YOHANA 10

1Yeso yavoola, “Muvooleraa agiligali, mundu ku vosi uvula kwingilira mu kirivwa che ekego cha magondi, navuzwa afudula ma yingilira halovega, uyu aveeye mwivi kandi mwiguliri. 2Navuzwa mundu wingilira mu kirivwa, oyo niyie mwayi wamagondi. 3Mulindi wi kirivwa amwiguliraa, kandi magondi gahulira mwoyo gwigwe lwa alaangaa sia lilala ku lieta lialio, ma agimiliraa kugatuliza ichova. 4Lwa amala kugatuliza ichova, yimira imbiri wago nago gamulonda, kigira gaamanya mwoyo gwigwe. 5Amagondi yaga si ganyala kolonda mugeni mba, nitali gamwiruka kigira sigamanyi mwoyo gwu mugeni oyo mba.”

6Yeso yavavolera lugano yilu, navuzwa yavo si vamanya icha yavavolera mba.

Yeso aveeye mwayi mulahi

7Kunangwa, Yeso yavavolera kandi, “Muvooleraa, agiligali, inzi ni kirivwa cha magondi. 8Avandu vosi avaazaa imbiri wange naviivi kandi aviguliri, navuzwa magondi sigavahulira mba. 9Inzi mbeeye kirivwa. Ku vosi uwingira kuvitira ku inzi alahonywa; alingira kandi atuli ichova kandi alanyoola vwayiru. 10Mwivi yaza vuzwa kigira ukwiva, ukwita nu kudiviza. Inzi ndaaza kunangwa amagondi gange gaduuki konyoora livamwoyo, kandi valinyoole linyingi ligali.

11“Inzi mbeeye mwayi mulahi. Mwayi mulahi ahaanaa livamwoyo lilie kigira amagondi geege. 12Mundu utungwa siaveeye mwayi mwene amagondi. Lwa alolaa kivwi nikizaa alekaa amagondi ma yiruka. Kigira si gaveeye ageege mba. Kunangwa lwa kivwi kigwizaa ku lilala agandi gasalana. 13Oyo yiruka kandi siahenderaa amagondi yago mba kigira aveeye mundu wu kutungwa vuzwa.

14“Inzi mbeeye mwayi mulahi, kandi manyi avaveeye avange, navo avaveeye avange, vamanya inzi, 15Kuli Baba amanya inzi, kandi ndio, inzi manya Baba kandi mbana livamwoyo liange kigira amagondi gange. 16Mbeeye kandi na amagondi gandi amanyingi agataveeye gu mu kego yiki. Kuduuka ngaleete kandi. Nago kandi galahulira mwoyo gwange, na galava chayo kilala nu mwayi mulala.

17“Kivuni kigiranga Baba nanyaanza keveeye kigira inzi mbugilira kuhaana livamwoyo liange, kunangwa nduuki kulinyoola kandi. 18Siaveeye nu mundu unyala kunyagalivamwoyo liange; inzi mwene nzihaanaa. Mbeeye nu vunyali vwu kwihana mwene kwitwa, kandi vunyali vwu kuva mwoyo kandi. Yaga nigo aga Baba yandaga kokora.”

19Liali ho ni liavukana kandi hagati ha Avayuda kigira amakuva gene yaga. 20Avanyingi kuvo vavoola, “Aveeye ni lidemoni; kandi nu mulalu! Kigira ki mu muhulirizaa?”

21Navuzwa avandi vavoola, “Yaga sigaveeye amakuva gu mundu oveeye ni lidemoni mba. Lidemoni linyala kwigura zimoni zia avavoku?”

Yeso Yasuulangwa na Avayuda

22Muku liali ho lisavo liu kusaalisa Litembeli mu Jerusalemi. Ing'inga yeyo yaali yu vukindu. 23Yeso yaali nagenda mu Litembeli, mu lusimbu lwa Solomoni. 24Kunangwa Avayuda vamukumbiriza, nivamuteeva, “Ulavika mioyo jietu mulihayahaya kuduuka ng'inga ki? Niiva ivi niyie Mesia, kovolere agiligali.”

25Yeso yavativulira, “Inzi ndaamuvolera, navuzwa munyi simwasuuvira mba. Miyinzi ja ngolaa ku lieta lia Baba wange jindolekizaa. 26Navuzwa munyi si musuuviraa mba, kigira simuveeye magondi gange mba. 27Amagondi gange gahulira mwoyo gwange; inzi ngamanyi, nago ganondaa. 28Inzi ngahezaa livamwoyo litahera mba, na sigalidiva kali hakuzu mba. Avula ho mundu unyala kunyaga kutura mu makono gange. 29Baba wange uwaamba amagondi yaga aveeye munene kuvita vosi, na avula ho unyala kugatuliza mu makono ga Baba. 30Inzi na Baba wange, koveeye kindu kilala.”

31Maku Avayuda vaavugura amagina vamulase kandi. 32Yeso yavavolera, “Mali kumumanyia miyinzi minyingi milahi kutura ku Baba. Ni guliha ku yijo gwa munyalagia mundase amagina?”

33Avayuda vaamutivulira, “Sikukulasaa amagina kigira miyinzi milahi, navuzwa kigira linyega Nyasaye. Ivi wekolaa mwene kuva Nyasaye, navuzwa oveeye mundu vuzwa.”

34Yeso yavativulira, “Sigang'odwa mu Lilaga lienyu ndi Nyasaye yavoola, ‘Munyi muveeye avanyasaye?’ 35Nyasaye yalanga avandu yavo, avanyasaye, avandu va yaaha likuva lilie, na kunyi kumanyi ndi Mang'oda Matakatifu gavoora agiligali kazozo, na siganyala kuvunagwa mba. 36Ku lwa inzi Baba yandovola kandi naanduma mu kivala. Kunangwa munyala kovora ndi, ‘Ivi onyegaa Nyasaye?’ Gaveeye kigira ndavoora, ‘Inzi nu mwana wa Nyasaye?’ 37Niiva singolaa miyinzi ja Baba wange, mutasuuviri mba. 38Navuzwa niiva ngolaa miyinzi, kali naiva si musuuviraa inzi musuuviri mu miyinzi yijo muduuki kumanya nukumanyiriza ndi Baba aveeye mu inzi, ninzi mbeeye muye.”

39Vageriza kandi kumugumira, navuzwa yazonoka mu makono gaavo.

40Maku Yeso yazia kandi engereka wu mugera gwa Jorodani, havundu ha Yohana yabatiziraa kutanga; kandi yamenya yo. 41Avandu vanyingi vazia kuye nivavoora, “Yohana si yakola kelolekizu choosi mba. Navuzwa goosi aga Yohana yavoola ku mundu uyu gaveeye agiligali.” 42Avandu vanyingi, havundu yaho vasuuvira muye.

Likuza lia Lazaro

वर्तमान में चयनित:

YOHANA 10: LOGOOLI

हाइलाइट

कॉपी