JOHANA 3
3
Jisua neh Nikodema
1Khante, mi khatkah, arming Nikodema a om a, Judahei ruaitu, Farisai pôla mi a nit.#Joh.7:50. 2Kha mi khah zânkah chu Jisua ziangah a hong a, a ziangah, “Rabi, Pathian ziang ata Minriseitu zuang ni nit iti kin riat. Pathian an ziangah a om non chu tutên hingkana sinrikhêl nî tho angkana hih tho thei no nih,” a ti a.#TS.10:28. 3Jisuan a sâm a, “Thutak nang ke ril, mi tukhom a suaknôk #3:3 ‘Chungtianga rithoka suak’ itih thei khom a nit. non chu Pathian Ram mu thei no nih,” a ti a.#1 Pet.1:23; Jak.1:18. 4Nikodema khan a ziangah, “Ingkan im mi a ûnlian nungin a suaknôk rang? A nu sungah lût thei tlak no nia, isuak khom voi nikah suak nôk thei tlak no nih,” a ti a.
5Jisuan, “Thutak nang iril ki ti, mi tukhom tuiah neh rithlan a suak nôk non chu Pathian Ram #3:5 Mss ṭhenkatah ‘Rivânram’ iti a nit. lût thei no nih.#Ezek.36:25-27; Efes.5:26; Tit.3:5. 6Taksaa inzir chu taksa mi a nit a, Rithlaa inzir chu rithla mi a nit.#1 Kor.5:50. 7‘Ni suaknôk rang a nit,’ kî ti hih arkhêl ti no roh. 8Phâivua hih a nuamna tiang tiang a râng ngai a, â rî khom ni riat a; nikhomsela, taktianga hong rithok im ai nit iti neh, taktiang im ai fe rang iti chu reh mak che. Mi tukhom Rithlaa suak chu khangkah khan an nit,” a ti pêk a.#Ezek.37:9.
9Nikodeman, “Amakhah Ingkan im a nit thei rang?” a ti a.
10Jisuan a ziangah, “Israelhei lâiah minriseitu lian ni nit a, hi thu hih nî riat thei ino mani? 11Thutak nang ke ril, kin iriat khah kin isîr a, kin imu khah kin inpuang ngai a; khanniseh, tutên kin thusîr iham nuam mak chei.#Joh.8:26. 12Rammual thil nangni ke sîr pêk iluan ne iam mak chei a, rivân thil nangni sîr pêk inlang vâng chu ingkan im nin ne iam thei ranga? 13Mi tute rivâna hang ife tâk la om ngai mak a, Miriam Naipa, rivâna rithoka zuang iṭumah ti no hi chu,” a ti a.#Rom.10:6; Efes.4:9.
14Mosian ramchâra dâr irûl a ikhâi angkah khan Miriam Naipa hi ikhâiin ai om ngêt rang a nit.#Rit.21:8; Joh.8:28; 12:34. 15Tukhom ama iam kan chu kumtluang ringna an neina rangin. 16Pathianin rammual lung a thlung tak tak a; khanchu, a Naipa neisun a pêk a; tukhom ama iam kan chu thi loia kumtluang ringna an neina rangin. 17Pathianin rammual thiamno inchang rangin a Naipa rammualah zuk tir mak a, rammual inring rangin a zuk itir a nit.#Rom.5:8; 8:32; Efes.2:4; 1 Joh.4:9,10.
18Tukhom Naipa iam chu thiamno changin omak a, tukhom â iam ino chu atûn ata thiamno changin an iom pial tâk a nit, Pathian Nai khât khah an iam no sikin. 19Thiamno chang tlia chu hingka hin a nit: ivâr khah rammualah a zuang a; khannisela, mihein ivâr nêkan izîng an kan ual, an sinthohei â sual sikin. 20Tukhom sual isin murdîn ivâr an nel ngai a, ivârah khom hong ngai mak; an sintho sualhei ilang an nuamno sikin. 21Thil idik isinhei murdi ivârah an hong ngai, an sinthohei khah Pathian thu zôma sin an nit iti ivâr khan ân lang theina rangin.
Jisua neh Baptistu Johana
22Kha rizoiin chu Jisua khah a kôilômhei neh Judai ramah an fe a, amakhan zoro sôt zankah an lâiah a châm a, baptisma ân chang a.#Joh.4:1. 23Johana khomin Salim kho kôla Ainon munah khan mi a baptis ngai a, kha munah khan tui a tam sikin. Mihei a ziangah an fe a, a lei baptis ngai a. 24Kha zoroah khan Johana kha tâng inah ikhum la ni mak e.#Mat.14:3; Mk.6:17; Lk.3:19,20.
25Khante, Johana kôilôm ṭhenkahei neh Juda khatkah risûnfâina dân thu-ah an lei rikhal a. 26Khanchu, Johana ziangah an fe a, “Minriseitu, Jordan râla ni zianga om, a thurchi ni isîr ngai khah ni la riat im? Ani khan atûnah hin mi a baptis a, mipuiin ani khah an ipun tâk a nit,” an ti a.
27Johanan a sâm a, “Pathianin a pêk non chu tutên îte dong thei ngai mak.#1 Kor.4:7. 28‘Keimah chu Mesia ni mang a, a matona fe ranga tir ki nit,’ kî ti khah nangmani ngêi ki thu riatpuituhei nin nit.#Joh.1:20. 29Imoi pasal chu moineitu khah a nit; nikhomseh, moineitu rual, a kôla dinga a he ringai ṭian khan moineitu rôl a riatin chu a lôm tak tak ngai a. Khaangkan kei khom ki lômna inrikipin ai om tâk a nit. 30Ani chu â roinpui tîr tîr rang a nit a, keimah chu â chîn tîr tîr rang ki nit,” a ti a.
Rivâna rithoka zuang iṭum
31Chungtianga rithoka zuang iṭumtu chu mi tin tin nêka â roinpui a nit; rinênga rithoka hong inzir chu rinêng mi a nit a, rinêng thil â sîr ngai; khanniseh, rivâna rithoka zuang iṭum chu tinrêng chunga ân chungtak a nit. 32Rivâna rithoka zuang iṭum khan thil ai mu neh ai riathei khah â sîr a; nikhomsela, tutên a thusîr khah iham mak e. 33Khanniseh, tukhom a thusîr iham khan Pathian chu â dik iti an inam indet ngai a nit. 34Pathianin ai tir khan chu Pathian thu â sîr ngai a, Pathiannin ama Rithla chu rikip #3:34 ‘Rithla kha an ziangah rita bakkan peh ngai mak,’ itih thei a nit. takkan ai pêk ngai a nit. 35Pa khan a Naipa lung a thlung a, a kutah tinrêng ai sia tâk a nit. #Mat.11:27; Lk.10:22. 36Tukhom Naipa iam kan chu kumtluang ringna an nei tâk; tukhom Naipa thu zôm ino chu ringna nei no nia, an chungah Pathian ningthikna ai om mai rang a nit.
वर्तमान में चयनित:
JOHANA 3: BIATBSI
हाइलाइट
शेयर
कॉपी
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
