San Mateo 5
5
A tsikba ix wits: U jach tsoyi t'ʌn
(Lc. 6.20-23)
1Ka tu yira Jesús ne pim winik, nʌ'ki yok'o wits y kuraj y laj taro' ti' u kʌ'sa winiko'. 2Ij chu'mpʌ u kʌ'sa, tʌn u yei'k:
A ba' jach tsoy u yirik a metik K'uj
(Lc. 6.20-23)
3«Ku jach bij tsoy ta u yoro' a mok ku yui'k u bʌj jach yʌnti' u jach kʌxtik K'uj, a layo' lʌji' yʌnio' tu ku wesintik K'uj a tiʌ kʌ'.
4»Ku jach bij tsoy ta u yoro' a mok ku yok'o',
a layo' ku jach bin nʌsa' u yoro'.
5»Ku jach bij tsoy ta u yoro' a mo' muj yui'k u bʌj t'o'o,
a layo' lʌji' ku bin jach ts'aba ti' a tumen lu'm a ku bin u mete K'uj.
6»Ku jach bij tsoy ta u yoro' a mok jach ne poch u yik u meta' u taji a ba',
a layo' ku bij meta' tio' a bex u k'at.
7»Ku jach bij tsoy ta u yoro' a mok ku ch'eik otsi ti' u bojo',
a layo' jeu ch'a'ba otsi tio' ten K'uj.
8»Ku jach bij tsoy ta u yoro' a mok tsoy pixʌn y mʌnʌ' k'ebʌn ti'
a layo' jeu jach irko' a K'uj.
9»Ku jach bij tsoy ta u yoro' a mok ku jach meajo' ti' u ts'oko ts'iki,
a layo' ku jach bij a'ba tio' u jach ti'o' K'uj.
10»Ku jach bij tsoy ta u yoro' a mok ku yakʌsta' yok'o tuku metik u taji a ba',
a layo' lʌjio' ku jach bin oko' ich kʌ'.
11»Ku jach bin tsoy ta wore'x tuk'in ka' u k'eye'x a winik, ku kʌxmetke'x y bexi' tuk'in ku yei'ko' ba' ti teche'x mo' taj chen yok'o ten. 12Jach ki tsoykinta worex, a teche'x jach ya'p ba' ku bij ts'aba teche'x ix kʌ', ka wirik bexi' meta ti' a profetas a tuk'in mo' yʌ tie'x teche'x.
A ch'och' y u sasi a lu'm
13»A teche'x lʌjie'x a ch'och' yok'o a je' a lu'm, chen wa ku luk'u u ch'och'i, ¿Ba' yete ku ka' bij ch'och'ta? Ya mo' tsoy ti' u k'ʌna' toj ja'ri' ku jochkinta' ix bej y a winik ku laj po'che'tik.
14»A teche'x lʌji' u kip'i a way a lu'm. Bexe'x a bex tiʌ jump'eri' kʌjta yok'o wits tu ne kʌ'nʌ y mo' bik u ta'kik u bʌj. 15Bexi', mix ku t'ʌba a kip' ti' u but'a yok'o u yarʌn lek, mo' to jay ku kukinta' kʌnʌ ti u ki tichk'atik tu woro a mok tiʌ ich nʌj. 16Bexi' te'x, ki' ire'x u ki' sasichʌ a kip'ex ti' a winiko', ti' u jach ki' irko' jach tsoy ba' ka metke'x y bex jeu ki' ya'ba ne tsoy ba' ti' a Tete'x a tiʌ ix kʌ'.
Jesús bi u tsikbʌte yok'o u t'ʌn K'uj a ts'ibtamʌ uchik a Moisés
17»Ma' tukrike'x wo taren in wae u ts'oko a metik a u t'ʌn K'uj a ts'ibtamʌ uchik a Moisés mix u a ba' tu yao' a profetas, moj taren in wae u ts'oko u meta', a ten taren ti in metik. 18Kin toj jach ki ei'k te'x wo ti'tʌ yʌn a kʌ' y a lu'm, mix mok ku luk'sik mix jump'eri' t'ʌn a ts'ibʌ' yok'o u t'ʌn K'uj a u ts'ibtamʌ uchik a Moisés, hasta ku k'uchu u k'ini u nup'u. 19La'jen, a mok muj yui'k a t'ʌn a to'o tu toj a'a K'uj uchik, a tu ts'ibta uchik a Moisés, wo tarak cho chichin, mix ku kʌ'sik a winiko' u jach metko', ku bin jach a'bati' ne cho chichin yoko' kʌ'. Chen a mok ku jach metik y ku kʌ'sik u bojo' u metik, a lay ku jach bin a'bati' jach nuk a yoko kʌ' a tuku wesintik K'uj.
A Jesús ku kʌ'sik jump'e tumen t'ʌn
20Ki toj ki' ei'k teche'x, a mok ku kʌ'sik u t'ʌn a K'uj a ts'ibtamʌ uchik a Moisés y u winiko' a judíos a ku ya'batio' fariseos ku che metko' u t'ʌn K'uj, chen teche'x yʌnti' a metke'x más ne ya'p tsoy ba', ti tsoy a woke'x yok'o a tuku wesintik K'uj a tiʌ kʌ'.
1. A Jesús y a ts'iki
(Lc. 12.57-59)
21»A teche'x a wuimue'x u yei'k a chunire'x: “Ma' kinsa, a mok ku kinsa ku bin u bo'te u si'pi.” 22A ten kin toj jach ki ei'k te'x, wo yʌn mok ku ts'ikta yete u bojo', ku jach bin u bo'te u si'pi, a mok ku jach ei'k ba' ti' u bojo', ku bij bisa' ti' a jak'ʌ u kuch, a mok ku k'uk'ux ei'k ba' ti' u bojo', ku bin jach pura' yoko k'ak'.
23»Wo ka tasik a siji ti' K'uj yok'o tuku k'uba' ba' ti' K'uj, y tita ku k'a'ja tech a bojo' ts'ik ti' tech, 24p'ʌte tita a siji ti' K'uj ʌkʌtʌn yok'o tuku k'uba' ba' ti' K'uj, y yʌ xen pʌti a tsoykinte a wor yete a bojo'. Y bex tsoy a sut a ts'ae a siji ti' K'uj.
25»Wo yʌn mok ku biskech yete a jak'o u kuch, toj yʌj k'ate a wor yete tuk'in ti'tʌ yʌnech yete yok'o bej, ti' mu bin u purech yete uj juesi tribunal, y uj juesi tribunal ku purkech yete a ku chukwinik y a ku chukwinik ku bin u b'utech tuku chuka mʌka' winik. 26Jach toj tu jay kin wei'k tech, mʌnʌ' a jok'o tita hasta ka laj bo'tik tu woro a bo'.
Jesús ku tsikbʌtik yok'o u tusik u lak' yete u jer mo' la' u lak'
27»A teche'x a toj wuimue'x a toj a'a': “Ma' tusik u lak' yete u jer mo' la' a lak'.” 28Chen a ten ki wei'k te'x, wo yʌn mok ku pʌktik junturi' ch'upra y ku ts'iotik, ya tu tusa u lak' yok'o u pixʌn.
29»Wo jump'eri' a wich ku ts'ek a kʌxtik a k'ebʌn, jare a pich'inte nʌchi yoko' tech, más tsoy wo ka sʌtik chichin a bʌk'e, y mo' tu woro a bʌk'e ku bin pich'inta' ix k'ak'. 30Y wo a k'ʌ' a no'or (derecha) ku ts'ek a kʌxtik a k'ebʌn, p'ik xat'e y pich'inte nʌch yok'o tech, y más tsoy wo junxet'i' ka sʌtik a bʌk'e, y mo' ku bin tu woro ich k'ak'.
3. Yok'o a mok ku p'ʌtik u lak'
(Mt. 19.9; Mr. 10.11-12; Lc. 16.18)
31»Bexi' toj aʌ': “Wo a xi'ra ku p'ʌtik u lak', yʌnti' u ts'ek ti' u ju'ni tuku p'ʌtik u bʌj a winik.” 32A ten kin toj ei'k teche'x wo a xi'ra ku p'ʌtik u lak', y mo' yok'o tu tu yira yete u jer xi'ra, ku ts'ek u bin kʌxtik u k'ebʌn a ch'upra ti u bin u yire u bʌj yete u jer xi'ra, Y a mok ku ch'eik a ch'upra a kay ch'aʌ', bexi' tʌn u kʌxtik u k'ebʌn.
Yok'o tuku a ts'ek a t'ʌn
33»A teche'x toj a wuimue'x u yei'ko' a chunire'x a Moisés a tu ya'a: “Jach mete'x a ba' ta ts'a a t'ʌn ti' K'uj.” 34Chen a ten kin wei'k teche'x: Tuk'in ka wei'k a metke'x ba' ma' ts'eke'x a t'ʌn, ma' k'ʌnik u k'aba' a kʌ' ti' a ts'ek a t'ʌn, ka wirik a kʌ' lʌji' tuku kuta K'uj, 35mix ka k'ʌnik u k'aba' a lu'm, ka wirik lʌji' yʌni K'uj, mix u k'aba' a Jerusalén, ka wirik lʌji' yʌni K'uj u ne t'oji Wes. 36Mix tech ka' k'ʌnik a kuxte'x ti' a ts'ek a t'ʌne'x, ka wirik a teche'x mix jump'eri' u tso'tse a jo' je' a waysik ek' o sʌk. 37Wo ka bin a mete'x ba', a'e'x je'e wo jach ja' metke'x, wo mʌnʌ' toj jay ka wei'ke'x mʌnʌ'. Wo ka wei'ke'x u jer ba', a lay ti' u tar ti' a kisin.
5. A mok ku ka' sutik u jer oj meta ti' mo' tsoy ba'
(Lc. 6.27-36)
38»Ta wu'a u ya'a uchik bex: “Wo yʌn mok ku jarik u wich u bojo' bexi' ti' yʌnti' u jara u wich, wo yʌn mok ku p'ikik u koj u bojo' bexi' ti' yʌnti' u p'ika' u koj.” 39Che ten ki wei'k te'x: Maj p'isik a bʌj wo yʌn mok ku kʌxmetkech, wo yʌn mok ku jʌts'ik a p'uk a derecha, ts'ati' u ka' jʌts'e tʌtʌjʌn bexi'. 40Wo yʌn mok ku kʌxtik u ts'iki yete tech y poch u takik a nok', ts'ati' bexi' a tso'ts nok'. 41Wo yʌn mok ku ts'ʌrik a pach a kuch u nʌchi jump'e kilómetro, tech kuche ti' ka'p'e kilómetro. 42A mok ku k'atik ba' tech, ts'ati', y a mok ku k'atik ba' tech mʌjʌbi, ts'ati' u mʌjʌnte.
6. Yʌnti' a yakuntik a mok p'ek u yirke'x
(Lc. 6.27-28,32-36)
43»Bexi' ta wu'a u ya'a uchik bex: “Yakunte a bojo' y p'akte a mok p'ek u yirikech.” 44Chen beje' ten kin wei'k te'x: Yakunte'x a mok p'ek u yirike'x, a'e'x ti tsoy ba' ti' a mok ku yei'k mo' tsoy ba' ti te'x, mete'x tsoy ba' ti' a mok p'ekyike'x y t'ʌne'x K'uj ti' a mok ku kʌxmetke'x. 45Y bex ka bin a we'se'x a teche'x jach lʌjie'x a Tet K'uj a tiʌ kʌ', a lʌji' ku yei'k u jok'o u k'ak' a k'in yok'o ti' a mok tsoy u tuko' y bexi' ti' a mok mo' tsoy u tuko', y bexi' ku tuchi'tik u tar ja' ti' a mok ku jach uik' u t'ʌn K'uj y ti' a mok muj yui'k. 46A teche'x wa jai' ka yakuntik a mok jai' ku yakuntike'x, ¿baij ku bin u bo'te tech K'uj? ¿Maj wirke'x bex ku metko' a moko' ku k'atik u bo'ri u ba' u bojo' a mu meaj tij wes?. 47Wo jay ka t'ʌnik a sukawirik, mʌnʌ' a metke'x jach tsoy ba', ¡A je' bex ku metko' a mok mo' judíos! 48Jach ki tsoykinte'x a tuke'x bex a Tet K'uj a tiʌ kʌ' ne tsoy u tuku.
נבחרו כעת:
San Mateo 5: PLacNaha
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Sociedad Biblica de México AC
