YOHANA 11
11
1Mundu mulala walangwa Lazaro, uwamenyaa mu lidaala lia Bezani, yaali mulwaye. Bezani nilio liali lidaala lia Maria na mwavo weve Marita vamenyaa mu. 2Maria uyu niyie wavaka Mwami Yeso amaguta agafunyaa mwayu nu ku mweeya virenge ni liisu lilie. Lazaro, mbozo weve, niyie uwaali mulwaye. 3Kunangwa, avamwavo yavo vaatuma mundu ku Yeso amuvolere, “Mwami, mulina woovo wa wayanza aveeye mulwaye!”
4Lwa Yeso yahulira ndio, yavoola, “Uvulwaye yivwo sivoveeye uvudukiza Lazaro ku likuza mba. Navuzwa voveeye ndio kigira uvukumi vwa Nyasaye vuduuki kutwekizwa. Kigira munzira yu vulwaye yeyo niyio yu Mwana wa Nyasaye akuminyirwaa mu.”
5Yeso yayanza Marita, na amwavo weve Maria kandi na Lazaro. 6Lwa yanyoora amakuva Lazaro aveeye mulwaye, Yeso yaazizagilira komenya havundu ha yaali ku madiku gandi gaviri. 7Kunangwa lwi nyima yavolera aviigi veve kandi, “Gendi kuzie Ivuyuda kandi!”
8Aviigi vamuvolera, “Mwigizi, ing'inga engekeeke iviti kutura lwa Avayuda venya kukwita na magina, na ivi wenyaa kwilana yo kandi?”
9Yeso yativura, “Zisa zia mbasu siziveeye likomi na ziviri? Kunangwa, mundu ku vosi nagenda mu mbasu si yikigitala mba, kigira alolaa uvulavu vwi kivala yiki. 10Navuzwa mundu nagenda vudiku alikigitala kigira siaveeye nu vulavu mba.”
11Lwa Yeso yamala kovora yaga, yavavolera, “Mulina wiitu Lazaro agoni, navuzwa inzi ndaazia kumuvuukiza.”
12Aviigi veve vamuvolera, “Mwami, niiva agonaa, alahona.” 13Yavo vaganagana hawundi Yeso yavoola lisosa lie ligona zindoolo, navuzwa yavoola ku lisosa lie likuza lia Lazaro.
14Kunangwa Yeso yavolera aviigi veve havulavu ndi, “Lazaro akuzi, 15navuzwa kigira munyi, nyaanzi lwa mburi kuva yo, kunangwa muduuki kusuuvira. Gendi kuzie kuye.”
16Tomasi uwalangwa Malongo yavolera aviigi vache, “Leki kuzie naye kandi, ku na kunyi kukuzi harara naye!”
Yeso aveeye lisimuguka kandi livamwoyo
17Lwa Yeso yaduuka, yanyoora Lazaro namali kogona mu kilindwa ku ing'inga ya madiku gane. 18Lidaala lia Bezani liali ahimbi Jerusalemi, ahimbi zikilomita zivaga. 19Avayuda vanyingi vaali nivaazi kolola Marita na Maria vavaleminye mwoyo ku likuza lia mbozo wavo.
20Lwa Marita yahulira ndi Yeso yaazaa, yazia kumwaganira, navuzwa Maria yaatigara niyikaye munyumba. 21Marita yavolera Yeso, “Mwami, ulava waali hano ngano mbozo wange si yaali akuzi mba. 22Navuzwa kali kalunu manyi ndi, choosi choteeva ku Nyasaye alakuha.”
23Yeso yamuvolera, “Mbozo woovo alasimuguka.”
24Marita yamutivulira, “Manyi ndi alasimuguka ing'inga yi lisimuguka, lidiku lie keheri.”
25Yeso yamuvolera, “Inzi niyie lisimuguka kandi livamwoyo. Usuviraa inzi kali niiva alakuza alava mwoyo; 26kandi ku vosi, omenya nasuuvira inzi siala kuza mba. Usuuviyi yaga?”
27Marita yamuvolera, “Yee Mwami! Inzi suuviraa ndi ivi niyie Mesia, Mwana wa Nyasaye, uzaa mu kivala.”
Yeso Yasiomera Lazaro
28Inyima wa Marita yaali yakavoola yaga, yazia kulanga Maria, amwavo weve namuvolera galaha, “Mwigizi aveeye hano, akulangaa.” 29Lwa Maria yahulira yaga, yasingira vwangu nazia kwaganira Yeso. 30Yeso yaali nakikiri kwingira mu lidaala, navuzwa yaali nakiri havundu ha Marita yamunyola. 31Kunangwa, lwa Avayuda vaali munyumba harara na Maria nivamuleminya mwoyo, valora Maria nasingira nu kuzia ichova vwangu, na vaamulonda. Vaganagana ndi azizaa kulilira ha kilindwa
32Lwa Maria yaduuka ha Yeso yaali kandi naamulora, yagwa ha virenge vivie nasigama, namuvolera, “Mwami, ulava hano ngano mbozo wange si yaali akuzi mba.” 33Lwa Yeso yamulola nalira, Avayuda avavaali harara naye nivalira yizula vovereri ni ligenya mu mwoyo gwigwe. 34Yavateva, “Mumuyavuyi hayi?”
Vamuvolera, “Mwami, hamba olole.”
35Yeso yalira. 36Kunangwa, Avayuda vavoola, “Heenzi kuli yamuyanza!”
37Navuzwa valala kuvo vavoola, “Uyu uwahaana lilola ku mundu mboku, siyaali yakigaliye Lazaro alavula kukuza?”
Yeso Yasimugukiza Lazaro
38Kunangwa, Yeso yavelera kandi mu mwoyo, nazia ha kilindwa. Kilindwa zana chaali luhangaywa, na lwali ni lwakunikwa ni ligina. 39Yeso yavavolera, “Tulizi ku ligina yilio?”
Marita, mbozo mundu wa kuza, yamuvolera, “Mwami, kuduuka kalunu atangi kufunya; omenyi mu kilindwa amadiku gane!”
40Yeso yavavolera, “Singovoleye ndi niiva usuviraa ulalola uvukumi vwa Nyasaye?” 41Kunangwa avandu vasuunda ligina. Yeso yahenza mwigulu navoora, “Ngusandizaa Baba kuva ivi umbuliraa. 42Manyi ligali ivi umbuliriza kazozo. Navuzwa mboraa yaga kigira avandu vasingiyi hano yava vaduuki kusuuvira ivi niyie wanduma.” 43Lwa yamala kusaala munzira yiyi, Yeso yahanzuka nu mwoyo munene, “Lazaro! Tula ichova!” 44Naye uwaali na kuzi yatura ichova, navoheywi ni zinguvu zie kilindwa virenge na amakono, nu mumoni mwimwe nimufumiywi. Yeso yavavolera, “Mutulizi zinguvu zie kilindwa zivoheywe kuye, mu muleke azie.”
Lilohiza mu vwivisu kwita Yeso
(Mat. 26:1-5; Mar. 14:1-2; Luk. 22:1-2)
45Kunangwa, lwa Avayuda avanyingi avaari nivaazi kolola Maria, valora kekolwa cha Yeso yakola, vasuuvira muye. 46Navuzwa valala kuvo virana ku Avafarisayo nivavoora kuli Yeso akoli. 47Kunangwa avasaalisi vanene na Avafarisayo valanga livugana lie kiyaalo, nivavoora, “Kokora ndi? Mundu uyu akolaa vilolekizu vinyingi. 48Kumuleka azizagiliri ndi, avandu vosi valamusuuvira, nu uvwamihi vwa Varumi vulaza kwononyia Litembeli lietu ni ihiiri yitu!”
49Maku, mulala kuvo uwalangwa Kayafa, uwaali Musaalisi Munene muhiga yigwo, yavavolera, “Munyi mu manyi kindu mba! 50Simulolaa ni vulahi ku munyi mundu mulala akuziri avandu vosi, kuvita ihiiri yoosi kukuza?” 51Oyo siyavoola agene yaga mwene mba, navuzwa lwa yaali Musaalisi Munene mu muhiga yigwo, ya porofeta Yeso alakuzira ihiiri ya Avayuda; 52na sikoveeye ku yavo venyine, navuzwa kandi aduuki kuleeta harara avana va Nyasaye avasalana.
53Kutura lidiku yilio, avanene va Avayuda vaali nivalohizaa kuli vanyara kwita Yeso. 54Kigira yaga, Yeso si yagenda kandi havulavu hagati ha Ivayuda mba, navuzwa yatura ahene yaho nazia ahimbi muchangalangwe, mu lidaala lialangwa Efuraimu. Yamenya uwene yeyo harara na aviigi veve.
55Lisavo lia Avayuda lie Lipasaka liali ahimbi, na avandu vanyingi vazia Jerusalemi vaduuki kwitakasa aveene imbiri wi lisavo likikiri kuduuka. 56Kunangwa vaali nivenya Yeso; na lwa vavugana harara mu Litembeli vateevana, “Muganaganaa ki? Yeso sialaaza mu lisavo?” 57Avasaalisi vanene na Avafarisayo vaali nivahaani malago ndi, niiva mundu amanyi havundu ha Yeso aveeye, avavoolere, kunangwa vaduuki kumugumira.
वर्तमान में चयनित:
YOHANA 11: LOGOOLI
हाइलाइट
शेयर
कॉपी
Want to have your highlights saved across all your devices? Sign up or sign in
©Bible Society of Kenya, 2019
