YOHANA 12

Maria Yavaka Yeso maguta ha Bezani

(Mat. 26:6-13; Mar. 14:3-9)

1Madiku sita lilia lie Lipasaka ni likiri kuduuka, Yeso yazia Bezani wa Lazaro yamenya, uwa Yeso yaali nasimugukizi kutura mu vakuzu. 2Vamulombera ichukulia cha mugolova, na Marita yakeleeta komesa. Lazaro yaali mulala ku yavo avaari ni viikaye harara na Yeso komesa. 3Kunangwa Maria yavugula ijuba ya maguta gafunyaa umwayu, aginaridi enzere aguvuguli vonene. Yavaka virenge via Yeso, na niyeeya virenge zana ni liisu lilie. Inyumba yoosi yekolera mwayu. 4Navuzwa Yuda wa Esikarioti, mulala ku avaari aviigi veve, uyu uwa zaama Yeso, yavoola, 5“Kigira ki amaguta yaga gavuli kugulizwa zidinari mia tatu, na zilahevwa avadaka?” 6Si yavoola yaga kigira yahendera nokovelera avadaka, navuzwa kigira yaali umbiki wa mabese, na kuli yaali mwivi, vuli ing'inga yivaa kutura mu livikiru yilio.

7Navuzwa Yeso yavoola, “Leki mukali oyo ave! Leka aviiki ichaveeye nacho kigira lidiku lie liteevwa liange.” 8Avadaka mulava navo kazozo, navuzwa simulava harara nainzi zing'inga ziosi mba.

Lilohiza mu vwivisu ukwita Lazaro

9Lwa avayuda avanyingi vahulira ndi Yeso aveeye Bezani, vazia yo, sigali kigira Yeso vuzwa, navuzwa kandi vaduuki kolola Lazaro wa Yeso yasimugukiza kutura muvakuzu. 10Kunangwa, Avasaalisi vanene valohiza zing'anagani viiti Lazaro kandi. 11Kigira Lazaro, Avayuda vanyingi vatanga kuvasuura vasaalisi, nivasuuvira mu Yeso.

Yeso yingira mu Jerusalemi nisango enene yi Liguuta

(Mat. 21:1-11; Mar. 11:1-11; Luk. 19:28-40)

12Lidiku lialonda ku, kiduma kenene cha avandu avaari nivaazi mu lisavo lie lipasaka, vahulira ndi Yeso yaazaa Jerusalemi. 13Kunangwa vaavugura zisia zia makindu nivazia kumwaganira, nivakuba isango nivavoora, “Hosana! Agasizwi uyu uzaa mu lieta liu Mwami. Agasizwi Mwami wa Isiraeli.”

14Yeso yanyoora kemoli chisukiri kilala, naniina ku kuli Mang'oda Matakatifu gavoora,

15“Utatia mba, lidaala lia Jerusalemi!

Henza, Mwami woovo yaazaa,

yikaye ku kemoli chisukiri.”

16Ing'inga yeyo aviigi veve sivamanyiriza vindu yivi viosi mba, navuzwa lwa Yeso yaali niyakakuminywa nilwo lwa vizuliza agaali ni gang'odwa kuye, kandi aga avandu vaali nivamukoleeye.

17Kiduma chaali harara naye ing'inga ya yalanga Lazaro kutura mu kilindwa, naamusimugukiza kutura muvakuzu, vavoola agekoleka. 18Kivuni chagira kiduma cha avandu vazia kumwaganira, chaali ndi, vahulira vosi ndi Yeso yaali naakori kelolekizu yiki. 19Kunangwa, Avafarisayo vavolerana, “Muloraa? Sikunyala kokora kindu choosi mba. Heenzi kuli kivala choosi kimulondaa.”

Avaguriki valala venya kolola Yeso

20Avaguriki valala avaari harara na avandu vazia Jerusalemi kusigamira Nyasaye mu ing'inga yilisavo yili. 21Kunangwa vazia ku Filipo, mundu wa Bezisaida wi lidaala lia Galilaya, nivavoora, “Mwami, kwenyaa kolola Yeso.”

22Filipo yazia navolera Andereya, navo vaviri vazia kovoolera Yeso. 23Yeso yavavolera, “Ing'inga yu kukuminya Mwana wa Adamu iduuki! 24Muvooleraa agiligali, enzori yi ingano itigalaa yenyine vuzwa nitagiywi mu marova ma ikuze, itigalaa yeng'ine. Navuzwa niiva ilakuza, yaama ingano inyingi. 25Uyanzaa livamwoyo lilie alaligotiza, na udunyiraa livamwoyo lilie mu kivala yiki alava ni livamwoyo litahera mba. 26Uyu wenyaa kundumikira gamuduukira anonde, kandi hoosi ha mbeeye, niho hu mutumikiri wange ava, kandi mundu ku vosi undumikira, Baba wange alamuha uvukumi.

Yeso Yamoloma ku likuza lilie

27“Kalunu mwoyo gwange gohendaa. Nambole ki? Mbore, ‘Baba, ombonyie ku ing'inga yu vusaliri yiyi?’ Awa, kigira yiki nicho chagira inze ninziza kunangwa nduuki kuvitira mu ing'inga yu vusaliri yiyi. 28Baba, ukuminyi lieta liilio!”

Maku mwoyo gwamoloma kutura mwigulu, “Mali kulikuminya kandi ndaalikuminya.”

29Kiduma cha avandu avaari nivasingiyi ahene yaho vahulira mwoyo yigwo, na valala kuvo vavoola ndi liali lihiligana lie inguba, na vandi navo nivavoora, “Engelosi amolomi naye!”

30Navuzwa Yeso yavativulira, “Mwoyo yigu siguuzi kigira inzi mba, navuzwa kigira munyi. 31Kalunu ni ing'inga yi likalagirwa lia avumukivala yiki. Kalunu Mwamihi munene wikivala yiki alakungwa. 32Lwa ndigingwa igulu ku musalaba nu kuhilwa mwigulu kutura mu kivala, ndang'usa avandu vosi sa mulala vaze ku inzi.” 33Yavoola yaga kuvamanyia ni likuza ki lia alikuza.

34Kunangwa, kiduma yicho cha mutivulira, “Kunyi kovoolerwa ni Lilaga lietu ndi Mesia alamenya ni kunyi mihiga ni mihiga. Unyala ndi, kovora Mwana wa Adamu adukanaa kuhilwa mwigulu? Nivwaha Mwana wa Adamu uyu?”

35Yeso yavavolera, “Uvulavu vukikiri ni munyi ku ing'inga engekeeke. Gendi lwa mukikiri mu vulavu yivu kunangwa; kisundi kivuli kumunyoola, kigira ogendaa mu kisundi siamanyi wazizaa mba. 36Kunangwa, ing'inga yamukikiri nuvulavu, musuuviri mu vuvulavu muduuki kuva avana vu vulavu.”

Livula kusuuvira lia avandu

Inyima wokovoola amakuva yaga, Yeso yazia niyivisa mwene kutura kuvo. 37Kali niiva yakola vilolekizu vinyingi yivi viosi imbiri wavo, si vamusuuvira mba, 38na ndio amakuva gu muporofeti Isaya gavoora gaduuki kuduukizwa:

“Mwami, nivwaha wasuuvira livoora lia amakuva giitu?

Kandi, nivwaha wavuulirwa zinguru ziu Mwami?”

39Kunangwa si vaali vanyara kusuuvira mba. Isaya yavoola kandi

40“Nyasaye umali kuvakuliza zimoni ziavo;

kandi umali kudinyia mioyo jaavo gase

valalola ni zimoni ziavo

kandi vamanye ni mioyo jaavo,

ma viganire, nainzi nduuki kuvahonyie.”

41Isaya yavoola vindu yivi kigira yalora uvukumi vwa Yeso, kandi navoora amakuva geege.

42Kali ndio, avanyingi ku avanene va Avayuda vasuuvira mu Yeso. Navuzwa, kigira liitia Avafarisayo, si viyama havulavu ndi vamusuuvira mba, gase valakungwa mulisinagogi. 43Vayaanza lizominywa na avandu kuvita lizominywa na Nyasaye.

Makuva ga Yeso galakakalagiri vandu

44Kunangwa Yeso yahanzuka nu mwoyo munene navoora, “Mundu usuviraa mu inzi, siasuviraa inzi zieng'ine, navuzwa asuviraa uyu uwanduma kandi. 45Olola inzi alolaa kandi oyo uwanduma. 46Inzi mali kuuza mu kivala kuli uvulavu. Kunangwa mundu kuvoosi usuviraa mu inzi avuli kutigala mu kisundi. 47Uhulira amakuva gange, navuzwa navula kugagumira, inzi si mukalagiraa mba, kigira sindaaza kukalagira avumukivala, navuzwa kuvahonyia. 48Uyu usulaa inzi kandi siagumira makuva gange, aveeye numukalagi. Amakuva gandavoola galava umukalagi weve mu lidiku lie keheri. 49Inzi simbolaa kuvunyali vwange mwene, navuzwa Baba wanduma niyie uwaamba aga ndukanaa mbore kandi molome. 50Inzi manyi ndi lilago lilie liletaa livamwoyo litahera mba. Kunangwa, inzi mboraa vuzwa aga Baba yambolera mbore.”

Yeso yasaaviza aviigi veve virenge

वर्तमान में चयनित:

YOHANA 12: LOGOOLI

हाइलाइट

कॉपी