Jon 16
16
1“Nan vev ginau geki lalai kimiu, huribe nomiu binihimwasigi garagusi sihav hovi tehe. 2Rav tau dagai kimiu nin imwa tataro, i tarona vi mai mahavana be ihei tehe mwa wehi kimiu vi vinihia be mwa lol rovoga non God la hala geki. 3Sinombu rav lol ginau kungeki lalai kimiu bwatuna be ram hav ilo te Tata sa inau. 4Take nam bev ginau geki lalai kimiu, huria be mahavana vi mai hurira be ramen lol ginau kerageki, take giv vinihi dumwia be nan vev dau ginau geki lalai kimiu.”
Rovoga non Vui Sabuga
“Nam hav vev te ginau kerageki lalai kimiu la bwativuna, bwatuna be nan togo mai kimiu. 5Take kadogaha nam ban huri wani gabe nu horau, vuvuri ta vwate nin kimiu mwa hav hudaliau tehe be namen van halabehe. 6I kadogaha huri be nam bevea lalai kimiu, gim ron̄ mwahantai maragai. 7Take nam bev mwasigi lalai kimiu be: nu tavuha lalai kimiu be nai van dagai, bwatuna be, be nasav vano tehe, Turai sihav mai tehe lalai kimiu. Take be nai van dagai, nav horae huri kimiu. 8I mahavana be vi mai, kea vi lol melmeloinia lalai sinombu ata lol ureure be kera ran vahala lol binihira huri vuro i huri ginau gabe nu vavtutu i huri silo vevegi non God. 9Kera ram bahala huri vuro, bwatuna gabe ram hav binihi te mwasigi aluku; 10kera ran vahala maragai huri ginau gabe nu vavtutu, bwatuna gabe nai vano huri Tata i kimiu gisav mom ḡitau te mulei; 11i kera ran vahala alun silo vevegi, bwatuna be tomuai ata lol ureure geki nu vevegiana huba.”
12“Ginau ivusi radu be nai vevea lalai kimiu, take vivora ivusi butbutui lalai kimiu huria be gimen laia. 13Mahavana be Vui vi mai, vi lol bisirai mwasigi huri God i kea vi tomuai kimiu vai lol mwasigi duluai. Kea sihav avo te alun non roron̄o sibona, take vi avo alun ginau gabe nu ron̄oe i vi vev ginau lalai kimiu gabe rav mai radu. 14Kea vi lol ihaku vi sarisari bwatuna be kea vi lai ginau gabe nam bevea, ba bevea lalai kimiu. 15Ginau non Tamaḡu duluai noḡu; bwatuna higea nam bevea be Vui vi lai ginau gabe nam laia lalainia ba bevea lalai kimiu.”
Ron̄ Mwahantai mai Ron̄ Mwandavuha
16“Tiri ḡalia n̄an gisav mom ḡita te muleiau, i tiri ḡalia n̄an ataguna giv gita muleiau.”
17Haḡe non roron̄tai rituai ram hudaligi mau ginginira be, “Binihiva huri avoana geki kunhanigi? Mwa bevea lalai gida be tiri ḡalia n̄ano tasav mom ḡitae tehe, i tiri ḡalia n̄an mulei ataguna tai mom ḡitae; i kea mwa bevea mulei be, ‘Bwatuna gabe nai vano huri Tata.’ 18Binihiva huri avoana geki be ‘Tiri ḡalia’, kunhanigi? Tam hav iloe tehe be mwa avo kun uhu huri havanau!”
19Haḡe Jisas mwa iloe be ram doron be ramen hudalinia, i kea mwa bevea lalainira be, “Nan vevea be, ‘Tiri ḡalia n̄an gisav mom gitau tehe. I tiri ḡalia n̄an ataguna giv gita muleiau.’ Matu geki haḡea ginau gabe gim hudaligi huria gingin kimiu? 20Nam bev mwasigi lalai kimiu be: giv dei ba ron̄ mwahantai, take ureure vi samsamwara. Giv ron̄ mwahantai, take nomiu ron̄ mwahantai vivogi gi samwarana. 21Mahavana be mwa abena be vavine men bav atatu, kea mwa ron̄ mwahantai bwatuna be mahavan tarona huri non ron̄ ḡagarasi mwa mai, take mahavana be naturigi, mwa bora, kea mwa binihi malioi non ron̄ ḡagarasi, bwatuna be kea mwa samwara huri naturigi gabe mwa bora lol ureure. 22Kunia haḡea mulei mai kimiu: kadogaha gim ron̄ mwahantai, take nav gita mulei kimiu, i lolomiu vi masiri gin samwarana, samwarana gabe atatu vwate sihav lai te dagai dumwia nin kimiu.”
23“Batena be gubwen̄i gea vi mai, gisav hudaliau te huri havanau. Nam bev mwasigi lalai kimiu be: Tata vi lai havanau tehe gabe gim hudaligi huria lol ihaku. 24Take kadogaha gim hav hudaligi te huri havanau tehe lol ihaku; giv hudaligi i giv lai dumwia, huri be nomiu samwarana vi haraharai.”
Jisas mwa Rihu Maragai nin Ureure
25“Nam bev ginau kerageki lalai kimiu gin avoan dalogai. Ta tarona vi mai gabe nasav avo tehe gin avoan dalogai, take nai vev melmeloi ginau lalai kimiu huri Tata. 26Batena gubwen̄i gea vi mai, giv hudalinia lol ihaku, i nam hav vevea tehe be nav vano ba hudalinia huri kimiu, 27bwatuna Tata sibona mwa dabe kimiu. Mwa dabe kimiu bwatuna gim dabeau i gim binihimwasigi be nan mai nin God. 28Inau nam mai nin Tata, i nan mai vai lol ureure; i kadogaha nav lin̄ ureure ba ban mulei vai aben Tata.”
29Haḡe non roron̄tai ram bevea lalainia be, “Kadogaha gom bev melmeloi ginau, gom hav avo tehe gin avoan dalogai. 30Kadogaha gam iloe be gom ilo ginau duluai; mwa hav tu tehe be atatu vi mom lai avoan hudaligi lalainigo bwatuna gom iloe vwaliura amua atatu ram siv hudalinigo. Geki mwa lolia gam binihimwasigi be gon mai nin God.”
31Haḡe Jisas mwa bwaliura be, “Gim binihimwasigi kadogaha? 32Tarona mwa mai, i nu votu huba teti, batena be kimiu duluai giv visalsala, vatvataha kimiu, vi tabagil mulei vai la mwasin vanuana, i inau nav togo n̄an gaheku. Take mwa hav vora te inau gaheku mwasigi, bwatuna gabe Tata kea maiau vataha mahavana. 33Nan vev ginau geki lalai kimiu huribe, giv lai tamwata ginia, huribe be giv bul gaituvwa aluku. Ureure vi lol kimiu giv ron̄ ḡagarasi. Take giv tu wasigi! Nan rihu maragai nin ureure!”
Trenutno odabrano:
Jon 16: HNB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific
