Lukas 18
18
Poumpamoan mongonaꞌi siku' urakng botina' balu huatan siku' urakng hakipm
(18:1-8)
1Yesus momakai poumpamoan ni'in pakai' mongajar boko murid-Nyo oca' hala bodoa huatan co putus asa, obai doanyo tajahan dikabulan. 2Kato-Nyo, “Ado siku' urakng hakipm. Hakipm nantai diapm di sobuah kota. Io kinyo gola' agatn Allah, io pan co tonturian agatn urakng bukai. 3Di kota nantai jam ado siku' urakng botina' balu. Botina' balu nantai hala datakng ko hakipm nantai. Io momuhun, ‘Tulukng pulah koputusan inyo adil obai dalapm pokaro ni'in, aku ninam inyo bondar huatan lawatnku inyo salah.’ 4Cukup manah hakipm nantai monula' pongaduan botina' balu nantai. Apo koponsuahannyo io bopikir, ‘Aku co ku gola' agatn Allah, aku pan co tonturian agatn urakng bukai. 5Apo botina' balu ni'in hala mongganggu' aku. Jadi, lobih boi' aku monorima' pongaduannyo. Aman cado, io tajahan hala datakng ongko monyusahan aku.’ ”
6Lalu Tuhatn Yesus bopandir, “Biar pan hakipm nantai kinyo adil, porotian kopintar-corodi'annyo pakai' bulah koputusan inyo adil pakai' botina' balu nantai. 7Jadi, pasti Allah inyo boi' bulah koputusan inyo adil pakai' urakng pilihan-Nyo inyo bodoa ko Sio siakng malapm. Pasti Sio tajahan co kalo landai monulukng sia'. 8Aku bopandir ko kaitn: Allah pasti janjakng molabuhan la'apo inyo adil pakai' sia'. Apo watu Ana' Monsio datakng bobali' ko dunia ni'in, bolupm pasti apobai Io monomu'i banya' urakng inyo totap pocayo ko Io.”
Poumpamoan mongonaꞌi siku' urakng Farisi inyo buhau huatan siku' urakng ponagih pajak inyo rondah hati
(18:9-14)
9Di santai ado boboropo urakng inyo buhau. Sia' yakitn obai diri sia' siku' bondar. Sia' pan ngombabahan urakng bukai. Jadi, Yesus bokisah agatn sia', 10“Ado duo urakng inyo botula' ko Rumah Allah pakai' bodoa; siku' urakng pomimpitn agama Yahudi doi' kolompok Farisi huatan siku' urakng ponagih pajak. 11Urakng Farisi nantai lalu bodoa dalapm hati ubo ni'in, ‘Oi Allah, aku bosukur ko Duatn, obai aku co bodosa samaꞌan urakng bukai inyo mongolit, molanggar hukupm, bomporajoan damo jahat samaꞌan ponagih pajak ni'in. 12Aku bopuaso duo kali sominggu. Aku moonju' populuhan ko Allah doi' somuo pongulihanku.’ 13Apo ponagih pajak nantai bodiritn jouh doi' somuo urakng bukai. Io monundu'an kopala'nyo obai mooso kinyo cucu' monongadah ko sorugo. Io momantu-mantu dadonyo obai monyosali boko dosanyo. Io bopandir, ‘Oi, Allah. Tulukng kasihibo aku. Aku ni'inan urakng inyo bodosa!’ ”
14Ongko Yesus bopandir, “Dinga'anbo! Timpu pulakng ko rumah, ponagih pajak nantai inyo ditorima' Allah, bukainyo urakng Farisi nantai. Obai Allah tajahan ngombabahan somuo urakng inyo moninggian diri. Apo, Allah tajahan moninggian somuo urakng inyo ngombabahan diri.”
Yesus momborokati boko bobia' kocit
(18:15-17)
(Mat. 19:13-15; Mrk. 10:13-16)
15Ado boko urakng mombaba' boko bobia' kocit#18:15: Kato inyo dipakai dalapm Baso Yunani biasonyo boroti ‘bobia' kocit’ ija' pontikng dikipa'. Apo obai ayat ni'in bokato ‘Yesus moningkau boko bobia' kocit nantai datakng’, mungkitn ado jam boko bobia' kocit inyo udah ulihnyo bojalatn siku'nyo. datakng ko Yesus oca' Sio moncama' huatan momborokati sia'. Watu boko murid-Nyo moniant hal nantai, sia' monogur boko urakng inyo mombaba' boko bobia' nantai.#18:15: Timpu joman Yesus, boko bobia' kocit kinyo dianggap pontikng, lalu boko murid-Nyo mungkitn bopikir ado boko hal inyo lobih pontikng pakai' Yesus daripado diganggu' boko bobia' kocit nantai. 16Apo Yesus moningkau boko bobia' nantai datakng ko Sio, ongko bopandir ko boko murid-Nyo, “Biaran jam boko bobia' nantai datakng ko Aku! Jangan morarakng sia'. Obai urakng sama'an ninam inyo monjadi anggota koluarga Koraja'an Allah. 17Aku bopandir ko kaitn: Aman urakng kinyo monorima' Koraja'an Allah samaꞌan siku' bobia' kocit, pasti io co tajahan monjadi anggota koluarga Koraja'an Allah.”
Urakng dampu ongko kohidupan inyo kokal di sorugo
(18:18-30)
(Mat. 19:16-30; Mrk. 10:17-31)
18Siku' urakng pomimpitn urakng Yahudi botakutn ko Yesus, “Guru inyo boi', aku gola' molabuhan la'apo oca' bodapat hidup kokal di sorugo?”
19Kato Yesus, “Mapo kolai mongatoan Aku boi'? Ongkah Allah am inyo boi'.#18:19: Biasonyo boko urakng pakai sotilah hormat samaꞌan ni'in oca' ulih dapat sosuatu damo oca' sia' siku' lobih dirogo'i. Apo Yesus bomasud, aman pomimpitn ni'in bopandir Sio boi', ado roti inyo pomimpitn nantai bolupm siap moaku'i. Rotinyo Yesus nantai Allah! 20Nah, mongona'i kolai botakutn nantai, pasti kolai udah mongotohu'i Porintah Allah. Sobagai contoh: ‘Jangan bomporajoan, jangan mombunuh, jangan mongolit, jangan bulah tuduhan kinyo bondar, hormaticam indai-bopai kolai.’ ”#18:20: Lima' porintah ni'in mowakili sopuluh porintah inyo Allah onju' ko Musa doholu. Tiat Koluaran 20:1-17 Huatan Ulangan 5:6-22. Apo lima' porintah ni'in ado hubukan agatn mongasihi urakng bukai (daripado boko porintah inyo ado hubukan agatn mongasihi Allah). Jadi, mungkitn Yesus sobut'an lima' porintah ni'in obai pomimpitn nantai kinyo mongasihi urakng bukai agatn somombondarnyo.
21Pomimpitn nantai bopandir, “Aku udah monaati somuo Porintah Allah nantai doi' aku ija' muda'.”
22Mondingaꞌ nantai, Yesus bopandir ko io, “Ongkah ado sobuti' agi' inyo kurakng bolupm kolai labuhan. Pulakngcam, jual somuo umputn kolai. Ongko pombagi-bagian duitnyo ko boko urakng jaro. Aman dipulah samaꞌan nian, kolai tajahan bodapat kodampuan di sorugo. Lopas jadi kolai molabuhan somuo nantai, datakng jam agi' ko Aku, pakai' jadi murid-Ku.”
23Mondingaꞌ pomandiran Yesus, io kotakng kocewa, obai io kotakng dampu. Io kinyo honda' monjual boko bando barakngnyo. 24Yesus moncorona'i pomimpitn inyo dampu nantai, lalu bopandir, “Uyuh bondar pakai' urakng dampu monjadi anggota koluarga Koraja'an Allah!#18:24: Mungkitn uyuh pakai' urakng dampu bosandar ko Allah obai hala bosandar ko kodampuannyo. 25Lobih mudah siku' unta mansu' molalu'i lubakng jayupm daripado urakng dampu pakai' monjadi anggota koluarga koraja'an Allah.”
26Boko urakng inyo mondingaꞌan hal nantai botakutn, “Wah, aman ubo nian, sopo inyo ulih disolamant'an?”#18:26: Urakng Yahudi bopikir somuo urakng dampu diborokati Allah. Jadi, aman urakng dampu kinyo disolamant'an, pasti urakng bukai (inyo kinyo diborokati Allah agatn kodampuan) kinyo ulih disolamant'an jam.
27Yesus monimbas, “Allah ulih molabuhan porbuatan inyo co mungkitn dilabuhan ulih monsio.”#18:27: Monsio kinyo ulih monyolamant'an dirinyo. Apo Allah ulih morubah hati huatan monyolamant'an sopo aja', tomansu' urakng inyo koras hati.
28Ongko Petrus bopandir, “Tiat am! Koi udah moninggalan somuo umputn koi oca' monjadi boko murid Duatn.”
29Kato Yesus, “Pocayocam! Boko urakng inyo udah moninggalan rumahnyo, bininyo, boko somadikannyo, urakng tuhonyo, damo poana'annyo oca' sia' ulih molayati Allah huatan Korajaan-Nyo, 30sia' tajahan mondapat'an agi' doi' Allah jouh lobih banyaꞌ di dunia joman ni'in. Sia' pan paca'an mondapat'an hidup kokal di sorugo pado joman inyo tajahan datakng.”#18:30: Perikop ni'in, ado boboropo sotilah inyo bisi roti hampikng samo: disolamant'an, monjadi anggota koluarga Koraja'an Allah, huatan mondapat'an hidup somanah-manahnyo.
Kopontigo kalinyo, Yesus momadahan boko ajab sonsaro inyo tajahan dialapi-Nyo
(18:31-34)
(Mat. 20:17-19; Mrk. 10:32-34)
31Yesus moningkau koduo bolas rasul oca' bokumpul di tompat husus agatn Sio. Ongko bopandir, “Dinga'anbo! Kito molajuan pojalatan kito agi' monuju kota Yerusalem. Di su'utn, tajahan tojadi sosuai agatn la'apo inyo holu udah ditulis boko nabi mongonaꞌi Ana' Monsio. 32Io paca'an disorahan ko boko urakng inyo bukainyo urakng Yahudi. Boko urakng nantai paca'an boulu'an, mohayam, moigahi-Nyo. 33Sia' paca'an momantu huatan mombunuh-Nyo. Apo tigo ari lopas nian, Io tajahan hidup agi'.”
34Apo koduo bolas rasul-Nyo samo sokali kinyo mongoroti somuo inyo dipandiran Yesus nantai. Sia' co tohu la'apo inyo dimasud-Nyo. Roti inyo sobondarnyo doi' boko pomandiran inyo dipandiran-Nyo, co sia' mongoroti.#18:34: Ado duo tapsiran ma'apo boko murid Yesus kinyo mongoroti. 1) Mungkitn Allah mohalaki sia' obai bolupm watunyo. 2) Damo mungkitn jam kopocaya'an sia' tobatas sampai co ulih mombayakan ma'apo Yesus gola' ajab sonsaro.
Yesus monyamani siku' urakng inyo buto di dampikng kota Yerikho
(18:35-43)
(Mat. 20:29-34; Mrk. 10:46-52)
35 Dalapm pojalatan ko kota Yerusalem, Yesus ongko boko urakng inyo tuyut Sio honda' tuntukam di kota Yerikho. Di santai, ado siku' urakng inyo buto di sisi jalatn tongahan dudu' mominto-minto. 36Timpu urakng buto nantai mondingaꞌ urakng banyaꞌ lalu, io botakutn, “Ado la'apo?”
37Sia' bopandir, “Yesus, Urakng Nazaret, tongahan lalu di si'itn.”
38Ongko io mondongkakng-mondorah, “Yesus, koturutan Daud!#18:38: Rajo doi' koturutan Daud nantai sobut'an inyo bukainyo pakai' ‘Rajo Inyo Dijanjian Allah’. Tulukngku bo!”
39Boko urakng inyo tongahan bojalatn di muka' mondoholu'i Yesus monogur urakng inyo buto nantai, monyiuhnyo oca' io langunt. Apo io mondongkakng-mondorah lobih borakng agi', “Rajo koturutan Daud! Tulukngku bo!”
40Yesus botongga' ongko monyiuh oca' urakng buto nantai dibaba' ko Sio. Pas io udah di dampikng-Nyo, Yesus botakutn ko io, 41“La'apo inyo ulih Ku tulukng?”
“Tuhatn,” timbas io, “Aku honda' suba' moniant!”
42Yesus bopandir, “Aman ubo nian, moniant cam! Kolai nyamanam obai kolai pocayo agatn Aku.” 43Timpu nian jam urakng buto nantai ulihnyo moniant, io lalu tuyut Yesus kapikng momuji Allah. Watu urakng banyaꞌ nantai moniant io udah nyamanam, sia' somuo momuji Allah jam.
