Lukas 19
19
Lopas jadi botomu Yesus, Zakheus morubah caro hidupnyo
(19:1-10)
1Lopas nian Yesus huatan boko urakng inyo tuyut Sio momansu'i kota Yerikho ongko torus bojalatn molalu'i kota nantai. 2Ado siku' urakng kopala' ponagih pajak inyo bodiapm di santai. Damonyo Zakheus. Io kotakng dampu. 3Timpu Yesus bojalatn molalu'i kota nantai, Zakheus bousaha honda' moniant Sio. Apo co ulihnyo obai boko urakng kotakan banya', apotolagi' obai io nantai urakngnyo panda'. 4Jadi, io monggidi'an mondoholu'i urakng banya' nantai, lalu noi' ko kayu ara, oca' ulih moniant Yesus inyo co manah agi' tajahan lalu di santai.
5Timpu Yesus di dampikng kayu nantai, Sio monongadah ko pucu'. Kato-Nyo, “Zakheus, turutncam doi' siatn! Obai Aku honda' noluntukng ko rumah kolai sari ni'in.” 6Lansukng, Zakheus turutn lalu monorima' Yesus di rumahnyo agatn sonang hati.
7Apo boko urakng inyo moniant Yesus botula' ko rumah Zakheus botuta'. Kato sia', “Uai! Sio monoluntukng di rumah urakng inyo bodosa.”
8Lopas nian di rumahnyo, Zakheus bodiritn ongko bopandir ko Yesus, “Tuhatn, Aku bojanji moonju' sobagi'an doi' bando barakngku ko boko urakng jaro. Sotiap urakng inyo kalo aku kolakari, aku bojanji mombayar agi' ompat kali lipat!”
9Ongko Yesus bopandir, “Sari ni'in kolai huatan somuo koluarga kolai disolamant'an obai kolai pan koturutan Abrahapm.#19:9: Zakheus nantai kopala' koluarga. Kali udah Zakheus pocayo agatn Yesus pasti io paca'an moajaran huatan mombaba' koluarganyo pocayo agatn Yesus jam. Agatn samaꞌan nian soluruh koluarganyo disolamant'an. 10Ana' Monsio datakng pakai' monggoyapi ongko monyolamant'an urakng inyo bodosa.”#19:10: Tiat boko poumpamoan di Lukas 15.
Poumpamoan mongonaꞌi boko hulutn inyo boi' huatan inyo jahat
(19:11-27)
(Mat. 25:14-30)
11Pontongahan Yesus bopandir agatn Zakheus, boko urakng banyaꞌ ija' mondingaꞌan Yesus. Obai Sio udah dampikng ko kota Yerusalem,#19:11: Sia' tongahan di kota Yerikho kiro-kiro 25 pal doi' Yerusalem. Obai boko rajo urakng Yahudi doholu momorintah doi' kota Yerusalem, jadi sia' salah sangko Yesus paca'an momorintah Koraja'an Allah doi' santai jam. ongko boko urakng monyangko Koraja'an Allah tajahan lansukng kotiat'an di dunia ni'in, ia'an sia' salah sangko huatan bopikir obai Allah tajahan lansukng momorintah sobagai Rajo di dunia. Jadi Yesus mongajar sia' agatn poumpamoan ni'in. 12Kato-Nyo, “Ado siku' urakng bangsawatn. Io paca'an botula' ko nogori inyo jouh pakai' diangkat monjadi rajo. Lopas nantai io paca'an bobali', lalu momorintah di doerahnyo siku'. 13Apo sobolupm botula', io moningkau sopuluh hulutnnyo mompocayoan banyaꞌ duit ko sia', sia' siku'-monyiku' dionji'i sopingka'i duit omas.#19:13: Sopingka'i mina (duit logapm omas damo pira') bonilai upah 100 ari korojo Katonyo, ‘Pakaicam duit ni'in agatn soboi'-boi'nyo pakai' bousaha pakai' aku, sampai aku pulakng.’
14Lopas jadi bangsawatn nantai botula', boko urakng di nogorinyo bonci' agatn io, monyiuh boko utusan nantai mombodapan oca' monyampaian posatn ko kopala' ponguaso di su'utn. Kato sia', ‘Koi bolai' urakng ni'in monjadi rajo koi.’ 15Apo bangsawatn nantai totap diangkat monjadi rajo nogori nantai.
Kali udah pulakng, io monyiuh oca' datakng ko io boko hulutn inyo dionji'i duit nantai. Io honda' tohu boropo kountukan inyo sia' dapat siku'-monyiku' pakai' io.
16Hulutn inyo potamo datakng, ongko molaporan, ‘Habakng, sopingka'i duit omas inyo duatn onju' ko aku, udah aku gunoan huatan mohasilan sopuluh kali lipat.’ 17Jadi, habakng nantai bopandir, ‘Boi' bondar! Kolai hulutn inyo boi'. Obai kolai suba' dipocayo agatn boko hal inyo kocit, aku moangkat kolai monjadi ponguaso disopuluh kota.’
18Hulutn inyo koduo datakng, ongko molaporan, ‘Habakng, sopingka'i duit omas inyo duatn onju' ko aku, udah aku gunoan huatan mohasilan lima' kali lipat.’ 19Lalu, habakng nantai bopandir, ‘Aku moangkat kolai monjadi ponguaso dilima' kota.’
20Hulutn inyo kotigo datakng,#19:20: Poumpamoan Yesus bayo monjolasan la'apo inyo tojadi agatn ko tigo doi' sopuluh hulutn inyo dipocayoan agatn duit nantai. lalu molaporan, ‘Habakng, ni'in sopingka'i duit omas duatn. Aku monyimpatnnyo dalapm pomputut'an koitn 21obai aku gola' agatn duatn. Duatn urakng inyo kojapm. Duatn monguti' la'apo inyo sobondarnyo kinyo umputn duatn. Duatnbodapat untukng doi' pogota'an urakng bukai samo samaꞌan urakng inyo monguti' hasil lakau doi' lakau inyo kinyo io tanam.’ 22Lalu, habakng nantai bopandir, ‘Kolai hulutn inyo jahat! Aku tajahan mohukupm kolai sosuai agatn pomandiran kolai nantai. Kolai mongatoan aku urakng inyo kojapm. Aku monguti' la'apo inyo sobondarnyo kinyo umputnku. Aku bodapat untukng doi' pogota'an urakng bukai samo samaꞌan urakng inyo monguti' hasil lakau doi' lakau inyo kinyo io tanam. 23Aman kolai bopikir ubo nian, soharusnyo palikng cado kolai monyimpatn duit nantai ko urakng inyo mominjapan duit, oca' watu aku pulakng, aku mondapat duitku agatn bunganyo jam.’
24Lopas nian io bopandir ko boko urakng inyo bodiritn di santai, ‘Kuti' duit nantai doi' io. Onju' duit nantai ko hulutn inyo bisi sopuluh pingkai' duit omas.’
25Apo sia' bopandir, ‘Habakng, io udah bisi sopuluh pingkai' am.’
26Habakng nantai monimbas, ‘Dinga'anbo! Urakng inyo udah ado, tajahan dionji'i lobih banyaꞌ agi'. Apo urakng inyo conyiant, la'apo pan inyo ado di io paca'an dikuti' doi' io.#19:26: Pomandiran ni'in samaꞌan Lukas 8:18. Tiat jam Lukas 12:48. 27Nah, ni'in mongonaꞌi boko musuhku nantai inyo kinyo honda' aku monjadi rajonyo. Baba'cam sia' ko si'itn. Bunuh somuonyo di hadapanku!’ ”#19:27: Dalapm poumpamoan ni'in, koturutan boko rajo monggambaran Yesus, boko hulutn monggambaran boko murid-Nyo, huatan boko musuhnyo monggambaran boko pomimpitn Yahudi inyo kinyo pocayo Yesus nantai Rajo Inyo Dijanjian Allah. Watu Yesus bobali' ko dunia pakai' koduo kalinyo, Yesus paca'an monjadi Rajo inyo monguaso'i somuonyo huatan mongalahan kuaso Rajo Sitatn. Urakng inyo sotia molabuhan kohonda'-Nyo paca'an diborokati, apo boko musuh-Nyo paca'an dihukupm.
Yesus dihimpa'i kotakng ramai di kota Yerusalem
(19:28-40)
(Mat. 21:1-11; Mrk. 11:1-11; Yoh. 12:12-19)
28Lopas jadi bokisah nantai, Yesus molajuan pojalatan-Nyo ko kota Yerusalem. Sio bojalatn palikng doholu. Inyo bukai mombodapan-Nyo. 29Timpu sia' huntu datakng di laman Betfage ongko laman Betania di sopia' bukit Jaitun,#19:29: Bukit Jaitun ado hubukannyo agatn kodatakan Rajo Inyo Dijanjian Allah. Tiat Zakharia 14:4. Yesus monyiuh duo urakng murid-Nyo botula' lobih doholu. 30Kato-Nyo, “Botula'cam ko laman inyo di polaju kito nu'un. Aman udah datakng, kaitn duo paca'an moniant siku' koledai muda' dikobat'an di tihakng di santai. Koledai nantai bolupm kalo ditunggaki urakng. Lopasan koledai nantai lalu baba' ko si'itan. 31Aman ado inyo botakutn, ‘Ma'apo kaitn molopasan koledai nantai?’ Pandiran cam, ‘Tuhatn momontikannyo.’ ”
32Koduo murid nantai botula'. Somuo la'apo pan tojadi topat samaꞌan inyo udah dipandiran Yesus ko sia'. 33Tongahan sia' molopasan koledai muda' nantai, urakng umputnnyo bopandir, “Ma'apo kaitn molopasan koledai nian?”
34Koduo murid nantai monimbasi, “Tuhatn momontikannyo.” 35Lalu, sia' mombaba'nyo ko Yesus. Sia' molota'an jubah sia' di pucu' punggukng koledai muda' nantai lalu monulukng Yesus noi' ko pucu'nyo. 36Watu Yesus dipucu' koledai muda' nantai monuju kota Yerusalem, boko urakng moincar jubah di jalatn inyo dilalu'i Yesus pakai' mohormati Sio. #19:36: Doholu ana' Rajo Salomo monunggaki koledai sobagai tando io monjadi rajo (1 Boko Rajo 1:33-35; 44). Zakharia 9:9 totulis obai Rajo Inyo Dijanjian Allah paca'an monunggaki koledai agatn caro samaꞌan nian jam. Pomandiran nantai monjadi nyata agatn poristiwa ni'in.
37Watu Yesus huntu datakng di Yerusalem di jalatn inyo monurutn doi' bukit Jaitun, somuo boko murid-Nyo inyo banyaꞌ nantai bosura' agatn kotakng rindakng, momuji Allah obai somuo mujisat inyo udah sampat sia' tiat. 38Kato sia', “Diborokati Rajo inyo datakng agatn kuaso Tuhatn Allah!#19:38: Mazmur 118:26 Sonang-asau di sorugo ongko topujicam Allah di tompat inyo maho tinggi.”
39Apo boboropo pomimpitn agama doi' kolompok Farisi di antaro urakng banyaꞌ nantai bopandir ko Yesus, “Guru, siuh boko murid Duatn botongga' bopandir ubo nian!”#19:39: Urakng Farisi kinyo honda' urakng mongatoan Yesus nantai Rajo Inyo Dijanjian Allah obai sia' kinyo pocayo nian.
40Yesus monimbasi sia' nantai, “Dinga'anbo! Aman boko murid-Ku botongga', boko batu nian tajahan bosura' momuji Allah!”
Yesus salu' moniant koadaan Yerusalem
(19:41-44)
41Yesus mongkitn dampikng agatn kota Yerusalem. Watu Sio moniant kota nantai, Sio salu' bondar obai boko urakng di su'utn.#19:41: Kota Yerusalem mowakili somuo urakng Yahudi. Yesus salu' bondar boko urakng inyo kinyo pocayo agatn Sio. 42Kato-Nyo, “Aku kotakng boharap kaitn mongotohu'i caro inyo bulah kaitn sonang-asau. Apo watu ni'in kaitn culih mongotohu'i caro nantai.#19:42: Bayo urakng inyo pocayo Yesus ado damai agatn Allah. Roma 5:1, Kolose 1:21-23, Yohanes 14:6, Kisah 4:12, 1 Tim 2:5. 43-44Kaitn co mongotohu'i watu Allah datakng pakai' monyolamant'an kaitn. Jadi, paca'an datakng watunyo di mono musuh kaitn tajahan mongopukng kota kaitn, bulah rintakan di sokolilikng kaitn. Sia' paca'an hala monyorakng kaitn doi' somuo arah. Sia' tajahan mohancuran kota kaitn, somuo batu tembok huatan batu bangunan paca'an diruntuhan. Somuo pondudu' paca'an dibunuh.”#19:43-44: 40 tohutn lopas nian la'apo inyo dipandiran Yesus monjadi nyata. Watu tontara Romawi mohancuran kota Yerusalem pado tohutn 70M.
Yesus monundukng boko podagakng doi' tongahlamanan Rumah Allah#19:45: Agatn monundukng boko podagakng, Yesus bulah borosih socaro rohani tongahlamanan Rumah Allah sobolupm Sio mongajar di su'utn.
(19:45-48)
(Mat. 21:12-13; Mrk. 11:15-19; Yoh. 2:13-16)
45Kali udah Yesus datakng di Yerusalem, Sio mansu' ko tongahlamanan Rumah Allah ongko monundukng boko podagakng di santai.#19:45: Komungkitan bosar poristiwa ni'in tojadi dibagian tongahlamanan Rumah Allah inyo disobut ‘Tongahlamanan Tompat Urakng Inyo Bukainyo Urakng Yahudi’. Soharusnyo dipakai pakai' bodoa huatan monyombah ko Allah, apo boko pomimpitn urakng Yahudi morubah tongahlamanan nantai monjadi pasar inyo ramai, bobou huatan tompat pokumpulan urakng pongolakar. Pasar ni'in momudahan boko urakng inyo datakng doi' jouh pakai' momboli posombahan apo pasar nantai soharusnyo ditompatan di tompat bukai. 46Kato-Nyo, “Kaitn monjadian Rumah Allah samaꞌan tompat pokumpulan boko urakng pongolakar!#19:46: Tiat Yeremia 7:11 Apo ado totulis di Buku Suci obai Rumah Allah nantai rumah pakai' bodoa.”#19:46: Tiat Yesaya 56:7.
47Lopas nantai, Yesus mongajar di tongahlamanan Rumah Allah sotiap ari. Tongahan nantai, boko imam kopala', boko guru Poraturan Agama Yahudi, ongko boko pomimpitn urakng Yahudi bogoyap caro pakai' mombunuh Yesus. 48Apo culih sia' obai urakng banyaꞌ hala ado di sokitar Sio sonang mondingaꞌan ajaran Sio.
