Malakus 12
12
Zəzəə fə fənkəfən boʼ aghə̂ ghə tsoʼo neynə sum wə
(Mat 21.33-46; Luk 20.9-19)
1Sey Yeso n zey ndòw ni ghɔɔmə tə̀ ghə n ghɔɔmə i fənkəfən dza nə̀, “Wù loʼ a zə̀ghə tsu sum u kaw tən tə məənə tam wən ghə faalənə lə̂mə a tii, tə n bày tsəghə kɔʼ mbàa fu n sum u tii wə, tə n bow naŋa kɔʼ kənyùʼ ni kammə lə mən n shiə bənə nə təlami, tə n bəghə naŋa kɔʼ soʼo kəfəə tə̀ ghə̂ a keyyə ghə. Tə n daŋŋə tsoʼo naŋa ndòw sum u tii wə tə̀ ghə̂ ghə usum a loʼ ghə, nuu ndòw n naʼ i nuu zə. 2Ambə nəŋə i kpii tsunə ni ndow kɔy fən bə lami tey, tə n tûm ndòw wù kəfwaʼ a wi u loʼ wə fu tii, nə̀ tə ndòw koʼ ndòw ghə̂ ghey tə â tsoʼo naŋanə sum wey n wɔ ghə tə̀ ghə fu bə tuʼ i wi. 3Nghee tə wù tii ndòwnə fu, ghə̂ a tii ghə n kwu bwɔd tsu wù kəfwaʼ wey, dzùm dzəŋŋə ndòw wi n wɔ a zum ghə. 4Muu usum wey n tûm kpiʼi ndòw wù kəfwaʼ u loʼ wə, ghə n kwu tsɔb wi nə kətow, nyab soʼo wi n jìi i bəbə zə. 5Muu usum wey n nam tûm kpiʼi ndòw u loʼ wə, ghə n wey maʼa tsu wi. Muu usum wey n tûm ndòw ndəmə aghə̂ fu, ghə n bwɔd a loʼ ghə, wey maʼa a loʼ ghə. 6Wù tii â khə kə waa wi umɔʼ tə â ngii ləghənə. Tə n baa bə tûm ndòw wi dza nə̀, ‘N moʼo ghə̂ ghən ghə i ngɔɔmənu waa wuŋ.’ 7Ambə, ghə̂ ghey ghə â tsoʼo neynə sum wey koʼ tsunə wi, ghə n dza tsu n wû i ghə nə̀, ‘À wən loʼ zəə kəbii, bə na a wey tsu wi, tə̀ a keeli sum u tii wə.’ 8Sey, ghə n kwu wey tsu waa wi, boʼo maʼa shi ndòw n mbàa.”
9Ambə Yeso ghɔɔmə may tsunə, tə n bəb tə̀ ghə nə̀, “Ghaa moʼo nə̀ muu sum u təlami wey i jiə tsuu ngee? Tə î bə wey maʼa ghə̂ ghə usum ghey, tə fu nuu ndòw sum u tii wə tə̀ ghə̂ a nuu ghə.” 10N moʼlə nə̀ ghaa n tɔŋɔ koʼ ghəə ghən n màʼlə K-a-zə̀, a dzanə nə̀,
“Tay zey wù bɔm u təndaw wə â tuu maʼanə,
A fəd loʼ i ghii i bə doʼo bənə num itay n tsə kə ndaw.
11À fwaʼ Mûkəbii ghəə a tii ghə,
Zə a ngii laabənə n sə̂ a ghey.”
12Ghə fɔɔngili a nii ghə, ngəd tə inaʼ tə ghə̂ a Təjuu nsə ghə̂ a dii a kəlaŋ ghey n kəŋə jìi ni kwu wi, n təŋkey, ghə â khənu nə̀ tə khəə ghɔɔmə i fənkəfən zən bòʼ ghə. Ghə n kee tsəŋə nɔɔ kə aghə̂ key, sey, ghə n zəghə tsu wi, nuu ndòw i ghə zə.
Màʼlə kə tsow kə
(Mat 22.15-22; Luk 20.20-26)
13Ghə n tûm tsu ghə̂ a tə Falasi nsə ghə̂ a Helɔd a loʼ ghə nə̀ ghə bə bìi kwu Yeso n ghɔɔmə i wi. 14Ghə̂ a tii ghə n bə dza bə tə̀ wi nə̀, “Wù dii wə, a khənu nə wə dza kə isəŋə, wə̀ ghəŋŋə ghəə ghə nə wə laalə way wù nə asə̂. Wə dii ghɔɔmə i Kəzə̀ tsətsəghə tə̀ ghə̂ ghə. A ləghə ni keeli nə̀, laŋ kə diinu nə saa i tsow màʼlə kə tə̀ Kaysa mɔ kə dii way ə?”
15Yeso n kee khə moʼlə tə bəbə tey ghə khənə n fə̀ŋ tə ghə, sey tə n bəb ndòw tə̀ ghə nə̀, “A loʼ kee ghaa bii kaabənə mə ə? Tə n dza tə̀ ghə nə̀, fuu bə na mə n khəə wə itsaa wə fa tə n koʼ.” 16Ghə n ney fu bə tə̀ wi. Tə n bəb tə̀ ghə nə̀, “À wən loʼ tûm usə̂ u ndee? À wən loʼ zəd i ndee?” Ghə n dza nə̀, “À loʼ tow kə Kaysa nsə zəd i wi zə.” 17Sey Yeso n dza tə̀ ghə nə̀, “Fuu na tə̀ Kaysa fə wey u loʼnə u wi wə, ghaa fuu ndòw tə̀ Zə̀ kə fə wey u loʼnə u wi wə.” Dzuu zə n ngii zum ghə n jìi zey tə a beelinə ghə tii.
Ghə̂ a Sadusi nsə zhəm dzəŋŋə zə ivə zə
(Mat 22.23-33; Luk 20.27-40)
18Ghə̂ a Sadusi ghən ghə dzanə nə̀ zhəm dzəŋŋə zə ivə i way, n ndòw bə, bəb tə̀ Yeso nə̀, 19“Wù dii wə, Mushi â tɔ̀ɔ naŋa laŋ kə loʼ kə tə̀ ghey nə̀, ‘Abə wù kpunə naŋa sə̂ tsu wey wi nə ghə ka waa ji, waazə ə wi khə ni nyəŋŋə ndòw weyzən wey, tə̀ tə ji fuu ndòw wù kpu wey n waa.’ 20Waazə a loʼ ghə â loʼ tsənu tow ghə usəghəmbəghə. Wù sə̂ isə wey n ney ndòw wey, bə kpu nə̀ tə ka waa ji. 21Waazə ə wi n ney ndòw wey kpusə u tii wə, bə kpu soʼo nə̀ tə ka waa ji. Zə n bə shi kɔʼ soʼo sey ghi waazə wey tə â dzûmə ndòwnə wi. 22Sey, tow ghə usəghəmbəghə ghə n ney tsəghə ndòw weyzən wey, bə kpu nə̀ ghə ka waa ji. Weyzən wey n baa bə kpu tsu i soʼo. 23Nya, abə ghə î zhəm dzəŋŋə bənə nə̀ ivə, tə i baa loʼ wey ndee? N təŋkey tə ma tow ghə usəghəmbəghə ney.”
24Yeso n beeli ndòw ghə nə̀, “Ghaa n bwù, bòʼ nə̀ ghaa khə way ghɔɔmə i Kəzə̀ zə, khə soʼo way daʼa K-a-zə̀ kə. 25N dza sey n təŋkey, ghə ney way wû zə abə ghə zhəm dzəŋŋə bənə nə ivə, ghə nə fəd loʼ tə a loʼ tstəndəghə tə Kəzə̀ idəŋ abə ghə zhəm dzəŋŋə bə nə ivə. 26Nya, n ghɔɔmə bə tə̀ ghaa bòʼ zhəm dzəŋŋə zə ivə, ghaa ka kam tɔŋɔ koʼ n màʼlə kə Mushi n luʼu key vəllə wə â fəə nə fəkaʼ a? Zə̀ kə â dza tə̀ Mushi nə̀, ‘N loʼ Zə̀ kə Abraham, Zə̀ kə Ayzik, nsə Jakob.’ 27Tə way dzə Zə̀ kə ghə̂ a kpu ghə, tə loʼ Zə̀ kə ghə̂ ghey ghə loʼnə utaw. Ghaa n nyəŋ laʼ nay.”
Laŋ key kə taw tsəghəshi
(Mat 22.34-40; Luk 10.25-28)
28Wù dii u kəlaŋ u loʼ wə n ndòw bə fu, zow tsu nghee ghə ghɔɔmə baalənə. Ambə tə koʼ tsunə nə̀ Yeso n beeli dzɔb ghə̂ a Sadusi ghey, tə n bəb ndòw tə̀ wi nə̀, “A loʼ laŋ kə ghaa kə, kə loʼnə laŋ kə sə isə kə nə ulaŋ udzəm ə?”
29Yeso n beeli ndow ghə nə̀, “Laŋ kə sə isə kə loʼ nə, ‘Ghaa zow a waa ghə Izree ghə! Yawe loʼ Zə̀ kə ghey, a may kə wi tə loʼnə Zə̀ kə. 30Wə khə ni ləghə Yawe, tə loʼnə Zə̀ kə kə̀, n fə̀ŋ zə idzəm, zay kə kə̀ kədzəm, n moʼlə zə zə̀ idzəm, n daʼa kə kə̀ kədzəm.’ 31Laŋ key kə dzûmənə kə kən loʼ nə̀, ‘I ləghə waazə wə, tə̀ wə ləghənə wû wə wə̀.’ Laŋ kə loʼ kə kəm way dzə kə tsəghəshinə u wən ubəghə.” 32Wù dii u kəlaŋ wey n dza tə̀ Yeso nə̀, “Wù dii wə, wə n dza dzɔb isəŋə nə̀ Zə̀ kə loʼ kəmɔʼ, kə loʼ kə kəm way dzə, a may kə wi. 33Wə dza dzɔb soʼnu nə̀, saa khə ni ləghə wi n fə̀ŋ idzəm, n tɔb wə udzəm, nsə n daʼa kə kədzəm nsə nə̀ wù khə ni ləghə wù wey tə kuʼlə loʼnə n səə wi tə̀ tə ləghənə wû u wi. I zən tsəghəshi kaŋ tə nyam tən saa fəələnə nsə nyam tən saa nyɔʼɔ tə a loʼ umaʼlə tə̀ Zə̀ kə.”
34Ambə Yeso koʼ tsunə nə̀ tə n beeli dzɔb, tə n dza tə̀ wi nə̀, “Wə n kuʼlə n fɔɔ u Kəzə̀.” Ni nuu tsu n nəŋə i tii zə, ndòw n sə kə, ghə̂ ghə n tsəŋə ni kəm bəb Yeso n ghəə zə.
Klisto loʼ waa ndee
(Mat 22.41-46; Luk 20.41-44)
35Ambə Yeso diinə n ndaw Kəzə̀ i nii zə n Yerosalem, tə n bəb tsu nə̀, “Ghə̂ a dii a kəlaŋ a loʼ ngee ni dzanə Klisto loʼ waa Devid? 36Lòʼ sey nə̀ Devid â dza n daʼa kə Zay kə Zow kə bòʼ Klisto nə̀,
‘Yawe â dza tə̀ Mûkəbii wuŋ nə̀
Doʼo tsu n kpii wuŋ u təmə wə
Ni ndòw kuum n nəŋŋə zey mə i ney naŋŋə bənə ghə̂ a təngəmə ghə ghə̀ n tənə ifuu zə.’
37Devid â tɔŋɔ wi nə̀ a loʼ ‘Mûkəbii’, tə̀ sə̀ loʼ ngee ni kəm loʼ waa wi ə?” Nɔɔ kə aghə̂ key kə â loʼnə fu n zəllə tənə ghɔɔmə i wi n fə̀ŋ idzəm.
38Nghee tə diinə, tə n dza tə̀ ghə nə̀, “Ney na ghə̂mə zə ghi ghə̂ a dii a kəlaŋ ghə, ghə ləghə ni bwey kaabə nə̀ ghə n wû i lab nə təsaŋ, ləghə nə̀ ghə i tɔŋŋə zow bə ghə n bikiwən. 39Ghə kəŋə ndòw kuu u nii wə n ndaw kədzəŋi ə ghə̂ Təjuu nsə n luʼu tey zə̂ kə loʼnə a tii. 40Ghə baŋŋə ney nuulə fə̂ u ghey a kpusə, ləghə ni gɔŋŋə daabə tə̀ ghə̂ ghə i tɔʼɔ koʼo bə ghə. Ngoʼ zey Zə̀ kə nə fuu n wɔ ghə nə faalənu.”
Wey kpusə kuu ukhəə n khəə K-a-zə̀
(Luk 21.1-4)
41Nghee tə Yeso â doʼnə n səə khəə key ghə kuunə naamə K-a-zə̀ kə tii, tə n laalə nghee ghə̂ a kɔʼɔ kuunə khəə wə. Ndəmə ghə̂ a kûm ghə n kɔʼɔ kuu khəə u səŋi wə. 42Weyzən ə kpusə u loʼ wə tə̀ â laanə, n ndow bə, kuu nyi tsu khəə u baŋa wə ubəghə nə̀ u ka buʼ kɔʼ kuum fòw fə. 43Yeso n tɔŋɔ tsu ngəd tə wi, dza tə̀ ghə nə̀, “N dza bə isəŋə tə̀ ghaa nə̀, wey kpusə wən n kuu khəə wə fa tsəghəshi aghə̂ adzəm. 44Ghə̂ a loʼ ghey dzəə shiə bə fənyaŋi n ndəm zey ghə khənə, wey kpusə wən u kee fuu may bənə fə key tə khənə, n laa i wi, tə fuu may bə fə key tə mə khənə ni muu tii.”
נבחרו כעת:
Malakus 12: WEH
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2022 CABTAL
