Lukas 17
17
Boko murid Yesus gola' molawatn dosa, moamputi urakng bukai, huatan hala pocayo ko Sio
(17:1-6)
(Mat. 18:6-7, 21-22; Mrk. 9:42)
1Lalu Yesus bopandir ko boko murid-Nyo, “Somuo urakng pasti tajahan moalapi coba'an pakai' bodosa. Apo Allah tajahan mohukupm boko urakng inyo monyobab'an boko coba'an nantai! 2Jadi, lobih boi' pakai' sia' aman batu bosar dikokalai ongko dikobat'an ko lihi'nyo, ongko dibuakan ko dalapm lout oca' sia' mati daripado mombulah salah siku' doi' boko urakng inyo kinyo pontikng#17:2: Ado boboropo tapsiran pakai' sotilah ‘boko urakng kocit.’ 1) Boko urakng inyo kinyo pontikng, co dirogo'i masrakat, samaꞌan urakng jaro damo urakng inyo boponyakit; 2) Boko murid Yesus; 3) Boko murid Yesus inyo bolupm ado iman inyo kuat; damo 4) Boko bobia'. ni'in bodosa. 3Jadi, boboi' cam oca' kaitn co monyobab'an urakng bukai bulah dosa!
Aman somadikan kaitn bulah dosa ko kaitn, nosihat'i io. Aman somadikan kaitn nantai monyosal ongko minto maap, maapancam io. 4Ongko, aman io bulah dosa ko kaitn tujuh kali dalapm soari, apo sotiap kali io monyosal agi' ongko bopandir ko kaitn, ‘Maapan aku.’ Kaitn gola' hala momaapan io sotiap kali.”
5Ongko koduo bolas rasul nantai bopandir ko Tuhatn Yesus, “Pulahbo iman koi lobih kuat.”
6Timbas Yesus, “Aman iman kaitn ado sobosar bigi' sonsabi inyo kotakng kocit pan, soandainyo kaitn monyiuh tontanaman ni'in tocabut doi' tanah sampai ko akarnyo, ongko totanam di lout. Tontanaman ni'in pan tundu' agatn porintah kaitn.”#17:6: Yesus kinyo bomasud boko murid-Nyo gola' ko mono-mono momindahan boko tontanaman agatn iman sia'. Sio momakai contoh ni'in obai dalapm pomandakan mato urakng kotiat'annyo co mungkitn. Apo co nyiant inyo co mungkitn pakai' kito, aman kito pocayo agatn Yesus huatan nantai sojalatn agatn kohonda'-Nyo. Tiat jam Markus 9:23, 10:27 ongko Lukas 1:37.
Boko urakng inyo molayati Allah soboi'nyo co moharap'an ucapan torima' kasih
(17:7-10)
7“Soumpamonyo siku' urakng di antaro kaitn bisi siku' urakng hulutn inyo bogai di lakau kaitn damo mongombolo boko domba kaitn. Lopas jadi hulutn nantai pulakng doi' pokoroja'annyo, pasti kaitn kinyo bopandir ko io, ‘Huncapm! Torahatcam, makatn holu'ai!’ 8Malah sobali'nyo. Kaitn paca'an bopandir ko io, ‘Gonti pakai'an kolai pakai' molayati aku. Siap'an pomakatn pakai' aku. Lopas jadi aku makatn-minum, hoyu' kolai ulih makatn.’ 9Pasti kaitn co botorima' kasih ko hulutn nantai obai wajar mo io molabuhan tugas inyo kaitn siuh pakai' io labuhan. 10Ubo nian jam agatn kaitn. Aman kaitn udah molabuhan somuo inyo diporintahan ko kaitn, pandirancam, ‘Koi boko hulutn mo. Koi kinyo cucu' bodapat pujian damo torima' kasih. Koi bayo molabuhan tugas inyo memang gola' koi labuhan.’ ”
Yesus monyamani sopuluh urakng, apo bayo siku'mo urakng inyo tohu botorima' kasih
(17:11-19)
11Ongko Yesus molajuan pojalatan ko kota Yerusalem, molalu'i pobatasan antaro doerah Samaria agatn doerah Galilea. 12Timpu Yesus ongko boko pongikut-Nyo mansu' ko sobuah laman, sopuluh urakng boponyakit kulit inyo bogola'i mondataki Sio, apo bodiritn aga' jouh. 13Sia' mondongkakng-mondorah moningkau Yesus, “Habakng! Tulukng nyamanibo koi!”
14Timpu Yesus moniant sia', Sio bopandir, “Botula'cam ko boko imam oca' sia' ulih momastian aman kaitn dinyamani ongko ulih dianggap borosih agi'.” Mondingaꞌ nantai, sia' botula', lalu di tongah pojalatan somuo sia' pan nyamanam.
15Apo, timpu mongotohu'i udah nyamanam, siku'mo doi' sia' nantai bobali' ko Yesus, kapikng momuji Allah agatn sura'-lahap. 16Ongko io tundu' di kaki Yesus, botorima' kasih ko Sio. Nah, urakng nantai doi' suku Samaria, bukainyo Yahudi!
17Jadi Yesus bopandir ko somuo urakng inyo ado di santai, “Aku udah monyamani sopuluh urakng. Soharusnyo somuo sia' bobali' momuji Allah. 18Apo tiat ni'in, bayo urakng Samaria ni'in inyo bobali' bosukur ko Allah.” 19Lalu, Yesus bopandir ko urakng Samaria nantai, “Bodiritncam. Ongko botula'cam. Kolai nyamanam obai udah pocayo agatn Aku.”
Yesus mongajar mongonaꞌi Koraja'an Allah#17:20: Dalapm ayat 20-21, Yesus mongajar urakng Farisi Koraja'an Allah udah ado di dunia obai Sio udah datakng. Sio nantai Rajo Inyo Dijanjian Allah. Urakng inyo pocayo agatn Sio, udah monjadi warga Koraja'an Allah nantai. Ongko inyo koduo, dalapm ayat 22-37, Yesus mongajar boko murid-Nyo obai sowatu-watu nononyo lopas Sio noi' ko sorugo, Sio paca'an bobali' agi' ko dunia, ongko mombaba' urakng inyo pocayo agatn Sio ko sorugo huatan mohukupm urakng inyo kinyo pocayo agatn Sio.
(17:20-37)
(Mat. 24:23-28, 36-41)
20Di ari bukainyo, boboropo pomimpitn agama Yahudi doi' kolompok Farisi botakutn ko Yesus, “Sombilo Koraja'an Allah tajahan datakng, ia'an watu Allah mula'i momorintah soponuhnyo di pucu' somuonyo?”
Yesus bopandir, “Koraja'an Allah kinyo dapat ditiat agatn mato. 21Jadi, urakng culih bopandir, ‘Tiat! Koraja'an Allah ado di si'itn.’ Damo ‘Koraja'an Allah ado di su'utn.’ Obai sobondarnyo, Koraja'an Allah udah ado di tongah-tongah kaitn di dunia ni'in.”
22-25Lalu Yesus bopandir ko boko murid-Nyo, “Ana' Monsio gola' ajab sonsaro kotakng banyaꞌ boko urakng dijoman ni'in tajahan monula' Io.#17:22-25: Ajab sonsaro Yesus tomansu' komatian di kayu salib. Lopas jadi hidup agi', Yesus noi' ko sorugo. Boko murid-Nyo moalapi ajab sonsaro jam. Jadi, pado watu nantai, sia' paca'an honda' Yesus bobali' ongko mongalahan somuo kuaso inyo molawatn sia'. Jadi, tajahan ado watu nononyo, kaitn honda' moniant biar bayo soari pan, doi' boko ari Ana' Monsio momorintah di dunia ni'in. Apo kaitn kinyo paca'an moniantnyo. Jadi, nononyo aman ado urakng inyo bopandir, ‘Tiat! Sio ado di si'itn.’ Damo Sio ado di su'utn, pasti tumbukan. Jadi, pompadohan tuyut sia'. Obai timpu ana' monsio bobali' ko dunia ni'in, somuo urakng ulih moniant kodatakan nantai agatn jolas. Samo sama'an kilat momanjah ongko bulah somuo langit torakng. Ubo niannam kodatakan Ana' Monsio.
26Koadaan dunia timpu Ana' Monsio honda' datakng, paca'an samo ubo koadaan dunia timpu joman Nuh.#17:26: Tiat Kej. 6-7. 27Urakng makatn, minum, kawitn-mongawitan, sampai watu arinyo Nuh huatan koluarganyo mansu' ko dalapm porohunyo inyo rayo nantai. Lopas nian tojadi pasakng rayo mombonasoan somuo sia'. 28Ubo nian jam timpu joman Lot.#17:28: Tiat Kej. 18-19. Boko urakng di kota Sodom makatn, minum, monjual, momboli, monanam ongko mombangun. 29Apo timpu ari Lot huatan koluarganyo koluar doi' kota Sodom, api ongko bolerang turutn doi' langit ubo hujatn doras. Allah mombonasoan somuo urakng di kota nantai. 30Koadaan dunia paca'an ubo nantai jam timpu Ana' Monsio datakng ko dunia ni'in agi'.#17:30: Yesus paca'an datakng socaro tiba-tiba samaꞌan kodatakan ara'i pasakng bosar pado joman Nuh huatan kodatakan api pado joman Lot. Paca'an ado urakng inyo disolamant'an sama'an koluarga Nuh huatan koluarga Lot. Jadi paca'an ado jam urakng inyo dihukupm.
31Timpu nantai, urakng inyo tongahan ado di luar rumah, jangan mansu' pakai' monguti' boko bando barakng inyo ado di dalapm rumahnyo. Ubo nian jam urakng inyo tongahan di lakau, jangan bobali' ko rumah. 32Ingant la'apo inyo tojadi ko bini Lot!#17:32: Timpu koluarga Lot koluar doi' kota Sodom, bininyo molanggar porintah Allah. Io mongilikng ko bolikat obai rindu momikiran boko barakng bando di kota Sodom. Jadi io dihukupm monjadi tihakng garapm. Tiat Kej. 19:26. 33Urakng inyo mondoholuan kohidupannyo siku', sobondarnyo kinyo tajahan mondapat'an kohidupan inyo sobondarnyo. Apo urakng inyo monyorahan kohidupannyo siku' pakai' tuyut Aku, pasti tajahan mondapat'annyo.#17:33: Tiat Luk. 9:24.
34Dinga'anbo ni'in: Watu malapm nantai paca'an ado duo urakng dalapm koluarga tongahan tidu' di tompat inyo samo. Siku' urakng paca'an dibaba', apo inyo siku' paca'an ditinggalan. 35Tajahan ado duo urakng botina' tongahan monggilikng gandupm bososamo. Siku' urakng paca'an dibaba', apo inyo siku' paca'an ditinggalan.#17:35: Hubukan kokoluargaan (ayat 34) damo koakraban pokawalan (ayat 35) kinyo monjamin sia' paca'an totap hidup bonsamo di sorugo. Porpisahan paca'an tojadi aman inyo siku'nyo pocayo huatan inyo bukainyo cado. [ 36Tajahan ado duo urakng bogai bosamo di lakau. Siku' urakng paca'an dibaba', apo inyo siku' paca'an ditinggalan.]”#17:36: Ayat ni'in ado dalapm boboropo naskah baso asli (BASO. Yunani), apo co nyiant diboboropo naskah inyo totuho. Jadi, kito co tohu aman ayat ni'in ado dalapm teks asli. Biar pan ubo nian, maknanyo samoam agatn isi perikop ni'in. 37Boko murid Yesus botakutn, “Di mono tompatnyo Tuhatn tajahan datakng nono?” Yesus monimbas, “Di mono ado bangkai, di santai jam bokorumun burukng pomuai' bangkai.”#17:37: Pobaso ni'in boroti ‘pasti somuo urakng paca'an tohu tompatnyo.’
