Malakus 10
10
Yeso dii aghə̂ kuum dzawwə zə iwû
(Mat 19.1-12; Luk 16.18)
1Sey, Yeso n nuu tsu n Kapenum, ndòw n mboʼo Judeya, daŋ shi kɔʼ dzùu Jodan. Nɔɔ kə aghə̂ kə n dzəŋi bə soʼo fu n səə wi. Tə n zey ndòw ni dii ghə n ghəə ghə, tə̀ tə â ghəŋŋə tsənə.
2Ghə̂ a tə Falasi a loʼ ghə n ndòw bə ni bə mɔm koʼ wi, ghə n bəb ndòw tə̀ wi nə̀, “Laŋ kə saa kə diinu nə̀ wù loʼ ni dzawwə uwû ghi wey wi ə?”
3Tə n beeli ndòw ghə nə̀, “Laŋ kə Mushi kə dza nə̀ ngee?”
4Ghə n dza nə̀, “Mushi â dza nə̀ abə wù dza i dzawwə uwû ghi wey wi, tə loʼ ni tɔ̀ɔ fu wi n màʼlə kə, ghə n dzawwə tsu iwû.”
5Yeso n dza ndòw tə̀ ghə nə̀, “Mushi â tɔ̀ɔ laŋ kə tii kə sey bòʼ fə̀ŋ tə ghaa tə taw tə. 6A kee loʼ nə̀, tə mbi a nə kaʼnə, nəŋə zey Zə̀ kə â bɔmnə mbi nə, I tɔ̀ɔ doʼo n màʼlə K-a-zə̀ nə̀ ‘Zə̀ kə a ghəŋə ghə weyzən ghi weynum.’ 7À wən loʼ ghə i tii zə, ‘Weynum zəghə tsuunə bày wi ghi nay wi, tə n təmdzəŋi ndòw uwû ghi wey wi. 8Tow u ghə ubəghə, ghə i doʼo bə kəfə kəmɔʼ. Ghə kəm way dzə aghə̂ abəghə, ghə fəd loʼ kəfə kəmɔʼ.’ 9Sey, fə key Zə̀ kə təm dzəŋinə, kə̂ wù nə dzawwənə.”
10Ambə ghə nyi ndòwnə n ndaw, ngəd tə Yeso tə n bəb kpiʼi ndòw ghəə zən tə̀ wi. 11Tə n dza tə̀ ghə nə̀, “Wù wey tə dzawwənə wû wə ghi wey wi, ney ndòw weyzən u nuu wə, sey taa zaʼ wey wi. 12A loʼ ighələ tə̀ weyzən wey tə dzawwənə wû wə ghi num wi, ney ndòw num u nuu wə, sey taa zaʼ num wi.”
Yeso buulə aghinətəghə
(Mat 19.13-15; Luk 18.15-17)
13Ghə̂ a loʼ ghə n ney bə aghinətəghə n səə Yeso nə̀ tə buulə tsu ghə, ngəd tə wi tə n kii naŋa ndòw ghə. 14Ambə Yeso koʼ tsunə sey, tə n ka ləghə dzə, tə n dza ndòw tə̀ ghə nə̀, “Zəghə na ghinətəghə ghey ghə bə n səə mə, kə̂ ghaa nə kwɔɔ naŋŋənə ghə, boʼ nə̀, fɔɔ u Kəzə̀ u loʼ tə̀ ghə̂ ghey ghə loʼnə tə̀ a loʼ ghə. 15N kuum dza bə isəŋə tə̀ ghaa nə̀, abə wù ka bəghəm fɔɔ u Kəzə̀ tə̀ a loʼ winətəghə, tə nə̂ nyi koʼ way fu.” 16Sey, tə n boʼo kɔʼ ghinətəghə ghey fəmɔʼ fəmɔʼ, mɔm tsu ghə adzəm, buulə i tsu.
Wù kûm wə
(Mat 19.16-30; Luk 18.18-30)
17Nghee tə̀ Yeso nuu ndòwnə n bwey i wi zə, wù loʼ n nyəŋ bə təm bə tənguʼ n tənə wi, bəb tə̀ wi nə̀, “Wu dii u dzuŋu wə, n loʼ ni ji ngee ni keeli muu zə itsali ə?” 18Yeso n beeli kɔʼ wi dza nə̀, “A loʼ kee wə̀ tɔŋɔnə mə nə̀ à loʼ wù dzuŋu ə? Wù dzuŋu u loʼ u way dzə, à may kə Kəzə̀. 19Wə khənu ghəə ghey laŋ kə dzanə. Laŋ kə dza nə̀, ‘kə̂ wə̀ nə weynə wù, kə̂ wə nə nyəŋinə ghi wey wù, kə̂ wə nə tsɔŋɔnə, kə̂ wə nə təmi tiilənə n ghəə a badla ghə, kə̂ wə nə tsìinə wù, i ngɔɔmə bày wə ghi nay wə.’”
20Wù tii n beeli kɔʼ dza nə̀, wù dii wə, “Mə n laŋ wən naŋa kɔʼ bə udzəm ni zey nuu bə nə̀ n nam təbənu.”
21Yeso n laalə ndòw wi n ləghə zə n fə̀ŋ, dza tə̀ wi nə̀, “A bow səə kə ighəə imɔʼ tə̀ wɔ ni ghəŋə. Ndòw fìi may tsu fə wə wə̀ udzəm, wə fuu nuu ndòw khəə u tii wə tə̀ ghə̂ a laa ghə, wə i keeli ikûm idəŋ. Abə wə ghəŋə tsu sey, wə daŋŋə bə dzûmə bə mə.” 22Ambə wù wən zow tsunə ghəə ghən, tûm usə̂ u wi wə n dəd doʼo i tsu, tə n nuu ndòw n mow zə n fə̀ŋ, n tənkey, tə â ngii kûmnu.
23Yeso n laalə tsəghə ndòw ngəd tə̀ wi, dza ndòw tə̀ ghə nə̀, “I ngii tawnu tə̀ wù kûm wə ni nyi n fɔɔ u Kəzə̀.”
24Dzuu zə n ngii zum dzûmə tə wi n ndzoʼo ghɔɔmə i tii zə, Yeso n kəm dza tə̀ ghə nə̀, “Waa ghuŋ ghə, i ngii tawnu tə̀ wù ni nyi n fɔɔ u Kəzə̀. 25I buulənu tə̀ nyam i nii zən ghə tɔŋŋənə nə̀ a loʼ Kamel, ni tsəghə tɔɔlə n sə̂ i fəsaʼ, tsəghəshi tə̀ wù kûm wə ni nyi n fɔɔ u Kəzə̀.”
26Dzuu zə n baa zum nay ndòw ngəd tey, ghə n bəbə n wû i ghə nə̀, “À baa loʼ ndee tə i keelinə bəghəshi zə ə?”
27Yeso n laalə tsəghə ndòw ghə dza nə̀, “Ghəə ghən a way ni bwey n daʼa kə wù sɔŋtsuʼ, a loʼ kə n daʼa K-a-zə̀, n tənkey, ghə i loʼ way i loʼnə ni tsəghəshi Kəzə̀.”
28Pita n dza ndòw tə̀ wi nə̀, “Ghey n naŋa taʼa fə u ghey wə udzəm, bə dzûmə bə wɔ.”
29Yeso n beeli ndòw wi nə̀, “N kùm dza bə tə ghaa nə̀, wù loʼ way dzə tə̀ loʼ ni zəghə tsu ndaw wi, waazə a wi, bày wi, nay wi, waa a wi, nsə sûm u wi wə, bòʼ mə nsə tûm Kəzə̀ i dzuŋu zə, 30tə i doʼlənə sey nə̀ tə ka keeli dzəŋŋə fə u tii wə udzəm fa n mbi i zən, tə buʼ keeli tsəghəshi daŋŋə fə wey tə khənə nya (təndaw, awaazə, ghə zə̂, awaa nsə sum zə. Fə wən udzəm wə i bəghə soʼo n chɔdmə a tii). A i bə n mbi i fəghə zə, tə î keeli muu zə itsali. 31Ndəmə ghə̂ ghey ghə kee loʼnə isə̂, ghə i bəghə doʼlə ibam, a ghey ghə loʼnə ibam ghə i bə doʼo kəsə.”
Yeso ghɔɔmə kpiʼi nə tənəŋə tətəghə kuum və i wi
(Mat 20.17-19; Luk 18.31-34)
32Yeso ghi ngəd tə wi tə n kwu nyi ndòw jii ə Yerosalem, Yeso n bwey ndòw isə̂. Dzuu zə n zum ngəd tə wi nə̀ tə ndòw n Yerosalem, ghə̂ ghey ghə â dzûmə bənə wi ibam n kee tsəŋə. Yeso n bɔɔ təmi ndòw ghi ngəd tə wi tey ighəm n ghii tə təbəghə, dza ndòw tə̀ ghə ghəə zey i khənə ni shi ghi wi. 33Tə n dza tə̀ ghə nə̀, “A sa kɔʼɔ ndòw n Yerosalem, a loʼ fu ghə i fìi fuu ndòwnə Waa Wù Sɔŋtsuʼ tə̀ ghə fɔɔngili a nii ghə nsə ghə̂ a dii ghə ulaŋ ghə. Ghə i tsəʼlə tsu saʼ nə̀ ghə wey wi, sey ghə i ney fuu ndòw wi, n wɔ ghə̂ ghey ghə ka bəghəm tə̀ Zə̀ kə, 34ghə i lənnə wi, ghə tsə̂ ntəghə n kow wi, ghə i bwɔd wi, ghə wey tsu wi, a i bə nə ntsuʼu ntəghə, tə i zhəm dzəŋŋə bə nə ivə.”
Jems ghi Jɔn nɔɔ buʼ kə nii kə n wɔ Yeso
(Mat 20.20-28)
35Sey Jems ghi Jɔn, waa a Zebedi ghə n bə n səə Yeso dza tə̀ wi nə̀, “Wù dii, ghə i loʼ i loʼ fa ghey ləghənə nə̀ wə ghəŋə bə tə̀ ghey.”
36Yeso n bəb ndòw tə̀ ghə nə̀, “À loʼ ghə i ghaa zə ghaa ləghənə nə̀ n ghəŋə bə tə̀ ghaa ə?”
37Ghə n beeli ndòw wi dza nə̀, “A ləghə nə̀, abə wə̀ î loʼnə n fɔɔ wə nkɔʼlə wə, wù ghey umɔʼ i doʼ n kpii wə u təmə wə, u loʼ wə i loʼ n kpii wə u kwɔɔ wə.”
38Yeso n dza tə̀ ghə nə̀, “Ghaa khə way fə key ghaa bəbənə, ghaa i loʼnu ni fəghə ndzoʼo fəghə zey mə i fəghənə ə? Nkee! Ghaa i loʼnu ni koʼ ndzoʼo chɔd wey mə i koʼonə ə?”
39Ghə n beeli ndòw wi nə̀, “Ghey î loʼnu.” Yeso n beeli ndòw ghə nə̀, “N khənu nə̀, ghaa i loʼnu ni fəghə ndzoʼo fəghə zey mə i fəghənə, ghaa koʼ soʼo ndzoʼo chɔd wey mə i koʼonə.
40Abə ni doʼo n kpii kuŋ kə təmə kə nkee kə̀ kwɔɔ kə, a way dzə buʼ kuŋ ni fuu tə̀ ghaa, luʼu tə tii tə loʼ tə̀ ghə̂ ghey Zə̀ kə bayyə naŋanə tə̀ ghə.”
41Ambə ngəd tə loʼ tey ighəm zow tsunə ghəə ghən, ghə n fəələ ndòw n fə̀ŋ ghi Jems nsə Jɔn. 42Sey Yeso n tɔŋɔ naŋa bə ghə, dza tə̀ ghə nə̀, “Ghaa khənu nə̀ ghə̂ ghey ghə saʼanə naʼa tey ghə bəghəm way tə̀ Zə̀ kə nsə tsoʼ tə ghə tə, ghə saʼa aghə̂ nə kədaʼa, ghə ləghə nə̀ ghə̂ ghə i fwaʼa bə tə̀ ghə. 43À wən way dzə nghee i khənə ni doʼo ghi ghaa. Wù wey tə ləghənə ni doʼo wù nii n fəŋŋə kə ghaa khə ni loʼ tə̀ a loʼ wù kəfwaʼ tə̀ ghaa adzəm. 44Wù wey tə ləghənə ni doʼo kətow khə ni loʼ tə̀ a loʼ kəkɔd tə̀ ghə̂ ghə adzəm. 45N təŋkey, kasə Waa wù sɔŋtsuʼ, tə â ka bə dzə fa n mbi nə̀ ghə̂ a fwaʼ tə̀ wi, tə â bə ni bə fwaʼ tə̀ ghə̂ ghə adzəm nsə ni bə fuu muu i wi ni kùm shi fə̀ŋ tə ndəmə aghə̂.”
Yeso baŋŋə wù fəbə wə tɔŋŋə Batimayɔs
(Mat 20.29-34; Luk 18.35-43)
46Yeso ghi ngəd tə wi tə n ndòw bə n naʼ i Jeriko, ambə ghə nuulə shiə ndòwnə fu, nɔɔ kə aghə̂ kə n bəghə n baa wi, wù fəbə u loʼ wə ghə â tɔŋŋənə nə̀ a loʼ Batimayɔs waa Timayɔs, n doʼ n khəə u jii tə nɔɔnə. 47Ambə tə zow tsunə, nə̀ a loʼ Yeso wù Nazaled tə tsəghənə, tə n kaʼ ni buʼlə nbɔ̂ŋ dza nə̀, “Yeso, Waa Devid, kwɔɔlə sî zə n kow mə.”
48Ndəmə aghə̂ ghə n kii naŋa ndòw wi dza nə̀, “Doʼo mɔŋ.” Tə n fədlə buʼu shiə kɔʼɔ kə nbɔŋ dza nə̀, “Waa Devid, kwɔɔlə sî zə n kow mə.”
49Yeso n təmi tsu, dza nə̀, “Tɔŋɔ bə na wi fa.” Ghə n tɔŋɔ tsu wi dza tə̀ wi nə̀, “Kwu tsu fə̀ŋ, wə̀ təmi kɔʼ n fuu zə, tə tɔŋŋə wɔ.”
50Tə n tsɔʼ maʼa ndòw maʼlə kə wi, taa nuu kɔʼ idəŋ, bə n səə Yeso.
51Yeso n bəb ndòw tə̀ wi nə̀, “Wə̀ ləghə nə̀ n ghəŋə tsu ghə i ghaa zə tə̀ wɔ ə?” Tə n dza tə̀ wi nə̀, “Wù dii, N ləghə ni kəm koʼ təluʼu.”
52Yeso n dza ndòw tə̀ wi nə̀, “Bəghəm i fə̀ŋ zə zə̀ n wɔ baŋŋə.” Sə̂ a wi ghə n daŋŋə chi kɔʼ, tə n kaʼ ndòw ni koʼ təluʼu, nuu ndòw n baa Yeso.
נבחרו כעת:
Malakus 10: WEH
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2022 CABTAL
