli, wala heza mulumuli, giladi viyatendile sikuvikomhokelwe. 21Komu yotenda ihoko, kokwiza kuLumuli, giladi viyotenda vyoneke chalinze kamba vija vilumbile na Mulungu.”
Gomba da kusunha na kugela nhende; Yesu msola mhambe
22Imala baho Yesu na wanahina wake wachola isi ya Uyuda, kasinda hiko hamonga na hewo yosingula wanhu. 23Na Yohana nayo kakala yobatiza hiko Ainoni behi na Salimu, kilumbo hiko kukala na mazi bwando, na wanhu wamgendela wabatizwa. 24Kilumbo Yohana kakala hanafungigwa.
25Kulawilila bamila, iwanahina wa Yohana na Muyuda imonga kwa kimu cha kungʼazwa. 26Wamgendela Yohana wamulongela, “Rabi (Mkulufunzi), ayuja yakalile hamwe na gweye umwambu wa Yordani, yuyuja yusindile, lola na heyo kosingula wanhu, na wose wamgendela.” 27Yohana kedika yolonga, “Munhu hadaha kubokela longa jojose, kamba hagwelelwe na Tata wa Uchana. 28Mwemwe wenyecho monisindila vinilongile, Niye si nene Kristo komu nhumigwa kuulongozi wake. 29Heyo yali na mhambe yuyo Msola-mhambe; komu Mbwiga wa Msola-mhambe (iyo nene) ayo yokwima na kumtegeleza yosamhukila hakulu dizwi da Msola-mhambe. Basi ndengha yangu ino ivikizwa. 30Avo heyo vimwandakana yabanze, na niye mhunguke.
31Heyo yalawile uchana ka uchana kwa gose; heyo yalawile muisi ino, magweka gake ga muisi, kolonga ga isi ii. 32Yalawile kuulanga ka uchana kubanza gose; gaja gayawene na kugahulika gago goyosindila; kileka haduhu yaubokele ulonzi wake. 33Maza heyo yauvumile ulonzi wake, kagela utango kamba Mulungu iyo wa ihoko. 34Heyo yatumigwe na Mulungu kolonga mbuli za Mulungu, kilumbo kogola iLoho habunzaga. 35Tata kamnogela Mwana kamwingha gose mmakono gake. 36Yonda yamtogole Mwana kanawo upile wa digunge; yolema kumtogola Mwana, honda yawone upile, komu lusango lwa Mulungu tomkalila.”
Trenutno odabrano:
Yohana 3: ZAM75
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Testament in Zaramo © United Bible Societies, 1975.
