JOHANA 4
4
Jisua neh Samari nupangnu
1Khante, Farisaihei khan Johana nêkan Jisuan kôilôm itam ual a siam a, a baptis intam ual iti an riat tâk a.#Joh.3:22. 2A dik takkan, Jisuan chu tute baptis mak a, a kôilômhein an ibaptis ngai a nit. 3Khanchu, Jisuan kha an iti khah a riatin chu Judai ram a mâk a, Galili ramah a kîr nôk tâk a. 4Kha a fe malamah khan Samari ram a ro ai nang a nit.
5Khante, Samari rama khua khatkah Sikar an iti khah a hong tlung a, amakhah Jakoban a naipa Josefa mun ai pêk kôla om a nit.#Riph.33:19; Jos.24:32. 6Jakoba tuisunsua khom amakhan a om a, Jisua kha a lam lônna a sôl sikin tuisunsua kôlah khan â ṭhung rak a. Sûnlâi tak vêl a nit.
7Khante, Samari nupang khatkah tui ichôi rangin a hong a. Jisuan a ziangah, “Tui iin rang ne peh roh,” a lei ti a. 8A kôilômhei chu ifarua richoh rangin khuaah an fe tâk a.
9Nupangnu khan a ziangah, “Nangmah Juda mi ni nit a, keimah Samari nupang ki nit a, ingkan ngân im iin rang ni ne ni tlia?” a ti a. (Judahei neh Samari mihein kilât manih, bêl manih thil îte an imang îtlâng ngai ino a nit.) #Ezr.4:1-5; Neh.4:1,2.
10Jisuan a sâm a, “Pathian thilpêk neh ni zianga, ‘Iin rang ne peh roh,’ ititu hih nî riat ni sela chu, nangman kêng a ziangah zong ni ta; ani khan ringna tui #4:10 ‘Tui iring’ tina khom a nit. nang ai pêk rang a nit,” a ti a.#Joh.7:37; Thup.21:6; 2:17.
11Khanchu, nupangnu khan a ziangah, “Epu, tui thâlna lak îte nei mak che a, tuisunsua lak ân thûk vit a. Taka rithokin im ringna tui kha nî nei? 12Kin pu Jakoba nêkan nî roinpui ual mani? Ani khan hi tuisunsua hih a ne pêk a, amah neh a naihei neh a ran vâihei khomin an lei iin ngai a nit,” a ti a.
13Jisuan a sâm a, a ziangah, “Tutu hi tui iin kangân chu an tui rihâl nôk a ta; 14nikhomsela, tukhom an zianga ki pêk rang tui iin kangân chu an tui rihâl nôk tlak khâi no nih. Keiman tui ki pêk rang chu, an sungah tuinâr hong chang a ta, kha tuinâr khan ringna tui neh kumtluang ringna pêng a ti,” a ti a.#Joh.6:35; 7:38.
15Khanchu, nupangnu khan a ziangah, “Epu, kha tui khah ne peh roh, ki tui arhâl khâi nona rangin neh hi ten ten tui ichôi ki hong khâi nona rangin,” a ti a.
16Jisuan a ziangah, “Fen la, ni pasal va koi inla, hin hong nôk roh,” a ti pêk a.
17Nupangnu khan a ziangah, “Pasal nei mang e,” a ti a.
Jisuan, “ ‘Pasal nei mang e,’ nî ti hih nî tin dik a nit. 18Pasal ringakah ni nei tâk a, atûna nî ompuipu khom hih ni pasal ni mak e. Thudik tak ni ne iril a nit,” a ti a.#2 Rêng.17:24; Hos.2:7.
19Nupangnu khan a sâm a, “Epu, zânthla ni nit iti ki riat tâk. 20Kin chibulhein chu hi tlângah hin Pathian chubai an ûn ngai a; khanniseh, nangmani Judahein chu, ‘Mihein Jerusalemah ngêt Pathian chubai an ûn rang a nit,’ nin ti ngai,” a ti a. #Dn nik.11:29; Jos.8:35.
21Khante, Jisuan a ziangah, “Nupangnu, keimah ne iam roh, hi tlângah ngêt neh Jerusalemah ngêt nino khom mihein Pa chubai an ûn zoro â tlung rang tâk a nit. 22Nangmani Samarihein chu nin iriat ino chubai nin ûn ngai a, keimani Judahein chu kin iriat chubai kin iûn ngai a nit; saninringna hih Judaheia rithoka hong isuak kêng ai nit.#2 Rêng.17:29-41; Isa.2:3; Rom.9:4. 23Nikhomsela, a zoro ai tlung rang tâk a nit, atûn khom ai tlung thiai tâk a nit. Kha tikin chu Pathian chubai iûntuhein Rithla neh Thutakin Pa chubai ûn tâng an ti. Khangkana mihei khah Pan amah chubai iûn rangin ai zong a nit. 24Pathian chu Rithla a nit a, amah chubai iûntuhein Rithla neh thutakin chubai an ûn rang a nit,” a ti a.#Fil.3:3.
25Nupangnu khan a ziangah, “Mesia la zuang a ti iti ki riat, a zuang tikin chu tinrêng ne la ril a ti,” a ti a.
26Jisuan a sâm a, “Keimah, nang risônpuitu hi ani khah ki nit,” a ti a.
27Kha lâi takah khan a kôilômhei khah an hong kîr nôk a, nupang neh an risôn an mun chu an ringai arkhêl ok a. Khanniseh, tutên, “Im nî nuam? Ithôm nupang ni irsônpui?” iti khom ridon mak e.
28Khante, nupangnu khan a tuibêl a mâkrak a, khosungah a fe nôk a, khosunga mihei ziangah khan, 29“Mi khatkah, ki sintho tinrêng ne ril vangtu a om a, hong unla, hong en ta u, Mesia ai nit thei rang mani?” a ti a. 30Khanchu, an khua ata an hong suak a, Jisua ziangah an fe tâk a.
31Kha kârah khan kôilômhei khan, “Minriseitu, fâk zong hi roh,” itin an lei riphat a.
32Khanniseh, Jisuan an ziangah, “Nin iriat ino bu ne rang ki nei,” a ti a.#Mat.4:4.
33Khante, kôilômhei khah an khâtin an risôn a, “Mîn bu an hong ichôi pêk manih?” an ti a.
34Khante, Jisuan an ziangah, “Ne tirtu lungdo sin neh a sin izoi hih ki bu tui tak a nit. 35Nangmanin chu, ‘Thla lika nungah bu ât a înrup rang a nit,’ nin iti ngai ni mak im a? Ringai ta u, nangni ke ril, tang unla, loihei en ta u, atûn ata iât rangin buhei a min tâk. 36Â âttu khan thalo a mu zel tâk a, kumtluang ringna rangin irâ ai bûm thiai a nit; â tûtu neh â âttu an lôm inrual theina rangin.#Mat.9:37; Lk.10:2. 37‘Mi khatkan a tû a, mi dangin a ât ngai,’ iti thu hih a idik a nit.#Job.31:8; Mik.6:15; Mat.13:57; Mk.6:4; Lk.4:24. 38Nin sinsôlna râ nino iât rangin kêng nangni kî tir; mi dangin an sin a, an sinsôl irâ nin iât a nit,” a ti a.
39Khante, nupangnu khan, “Ki sintho tinrêng a ne ril vang,” a ti sikah khan kha khuaa Samari mi itam takkan Jisua an iam tâk a. 40Khanchu, Samari kho mihei khah Jisua ziang an hong tlungin chu an zianga châm rangin an ngên a. Jisua chu kha khuah khan sûn nikah a châm tâk a.
41A thusîr an riatin chu mi dang itam takkah khomin an iam tâk a. 42Khanchu, anni khan nupangnu ziangah khan “Atûn chu ni thu sîr sika iam ni khâi mang ung a, keimani ngêiin a thu sîr kin riat a, hi mi hih rammual saninringtu a nit ngêt iti kin riat tâk,” an ti a.
Jisuan milian naipa ân dam
(Mat.8:5-13; Mk.7:1-10)
43Khante, sûn nika nungah chu kha khuaa rithokin Galili ramah a fe tâk a. 44Amah Jisua ngêiin, “Zânthla chu ama khuaah khan chôiinrisângin om ngai mak e,” itin a lei isîr tâk a.#Mat.13:57; Mk.6:4; Lk.4:24. 45Galili ram a hong tlungin chu mipuiin an lei lôm a; Jerusalemah Kalkan Kût imang an hang fe lâia Jisua sintho tinrêng khah an mu sikin. #Joh.2:23.
46Khante, Jisua kha Galili rama Kana khua, tui uain ân changna khah a hong tlung nôk a, milian khatkah a lei om a, a naipa Kapernaum khuaa dam ino a nit.#Joh.2:1-11. #Mat.8:5-10; Lk.7:2-10. 47Kha mi khan Jisua, Judai ram ata Galili ramah a hong iti a riat kaneh a ziangah a fe a, a naipa ithi lôk lôk tâk indam ranga Kapernauma fe rangin a ngên a. 48Jisuan a ziangah, “Sinrikhêlhei neh thilrikhêlhei nin mu non chu tutên iam tlak no tin u,” a ti a.
49Khante, kha milian khan a ziangah, “Epu, ki naipa a thi man ne zuang pêk ngêt roh,” a ti a.
50Jisuan a ziangah, “Fe nôk ta roh; ni naipa chu a dam tâk,” a ti pêk a.
Khanchu, Jisua ṭong iiam pumin a fe tâk a. 51Khante, a in ipuna a fe lâiin lampuiah â somhein an lei don a, “Ni naipa chu a dam tâk,” an lei ti a.
52Khante, ani khan an ziangah, a naipa dam zoro tak khah ardon a. Anni khan a ziangah, “Mizân kholoi dâr khatka ta khah ân khur ai boi tâk a nit,” an ti a. 53Khanchu, a Pa khan kha zoro tak khah Jisuan, “Ni naipa chu a dam tâk,” a zianga a ti zoro tak khah a nit iti a riat tâk a. Khanchu, amah neh a inmihei an rêngkan an iam tâk a. 54Amakhah Jisuan Judai ram ata Galili ramah a hong nunga sinrikhêl a sin voi nikna a nit.
वर्तमान में चयनित:
JOHANA 4: BIATBSI
हाइलाइट
शेयर
कॉपी
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
