Jon 15
15
Jisas Mwasin Taligaon Waen
1“Inau mwasin taligaon waen, i Tamaḡu kea atatun ute loloara. 2Mwa dai n̄andu rarana duluai niniau gabe ram hav vwavwae tehe, i mwa bagaha rarana duluai gabe ram bwavwae, huribe vi melmelo tavuhai ba bwaevwae bilin̄ai. 3Kimiu gin lol melmeloi kimiu huba gin silo vagahi gabe nan laia lalai kimiu. 4Kimiu giv bulu maiau, i inau nav bulu mai kimiu. Rarana sihav vwavwae te dum sibona; take vi vwavwae dumwi n̄an be vi tarihou mai talina. La hala mulei kunia gisav vwavwae tehe vaivotu be giv bulu maiau.”
5“Inau mwasin bwatun taligaon waen, i kimiu rarana. Ihei tehe mwa bulu maiau, inau maia, i vi vwavwae bilin̄iai; huribe gisav lol te dum hano dagai niniau. 6Ihei tehe mwa hav bulu te maiau vi vohaian kaburai kun raran gai i vi ḡoru i rara kunira gea vi haran ḡoḡo ba bohaiana vai lol gabi, i rav oda aia. 7Be giv togo aloloku i noḡu avoana vi togo alolomiu, giv hudaligi huri havanau tehe gabe gim doronia, giv lai dumwia. 8Mwa seserai sarisarin Tamaḡu aluna be gim bwaevwae bilin̄iai; i la hala geki gim mai gi noḡu roron̄tai. 9Nam lolotabetabe kimiu kunia gabe Tata mwa lolotabeau: giv togo lol noḡu lolotabetabe. 10Be gim dabe noḡu leo horai giv togo lol noḡu lolotabetabe, kunia gabe nam dabe leo horai non Tamaḡu i nam dogo lol non lolotabetabe.”
11“Nam bev ginau geki huribe noḡu samwarana vi togo dum alolomiu i be nomiu samwarana vi haraharai dum. 12Noḡu leo horai geki, giv tabetabe kimiu, kun gabe nam dabe kimiu. 13Mwasin lolotabetabe gaivua gabe atatu vi lai dumwia hurira non buluana gabe vi lin̄ rahuna hurira. 14I kimiu noḡu buluana giv lol dum hano tehe gabe nan vevea lalai kimiu. 15Nasav mom uloi te kimiu be noḡu atatun rovoga, bwatuna be atatun rovoga mwa hav ilo te havanau be non ratahigi mwa lolia. Take nam uloi kimiu be noḡu buluana, bwatuna be nan vev ginau duluai lalai kimiu gabe nan ron̄oe nin Tamaḡu. 16Gin hav gita te luau; nan gita lua kimiu i nam uloi kimiu be giv vano ba bwavwae bilin̄ai, vwae gai gabe vi tu vai tuai. Haḡe Tata vi lai havanau tehe lalai kimiu gabe gim hudalinia lol ihaku. 17Geki haḡea ginau gabe nan vevea lalai kimiu: giv tabetabe kimiu.”
Atatu ata lol Ureure ram Barihai Atatu non Jisas
18“Be ureure mwa barihai kimiu, giv vinihi dumwia n̄ano be mwa barihaiau muana. 19Be gis vora bilan ureure, kunia ureure si tabe kimiu kun gabe bilana sibona. Take nan gita lua kimiu nin ureure geki, i kimiu gim hav vora te bilana; i bwatuna higea ureure mwa barihai kimiu. 20Giv vinihi dum havanau gabe nan vevea lalai kimiu be: ‘Turin rovoga mwa hav tomua tehe nin non ratahigi.’ Be rav lol ḡagarasiau, rav lol ḡagaras kimiu mulei; be rav tabe noḡu silo vagahi, rav tabe nomiu mulei. 21Take rav lol ginau duluai kerageki lalai kimiu bwatuna be kimiu noḡu atatu; huribe ram hav ilo te atatu gabe nu horau. 22Kera rasav vuroga tehe be inau nan hav mai tehe be namen avo lalainira; take inau nan mai huba, kunia rasav mom ḡolai te dumwia huri vurora. 23Ihei tehe mwa barihaiau mwa barihai Tata mulei. 24Kera ram buroga bwatuna ran gita ginau duluai gabe nan lolira, gabe atatu vwate mwa hav lol te dumwia radu; i kera ran gita ginau gabe nan lolira, i ram barihai kamaru saraḡo inau mai Tata. 25Ginau geki, mwa du be vi loli mahaḡea huribe havanau gabe nu ravana lol nora silo vi visirae be: ‘Ram barihai bonogaiau n̄an bwatuna sigai.’”
26“Taro vi mai gabe Vui vi lol bisirai mwasigi huri God i kea mwa mai nin Tata. Nav horae huri kimiu nin Tata, i kea vi avo huriau. 27I kimiu mulei giv avo huriau, bwatuna gin togo maiau la bwativuna radui.”
Trenutno odabrano:
Jon 15: HNB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific
