LUK 21
21
A hogogi noi vavine madue
1I Jisas mo leo vurugegi, mo lehi na tagi hako gineu ram tuli na nora hogogi talolo tanoi tuli homu lolo Sara Gogona. 2Mwerehi vage mo lehi na vavine madue gatagale u mahogi mo tuli na homu wuwerigi gairue u tatarise mena vatu hangavulu. 3I Jisas mo veve vena, “A hogo, nam veve lawe gimiu vena, a vavine madue hi a mahogi u tuli na homu u liure doluegi. 4Huri ingere doluegi ram tuli na nora hogogi, a duvi nora homu rau hako dore. Nge a vavine hi a mahogi u tuli na nona lalaie doluegi ve vin mwaso lune.”
I Jisas mo laqagi huri vin vei vohogi na Sara Gogona
5Lavasigi denire ram laqagi huri na Sara Gogona huri a tangaloi rau hakovie lo vatu gagareagi ngerehi ko rau gebuginie gina hogogi nora sinobu rau bete lawe God. I Jisas mo veve vena, 6“A gineu ingere ngaha nem lehire, a taro vin vomai, a vatu gatagale vin he toga tea loului vetu tuegi, nge rain sasarugi doluegi.”
A tau vuin romasi
7Ram huie vena, “?Huhui, a gineu ingere ngaha rain vei tagaha? ?A hava gigilegi vin haharagi ve a tarogi u vomai beno ve a gineu ingere ngaha rain dadari vomai?”
8I Jisas mo veve vena, “Nen leogoro gimiu vaiteu ihine mo sine gimiu. A tangaloi u sao rain vomai lo henaku, rain veve vena, ‘!Ineu hi!’ ko ‘!A taro u vomai beno!’ Tau nge mese hurire. 9Nge lune gimiu nein rongo huri na vuro ko a qaloana, nen mese romasi hurie. Huri a gineu ingere ngaha vin he vagasile tea rain dadari tomue, nge a rovonagi vin he vomai tea vena siseri.”
10Siu mo laqagi tuturedu vena, “A sinobu vin qalo mena sinobu, ko a vanue mena vanue. 11A ruru lawua vin vomai ko vin maro ko a segeana vin mawahewahe lo vanue saosao. A gigilegi matagute lawua rain vomai dena mahava. 12Nge tomue dena gineu ingere ngaha ingere rain wiri bibi gimiu, rain veivei gimiu, rain siregi gimiu sulo leo vevegi lo valei soneana, ko rain teu gimiu lo valei vauveu. Rain lei gimiu sulo nagora ratahigi meire kavman hurieu. 13Ngehi a mahogi u garea lawe gimiu huri nein ahagi na Roro Garea. 14Nen ladolado tomue huri ve nen mese lado uleule huri ve nein duvire mwerehilogo. 15Huri ineu nain bete lawe gimiu a leo ko a mataisao, ngehi a nomiu tavului vuro rain he labe goro tea lai sige rain he qoragi lai gimiu tea. 16Ire tamamiu tora retahimiu meire tuemiu meire havamiu meire nomiu buluana rain siregi gimiu lawera hi, ko rain vei vagamate gimiu lavasigi. 17A tangaloi doluegi rain sebugi gimiu huri na henaku. 18Nge a vulumiu gatagale vin he sala tea. 19Nen labe siaga, ko nen he vagasalagi na mwasoamiu tea.
I Jisas mo veve huri ve rain toto gaburegi na vanue Jerusalem
20“Lune nein lehi na tavului vuro rain labe dali na vanue Jerusalem, neu ilo beno ve mo kakarani ve rain toto gabureginie. 21Lo tarogi hi ingere ram toga Judia ran toa sulo vusi. Ingere ram toga lolo qatui venue hi ran mwalue, ko ingere hi ram toga tavala varea ran he vano tea lolo qatui venue hi. 22Huri a rani ngerehi a ‘Rani Vai Gagarasi,’ huri ve vin vagahorongi na leo talo Reve reve Gogona. 23Nge a hahagavi hurire vavine ram wali taqangi ko irahine ram vagahuhu lo bongi ngerehi! A hahagavi lawua vin vomai lo vanue ko a vevegi noi God vin wehi na sinobu hi. 24Ko rain wehire lavasigi gina buei vuro, ko rain veuhire lavasigi, rain leire sulo vanue wagiwegineu, ko ira haroharo rain varavara lolo Jerusalem vin dadari a nora taro vin rovo.
I Netui Tangaloi vin vomai teligu
25“A gigilegi rain serelue lo aho ko lo vule ko lo visiu doluegi, ko lo ure a sinobu vataha vanue rain toga hahagavi, rain matagu gina diloi navo hi mo navonavora. 26A tangaloi rain mate gina matagute lune ingere ram rarai na gineu ve rain vomai lolo ure doluegi, huri a huireana lo mahava rain gilu. 27Ko lo tarogi ngehi rain lehieu i Netui Tangaloi nain vomai lo dodo mena huireana ko a varavara lawua. 28Lune a gineu ingere ngaha rain teuvuigi, nen maraga nen labe ko nen wali raga na qatumiu, huri a tarogi mo kakarani ve nain voli tuguhi gimiu.”
A gato tavalu huri na vui duledule
29Siu i Jisas mo veve na gato tavalu ngaha lawera, mo veve vena, “Nen lado na vui duledule ko a gai doluegi vage. 30Lune nem lehi na raure ram tauvuigi ram tavu, nem ilo ve a mwagoto mo kakarani. 31Mwerehi vage, lune nem lehi na gineu ingere ngaha ram vomai, nein ilo ve a mwasoana garaqa God mo ratahigi lolona mo kakarani vena vomai.
32‘A hogo, nam veve lawe gimiu vena, a tangaloi ram mwaso siseri ngaha ran he mate tea doluegi vin dadari a gineu doluegi ngaha rain vomai. 33A eulu ko lovavagi roin rovo, nge a noku leo rain he rovo lai tea.’ ”
Nen leogoro gimiu
34“Nen leogoro gimiu! Nen mese siregi na lolo lolomiu mo horo gina domianai gaganie ko a inuinugi ko a gineu talo mwasoana ngaha ram vai gimiu nem lado uleule lure. Tare ve mwerehi, a Bongiku vin vomai siserigi, lune gimiu nehe rarai tea. 35Huri vin vomai mwere na vune lawe na tangaloi doluegi talo ure doluegi. 36Nen rada goro ko nen tataro gesegi huri nein lei na huireana huri nein vano turu na gineu ingere ngaha rain vei, huri nen he soi tea, ko huri nein labe lo nagoku i Netui Tangaloi.”
37I Jisas mo toga vataha rani mo huhui lo Sara Gogona, ko lune mo revirevi mo mwalue mo hage mo maturu lo Vusi Oliv. 38A sinobu u sao ram vano vataha robongi ram rorongtagi na nona leo huhui.
Trenutno odabrano:
LUK 21: HNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific, 2013
