Yohana 2
2
Yesu kaimoteza halusi hiko Kana
1Na siku jekadatu kukala na halusi hiko Kana, kiwambo cha Galilea, na mamo wake Yesu kakala baho. 2Yesu na heyo kakala yagonekwe kwihalusi hamonga na wanahina wake. 3Hata ugimbi vumalile, mamaake Yesu kamulongela, “Wabule ugimbi.” 4Yesu kamulongela, “Mamo, tuna mzengwe gani niye na gweye? Isaa yangu hainavika.” 5Mamo wake kawalongela iwasongolo, “Jojose jonda yamulongeleni ditendeni!”
6Baho hakalaga na minongo sita ya mibwe, ikigwa hiko kwa luto lwa Wayuda kwa kunawa, kila dimonga jopata kamba ngelezo mbili bule ndatu. 7Yesu kawalongela, “Memezeni mazi iminongo!” Womana kwimemeza swadu hakilomo. 8Kawalongela, “Deheni mumgalile imkulu wa ulusona!” 9Wamugalila. Na heyo imkulu wa ulusona viyagalanzile gaja gamazi gagalulwe ugimbi, wala hajuwile kuulawile, bali wasongolo wavimanya waja wadehile gaja gamazi, heyo imkulu wa ulusona kamkema ibwana halusi. 10Kamulongela, “Munhu chanduso kalavaga ugimbi unogile, kileka wanhu wahamala kungʼwa nghani, baho vonda uugale uja ugwaduke; gweye kwika ugimbi unogile mpaka vino.”
11Mwidu hiwo wa nhuko Yesu kautendela hiko Kana ya Galilea, kaibwililisa iyenzi yake, wanahina wake wamtogola.
Yesu kadingʼaza Hekalu; kilaga cha Hekalu da sambi
12Imala baho Yesu kahumuluka kikomo Kapernaumu, heyo na mamo wake na wandugu zake na wanahina wake, wakala hiko mazuwa si bwando.
13Na Pasaka, sikunghulu ya Wayuda, ikala behi, na Yesu kachola Yerusalemu. 14Kahona haja ha Dihekalu (Dingʼanda ja Ukupulila) wanhu wakalile wokiguliza ngʼombe, nghondolo na nziwa, na wasosokanya zimhiya wakalile. 15Kabota kibongho cha luzabi, kawalava wose muna Dihekalu, na iwanghondolo na iwangʼombe, kazikutula mhiya za wasosokanya-mali, kaihindula mibao yawo. Kawalongela waja wakalile wokiguliza iwanziwa, “Wasegezeni wano, sikumwitende Ngʼanda ya Tataangu kamba ngʼanda ya gulilo!” 17Wanahina wake wakumbuka malonga gandikigwe, “Migongo ya Ngʼanda yako yondiya.”
18Baho Wayuda wamwidika wolonga, “Kilolomboto kilihi chutulagile kileka utenda higo?” 19Yesu kedika kawalongela, “Dituleni hekalu dino, na niye kwa muda wa siku ndatu nodi-nula.” 20Wayuda walonga, “Hekalu dino dizengigwe milongo minne na sita, agweye kodinula kwa muda wa siku ndatu?”
21Kahi heyo kalonga kiloto cha hekalu ja mtufi wake. 22Ako kuyazukile muna ikifo, wanahina wake wakumbukila kumbe kalonga vino, nawo waditogola dija jandiko na dija dilonga diyalongile Yesu.
23Aluja luyakalile Yerusalemu ha isikunghulu ya Pasaka, wanhu bwando waditogola tagwa jake vuwawene nhuko zake ziyatendile. 24Maza Yesu havumile kwigondanya nawo, chanduso mwenyecho kawatanga wose. Na hasulukile kulagusilwa na munhu yamsindile mbuli za munhu, kilumbo mwenyecho kagatanga gali mgati mmwawo.
Trenutno odabrano:
Yohana 2: ZAM75
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Testament in Zaramo © United Bible Societies, 1975.
