IOANE, 4
4
O LE MATAUPU IV.
O le malaga i Kalilaia.
1Ua silafia e le Alii ua faalogo e le au faresaio, e toatele soo ua faia e Iesu ma papatisoina, a e toaitiiti a Ioane; 2(peitai o Iesu, e lei papatiso e ia, na o ona soo,) 3ona tuua lea e ia o Iutaia, a ua toe maliu atu i Kalilaia. 4E ao ina ui atu o ia i Samaria. 5Ua oo atu ia i le tasi aai o Samaria, o Sukara le igoa, e latalata ane i le fanua na avatu e Iakopo i lona atalii o Iosefa. 6Ua i ai le vaipuna o Iakopo. Ua le lavā foi Iesu i lana malaga, ona nofo ai lea o ia i luga o le vai, ua oo i le itu aso po ua ono. 7Ua sau le fafine o Samaria e utu vai. Ua fetalai atu Iesu ia te ia, Au mai ia ia te au, ou te inu. 8(Auā ua o atu ona soo i le aai e faatau ai ni mea e ‘ai.) 9Ona fai mai lea o le fafine o Samaria ia te ia, Pe faapefea ona e fai mai i se mea e inu ia te a‘u, o le fafine o Samaria, a o oe o le Iutaia? auā e leai ni mea e feaveai a Iutaia ma Samaria. 10Ua tali atu Iesu, ua faapea atu ia te ia, Aua e iloa le mea foai fua a le Atua, ma le ua fai atu ia te oe, Au mai ia te au, ou te inu: po ua e ole mai ia te ia, ona foai atu lea e ia ia te oe o le vaiola. 11Ua fai mai le fafine ia te ia, Le Alii e, e leai sau mea e utu ae ai, e maulalo foi le vaieli: e te maua ea ifea lena vaiola? 12E sili ea oe i lo matou tamā o Iakopo, na na tuu mai ia te i matou le vaieli, ua inu ai foi o ia, ma lana fanau, ma ana manu? 13Ua tali atu Iesu, ua faapea atu ia te ia, O lē inu i lenei vai e toe fia inu ia. 14A o sē inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau. 15Ua fai mai le fafine ia te ia. Le Alii e, au mai ia te au lena vai, ina ia ou le toe fia inu, ina ia ou le toe sau foi iinei e utu vai. 16Ua fetalai atu Iesu ia te ia, Alu ia oe, valaau i lau tane, i le toe sau iinei. 17Ua tali mai le fafine, ua faapea mai, E leai sa‘u tane. Ona fetalai atu lea o Iesu ia te ia, Ua tonu lau upu, E leai sau tane; 18auā sa ia te oe tane e toalima; o ia foi ua ia te oe i ona po nei, e le sau tane lea; o le mea moni lava ua e fai mai na. 19Ua fai mai le fafine ia te ia, Le Alii e, ua ou iloa nei o oe o le perofeta. 20O matou tamā sa tapuai i lenei mauga; a ua outou fai mai, o Ierusalema le mea e tusa ai ona tapuai ai. 21Ua fetalai atu Iesu ia te ia, Funa e, talitonu mai ia ia te au, e oo mai ona aso, tou te tapuai i le Tamā e le gata i lenei mauga, po o Ierusalema. 22Tou te tapuai ma le le iloa; a ua matou tapuai ma le iloa, auā mai ia Iutaia le faaolataga. 23A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni; auā o loo saili le Tamā e tapuai faapena ia te ia. 24O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni. 25Ua fai mai le fafine ia te ia, Ua ou iloa o le a maliu mai le Mesia, (o lē ua igoa ia Keriso,) pe a maliu mai o ia, e faailoa mai mea uma ia te i matou. 26Ona fetalai atu lea o Iesu ia te ia, O a‘u lava lenei, o lē tautala atu ia te oe. 27Ona o mai lea o ona soo, ua ofo ina ua tautala i laua ma le fafine; a e lei faapea mai se tasi, Pe se a se mea e te saili na? pe faapea, O le a le mea ua oulua tautala ai ma ia? 28Ona tuu lea e le fafine o lana vai, a e alu atu i le aai, ua fai atu i tagata, 29Ina o mai ia: ina vaai i le tagata ua na ta‘ua mai ia te au o mea uma lava ua ou faia; pe le o le Keriso ea lea? 30Ona latou o ai lea i tua o le aai, ua o mai ia te ia.
31A o fai lea mea, ua aioi mai ona soo ia te ia, ua faapea mai. Rapi e, ina taumafa ia. 32A ua fetalai atu o ia ia te i latou, O ia te au mea e ‘ai tou te le iloa. 33Ona fetautalatala‘i lea o le au soo, Pe na au mai e se tasi sana mea e ‘ai. 34Ua fetalai atu Iesu ia te i latou, O la‘u mea e ‘ai, ia ou faia le finagalo o le na auina mai a‘u, ma faaiu lana galuega. 35Tou te le fai ane ea, E toe fa masina, i le oo ai i le seleselegāsaito; faauta, ou te fai atu ia te outou, ina tepa ae ia o outou mata, ma vaavaai i le fanua ua sinasina mai nei i le seleselegāsaito. 36O lē selesele foi, e maua lana totogi, ma faaputu le fua e oo i le ola faavavau; ina ia faatau olioli o lē lulu saito ma lē selesele. 37O lenei mea foi ua faamaoni ai le upu, Ese lē lulu saito ese lē selesele. 38Ua ou auina atu outou e selesele i le mea sa outou le galulue ai; na galulue isi tagata, a ua oo atu outou i la latou galuega.
39E toatele Samaria i lea aai na faatuatua ia te ia, ona o le upu a le fafine na ia fai atu, Ua na ta‘ua mai ia te au o mea uma lava ua ou faia. 40Ua o mai foi tagata o Samaria ia te ia, ona latou aioi mai lea ia te ia, latou te nonofo ma i latou; ona nofo ai lea o ia i lea mea i aso e lua. 41Ua atili ai ona toatele o e na faatuatua ia te ia ona o lana fetalaiga; ua fai atu foi i latou i le fafine, 42E le ona o lau upu ua matou faatuatua ai nei ia te ia; auā o i matou lava ua matou faalogologo, ua matou iloa foi, e moni lava, o le Faaola lenei o le lalolagi, o le Keriso lava. 43Ua mavae ia aso e lua, ona tuua ai lea e ia o lea mea, a e maliu atu i Kalilaia; 44auā ua fetalai lava Iesu, E le mamalu se perofeta i lona lava nuu. 45Ua oo foi o ia i Kalilaia, ona talia mai lea o ia e tagata o Kalilaia, auā na latou vaai atu i mea uma lava na ia faia i Ierusalema i le tausamiga; auā o i latou foi, na o atu i latou i le tausamiga.
46Ona toe malia atu ai lea o Iesu i Kana i Kalilaia, na ia lina ai le suāvai ma uaina. O le tasi alii foi ua ma‘i lona atalii i Kapanaumi; 47ua faalogo o ia ua maliu mai Iesu mai Iutaia i Kalilaia, ona sau ai lea o ia ia e ia, ma faatoga mai ia te ia, ia maliu ifo e faamalolo i lona atalii, auā ua tāli oti. 48Ona fetalai atu lea o Iesu ia te ia, Afai tou te le vaavaai i faailoga ma vavega, tou te le talitonu lava. 49Ua fai mai le alii ia te ia, Le Alii e, se‘i e maliu ifo, manū o lei oti si ou atalii. 50Ona fetalai atu lea o Iesu ia te ia, Alu ia oe, ua ola lou atalii. Ua talitonu le tagata i le upu na fetalai atu ai Iesu ia te ia, ona alu ai lea o ia. 51O alu ifo o ia ua fetaiai ma ana auauna, ona latou ta‘u atu lea ia te ia, ua faapea atu, Ua ola lou atalii. 52Ona fesili atu lea o ia ia te i latou, po o le fea itu aso na afua ai ona faafeoloolo. Ua fai mai i latou ia te ia, Na mavae lava ananafi lona ma‘i vevela i le itu aso e fitu. 53Ona iloa lea e le tamā, o le itu aso lava lea na fetalai atu ai Iesu ia te ia, Ua ola lou atalii. Ona talitonu lea o ia, atoa ma lona aiga uma. 54O le lua lea o faailoga na faia e Iesu, ina ua maliu mai o ia nai Iutaia i Kalilaia.
Trenutno odabrano:
IOANE, 4: SOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Samoan Edited Old Version © Bible Society of the South Pacific, 2017.
