IOANE, 5
5
O LE MATAUPU V.
O le vavega na faia e Iesu i Petesa.
1Ua mavae ia mea, ona oo lea i le tausamiga o Iutaia; ua maliu ae ai Iesu i Ierusalema. 2O i Ierusalema le taelega, e latalata i le faitotoa mamoe, o Petesa lona igoa i le upu Eperu, e lima ona faapaologa. 3Sa taooto ai tagata e toatele o e mamai, o e tauaso, o e pipili, ma e ma‘i tino vale; o faatalitali ai le gaepu o le vai; 4auā a oo i ona aso, ua alu ifo ai le agelu i le taelega, ma faagaepu le vai; i le o le ua muamua ifo, ina o gaepu o le vai, ua malolo ai o ia i le ma‘i na ma‘i ai o ia. 5Sa i ai foi le tasi tagata na ma‘i i tausaga e tolugafulu ma le valu. 6Ua silasila atu Iesu ia te ia o taoto; ua silafia foi ua loa ona ia te ia o le ma‘i, ua fetalai atu ia te ia, E te fia malolo ea? 7Ua tali mai ia te ia le na ma‘i, Le Alii e, e leai lava se tagata na te tuuina ifo a‘u i le taelega, pe a gaepu le vai; a alu ifo a‘u e muamua ifo le tasi ia te au. 8Ua fetalai atu Iesu ia te ia, Ina tu ia i luga, ave ia lou moega, ma ia e savali. 9Ona malolo loa lea o le tagata; ua ave lona moega, ma ua savali. O le sapati foi lea aso. 10O le mea lea ua fai mai ai Iutaia i le tagata na faamaloloina, O le sapati lenei, e sa ona e ave ai lou moega. 11Ua tali atu o ia ia te i latou, O le na faamalolo mai ia te au, ua fetalai mai o ia ia te au, Ave ia lou moega, ma ia e savali. 12Ona fesili mai lea o i latou ia te ia, O ai ea le tagata na fai atu ia te oe, Ave ia lou moega, ma ia e savali? 13A e lei iloa e le na faamaloloina po o ai, auā ua maliu ese lemu Iesu; auā na i ai le motu o tagata i lea mea. 14Ua mavae ia mea, ua silafia o ia e Iesu i le malumalu, ona fetalai atu lea o ia ia te ia. Faauta, ua e malolo oe; aua e te toe agasala, ne‘i oo atu ia te oe se leaga e sili i lena. 15Ua alu atu le tagata, ma faailoa atu i tagata Iutaia, o Iesu na faamalolo ia te ia. 16O le mea lea na faasaua ai Iutaia ia Iesu, ua saili foi e fasioti ia te ia, auā na ia fai nei mea i le sapati.
17Ona tali atu lea o Iesu ia te i latou, O loo galue lo‘u Tamā e oo mai lava i le aso nei; o loo galue foi a‘u. 18O le mea lea ua atili ai ona saili o Iutaia e fasioti ia te ia, auā e le gata ina soli e ia le sapati, a ua fetalai mai o ia, o le Atua lona lava Tamā; ua ia faatusa o ia ma le Atua. 19Ona fetalai atu lea o Iesu ia te i latou, ua faapea atu, E moni, e moni, ou te fai atu ia te outou, e le mafai e le Atalii ona fai o se mea, na o ia lava; a o mea na te vaai atu i le Tamā o faia; o mea foi o faia e ia, o loo faia foi ia lava mea e le Atalii. 20Auā o loo alofa le Tamā i le Atalii, ua faaali mai foi ia te ia mea uma lava e faia e ia; e faaali mai foi e ia ia te ia galuega silisili i ia galuega, ina ia outou ofo ai. 21Auā faapei ona toe faatutū ma faaola e le Tamā i e ua oti; e faapea foi ona faaola e le Atalii o i latou ua ia loto i ai. 22Auā e le faamasino e le Tamā i se tasi, a ua ia tuu mai i le Atalii, le faamasinoga uma lava; 23ina ia ava tagata uma lava i le Atalii, faapei ona latou ava i le Tamā. O le le ava i le Atalii, e lē ava lea i le Tamā na auina mai o ia. 24E moni, e moni, ou te fai atu ia te outou, o lē faalogo mai i la‘u upu, ma talitonu ia te ia na na auina mai a‘u, ua ia te ia le ola e faavavau: e le oo foi ina faasalaina o ia, a ua oo atu ia i le ola, sa i le oti, 25E moni, e moni, ou te fai atu ia te outou, e oo i le aso, ua oo nei foi i ai, e faalogo mai ai e ua oti i le leo o le Atalii o le Atua; o e faalogo ai foi, e ola ai i latou. 26Aua faapei o le Tamā e i totonu ia te ia lava le ola: e faapea foi ona foai mai e ia i le Atalii, ia i totonu ia te ia lava le ola. 27Ua foai mai foi ia te ia le pule, ina ia fai e ia le faamasinoga, auā o ia o le Atalii o le tagata. 28Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai; 29o e na amio lelei, e toe tutū i le ola; a o e na amio leaga, e toe tutū i le faasala. 30Ou te le mafaia ona fai o se mea e tasi, na o a‘u; e faatatau la‘u faamasinoga i lo‘u faalogo; ua tonu lava la‘u faamasinoga, auā ou te le usiusitai i lo‘u lava loto, a o le finagalo o le Tamā, o le na auina mai a‘u. 31Afai ou te molimau a‘u ia te au, e le moni la‘u mau; 32o loo molimau le tasi ia te au, ua ou iloa foi e moni le mau o loo molimau o ia ia te au. 33Na outou aauina atu nisi ia Ioane, na na molimau foi i le upu moni. 34A e le aoga ia te au le molimau a tagata; peitai ou te fai atu nei mea ia te outou ina ia faaolaina outou. 35O le lamepa o ia, sa mumū ma pupula mai; sa outou loto foi i nai isi aso e olioli i lona malamalama. 36A ua ia te au le molimau e sili ia Ioane; auā o galuega na tuuina mai ia te au e le Tamā ia ou faaumaina, o galuega lava ia ou te faia, e molimau mai ia ia te au ua auina mai a‘u e le Tamā. 37O le Tamā foi na auina mai a‘u, o ia lava ua molimau ia te au. E lei faalogo lava outou i lona siufofoga, e lei vaavaai atu foi i lona tino mai. 38E le tumau foi lana afioga i totonu ia te outou; auā o le ua ia auina mai, tou te le talitonu i ai.
39E suesue outou i Tusi, auā ua outou manatu tou te maua ai le ola e faavavau; o Tusi foi ia o loo molimau ia te au; 40a e le mafafai outou ina o mai ia te au, ia outou maua ai le ola. 41Ou te le manao i le viiga mai tagata. 42A e peitai ua ou iloa lava outou, e leai so outou alofa i le Atua i totonu ia te outou. 43Ua ou sau i le suafa o lo‘u Tamā, a e lei talia a‘u e outou; afai e sau se tasi i lona lava igoa, ona talia lava lea o ia e outou. 44E mafai faapefea ona talitonu outou o e mananao i le viiga o le tasi i le tasi; a o le viiga mai le Atua e toatasi lava, tou te le sailia? 45Aua tou te masalo ou te molia outou i le Tamā; o i ai le tasi o lē molia outou, o Mose lea, ua outou faatuatua i ai. 46Auā afai ana outou talitonu ia Mose, po ua outou talitonu mai ia te au; auā na tusia a‘u e ia. 47A e afai tou te le talitonu i ana tusi, pe faapefea ona outou talitonu i a‘u upu?
Trenutno odabrano:
IOANE, 5: SOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Samoan Edited Old Version © Bible Society of the South Pacific, 2017.
