Mk 16
16
Kũthayũũka kwa Yesũ
(Mat 28.1-8; Lk 24.1-12; Yoa 20.1-10)
1Ĩtina wa mũthenya wa Savato kũthela, Meli Makitalene, Salome na Meli inyia wa Yakovo, nĩmathooie mauta meũnyunga nesa makavake mwĩĩ wa Yesũ. 2Nĩmaendie mbũanĩ Wakyumwa kĩoko tene syũa yĩyuma. 3Me nzĩanĩ nĩmakũlanasya atĩĩ, “W'o twĩthi kũvetangĩwa ĩvia mũomonĩ wa mbũa nũũ?” 4Ĩndĩ yĩla masiisye nĩmoonie ĩvia yĩu yĩĩvete, nayo yaĩ ĩnene mũno. 5Malika mbũanĩ, nĩmoonie mwanake weekĩĩte ngũa nzaũ ndaasa ailyĩ nthĩ ngalĩko ya kw'oko kwa aũme. Namo matelema mũno.
6Mwanake ũsu nĩwameie atĩĩ, “Ekai kũseng'a, nĩnĩsĩ mwĩmantha Yesũ wa Nasaleti ũla ũnambiwe. Nde vaa, nũthayũũkie! Kwa sisyai, vaa nĩvo manamwiĩte. 7#Mat 26.32; Mk 14.28 Endai yu mũkamatavye amanyĩw'a make, na mũno mũno Vetelo, mũmee kana Yesũ nũkũthi mũkamwĩthĩae avikie Kalilii. Kũu nĩmũũthi kũmwona o tondũ wamũtavĩtye.”
8Nĩmaumie mbũanĩ mĩtũkĩ na masemba, nũndũ nĩmathĩlĩĩte nĩ w'ĩa na nĩmaseng'ete. Mayaatavya mũndũ ũndũ ũsu nũndũ nĩmatelemete.
Yesũ Aimumĩlĩĩla Meli Makitalene
(Mat 28.9-10; Yoa 20.11-18)
[ 9Yesũ amina kũthayũũka kuma kwa akw'ũ kwakya kĩoko tene, mũthenya wa mbee wa kyumwa, nĩwambie kũmumĩlĩĩla Meli Makitalene, ũla navu mbeenĩ wamumĩtye maimũ mũonza. 10Meli nĩwaendie na amatavya ala mekalanasya na Yesũ. Nĩwamethĩie makĩĩa me na kĩmako. 11Yĩla meewie kana Yesũ e thayũ na nĩwonekie nĩ Meli, nĩmaleile kwĩtĩkĩla ndeto isu.
Maumĩla Angĩ ma Yesũ
(Mat 28.16-20; Lk 24.13-49; Yoa 20.19-23; Meko 1.6-8)
12Ĩtina wa ũu, Yesũ e na mũvw'ano ũngĩ, nĩwamaumĩlĩĩle amanyĩw'a make elĩ maendete ndũanĩ. 13Namo masyoka na mamatavya ala angĩ, ĩndĩ mayaaĩtĩkĩla ndeto syoo. 14Mũthya vyũ, nĩwamaumĩlĩĩle amanyĩw'a onthe me ĩkũmi na ũmwe makĩya lĩu. Nĩwamatetisye nũndũ wa wũmũ wa ngoo syoo, na kũlea kwĩtĩkĩla ndeto sya ala mamwonete athayũũka. 15#Meko 1.8 Nĩvo ĩndĩ wameie atĩĩ, “Endai nthĩ yonthe mũkatavany'e Ũvoo Mũseo kwa andũ onthe. 16O ũla ũketĩkĩla na aivatiswa, ũsu akatangĩĩwa, ĩndĩ ũla ũtaketĩkĩla ũsu akasilĩlwa. 17Andũ ala maketĩkĩla makeethĩwa matonya kwĩka maũndũ aa: Makalũngasya maimũ maitũmĩa ĩsyĩtwa yakwa, na makaneenaa na ithyomo ngeni. 18O ta ũu, makakwata nzoka na moko, na manyw'a kĩndũ kĩ sumu kĩikamathũkya. Makailĩĩla andũ awau moko na makavoa.”
Yesũ Ayambata Ĩtunĩ
(Lk 24.50-53; Meko 1.9-11)
19 #
Meko 1.9-11
Yesũ amina kũneena na amanyĩw'a make, nĩwambatie ĩtunĩ na ekala nthĩ ngalĩko ya kw'oko kwa aũme kwa Ngai. 20Nĩvo ĩndĩ amanyĩw'a make maendie maitavany'a Ũvoo Mũseo kĩla vandũ, na Mwĩai atethya wĩa vamwe namo, na oonany'a kana ũtavany'a woo nĩ wa w'o kwa syama ila meekaa.]#16.20 Maandĩko amwe ma tene ma Ndeto ya Ngai mai na mĩsoa ĩno
BIBLE SOCIETY OF KENYA © 2011
