Malakus 11
11
Ghə kpiney dzɔb Yeso n Yerosalem
(Mat 21.1-11; Luk 19.28-40; Jɔn 12.12-19)
1Ambə ghə kuʼlə ndòwnə n Yerosalem, n səə naʼ i Betfaj nsə Betani, ghə n ndòw bə n kaʼ u Oliv. Yeso n tûm ndòw ngəd tə wi təbəghə isə̂, 2dza tə̀ ghə nə̀, “Ndòw na n naʼ zey i loʼnə isə̂. Nghee tə̀ ghaa nyiə ndòwnə, ghaa i koʼ waa fə fənjakas ghə faŋa naŋanə nə̀ wù ka kam kɔʼ koʼ tii. Ghaa i zìi tsu ghaa ney bə fa. 3Abə wù loʼ bəbnə tə̀ ghaa nə̀, ‘Ghaa sey jiə ngee.’ Ghaa i dza ndòw tə̀ wi nə̀, ‘Mûkəbii khə kəfwaʼ tii, abə tə mayyə tsunə, tə i daŋŋə tûm dzəŋŋə bə.’” 4Sey ghə n nuu i ndòw, bɔɔmə ndòw koʼ ndòw soʼo Njakas fey n jìi nə̀ ghə n təŋə naŋa n fuʼ u ndaw u loʼ wə. Ambə ghə zìilənə, 5Ghə̂ a loʼ ghə, ghə â teynə fu n bəb tə̀ ghə nə̀, “Ghaa sey jiə ngee, ghaa ziilə Njakas fey nə̀ a loʼ kee?” 6Ghə n bɔɔmə beeli ndòw ghə tə̀ Yeso mə dzanə, ghə̂ a tii ghə n zəghə tsu ghə nə̀ ghə ney ndow. 7Ambə ghə ney bə Njakas fey n səə Yeso, ghə n zey kɔʼ ndòw təndzə̂ n dzəmə fə ghi, Yeso n kɔʼ doʼo kɔʼ tii nə fənjakas. 8Ndəmə aghə̂ n zey bə ndzə tə ghə n jìi, a loʼ ghə n gboo bə utsəghə, bə tsuŋŋə bə n jìi ni fuu nkɔʼlə tə̀ wi. 9Ghə̂ ghey ghə â loʼnə n sə kə wi nsə ghə̂ ghey ghə â loʼnə ibam n buʼlə bə nbɔŋ dza nə̀, “Kali u loʼ tə Zə̀ kə, buulə i Kəzə̀ i lo tə̀ wù wey tə bəghənə n zəd i Mûkəbii. 10Buulə i loʼ tə̀ wù wey tə saʼanə fɔɔ u ghə bày a ghey wən u bəghənə tɔŋŋə fɔɔ Devid. Zɔŋ u Kəzə̀ u fuŋ nay ndow idəŋ idəŋ!” 11Yeso n nyi ndòw n Yerosalem, ndòw nyi ndòw n ndaw Kəzə̀ i nii zə, laalə tsəghə ndòw luʼu tədzəm ni koʼ ghəə ghey a neynə bənə kə fu. A n loʼ nə̀ nəŋə zə n ngii ndòw, sey, tə nuu dzəŋŋə ndòw n naʼ i Betani ghi ngəd tə wi tey ighəm n ghii tə təbəghə.
Yeso lɔʼ kaʼ fə fik
(Mat 21.18-19)
12Ambə tsətsə wey, nghee tə̀ ghə nuu bənə n naʼ i Betani, dzəŋ n zabə Yeso. 13Tə n koʼ ndòw kaʼ fə fik nə kədaa nə fəbə tə wi tə n dzəə, sey, tə n ndòw fu ni ndòw koʼ nə̀ tə nə kpaʼi keelinə tam u loʼ wə fu ni nəghə. Ambə tə ndòwnə fu, à n loʼ kə təfəbə, boʼnə â kam way dzə nəŋə zey kaʼ fə tii fə məənə. 14Yeso n lɔʼ ndòw kaʼ fə tii fə dza nə̀, “Wə nə kəm mə̂ koʼ way tam kə tə̀ mbi nə bə may.” Ngəd tə wi tə n zow tsu ghəə ghey tə dzanə tə̀ kaʼ fə tii fə.
Yeso dzum shi ghə̂ a bikiwən n Ndaw Kəzə̀
(Mat 21.12-17; Luk 19.45-48; Jɔn 2.13-22)
15Ambə ghə n ndòw nyi ndòwnə n Yerosalem, Yeso n nyi ndòw n ndaw Kəzə̀ i nii zə, kaʼ ni dzùm shi ghə̂ ghey ghə â ghəŋŋənə bikiwən kə fu. Tə n fədlə maʼa kɔʼ baŋŋə kə ghə̂ ghey ghə a kweyyə fuunə khəə wə, nsə kuu u ghə̂ ghey ghə â fìilənə buŋu tə. 16Tə n ka bəghəm nə̀ ghə̂ a bə tsəghə tɔɔlə n fə wə fu n bii kə ndaw Kəzə̀ i nii zə n Yerosalem. 17Tə n dza tə̀ ghə̂ ghə nə̀, “I loʼ n màʼlə K-a-zə̀ nə̀ Zə̀ kə dzanə, ‘Ndaw zuŋ i doʼlə ndaw i gɔŋŋə zə tə̀ naʼa tə tədzəm.’ Ghaa u ney kee ney naŋa kɔʼnə nə̀ a loʼ luʼu key ghə̀ a tsɔŋɔ a nyiə doʼonə tii.”
18Ghə fɔɔngili a nii ghə nsə ghə̂ a dii a kəlaŋ ghə n zow tsu sey, kaʼ ni kəŋ təjìi ni wey Yeso. Ghə n kee tsəŋə ni kwu wi n təŋkey, ghə̂ adzəm â ləghənu ghəə ghey tə diinə. 19Ambə n nəŋə i fənə zə, Yeso nsə ngəd tə wi tə n zəghə tsu naʼ i tii zə.
Itsə̀ kuum bəghəm i fə̀ŋ
(Mat 21.20-22)
20Ambə n bələbələ tə, Yeso ghi ngəd tə wi tə n tsəghə n jìi, ghə n koʼ ndòw kaʼ fə Fik fey nə̀ fə n kpu tsu kùm nə təghaŋ. 21Pita n daŋŋə moʼlə tsu ghəə zey zə â shinə, dza tə̀ Yeso nə̀, “Wù dii wə, koʼo kaʼ fə Fik fey wə â lɔʼnə, fə n kpu.”
22Yeso n beeli ndòw ghə dza nə̀, “Ghaa khə ni keeli bəghəm i fə̀ŋ tə̀ Zə̀ kə. 23N kùum dza bə isəŋə tə̀ ghaa nə̀, abə wù ghaa u loʼ u dza tsunə tə̀ kaʼ u wən nə̀, ‘Zəb kɔʼ wû wə wə̀, wə bwù ndòw n dzùu’, nə̀ tə səmə way, keeli tən tsu ibəghəm n fə̀ŋ ə wi, zə i teeli doʼo sey. 24Sey, n dza bə tə̀ ghaa nə̀, abə wə bəbnə fə kə nə igɔŋŋə, keeli tsu bəghəm zə n fə̀ŋ nə̀, wə n keeli fə kə tii kə. Wə i keeli fə kə ghaa kə wə mə bəbnə. 25Abə wə gɔŋŋənə, neyzəə ghə i bəbə zey wù loʼ ghəŋənə tə̀ wɔ, sey nə̀ Bày wə idəŋ i neyzəə soʼo ghəə ghə a bəbə ghə.” 26[Abə wə ka neyzəə ghə̂ a loʼ ghə, Bày wə idəŋ î neyzəə soʼo way ghəə a bəbə ghey wə ghəŋənə tə̀ ghə̂ a loʼ ghə.]#11.26 Màʼlə u loʼ u khə way ghəllə zən.
Ghə̂ a bəbə nə̀ Yeso daʼa kə wi kə ney ghee
(Mat 21.23-27; Luk 20.1-8)
27Ambə Yeso ghi ngəd tə wi tə ndow bə kpiʼinə n Yerosalem, Yeso n bwey tsəghə kaabə ndow n fə̀ŋ ə ndaw Kəzə̀ i nii zə n Yerosalem. Ghə fɔɔngili a nii ghə, ghə̂ a dii a kəlaŋ ghə, nsə ngəd tə inaʼ tə n ndòw bə n səə wi, 28bəb tə̀ wi nə̀, “Wə khə daʼa kə ghaa kə ni ghəŋə ghəə ghey wə ghəŋŋənə ə? A fuu ndee wɔ n daʼa kə tii kə?”
29Yeso n beeli ndòw ghə dza nə̀, “N dza n bəb bə ghaa n ghə zə imɔʼ, abə ghaa beelinə, mə i dza bə soʼo tə̀ ghaa ndzoʼo daʼa key n khənə ni ghəŋŋə ghəə ghən. 30Ghaa dza bə tə mə, Jɔn â ney ghee daʼa kə ni fuu ghə̂ ghə n mmuu n Kəzə̀ mə ə? Â loʼ n wɔ Zə̀ kə idəŋ kə mɔ n wɔ wù ə?”
31Ghə n kaʼ ni ghɔɔmə n wû i ghə dza nə̀, “A dza ndòw nə̀ ngee? Abə a dza tsunə nə̀, ‘Â loʼ n wɔ Zə̀ kə idəŋ kə,’ tə i bəb bə nə̀, ‘A sə loʼ kee ghaa â ka bəghəm tə̀ Jɔn ə?’ 32Abə saa kee dza tsunə nə̀, ‘Â loʼ n wɔ ghə̂ ghə’, zə i bweynu ə?” (Ghə â tsəŋə aghə̂, boʼnə ghə̂ ghə â khə nə̀ Jɔn â ndzəm loʼ Wù tûm Kəzə̀). 33Sey ghə n dza tə̀ Yeso nə̀, “Ghey khə dzə way.” Yeso n dza tə̀ ghə nə̀, “Mə î dza soʼo way tə̀ ghaa luʼu key n neynə ndzoʼo daʼa key n khənə ni ghəŋə ghəə ghey n ghəŋŋənə.”
נבחרו כעת:
Malakus 11: WEH
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2022 CABTAL
